GAGAUZ DİLİ UROKLARINDA YARATICI İŞ SOYLARIN EFEKTİV KULLANILMASI
Marçuk S.G.
sveta_marchuk1982@mail.ru
Аннотация. В статье рассмотрено эффективное использование разнообразных видов
творческих работ и заданий на уроках гагаузского языка в гимназическом звене доуниверситетских учебных заведениях. Приведены примеры творческих заданий и
эффективные методы и приёмы работы с ними.
Ключевые
слова: творческая работа, творческие задания,
гагаузский язык
Üürenicilerin
üüretmäk işi doorudulu bilgi, becermäk sistemasına. Dooruluu hem içindilii o
bilgilerin herzaman genişlener, enilener, bakarak bilgi ilerlemesinä, eni bilgi
tehnikalara.
Üürenicilerin
üürenmesi geçer başka-başka. Bilgileri var nicä kabletmää fikirli, kimisi
üürener ezbere yada yaratıcı tarafından fikirleer. Kimisi üürener, bakmayarak
yaşamanın baalanmasına. Üürenicilerin üürenilmesi okulda diil lääzım durgunsun
o bilgilärlän programaya görä, onnar lääzım ilerlensinnär uşakların kendibaşına
yaratıcı işlemesinnän.
Üürenicilerin
üürenilmiş hem yaratıcı işi üüretmektä - çemrekliin hem kendibaşına işin
uurları. Üürenilmiş – ilk uursaydı, yaratmak – en üüsek uur. Bundan da onnarın
eri üüretmäk proţesindä başka.
Üürenilmişin
daavası - annamak, bilgi becermäk toplaması; yaratıcı işin daavası - diil sade
zenginnetmää bilgileri, ama ilerletmää becermekleri kullanmaa onnarı yaşamakta.
İş
soyları başkalanêrlar biri-birindän nicä içindeliinnän, ölä dä onun
yapmasınnan.
Yaratıcı
üüretmäk işinä girer eni materialın genişlenmesi hem derinnetmesi. Yaratıcı
işleyän uşak durgunmêêr sade üürenmäk kiyadınnan, o aarêêr material bilgi
literaturasından, enţiklopediyalardan, internet resurslarından.
İşlärkän
üürenmäk kiyatlarınnan, onnar bulêrlar soruşları, angılarını lääzım derindän
annamaa, onun için üürenicilär yapêrlar kendibaşına aaraştırıcı işlerini. Onnar
var nicä üürensinnär materialı üüredicinin laflarından, üürenmäk kiyadından,
kullanmaa metodları hem kolaylıkları verilän programaya görä. Ama var nicä
genişletmää hem derinnetmää verilmiş bilgileri, üürenilmiş olayların eni
taraflarını açıklamaa, sölemää kendi düşünmeklerini koyulmuş soruşları çözmää
deyni. İlk soy işä var nicä demää – üürenilmiş; ikinci soya - yaratıcı.
Üürenilmişin daavası: zenginnetmää uşakların yaşamak halizliini, vermää onnara
maasuz ük teoriya bilgilerindän.
Büünkü
gündä hesap alınêr üürenicilerin yaratıcı işi okulda.
Üüretmäk
praktikası gösterer, ani üürenicilär var nicä diil sade derindän, ama
hertarafça üürensinnär olayları; diil sade göstersinnär kendi götürmesini üürenilmişä,
ama sölesinnär kendi bakışını da; diil sade kullansınnar alınmış kolaylıkları
daavaları çözmää deyni, ama bulsunnar eni kolaylıkları.
Üürenicilär
başarılı üürensinnär deyni, lääzım ilerletsinnär kendi kalitelerini, nicä
kendibaşına üüretmektä, ölä da yaratıcı tarafından. Üüredicinin daavası
üüretmää uşakları yaratmaa, tanıştırmaa onnarı başka insannarın aaraştırmaklarınnan,
vermää onnara osoy praktik sınışı, angısı uyandıraceydı uşaklarda çemreklik
hem da kaldıraceydı onnarın kendibaşlıını üüsek uura.
Üüretmäk
proţesi lääzım koyulsun ölä, ani üürenicilär diil sade kabletsinnär bilgileri,
ama ilerletsinnär kendi yaratıcı becermeklerini kendibaşına işlemää.
Geçärkän bir
uurdan öbür üüretmäk uuruna, üürenicilerin yaratıcı işleri taa yaklaşêr
aaraştırıcı işinä.
Üüretmäk
praktikasında gagauz dilindä var maasuz yaratıcı işlerin soyları. Ama diil
lääzım unutmaa, ani termini “yaratıcı iş“ kimi üüredicilär, metodistlär,
psihologlar açıklêêrlar başka-başka. Kimisi yaratıcı işin maanasını açıklêêrlar
pek geniştän. T.S. Panfilova sayêr:,, Yazmak işlerini, neredä teksttä var
kaçırılmış bukvalar, kısımnar, iş daanık tekstlän, kendindän çıkartmaa cümlä,
kullanarak türlü gramatika formalarını-bunnarı hepsini yaratıcı iş gibi’’[1,41].
Kimi avtorlar sayêrlar afikslerin belli etmesini dä, nicä yaratıcı işini.
Yaratıcı
diktant hazırlêêr üürenicileri yaratma hem takrir yazmasına. Yaratıcı
diktantını vermää deyni, üürenicilerdä lääzım olsun üüsek uurda bilgilär, onun
için yaratıcı diktantları yok nicä vermää herbir klasta.
Yaratıcı
diktantlardan kaarä gagauz dilin gramatikasında taa kullanêr serbest diktantlar
da. Onnar yardım ederlär söz ilerletmesindä, hazırlêêrlar üürenicileri takrir
yazmasına.
Serbest
diktant geçer butakım: üüredici ayırêr baalantılı tekst, o lääzım olsun
uşaklara annaşılı, dolu üürenän kurallarlan.
Bütün teksti
payederlär abzaţlara 3-4 cümlä herbirindä. İlkin bütün teksti okuyêr üüredici,
sora bir üürenici annadêr bütündän, üürenilmiş orfogramaları hesaba alêrlar,
sora abzaţ-abzaţ yazêrlar.
Herbir abzaţı
üüredici okuyêr birär kerä da uşaklar ne tuttular aklında yazêrlar. Üç-dört
okunmuş cümledän üürenicilär yazêrlar ya taa çok, yada taa aaz; bir lafı var
nicä diiştirmää başkaylan.
Diktant
bittiktän sora, üüredici söleer üürenicilerä hesaba alsınnar yannışlıkları.
Açan üürenicilär yapêrlar kontrol kendi işlerinä, üüredici ayırêr bir-iki
tefter kontrol yapmaa deyni.
Kontrol
yaparkana bu tefterlerä, hesaba alınêr diil sade yannışlıklar, ama içindiliin
dooruluu da. Bu soy diktantı var nicä vermää üürenicilerä, açan üürenicilerdä
var bilgilär.
Yaratıcı becermeklerini ilerletmää deyni öncä üüredici uşakları
lääzım üüretsin dooru cümlä kurmaa. Üürenicilär lääzım logikayca dooru, uygun,
biri-biri ardına sölesinnär. Bu becermekleri ilerletmää deyni, ilktän üürederiz
uşakları:
-
tekstä görä soruşlara cuvap vermää;
-
teksti adlamaa, temasını hem öz fikirini
bellietmää.
Örnek:
Büüklär hem küçüklär büük umutlan yaz vakıdını
bekleerlär. O bir sevgili zaman herbirinä. Gün şılêêr. Herersi gözäl, eşillik.
Meyva olêr. Ne gözäl bizim küüyümüz yaz zamanı! Yazın insan dinnener. Kim
denizä gider, kim musaafirlää. Ama bu vakıt küüdä çok iş var.Gündüz küüyün içi
boş. Hepsi insannar kırda çalışêr.
-
Yazın arkan terleyecek, kışın şennik olacek.
-
Yazın sän çalışacan – kışın tatlı uyuyacan.
1.
Okuyun.
2.
Var mı nicä bu parcayı tekst saymaa? Necin?
3.
Nesoy onun tipi?
4.
Nesoy onun stili?
5.
Adlayın teksti.
6.
Bulun onun öz fikirini.
7.
Çizin herbir cümledä subyekti hem predikatı?
8.
Nesoy temaya hepsi bu söleyişlär?
9.
Nesoy çıkış var nicä yapmaa?
10. Hepsi söleyişlär uyêrlar mı bu tekstä?
11. Herbir grupa ayırêr birär söleyiş da yazêrlar mini-yaratma 3-4
cümledän.
Yaratmasız
yok nicä ilerletmää üürenicilerin yaradıcılıını. Yaratma yazmaa deyni, üürenici
lääzım analiz, sintez yapsın, lääzımnı materialı ayırsın, sistemaya onu
getirsin, logikayca dooru erleştirsin, çıkış yapsın.
Üürenicilerin
bilgilerini, bakışlarını sistemaya getirmää deyni, onnarın özünü bulmak için,
ilk yaratmalar bir plana görä yazılêr:
- Neredä hem
nezaman bu oldu?
- Ne oluşları
personajlar geçirdi (resimä görä)?
- Senin bakışın
annatmaya?
Ayırarkan
resimi yaratma için, uşakların diil sade yaş uuru hesaba alınêr, ama onnarın
orfografiya, gramatika tarafından bilgileri dä.
Kendi bakışına
görä hem literatura okumaklarında üürenän tekstlerä görä, şkolacılar yazêrlar
yaratma tabiatta diişilmeklär için.
Yaratma
- o yaratıcılık işi, angısında üürenicilär kendibaşına annadêrlar fikirini,
düşünmeklerini verilmiş temaya görä. Yaratmaların var büük üüretmäk hem
terbietmäk funkţiyaları. Yaratmaylan işleyärkän, üürenicilär lääzım aktiv
olsunnar, meraklansınnar, kendi fikirini yazmakta dooru kursunnar. Yaratma yazması
yardım eder uşaklara taa derindän üürenmää verilän temayı. Yaratma hazırlaması
– yaradıcılık uurunda çalışmak, informaţiyayı aaraştırmak, neredä üürenicilerin
logika düşünmekleri, estetika duyguları hem sözü ilerleer. Material toplarkan,
hazırlarkan, uşaklar üürenerlär görmää o işleri, angılarını şindiyädan hesap
almadılar. Bu işi uşaklar yapêrlar büük havezlän ozaman, açan onnara hepsi
annaşılı hem sevinmelik getirer.
Hergünkü
sistemaya görä iş baalantılı sözü taa üüsek uura kaldırmaa deyni, uşakların
fikirini ilerleder, tabiata düşünmeklerä meraklandırêr, uygun lafa duygularını
inceleder. Yaratıcı becermeklerin ilerlemesi başarılı olsun deyni, üürenicilär
lääzım durmamayınca düşünsünnär: analiz, sintez yaparak, kendi çıkışlarını,
kararlarını inandırsınnar, çok cuvabın arasından doorusunu ayırsınnar,
bulsunnar.
Yaratıcı
işlär verilerlär hem geçirilerlär başka-başka, neçin ki üürenicilerin bilgileri
hem becermekleri başka-başka. Ama hepsi soy yaradıcı işlerin etapları, didaktik
kolaylıkları, onnara hazırlanmak hem geçirilmesi birtakım.
- Yaparkana herbir
soy yaratıcı işlerini lääzım düşünmää;
- Hazırlanarkana
yapmaa yaratıcı işlerini, lääzım yapmaa analiz, belliederäk üürenicilerin
bilgilerini hem becermeklerini;
- Yaratıcı işınä
lääzım yapılsın plan;
- Planın
açıklanması;
- Notalamaa.
Üüretmäk proţesini var nicä
payetmää aşaadakı etaplara:
-
eni materialın tanıştırması;
-
üürenilmiş materialın kaaviletmesi;
-
üürenilmiş materialın tekrarlaması;
-
kullanmaa kabledilmiş bilgileri yaşamakta hem
kabledärkän başka bilgileri.
Bu etaplarda kullanılêr hertürlü yaratıcı işleri. Büük yannışlık
olaceydı ayırılıydı bu etaplar biri-birindän. Onnar geçerlär sade birleşik.
Örnek: tanıştırarkan üürenicileri eni temaylan var nicä kaaviletmää
eskiyi. Kimär kerä üüredici hem annadêr, birdän kaaviledip verilän materialı.
Giriş eni materiala
olêr başka-başka. Önemli soylar:
1.
Üürenärkän eni materialı lääzım kullanmaa diil sade
üüredicinin sözünü, ama kiyat içindiliini dä. Üürenicilär lääzım tutsunnar
aklında teksti, annasınnar içindiliini, becersinnär annatmaa kiyada yakın.
2.
Annadarkan kiyada yakın, kimi üürenicilär annadêrlar
sade ne var teksttä, ama kimisi var nicä annadarkan göstersinnär kendi
bakışını, yapsınnar kendi çıkışlarını.
3.
Açıklêêrlar olayların eni taraflarını.
Kaaviledärkän hem tekrarlarkan üürenilmiş materşalı, üürenicilär açıklêêrlar
üürenilmişin eni tarafını, kimär erdä genişlederlär hem derinnederlär kendi
bilgilerini.
Bütündän hesaba
alınêr yaratıcı işlär. Yaraştırarak gramatikayı, toplayarak yada ayırdarak
onnarın nışannarını, üürenicilär kaldırêrlar taa üüsek uura kendi logikasını.
Lääzım kullanmaa praktik işlerinni, kaaviletmää hem ilerletmää beceriklerini
deyni.
Eni
temayı üürenmää deyni, lääzım tekrarlamaa verilmiş bilgileri.
Üüretmäk proţesindä
önemli er kaplêêrlar türlü metodlar, angıları yardım ederlär açıklamaa, nekadar
üürenicilär annadılar okunmuşu kiyattan. Onnarın arasında önemli er kaplêêrlar
annatmalar kiyada yakın, ezbere üürenmeklär.
Derinnetmää
uşakların bilgilerini deyni, var nicä kullanmaa yaratma işlerini da, koyup
onnarın önündä orfografiya daavalarını.
Örnek: Yaratma
resimä görä, kullanarak maasuz orfogramaları. Deyecez, kaaviletmää deyni
uşakların bilgilerini temaya: “Nicä yaratmayı, teksti taa ii yazmaa“, üüredici
lääzım ayırsın osoy sınışları, neredä var nicä yapmaa yazdırmak. Örnek gibi
var nicä olsun tabiat, yıl zamanın gözelii h. b.
Hepsi
bu yaradıcı işleri, angıları zorlanmış orfografiya işlerinnän yardım eder
üürenicilerä ilerletmää onnarın bilgi edinmesini.
Yaratıcı
iş - o eni yapmak, ne taa olmadıydı. Kızıştırmak yaradıcı işinä, neredä koyulêr
bir problem, angısını yok nicä çözmää hergünkü sınışlarlan. Yaraştırmaya
kızıştırmak var nicä olsun fikirlemäk, engel etmäk, beceriklik, bütündän
görmäk. Yaratıcılık var herbir insanda. Lääzım onnarı hesaba almaa da
ilerletmää. Vergi yaratıcılaa herbirindä diil birtakım. Hergünkü üürenmektä
üürenicilär üürenerlär maasuz haberleri, becererlär onnarı annatmaa. Ama diil
herbir derstä üürenicilär zanaatlanêrlar yaradıcılıklan. Üüredici lääzım bulsun
o soy koşullar derstä yapmaa deyni üürenicilerdä yaradıcı çözümü[3,56].
Efektiv olsun deyni
aazdan annatmak, ama lääzım esaba alınsın maasuz kolaylıkları:
-
yapmaa problem olayı, soruş koyması hem bilgi
edinmäk daavaları, angısı uyandırêr üürenicilerin fikirlemäk işini, kabletmää
eni bilgileri;
-
uyandırmaa uşaklarda becermäk getirmää örnek, olay;
kendibaşına oluşturmaa çıkışları, kuralları, terminneri;
-
daava koymak, yaraştırmaa üürenilmiş olayları hem
örnekleri, hem bellietmää önemli nışannarı;
-
üüredicinin becermesi doldurmaa kendi annatmasını
açık meraklı materiallan;
Kasaba
okullarında üürenicilerin sözlüü yufkarak, ne zorladêr üürenicilerin başarılı
üürenmesinä. Onun için lääzım hesaba alınsın üürenicilerin bilgileri hem
becermekleri dil uurunda: dooru sölemektä, dooru yazmakta.
Çok
kerä üüredici hem ana-bobalar söleerlär, ani uşak prost üürener, neçinki o diil
dikkat derstä. Bu diil dooru düşünmäk. İş ii başarıylan gitsin ileri deyni,
üüredici lääzım kaaviletsin fikir işini derstä, metetsin uşaa, meraklandırsın
uşaa oyun sınışlarınnan.
Üürenicilerin
yaratıcı işleri kaavilederlär hem üüseklettirerlär üürenicilerin üüretmäk
meraklanmasını, yaratıcı fikirlenmenin ilerletmesini, her bir uşaan kendiliini.
Bakmayarak buna, yaratıcı işlerini lääzım vermää enikunu.
Üürenicilerin
üüretmäk meraklanması diil çetin. O var nicä korkunsun yaratıcı işin iş
vermesindän. Onun için lääzım çeketmää sadä işlerdän hepbir geçerlän taa
zorlaşêr. Yaratıcı işlerin yapmasına lääzım büük hazırlamak işinä.
Geçmäk
yaratıcı işlerinä – üüretmäk-yaratıcı işleri.
- Obyekti,
göstermää deyni işlär. Kaaviledärkän materialı üürenicilär cuvap ederlär
üüredicilerin soruşlarına.
- Çok soylu praktik
işlerini yapmaa deyni, lääzım kullanmaa türlü kurallar, becermää yapmaa
çıkış. Örnek gibi bu soy işä olêr:«Yazın teksti, koyun durguçluk
nışannarını ».
- Örnek gibi
kombinir işinä var nicä olsun: «Verilmiş sadä cümlelerdän kurun katlı.
Bulun adlardan predikatı, angı söz payından o düzülü ».
Yaratıcı
işlerin bir payı diil sade annamaa üürenilmiş materialı, nekadar üüseltmää
uşakların çemrekliini hem kendibaşına işlemesini, ilerletmää yaradıcı
soruşların çözmesini, üürenicilerin üüretmäk meraklanmasının oluşturmasını.
Yaratıcı
işinä örnek gibi var nicä götürmää: açıklamaa verilmiş tekstin içindiliini
maasuz yaratıcı elementlerinnän: düzmää teksti, göstürmää kendi bakışını h.b.
Üüredärkän
ilerletmää becermeklerini nicä da kaaviledärkän materialı, var nicä kullanmaa
yaratıcı işlerini.
İş
soyları üüredärkän ilerletmää becermeklerini:
1.
İşlerin örnää görä var neeti vermää ilk uuru
annamaa bilgilerini, ilerletmää becermeklerini kullanmaa o bilgileri ileri
dooru.
2.
Savaşmaklı işlerin neeti: kaaviletmäk, tekrarlamak
teoretik materialını, ilerletmää ilk uur bilgilerini hem ilerletmää
becermeklerini.
Yaratıcı
işleri kullanılêr o etapta açan üürenicilär becererlär kullanmaa kabledilmiş
bilgileri.
Örnek
gibi olêr yaratmalar yaraştırma elementlerinnän yada yazdırma elementlerinnän.
Yazmaa deyni yaratma üürenicilärlän hazırlanmak işi lääzım olsun.
Örnek:
Yaratma «Adam hem Vatan» yazmaa deyni, üürenicilär lääzım esaba alsınnar ne o
vatan, yaraştırsınnar resimcilerin resimnerini, belli etsinnär angı stildä
yazaceklar bu yaratmayı (artistik osa publiţistik), verilmiş soruşlara görä
plan kursunnar, epigraf bulsunnar, artistik kolaylıklarını uydursunnar.
Yaratıcı
işlerin arasında – yaratmalar resimä görä. Herbir üürenici yazêr kendi
stilindä: artistik, yazdırma, fikirlemä.
Çıkış:
yaratıcı işlär kaplêêrlar önemli er oluşturmaa deyni üürenicilerdä üüretmäk
meraklanmasını.
Gagauz
dilin derslerindä kaaviletmenin var kendi maasuzluu hem çözer butakım daavalar:
belli etmäk hem kaaviletmäk teoretik haberlerini, belli etmäk lääzımnı
becermekleri dooruyazmakta, ilerletmää hem zenginnetmää üürenicilerin aazdan
hem yazılı sözünü, ilerletmää fikirlemäk becermeklerini.
Üüretim
hem yaratıcı proţesleri üürenicilerin üüretmäk işindä belli olêr praktik
işlesin kaaviletmesindä. Üürenicilerin işlerini var nicä bölmää: üüretim,
üüretim-yaradıcı, yaradıcı.
Üürenicilerin
işleri üüretim karakterindä kaaviletmäk etapında gagauz dilindä koyêr neet
ileri dooru fikirlemää hem derinnetmää teoretik materialını annamaa önemli
gramatika terminnerini, dooru yazmak kurallarını, üürenicilerin praktik işleri
kullanarkan eni bilgileri verilmiş koşullarda.
Bu
işin önemliydir o, ani işi lääzım yapmaa yakın tekstä, serbest açıklamaa
teoretik materialını, yapmaa praktik işini açıklamaa deyni eni obyekti,
kullanmaa eni haberleri verilmiş koşullarda, bulmaa başkalı hem benzeyän
nışannarını, esaba almaa logika sıralıını.
Bu
işlerin neeti – toplamaa bilgi kullanmaa yaşayış koşullarında, hazırlamaa uşakları
taa zor hem kendibaşına işleri yapmaa.
Durgunacez
kimi soy üürenicilerin işlerindä, angılarını taa sık kullanêrız praktikada
kaaviletmää deyni materialı gagauz dilindä, angılarını var nicä götürmää
üüretim işlerinä.
1.
Aazdan annatmak gramatik terminnerini, açıklamaa
orfografiya hem punktuaţiya kurallarını. Üürenicilerin annaması terminneri hem
kuralları lääzım olsun düşünmekli. Ama üürenicilär taa derindän annasınnar
gramatika temellerini, kaaviletsinnär bilgilerini, becermeklerini, lääzım ani
üürinicilär tutsunnar aklında kuralları yakın kiyada.
2.
Kullanmaa material kaaviletmesindä üürenicilerin
cuvaplarını.
3.
Dersin bitkisindä kaaviletmaa deyni, yapmaa çıkış
yapılmış işä, ilerletmää üürenicilerin sözünü deyni, kullanılêr bu soy iş:
yavaş-yavaş açıklamaa eni materialın içindiliini, angısı üürenildi derstä.
4.
Getirmää örnek henez üürenilmiş terminä yada
kurala. İlk örnekli üürenicilär alêrlar kiyatlan yada üüredicinin sözündän, ama
sora onnar kendileri örnek getirerlär.
5.
Praktik işleri bulmaa hem tanımaa gramatika
obyektlerini maasuz koşullarda. Onnarın temelindä durêr birleştirmäk yada
ayırtmak. Bu işlerdä üürenicilerdän istener: bulmaa, tanımaa, çizmää, belli
etmää.
6.
Annatmaa lafların dooruyazılması yada koymaa dooru
durguçluk nışannarını üürenilmiş kurala. Bu soy işin neeti – ilerletmää
becermeklerini dil uurunda, annatmaa yazılmasını yada durguçluk nışannarın
dooru koyulması. Kim birdän ilerletmää üürenicilerin sözünü.
7.
Türlü soy iilencä diktantları (yaradıcı hem
serbesttän kaarä), onnarın neetleri – ilerletmää üürenicilerdä serbest kullanma
üürenilmiş kuralı.
Geçim
üüretim işindän yaradıcı işinä deniler üüretim-yaratıcı. Üürenicilär
yapêrlar üüretim işleri kendibaşına yaratıcı elementlerinnän.
Gagauz
dilindä kaaviledärkän materialı kullanêrlar yaradıcı işini teoretik dil
materialın, yaraştırmak bir gramatika olaylarını öbürlerinnän. Hepsi işleri
üüretim-yaratıcı soyunda var nicä bölmää 3 grupaya:
I.
İş, diiştireräk obyekti.
II.
Çok türlü praktik kullanması.
III.
Diferenţial sınış.
I. Diiştirmäk
işleri pek sık kullanılêrlar praktikada. Yaratıcı temeli olêr açan üüredici
diiştirer, doldurêr, kurêr. Bunu var nicä götürmää nicä üürenärkän teoretik
materialını, ölä da yaparkan praktik işlerini, ilerledärkän kendi bilgilerini
hem becermeklerini.
Diiştirici
iş soyları kaaviledärkän materialı: üürenicilerin cuvapları, inandırmak,
açıklamaa maana baalantısını, uydurmaa geniş planı temanın içindiliinnän;
kendibaşına adım-adım temanın açıklanması, belliediräk temel kuralları,
uydurmaa gramatika olaylarını.
Diiştirän
işlerin soyları:
1). Türlü soy cümlä
diiştirmesleri: diiştirmää erindän cümlä paylarını; diiştirmää lafları yada
lafbirleşmelerini verilmiş materialda yada kendibaşına; kurmaa cümlä verilmiş
çeketmäylän.
5). Yazmaa takrir
verilmiş tekstä.
6). Küçürek takrir
gramatika işlerinnän. Bu soy takrir yazmasında üürenicilär kendibaşına kurêrlar
plan, içindiliini açıklamaa deyni.
7). Yaratma
gramatika işlerinä görä üürenicilär kendibaşına üürenerlär materialı, logikayca
dooru annadêrlar, bakarak ilüstraţiyalara. Herbir yaratmanın temelindä durêr
orfografik daavaları.
1.
Yaratma resimä görä, kullanarak maasuz orfogramaları. Üüredici lääzım esaba
alsın resimin süjetini. Süjet lääzım ilinnetsin iş yapmasını: nışannıın
kullanılması – boya tabiat resimi.
2.
Yaratma, verilmiş temaya, maasuz laflarlan: Örnek: işhallıklar (orada, burada,
yakarda, aşaada).
3.
Yaratma, verilmiş temaya, üürediciylän.
4.
Üürenicilär kendileri ayırêrlar yaratma temasını.
8). Bulmaa
yannışlıkları verilmiş teksttä (orfografik, stilistik, punktuaţiya). Bu soy işä
taa deniler redakţiya işi.
II. Çoktürlü
praktik işlerin kullanılmasına girer işlär, angılarına girer diil bir kural
yada termin, ama kompleks kural hem termin, angılarını üüreneriz büünkü derstä.
Yaratıcı elementleri burada kullanılêrlar, açan uşaklar yaraştırêrlar, yapêrlar
analiz, inandırêrlar, yapêrlar çıkış. Bu soy iş taa çok lääzım, açan üürenerlär
temaları sintaksis hem punktuaţiya, neredä lääzım kullanmaa bilinç uurunu.
Örneklär:
1. Annatmaa
lafların dooruyazılmasını, durguçluk nışannarın koymasını. Bu soy işi yapmaa
deyni üürenicilär lääzım fikirlemäk işlerini yapsınnar – aklına getirmäk,
uydurmak türlü kuralları, annatmaa ayırılmışı, inandırmaa fikirini.
2. Koymaa
bukvaları, lafları, laf paylarını, durguçluk nışannarını yapmaa deyni üürenici
lääzım yapsın analitiko-sintetik işini.
3. İilenmäk
diktantların (annadıcı, ayırdıcı) neeti ilerletmää bilgileri hem becermekleri
kullanarak dooruyazmanın kurallarını. Örnek laflı diktant: koyun kaçırılmış
lafları:
Maşinalar durêrlar
... . Çocuklar gözäl çalêrlar ... . Baka ... çok faydalı haberlär bulêr. Däduya
artık ... da yardım etmeer. ... uçuşêrlar bostanın üstündä ... – çalışkan
insannar. Bizim Bucakta pek karannık ... olêr. Paşi pek sever karpuzların ... .
Karı çarpaladı uşakların ... .
4. Morfologiya
yada sintaksis analizi. Bu en faydalı gramatika işi, angısı yardım eder
ilerletmää bilgileri, becermekleri, ilerletmää fikirliini hem dilini. Analiz
var nicä olsun ayırılmış hem da dolu. Onu var nicä kullanmaa kaaviledärkän
materialı.
III. Üüretmäk
proţesindä büük er kaplêêrlar üüretim hem yaradıcı işlerin birleşik
kullanılması – bu işlerä deniler kombinir işleri.
Kombinir
işleri verilerlär nicä kiyatlarda gagauz dilindä, ölä da kaaviletmäk etapında.
Örnek: kurmaa katlı cümleleri verilmiş sadä cümlelerdän, yazsınnar, koysunnar
dooru durguçluk nışannarını.
1. Yaratıcı işleri
gagauz dilindä kullanêrlar diil sade neet açıklanmasında, ama üüseltmää deyni
çemrekliini yada kendibaşlıını; ilerletmää onnarın girişliini hem çözmää
soruşları yaratıcı tarafında; onnar üürenerlär göstermää kendi bakışını, bulmaa
da ayırmaa kendi çözmesini.
Üüretmäk
proţesindä var nicä kullanmaa yaratıcı işlerini, kullanarak kaaviletmäk
materialını: kurmaa zor katlı plan kullanarak temayı, cuvap vermää soruşları,
neredä lääzım yaraştırmaa gramatika olaylarını.
Yaratıcı
işlerin arasında – yaratıcı diktant. Bu soy iş metodikada sayılêr yaratıcı
işlär, angıları ilerlederlär sözü, üürederlär kendibaşlıını hem girişini.
Yaratıcı
diktant var nicä kullanmaa üürenärkän temayı «Nışannık». Koyun nışannıkları:
Bizim aylemiz ... . İnsannar orada ... . Bobam çalışêr ... zavodta. O pek ... .
Bän temizlik yapêrım kendi içerimdä. O ..., ..., ... .
2. Düzmää cümlä
maasuz gramatika işlerinnän: verilmiş laflarlan hem lafbirleşmelerinnän;
verilmiş soy cümlelärlän; verilmiş shemaya görä; verilmiş çeketmeyä; verilmiş
temaya.
Örnek:
Kurmaa cümlä, ani o açıklasın önünkü cümleyi:
“
Bän yaşêêrım büük evdä. Orada ... . “
3. Kendibaşına kurmaa
tabliţa bir temaya yada bir dersä.
4. Verilmiş teksti
diiştirmää, doldurmaa, göstermää kendi bakışını.
5. Aazdan annataa
verilmiş temaya. Kimär kerä ona deerlär yaratma-annatma yada aazdan yaratma. Bu
soy iş başkalanêr yaratmadan, neçin ki o geçer aazdan hem o taa küçük.
6. Küçürek yaratma
gramatika işlerinnän.Bu soy yaratmalar olêrlar derstä resimä görä, temaya
görä, angısını ayırêr üüredici yada üürenici kendi.
7. Yaratma
gramatika temasına görä, angısı kaplêêr bütün temayı,bölümünü. Bu soy
yaratmalara lääzım,ani üürenicilär fikircä bakêrlar gramatikaya hem
dooruyazmaya.
8. Yaratmalar,
neredä var ofiţial söz: mektup, gazeta statiaları, yaratma kafadarlarına.
Çıkış: Yaradıcı
işlär kaaviletmäk etapında gagauz dilindä sıkılêr üüretmäk meraklanmasını üürenicilerdä
gimnaziya klaslarda, yapêr bir temel ileri dooru ilerletmää deyni
üürenicilerin üüretmäk meraklanmasını.
Yaparkan
o işleri olêr baalantı teoretik bilgilerin hem praktik yaptıkların arasında,
olêr enikunu geçim denemek işlerindän taa zor konkret işlerinä.
Yaparkan
kalan işleri diişiler praktik yaptıkların özellikleri. Becermää ilerlemää.
Teoretik temel becermeklerin strukturası, üürenicilerin annatmak kolaylıkları,
açıklamak proţesindä var kapalı harakter. Teoriyanın hem yaptıkların arasında
var baalantı üüretmäk hızlı hem dooru baalêêr bilgileri hem yaptıkları.
Yaparkan
işleri, neredä kullanılêr üürenilmiş kurallar olêrlar taa ii, taa ilin. Praktik
işleri olêrlar taa kaliteli hem enili. Yapêrlar ii koşullar kaaviletmä deyni
üürenicilerin dikkatlıını.
Lääzım
olêr ayırmaa da yapmaa ikinci soy iilencä işleri, neredä üürenicilär lääzım
kullansınnar hepsi bilgilerini hem becermeklerini eni koşullarda.
Bu
işlerin özelliydir o, ani yapmaa deyni lääzım kullanmaa bir bölüm kural.
İçindiliinä hem logikasına görä işlär lääzım çözmää deyni eni daavaları.
İşlerin içindiliinä girer bir temanın kaaviletmäk materialı.
Bu soy işlerin
paalılıı onda, ani yapmaa deyni onnarı üürenicilär kullanêrlar çok bilgi,
yaradıcı fikirini.
Çıkış: kullanarkan
iilencä işlerini üürenicilär zinginnederlär bilgilerini, kaavilederlär, taa çok
vakıda koruyêrlar, taa ii kullanılêrlar çözmää deyni zor daavaları.
Yaratıcı işlär kullanılêrlar açan
üürenicilär kablederlar eni bilgilär, becermeklär türlü yaratıcı praktik
işlerin yardımınnan.
Yaradıcı
işlerini yaparkan üürenicilerdä ilerleer bilim kuvedi, becermekleri. Bunnar
hepsi getirerlär ii başarılara: fikirlemeya, sözä, aklında tutmaya, dikatlaa,
genişleder üüretini hem yaradıcı kuvedini. İlerletmää deyni bilgileri,
becermekleri pek önemli kullanmaa yaradıcı işlerini.
Örnek:
Kurun bir annatma «Nicä biz yortuya hazırlanêrız» yada «Nicä bizim klas
gezintiya gitti». Çizin işliklerin altlarını, belliedin zamannarını.
Ayırarkan hem
yaparkan yaratıcı işlerini kurikulumda esaba alınêr adımnık – yıl-yıldan
onnarın kullanılması zorlanêr. Bunu var nicä görmää yazmak yaratıcı işlerin
tabliţasından.
Üüredicilär
ayırêrlar yaradıcı işlerini, bakarak onnarın yaş uuruna, bilgi uuruna.
Üürenicilär kendi bakışını göstersinnär deyni yaratmalarda hem takrirlerdä,
üüredicilär lääzım yapsınnar büük hazırlamak işi. Bu işi var nicä yapmaa maasuz
plana görä:
1.
Hazırlamaa yazmaa cümleleri resimä görä gramatika
işinnän.
2.
Kurmaa da yazmaa cümleleri resimä görä verilmiş
temaya.
3.
Hazırlamaa da yazmaa cuvapları soruşları bakılmış
resimä görä.
4.
Kurmaa da yazmaa cuvapları soruşlara okunmuş tekstä
görä.
5.
Doldurmaa cümleyi üürenilmiş eni laflarlan hem
lafbirleşmelerşnnän.
6.
Kurmaa hem yazmaa cümlä, üürenilmiş kurala görä.
7.
Kurmaa da yazmaa annatma.
8.
Kurmaa da yazmaa takrir.
9.
Kurmaa da yazmaa yaratma:
·
bütün klasın toplunmuş materialınnan;
·
örnää görä, okunmuş teksta;
·
yaratmanın temelindä durêrlar: yaşayışını, okunmuşu
gazetalardan, dergilerdän;
·
esaba alarak üürenilmiş temayı;
·
kiyatta verilmiş temaya.
Yaratıcı
işlerin yapması ilerleder bilgi hem becermäk uurunu. Üürenicilerä taa yakın
yaradıcı işlär, angıları baalı maasuz temaylan, annaşılı içindiliklän, baalı
yaşamaklan, baalı uşaan meraklanmasınnan.
Üürenicilerin
yaşayış dolayı zengin materiallan kurmaa kendibaşına deyni annatma, takrir,
yaratma h.b. Nekadar yaradıcı iş yakın uşaa deyni, okadar o taa pek düşüner hem
açıklêr onun çıkışı için, savaşêr taa üüsek uurda olsun notalamak. Dooru
yazmanın da becermekleri olêrlar taa kaavi.
Bulunarak
herzaman aaramakta, savaşarak yaratmalı yaklaşmaa üüretmäk proţesinä, bän, nicä
üüredici isteerim herbir kendi üürenicimdä görmää yazıcıyı, türkü çalanı,
resimciyi yada ii ürekli, insanı sevänini. Bän savaşêrım üüretmenin ilk
günnerindän taa yapmaa yaratıcı soluunu, yardım ederäk, açmaa herbir uşaan
akıllılıını. Onun için ilk günnerdän taa üürederim uşakları başlankı
klaslarda, bir temaya görä yapmaa işleri kendincesinä, ilerlederäk bununnan
kendibaşlıını, çalışkannıını - o kalitelär yardım ederlär ilerletmää yaratıcı
fikirliini hem akıllıını.
Yok nicä
sölemää, ani bu proţes geçer pek düz hem ilin. İlk vakıtlarda olêr çok problem
hem zorluk. Bu olêr, neçin ki diil her bir uşak açık yaratıcılaa. Her bir
uşakta diil ilerlenmiş açıkgöz hem çıkartmak. Aazalatmaa bu zorlukları hem
yaklaştırmaa herbir uşaa işä deyni, savaşêrım koymaa derstä o soy işleri,
angıları diil sade ilerledecek hem yaklaştıracek uşakları iş yapmasına, ama
olacek annaşılı hem meraklı hepsinä.
BİBLİOGRAFİYA
1.
Baboglu İ., Vasilioglu K., Stoletnäyä A. Gagauz
dili. Metodika teklifleri V-ci –IX-cu klaslar için.
Chişinău, 2000, 61 s.
2.
Baboglu İ., Vasilioglu K., Stoletnäyä A. Gagauz
dili hem literatura. Kurikulum gagauz şkolanın V-ci – IX-cu klaslar için. Yaşi,
200, 48 s.
3.
Baboglu İ., Babaoglu N., Vasilioglu K. Gagauz dili
hem literatura okumakları.
4.
V-ci klas için üüretmäk kiyadı. Chişinău, 2000, 257
s.
5.
Baboglu İ., Babaoglu N., Vasilioglu K. Gagauz dili
hem literatura okumakları.VIII-inci klas için üüretmäk kiyadı. Chişinău, 2001,
320 s.
6.
Baboglu İ., Babaoglu N. Gagauzça – rusça hem rusça
– gagauzça şkola sözlüü.Kişinöv, 1993.
7.
Dergi “Kırlangaç”. 2001/ 2.
8.
Gazeta “Ana sözü”. 1990 / 5.
9.
Gazeta “Ana sözü”. 2001/ 9.
10.
Gazeta “Gagauz sesi”. 2000 dekabrinin 28.
Оставьте свой комментарий
Авторизуйтесь, чтобы задавать вопросы.