Эссе на тему "Мен ұстазбын"

Эссе « Мен – Ұстазбын»

Ұстаз болу – жүректің батырлығы,

Ұстаз болу – сезімнің ақындығы,

Ұстаз болу – мінездің күн шуағы,

Азбайтұғын адамның алтындығы

Ұстаз.  Осы бір  ауыз  сөзде  қаншама  құдырет, қаншама күш жатыр. Ол – кім?  Ол - адам  өмірінің  бағбаны,  бағы, болашағы, бүгіні мен ертеңі. Ағаштың  күтімі  жақсы болса, жемісі мол болмақ.  Сондай –ақ, бүгінгі  ұрпаққа беретін білімнің  күші  - оның  ертеңгі  елге жасайтын қызметінің күші. 
        Ұстаз сөзінің ұғымы кең.  Ұстаз  болу  деген  сөз - өмірде өзі де бақытты болып, өзгелерді де бақытқа жеткізу дегенді білдіреді.  Бала  кезде «Ұстаз» сөзі көз алдымызға мейрімді, білімді, парасатты, жүрегі жұмсақ асыл жанды елестететін  еді. Бірақ,  оның талмай іздену, маңдай терін төгу арқылы ғана көп жетістіктерге қолын жеткізе алатындығын  сол  жолды  таңдаған  адам  ғана түсінер  еді.  Мен  осы  жолды  таңдадым,  Ұрпақ тәрбиесі - қиындығы мен қызығы қатар жүретін ұлы іс екендігін біле,  түсіне  отырып  осы  жолды  таңдадым.   Кез келген қиындыққа шыдай білген адам сол еңбегінің жемісін көреді. Сол еңбегінің жемісін көру үшін ұстаз бойында ұстамдылық, дарындылық, байсалдылық, ізденімпаздық сияқты алуан түрлі қасиеттер болуы шарт.  Әр ұстаздық  жолды  таңдаған  адам  бойында  болатын  осы  қасиеттерді мен де бойыма  жинауға  тырысып келемін.
       «Ұстазсыз ғұмыр - сөнген күн»деп ата - бабамыз айтқандай, бұл өмірді ұстаздарсыз елестету мүмкін емес.

          Мен бүгінгі таңда Ақмола облысы, Целиноград ауданы,  Тайтөбе ауылы  орта    мектебінде  бастауыш сынып мұғалімі болып қызмет істеймін. Алдымдағы шәкірттеріме  қарап  отырып ойланамын.   Бүгін  менің  алдымда  отырған  бала  -   ертең  елімнің  болашағы. Демек, ел ертеңі осылардың  қолында.  Яғни,  менің ұстаз ретінде зор жауапкершілігім тек  бүгінгі  жас ұрпақтың  ғана емес, ертеңгі  ел  алдында деп пайымдаймын.  Бастауыш сынып оқушылары   тап - таза ақ парақ,  жып - жылтыр айна  сияқты ойы  да,  миы  да,  жүрегі де  таза.  Таза  ақ  параққа  түсірген   суретің  айқын  көрінетіні  секілді  оларға  берген  тәлім-тәрбиең  де, білімің  де   айнадай көз алдыңда тұрады.  Оларға  қарайсың да кемшіліктеріңді түзетесің, жетістіктеріңе қуанасың. Менің  өмірлік  ұстанымым – оқи алмайтын  бала жоқ, оқыта  алмайтын мұғалім бар. Сондықтан,  менің өзіме қояр талабым, алдыма қойған мақсатым да жоғары, айқын.

     «Адамның адамшылығы - жақсы ұстаздан» деп ұлы Абай айтқандай, мұғалім тәрбиесі мен өнегесі оқушының болашақ азығы. Жақсы ұстазға кезігіп, тәлім - тәрбие алған шәкірт өмір майданында мойымай күресіп, болашақ  жолдарда бағытынан таймасы анық. Ұрпақ болашағы, халқымыздың келешегі қазіргі ұстаздардың қолында. Тәуелсіз ел атанып, төбемізге ту тігіп, тіліміздің мәртебесі артып, әлемге атымызды танытып жатқан кезеңде ұлттың, елдің болашағы - жас ұрпақ тәрбиесіне де мықты көңіл бөлінуде. Осы егеменді, тәуелсіз Қазақстанда өркениетке бастар жолдың бастауы мектеп десек, мектептің басты тұлғасы, жүрегі - мұғалім.
     Қорыта келгенде  айтарым мен өзімнің таңдаған мамандығыма үлкен жауапкершілікпен қараймын.  Ш.А.Амонашвилидің «Мұғалім өз сабағын сүймесе, оған өзі сүйсіне білмесе, ол шәкірт бойында да сүйіспеншілікті дарыта алмайды...» деген сөзін  үнемі  есте  ұстаймын. Себебі, мен әр сабағымда оқушымен қарым - қатынасты, олармен сөйлесу мәнерін, сабақты ашып түсіндіру, оқушы бойына қызығушылық туғызып, оқушының жан - жақты болуына үлкен көзқараспен, сенімділікпен қарауға  тырысып  келемін.  Кәсіби міндетім - бастауыш сынып мұғалімі болғандықтан балалардың ақыл - ой ынтасын көтеріп, білімді игеруге қабілеті мен дағдысын қалыптастыру, ойлау қабілетін шыңдау,  жан - жақты дамыған, жаңаша, тәуелсіз ойлай алатын, білімді жас жеткіншектер тәрбиелеп шығару. Жаңашыл ұстаз шәкіртке жан - жақты білім беріп қана қоймай, оны дүниежүзілік ақпарат кеңістігіне шығуға, яғни қатаң бәсеке жайында өмір сүруге тәрбиелеу - өзімнің басты парызым  деп  санаймын.

Кемелова  Айнура  Бауыржановна

Кәсіби міндетім - бастауыш сынып мұғалімі болғандықтан балалардың ақыл - ой ынтасын көтеріп, білімді игеруге қабілеті мен дағдысын қалыптастыру, ойлау қабілетін шыңдау,  жан - жақты дамыған, жаңаша, тәуелсіз ойлай алатын, білімді жас жеткіншектер тәрбиелеп шығару. Жаңашыл ұстаз шәкіртке жан - жақты білім беріп қана қоймай, оны дүниежүзілік ақпарат кеңістігіне шығуға, яғни қатаң бәсеке жайында өмір сүруге тәрбиелеу - өзімнің басты парызым  деп  санаймын.