"Алтын күз" балаларға арналған ертеңгіліктің сценариясы

Сап - сары маңай,

Сап - сары тоғай.

Соңғы әнін айтып

 Құс кетті қайтып.

Қарашы күз келді, күз келді

 Жапырақ жауыпты іздерді.

Құс біткен керуен тізеді,

Қара бұлт қабағын түйеді.

«Алтын күз» мерекесіне арналған ертеңгілік

Мақсаты: Балаларды күз мерекесіне тән белгілерді тауып, табиғатты қорғауға, жемістер мен көкөністерді ажырата білуге, оның сұлулығын тамашалауға тәрбиелеу. Берекелі күз туралы мағлұмат беріп, тақпақтары мен ән билер арқылы мерекелік көңіл күй сыйлау.
Көрнекілігі: Саз залы мерекеге сай безендірілген «Бақ іші» көрінісі «Алтын күз» ханшасы, көкөністер ағаш, құстар кейіпкерлері.
Ертеңгіліктің жүру барысы: «Алтын күз» мерекесіне сай киінген балалар қол ұстасып әдемі әуеннің үнімен саз залына кіріп, өз орындарына кеп отырады.

Салтанатты әуен ойналады.
Жүргізуші: Сәлематсыздар ма құрметті қонақтар, және кішкене бөбектер!
Табиғаттың әсем мезгілі «Алтын күз» мерекесіне қош келдіңіздер!
Кездескен соң күзбенен,
Бұтағынан үзілген!
Ай жапырақ, сары алтын,
Айналаның бәрі алтын.
Қуантып біздерді
Мерекелі күз келді,
Кел жемісті алтын күз,
Кемелденсін халқымыз.

Жүргізуші: Қане балалар қол соғып «Алтын күзді» қарсы алайық! /әннің ырғағымен күз ханшасы келеді/
Күз ханшасы: - Сәлематсыздар ма қонақтар!
- Сәлематсыздар ма балалар!
- Бүгін қандай әдемісіңдер?

Жүргізуші: Жиын - теріп болатын.
Қамбаға астық толатын
Қызыл қырман ойнайтын
Қай мезгіл деп ойлайсың?
Балалар: Күз мезгілі.
Күз ханшасы: Өте дұрыс айтасыңдар мен күзбін.
Сәл нәрсеге ренжіп, қабағымды түйіп қаламын кейде болмашыға өкпелеп, көз жасымды төгіп - төгіп жіберемін. Әйтседе менің жомарттығым мен ақ көңілділігім үшін мені барлығы да ұнатады.
Жүргізуші: Иә біз сізді байлық пен молшылықтың белгісі «Алтын күз» деп білеміз. Төрлетіңіз! /Күз ханшасы төрге отырады/
Көбейді құт – береке
Астық толы қойнымыз
Құтты болсын мереке
Алтын күзді тойлаймыз.
Күз ханшасы біздің балалар шетінен өнерлі балалар, осы өнерлі балалардың өнерлерін тамашалап отырыңыз. Сізге арнап балалар өз тақпақтарын айтып береді.
Тақпақтар

Күз ханшасы: Рахмет балалар! Сендердің өнерлеріңе риза болып отырмын.
Жүргізуші: Қане балалар бәріміз бау - бақшаға саяхатқа шығайық. Барлығың көздеріңді жұмыңдар.
Саяхатты құрамыз,
Бау - бақшаға шығамыз.
Ал бәріміз көзімізді ашамыз. Балалар мынау не?
Балалар: - Ағаш
Жүргізуші: Қане ағашпен сырласып көрелік.
- Ағаш, ағаш, тыңдайықшы
Айтшы бізге сырыңды.
Ағаш: Күн шуақта маужырап
Жатыр едім атырап,
Қыс ызғарын сезгендей.
Жабырқайды жапырақ.
Алтын - сары, қызыл - көк,
Алуан - алуан жапырақ.
Бұтағымнан жамырап
Ұшты кенет жапырақ.
Жүргізуші: Ағаш сен жабырқама, біздің балалар сенің айналаңды тазартып жапырақтарыңды жинап береді.
Ойын: «Жапырақ жинау»
Жүргізуші: Ағаш сізге арнап біздің бүлдіршіндер «Жапырақтар» биін билеп береді.
«Жапырақтар биі»

Тақпақтар...
Жүргізуші: Енді құстарды шығарып салайық
Көк жүзінде барады құстар қайтып
Күндер солай өтеді шалқып - шалқып
Құстар ұшып барады жылы жаққа
Қыс боларын сезгендей қиқуласып.
Ойын: «Көкөністерді ажырата жинау»
Ойын шарты: бау - бақшада өсіп тұрған көкөністерді пішініне, түсіне қарай ажыратып себетке жинау.
Жүргізуші: Жемісті мол терелік
Күз дос екен бізбенен.
Бәрін тауып беретін,
Жомарт екен күз деген.
Күз ханшасы: Рахмет балалар
Уақыт өтпес тірліксіз
Бақыт келмес бірліксіз.
Талмай еңбек етіңдер
Қыстан аман өтіңдер.
Жеміс жидекті коп жеп дендерің сау болсын. Келесі кездескенше аман болыңыздар!
/Күз ханшасы кетіп қалады/
Жүргізуші: Осымен күз мерекесіне арналған ертеңгілігіміз аяқталды. Келесі кездескенше сау болыңыздар!