Дизайн. Шығармашылық сабақ үлгілері

ШЫҒАРМАШЫЛЫҚ САБАҚ ҮЛГІЛЕРІ

1-сабақ  Дизайн әлеміне алғашқы саяхат

Мақсаты: Балаларға дизайн ұғымын түсіндіру және өнерге деген қызығушылығын туғызу. Еркін таңдау бойынша түрлі бейнелердің (балық, ұлу, жауынқұрты т.б.) дайын үлгілерін көркем жапсыру. Қауіпсіздік және тазалық-гигиена ережелерін сақтауды үйрету, жұмыс орнын ұйымдастыру. Көркемдік талғамын дамыту. Әсемдікке тәрбиелеу.

 Қолданылатын құралдар:  Фотосуреттер не бейне таспа. Балаларға арналған дизайн туындылары және балалар шығармашылығынан туындаған өнімдер. Түрлі түсті қағаз, қатырмақағаз, қайшы, желім.

Алдын-ала дайындық:  Дизайн әлеміне саяхат  жасау үшін көрме  ұйымдастыру, көрме бұйымдарын, материалдарын және құралдарын дайындау.  «Бұл неге ұқсайды?» ойынын ойнату.

Педагогтарға арналған ақпарат.

Бейнелеу сабақтарында балалар бірде сурет салса, бірде мүсіндейді, келесі де жапсырады, кезегі келгенде құрастырады. Ал енді осы шығармашылық жұмыстардың барлығын  біріктіріп қолдануға болады. Бұл   дизайн шығармашылығы. Балаларды дизайн  өнерімен таныстырып қана қоймай, алуан түрлі қажетсіз ескі бұйымдарды, табиғи материалдарды, қалдық өнімдерді т.б құралдарды  пайдалана отырып, өз қолымен жаңа, пайдалы, қызықты және әдемі бұйым жасап үйренетінін айтып қызықтырып қойған жөн.  

Сабақ барысы:

Педагог балалармен бірге алдын ала дайындалған көрме залына саяхат жасайды.  Педагог-дизайнер барлық жұмыстарға түсініктеме береді.  Балалар өздерінің көрмеден алған әсерлерін, қандай туындылар ұнағанын, олардың қандай материал, құралдардан жасалғандығын әңгімелейді. Кейде балалар осы құралдардың көпшілігін бұрын бейнелеу өнері сабақтарында көріп жүргендерін айтады, болмаса педагог естеріне түсіреді.

Біздің ұранымыз:

Табиғат-ана панамыз,

 Үнемдеп нәрін аламыз.

 Көнеден жасар жаңаны,

 Өнертапқыш баламыз.

О. Абилова

Сөздік жұмыс: «дизайн», «дизайншы», «өнертапқыш» сөздерінің мағынасын ашу.

Өнер, еңбек туралы мақал-мәтелдерді еске түсіру.

Қорытынды. Жетекші сұрақтар арқылы көрмеден алған әсерлерін әңгімелетеді.

2-сабақ «Гүлді мозаикалар» 

Мақсаты: Қағаз түрлері, оның қасиеті және неге керектігі туралы түсінік беру. Балалардың силуэтті композицияның сәнділігін қабылдау сезімталдығын дамыту. «Гүл алаңы» дизайнына қағаздан формасы мен өлшемі алуан түрлі гүлдер мен жапырақтарды қиюға үйрету.  Құралдармен жұмыс жасау барысында қауіпсіздік және тазалық ережелерін  орындауға үйрету. Ұқыптылыққа тәрбиелеу.

Қолданылатын құралдар: Ақ және түрлі түсті қағаздар, қайшы, қарындаштар, фломастерлер, желім, қылқалам. Балалар калейдоскопы немесе мозайка (түсі, өрнегі, композициясы алуан түрлі) үлгілері түсірілген бейне таспа.

Әдіс-тәсілдер: Қағаздың қасиетін тәжірибе арқылы көрсету. «Калейдоскоп» ойыны. Балалардың өз мозайкасын   құрастыруы.

Педагогтарға арналған ақпарат

           Композиция дегеніміз шығарманың жалпы құрылымы және ойды толық жеткізуге мүмкіндік беретін шығармадағы барлық элементтердің үйлесімділігі. «Композиция» латын тілінен аударғанда «орналасу», «үйлестіру», «сәйкестендіру» деген мағынаны білдіреді. Бейнелеу өнерінде, «композиция»  – бұл фигуралар мен нәрселерді, түс дақтарын және көлемді массаны орналастыру деген сөз. Композиция суретшінің ойын өткір жеткізе білуге мүмкіндік береді. 

            Композицияның шығарманы қалай құру қажеттігін, қай жерін алып не қосарын, фигураларды қалай орналастыру керектігін сезіне білуге көмектесетін ерекше ережелері бар.

3-сабақ  «Гүлге қонған көбелек»

Оригами өнері

Мақсаты: Оригами өнері туралы түсінік беру. Қағаздан, ешбір қосымша құралсыз, бұйымдар жасауға үйрету. Көз мөлшерімен бүктеу және бақылаушылық қасиеттерін, зейінін дамыту. Эстетикалық сезімдерін тәрбиелеу.

Қолданылатын материал: Түрлі түсті қағаз. Үлгі-сызба суреттер (гүлге қонған көбелек бейнесі; көбелектің алуан түрі).

Сабаққа дайындық. Суретті кітапшалардан не бейне таспаға жазылған көбелектің тіршілігімен таныстыру. Көбелектің өзіндік   әсемдігіне назар аудару.

Сабақ барысы:

Үстіндегі көйлегі

Түрлі-түсті, не керек.

Қызықтырар көргенді,

Мұның аты  ......

(Көбелек)