Баяндама (Ата-аналар жиналысына) Бастауыш сынып

Ес түзелмей,ел түзелмейді

/Ата –аналар жиналысында оқылған баяндама /

Жас ұрпақты тәрбиелеу жүйесі заман талабына сай қоғамдық өмірде болып жатқан ұлы өзгерістерге байланысты, қазір қоғам жан-жақты үйлесімді жетілген жаңа адамды тәрбиелеуді талап етіп отыр.Жас адамды есті ,саналы ,сергек етіп тәрбиелеу отбасы мен қоғамдық тәрбие орындарының бірден бір парызы, өйткені «ес түзелмей ел түзелмейді», олай болса ,егеменді еліміздің болашағы ,отбасында тал бесіктен басталып , оқу-тәрбие орындарында есті ұрпақты тәрбиелеу ісімен шешілмек.Аталған нысанаға жету үшін отбасындағы тәрбие төмендегі міндеттерді шешеді. Отбасында баланың өсіп жетілуіне денсаулығына қамқорлық жасау, нығайту ,бекіту.Тазалық дағдыларын қалыптастыру .

Еңбексүйгіштікке еңбекті қажетсінуге баулу баланың күнделікті өмірін мәнді ұйымдастыру, тұрмыстағы ,үй шаруашылығындағы еңбекке құлшынысы арттыру ,өзіне-өзі қызмет ету дағдыларын үйрету.

Отбасы мүшелерінің өзара дұрыс қарым-қатынасын ,тіл табысын түсінуін, бірін-бірі тыңдап, ата-ананы, туған-туыстарын ,жасы үлкендерді сыйлап, құрмет тұтуға үйрету.

Оқудың, білім алудың, мәдени мінез құлықтың әдет -дағдыларын қалыптастыру.

Отбасында баланың икемділігі мен қабілетін байқап, кәсіптік жасынан бағдарлау.

Әдебиетке ,өнерге ,мәдениетке, ғылымға құштарлығын тәрбиелеу, уақытын тиімді пайдалануды ұйымдастыру .

Баланың ақылына, күшіне ,біліміне сай берілген тапсырманы талапты орындауға дайын болуға үйрету.Бақылау,тексеру,бағалау.

Тәртіптілікке, ұқыптылыққа ,жауапкершілікке, ойыншылдыққа, сергектікке, естілілікке баулу.

Өзін-өзі тәрбиелеуге, дербестікке ,шығарашылыққа баулу.

Осыларың бәрін халықтық педагогика негізіне сүйене жүргізіледі.Жас ұрпақты осы тұрғыда тәрбиелеуде отбасы маңызды орын алады.Баланың бас ұстазы-ата-анасы. Отбасы үлгі өнеге бастауы «Балапан ұядан не көрсе, ұшқанда соны іледі». Әкеден ақыл, анадан мейірім алады .Отбасында әке асқар тау, ана бауырындағы бұлақ, бала -жағасындағы құрақ болып есептеледі.

Ата-анаға баладан жақын ешкім жоқ.

Сондықтан баласының әдепті, арлы азамат болып қалыптасуын армандайды. Ата-ана баламен пікірлесуде дөрекелікпен жеке басын қорламай мейірімді, табиғи жылы ақылды сөздер айтып өнеге бола білсе, тәрбиеде табысқа жетеді, өйткені жақсы сөз жан семіртеді. Сонымен отбасындағы тәрбиемен қоғамдық тәрбие өзара бірлікте, халықтық педагогикадан бастау алып ғылымда дәлелденген нәтижелерге сүйеніп, тәрбие құралдары мен әдістері дұрыс таңдалып жүргізілсе, ізгілікті тәрбиенің негізі қаланбақ.