Ашық сабақ конспектісі: "Алтын күз"

«Теміртау қаласы әкімдігі Теміртау қаласының білім беру бөлімінің « №6 «Ұяша» балабақшасы» МКҚК   №10 «Сұңқар» тобының тәрбиешісі: Мустаева Нурзипа Турабековна

 Ашық сабақтың тақырыбы: «Алтын күз»

Сабақтың мақсаты:           «Балалардың күз туралы алған білімдерін тиянақтау,

Білімдік міндеті: күзгі табиғат өзгерістерін балалардың өз көздерімен көріп, күз байлығын, әсемдікті, сұлулықты сезіне білуге, сурет көріністерін әңгімелеп, айтуға, үйренген сөздерін күнделікті қолдана білуге жаттықтыру, сөздік қорын молайту, байланыстырып сөйлеуге баулу;

Дамытушылық міндеті: күз туралы өлең, тақпақ айтып, жұмбақ шешу арқылы балалардың ойлау  қабілетін жетілдіру, тіл дамыту,

Тәрбиелік міндеті: көркемдік талғамын, қимыл-қозғалысын  жетілдіру, іскерлі дағдыларына баулу арқылы еңбектенуге тәрбиелеу.

Көрнекілігі: Күз көрнісі бейнеленген бейнелі сурет, көкөністер  мен жемістер,күзгі бақ, қолшатыр, шашылып жатқан жапырақтар.

Әдіс-тәсілдер:   Әңгімелеу, көрсету, сұрақ, жауап, мадақтау, қимылды ойын, сергіту жаттығуы, қорытындылау.

Жаңа сөз:   «Қолшатыр».

Сабақтың барысы: 1. Ұйымдастыру, сәлемдесу.

Күннің көзі ашылып,

Көкке шуақ шашылып,

Құтты қонақ келіпті

Төрімізге еніпті

Амандасу үлкенге,

Тәрбиенің басы ғой,

Ал, кәнеки бәріміз

Сәлем дейік үлкенге.

  Шеңбер бойына тұру.

- Шеңберіміз неге ұқсайды?

- Алақандарымыз арқылы балалар нені сезініп тұрмыз?

- Біздің жүрегіміз қай жерде?

- Бір-бірімізге жүрегімізден шыққан жақсы тілектер айтайық.

- Сендер жақсы тілектер білесіңдер ме?

-  Нанымыз көп болсын!

- Аспанымыз ашық  болсын!

- Әрқашан күн сөнбесін!  

- Достарымыз көп болсын!

- Бәріміз ауырмайық!

- Еліміз тыныш болсын!

- Көк туымыз биік болсын!

- Қазір жылдың қай мезгілі?

- Күз бізде қонақта неше ай болады?

- Күз айларын атайықшы?

- Күз мезгілінің қандай ерекшеліктері бар?

Күзде күн суыта бастайды. Адамдар жылы киімдер киеді. Құстар жылы жаққа ұшып кетеді. Ағаштың жапырақтары сарғайып жерге түседі, аспанда бұлт пайда болып жаңбыр жауады, қатты жаңбыр жауған кезде «Қолшатыр» ұстайды. Қолшатырдың пайдасы көп, адамдардың киімдері су болмайды. Мына күз мезгілінің суретіне қарайық.

Сурет бойынша әңгімелеу.

- Жапырақтардың түсі қандай болады?

- Күз мезгілі туралы тақпақ білесіңдер ме?

 Бибінұр:    Алтын,сары, қызыл, көк,

Алуан-алуан жапырақ.

Күзгі бақта күлімдеп,

Көз тартады атырап.

Аружан:     Кенелдік біз көкөніске,

Жеміс-жидек, алмаға.

Атқарылды киелі іс,

Астық толы қамбаға.

Нұрислам:    Күзім-ау, күзім-ау,

Мінезің бұзық-ау.

Жаңбырың сіркіреп,

Келгенің қызық-ау.

Күзде адамдардың еңбегі өте зор. Адамдар егін орады. Бау-бақшада жемістер мен көкөністер жинайды.

Осы кезде есік қағылады. Айгүл (қуыршақ) қонаққа келеді.

        Балалар Айгүлмен сәлемдеседі.

Тәрбиеші: Мына қызыққа қараңдар,  Айгүл бізге көптеген тапсырмалар әкеліпті .

- Жемістерді ата?

- Көкөністерді ата?

- Жемістердің дәмі қандай?

- Түстері қандай?

- Балалар көкөністер мен жемістер туралы тақпақ білесіңдерме?

Мерует: Мен өрікпін, өрікпін,

Табиғатқа көрікпін.

Нұрасыл: Мен жүзіммін, жүзіммін,

Моншақ болып тізілдім.

Ерғали: Мен алмұртпын, алмұртпын,

Аузындамын бар жұрттың.

Нұрила:   Мен шиемін, шиемін,

    Піскенше тон киемін.

   Бала келсе қасыма.

   Басымды мен иемін.

Балалар мен сендерге жұмбақ жасырамын, шешуін табыңдар?

        Қабат-қабат тоны бар,

        Шешіндірсең жылатады.

                                                 (Пияз)

        Жер астында басы,

        Жер үстінде шашы.

                                        (сәбіз)

        Күзде піседі,

        Домалап түседі.

                                 (алма)

Сергіту сәті: 

Алтын сары,қызыл, көк, (саусақтарын санау)

Алуан-алуан жапырақ.   (қолдарын жоғары көтеріп, дөңгелек жасау)

Күзгі бақта күлімдеп      (жүздерінде күлкі)

Көз тартады атырап       (қолдарын маңдайына сүйеп, айналып қарау)

Ой алақай тамаша,         (аяғымен секіріп, қол шапалақтау)

Шашу шашты жапырақ. (қолдарымен шашу шашу)

Айгүлдің тапсырмасы:

- Отан деген не?

- Қалай түсінеміз?

- Отанымыз қалай аталады?

- Еліміздің басшысы, елбасымыз кім?

- Еліміздің рәміздерін ата?

- Ту, елтаңба  туралы тақпақ білесіңдер ме?

Аяулым:  Айнымайды аспаннан ,

               Біздің тудың бояуы.

               Оны халық қашанда,

               Биікке іліп қояды.

Айару:  Елтаңбасы елімнің,

             Неткен әйбат, әдемі,

            Тұнығындай көңілді,

             Ортада аспан әлемі.

Айгүлдің келесі тапсырмасы:

- Қалаңның атын айт?

- Қай балабақшаға келесіңдер?

- Топтарыңның аты қандай?

- Дидактикалық ойын «Күн мен жаңбыр»

Жерде жатқан жапырақтарды жинау. Қазір балалар біз балықтың бейнесін жапсырамыз. Балалар, балық немен жүзеді?

Балықтың қанатын жапырақтардан жапсыру.

Әдіс тәсілдерін үйрету.

Қорытындылау, мадақтау.

«Күз» әнімен аяқтау.