Ашық сабақ тақырыбы: "16- желтоқсан"

Тақырыбы: «Тәуелсіздік – ел тірегі»

Мақсаты: Өз Отанына, туған жеріне деген сүйіспеншілігін арттыра отырып, елжандылыққа, ұлтын сүюге, еліміздің рәміздерін қастерлеуге тәрбиелеу.

Көрнекілігі: нақыл сөзбен жазылған плакаттар, жалауша, шарлар, жеке суреттер, бейнеролик.

Барысы:1.Қызығушықты ояту.

Тренинг. «Менің тілегім»

2.Топқа бөлу. «Шашу» кәмпитер арқылы. «Бәйтерек» , «Ханшатыр» тобы.

3.Ән ұраны айтылады. §  Бостандық! – деп аталатын асқақ арман жолында қаншама қан төгілді, қаншама батыр мерт болды. Бұл арпалыс бір күн, бір жыл, бір мезет емес, талай ғасырларға созылған. Осы апрылысты жай тілмен тарих дейді.

1-      Жүргізуші: Егемендік! Тәуелсіздік! Осыдан 26 жыл бұрын бұл сөздердің қаншалықты мағыналы екенін біз дәл қазіргі уақыттағыдай түсінбеген шығарамыз. Ешкімге тәуелді болмауды арман еткен Кенесары секілді айбарлы ханымыз, Наурызбай, Ағыбайдай айбынды батырларымыз найзаның ұшымен, білектің күшімен күресіп құрбан болса, Төле, Қазыбек, Әйтеке секілді дуалы ауыз билеріміз қызыл тілдің арқасында ел тыныштығын сақтады. Сол заманнан бері азаттық, егемендік елімнің арманы болды. Халқының қамын жеген ата-бабаларымыздың қайсар ұрпағы 1986 жылы арман еткен тәуелсіздіктің, азаттықтың туын тікті.

«Ой ашар» кезеңі: Тәуелсіздік дегеніміз не?

4.Тәуелсіздік хронологиясы:

-         1991 жыл 16 желтоқсанда Қазақстан Республикасы тәуелсіздігін жариялады. Қазақ мемлекетінің тәуелсіздігін 140-тан астам ел таныды.

-         1991 жылы қазақ халқының тұңғыш ғарышкері Т.Әубәкіров ғарышқа ерлік көрсетті.

-         1992 жылы Қазақстан дүниежүзіндегі ең ықпалды және беделді ұйым БҰҰ мүше болды.

-         1992 жылы Қазақстан Республикасы Жоғарғы Кеңесінің сессиясында Республикамыздың мемлекеттік рәміздері қабылданды.

-         1993 жылы 15 қарашада Ұлттық валюта – теңге енгізілді.

-         1995 жылы 30 тамызда ҚР Конституциясы бүкіл халықтық референдум арқылы қабылданды.

-         1997 жылы 10 желтоқсанда Ақмола қаласы астана болып жарияланды.

-         1999 жылы ҚР «Білім туралы» заңы қабылданды.

2-жүргізуші: Біздің туып-өскен жеріміз Қазақстан Республикасы. Ол көне замандардан басталатын тарихы бар, аса бай ел. Қазақстан жерін ежелден қоныстанып келе жатқан ел – қазақ халқы. Қазақ халқы – ер жүрек, достыққа адал, бауырмал, қонақжай халық. Қазір Қазақстанда ынтымағы жарасқан көптеген ұлт өкілдері тұрады. Қазақстан бүгінде дүние жүзінің көптеген елдерімен достық байланыс орнатқан, бүкіл әлем таныған елге айналады. Қазақстанда өмір сүруші әрбір адам өз Отанын жанындай сүйеді, оның көк байрағын көкке көтеруді мақтаныш тұтады.

1-оқушы: Тәуелсіздік! Осы бір қасиетті сөзді естігенде қалайша тебіренбейсің! Ата–бабаларымыз  аңсап қана қоймай, сол үшін не бір қанды ұрыстарда белді бекем буып күресті емес пе? Төгілген қан, сіңірген еңбек ешқашанда зая кетпейді.

2-оқушы: Ия, қазақ халқының басынан небір қилы заман өтті. Тарихта аты шулы «Ақтабан шұбырынды алқакөл сұлама» қаралы атқа ие болған 1723 жылғы жоңғар шапқыншылығы қазақ жерін ойсыратып кетті.

3-оқушы: 1941-1945 жылдары азамат тарихында болмаған алапат соғыста, бірлік жолында жан қиған қазақ батырлары фашизмнен бүкіл адамзатты қорғап, ерекше ерлік көрсетті. Жүзге тарта қазақ қаһарманына Кеңес Одағының батыры деген абыройлы атақ берілді.

4-оқушы: 1986 жылы Атыраудан Алтайға, Сарыарқадан Алатауға дейінгі байтақ жерімізде Желтоқсанның қанды қара дауылы үдей түсіп, дүрбелең жайлады. Әділдік үшін бой көтерген жас боздақтардың маңдайы тасқа соғылды.

Бейнеролик: «Алматы алаңы – 1986 жыл»

Мұғалім: Еліміздің тәуелсіздігін аңсаған, ақ найзаның ұшымен елді жаудан қорғаған батыр аталарымыз бен желтоқсан оқиғасының құрбандарына айналған қыршын кеткен жастарды құрметтеп, осы отырғандардан 1 минут үнсіз орындарынан тұру сұралады.

Ән: «Желтоқсан желі»  Желтоқсан оқиғасында сен студент болғанында алаңға шығар ма едің?

«Үйренейік, танысайық» кезеңі: Мәдени ескерткіштерді білеміз бе?

1. Ата тарих тұмасы – Алтын Адам.

Шығыс Қазақстан облысы, Зайсан ауданы, Шілікті елді мекенінің жанындағы ескі қорғандардың бірінен археологиялық экспедиция кезінде табылды. Алғаш хабарлаған археолог, профессор, тарих ғылымының докторы Әбдеш Тәшкенұлы Төлеубаев.

2. Жас Астананың символы – Бәйтерек.

Бәйтеректің жобасын жасаған сәулетшілер Артур Манукян, Мұрат Байысбай. Биіктігі – 97 метр, салмағы – 210 тонна.

3. Респубика алаңында. Тәуелсіздік монументі.

16.12.1996жылы ашылды, авторы: Ш.Ыдырысұлы бастаған топ. Монументтің биіктігі – 32 метр, оның ортасында еліміздің елтаңбасы салынған, ұлттық нақышпен өрнектелген, биік тұғырдың ұшар басына алтын батыр мен жолбарыстың мүсіні қойылған. Батырдың бейнесі Есіктен табылған «Алтын адам» үлгісінде құйылған. Ескерткіштегі алтын жалатылған бүркіт, батырдың қылышы мен жолбарыстың жиынтық бөлшектері қымбат тастармен жасалған.

 «Шын жүректен» кезеңі: Жылы тілек айту.

Әр оқушы көк жалаушаны қолдарына алып, «Мен елімді сүйемін» деп жылы лебіздерін білдіреді.

Бекіту:- Тәуелсіздік мәңгі жасасын! Еліміздің бірлігі мәңгілікке сақталсын!

Ән: «Көк тудың желбірегені».

Тараз қаласы әкімдігінің білім бөлімі

№ 20 орта мектеп

Тәрбие сағаты

Тақырыбы:

«Тәуелсіздік – ел тірегі»

Сыныбы: 11 «А»

Сынып жетекші: Құлманова Р.С.