Канспект Қазақстан тарихы пәні бойынша мақала "Ұлы жеңіс"

Жеңіске жеткен ерлерге құрмет.

Өздеріңізге белгілі Ұлы Жеңістің 70 жылдығы таяп келеді. Өткен жылы 25 қазанда Минскіде ТМД мемлекеттерінің басшылары бас қосқан үлкен дәрежелі отырыста, Ұлы Отан соғысы Жеңісінің 70 жылдығын, яғни 2015 жылды «Соғыс ардагерлерінің жылы»-деп атау жөнінде арнайы бірлескен қаулы қабылдады.
Осыған байланысты тәуелсіз мемлекеттер достығы аясында, барлық республикаларда жан-жақты дайындық жұмыстары жүргізілуде. Сол алапат соғыстың зардаптарын ата-аналарымыз, бауырларымыз жақсы біледі. Тек Қазақстаннан аттанған 1,5 млн. ағаларымыз бен бауырларымыздың жартысынан көпшілігі болашақ ұрпақтарының бақытын сақтап қалу үшін жан алысып, жан беріскен майдан даласында шейіт болды. Енді олардың ұрпақтары сіздер мен біздер ұрыс даласында ерлік көрсеткен аталарымыз, ағаларымыз бен бауырларымызды бір сәтте ойдан шығармай, ерліктерін болашақ ұрпаққа үлгі етіп, еске алып, мәңгілік дәріптеп, насихаттап өтуді өзіміздің және болашақ ұрпақтарымыздың мәңгілік парызы деп қарауымыз керек. Бұл ұлы жеңіс ұлтымыздың жадында мәңгі қалмақ. Соғысқа қатысушылар ерлігі еш ұмытылмас. Батыс шекарада алғашқы соққыны күтіп алған сарбаздар ішінде отандастарымыз да болған. Жауды жеңу үшін барын аямай, жеңісті жақындату жолында қаза болды. Соғыстың соңғы күндерінде де Қазақстаннан шыққан жауынгерлер алдыңғы шепте болған. Соғыстың шарпыған жалынын тоқтату жолында көптеген азаматтар қаза болды. Бірақ олардың алып берген жеңісін кейінгі ұрпақ бағалауда. Уақыт доңғалағын алға сүйреткен сайын Отан үшін от кешіп, елдің тыныштығы үшін жанын салған батырларымыздың қатары сиреп, ардагерлер азайып барады. Бүгінгі бейбіт өмірдің, тыныштың қадірін жиі-жиі еске алатын соғыс ардагерлері қандай құрметке болсын лайықты. «Қазақ халқы бойындағы Амангелді рухы өлген жоқ. Біздің даламызда ер жүрек жігіттер мен сәйгүлік аттар қашанда бар»- деген сөздерді Қазақ халқы дүние жүзінде қайсар халық екенін, қасық қаны қалғанша соғысатынын көрсетті. «Майданға жіберетін үйімізде ағам да, апамда жоқ, өзімді жіберіңіз» деп,сол кездегі Алматы медицина институтының талдырмаш студенті, қазақтың батыр қызы- Мәншүк Мәметова болды. Мәншүк Маметова Кеңесінің шығыс әйелдері ішінде бірінші болып «Ленин орденімен» және «Алтын жұлдыз» медалімен наградталған. Ұлы Отан соғысында аты аңызға айналған ер жүрек қаһарман, жаудан қаймықпаған, Кеңес Одағының батыры, белгілі жазушы Б.Момышұлы былай деген «Біздің үрейді жеңетін ең күшті қаруымыз бар, ол Отанға деген сүйіспеншілік».

Міне, бұл сол кездегі кеңес халқының ержүректілігі мен төзімділіктерін паш ететін, тарихта мәңгілік қалатын күн. Бұл күнді соғыстың алғы шептерінде қайсарлықпен шайқас жүргізіп, ерліктің сан үлгісін көрсеткен ардагерлер тойлайды. Бұл мейрамды өздерінің тылдағы қажырлы еңбегімен жеңісті шыңдаған, станоктың қасынан, егін даласында, күні-түні мал бағып, тынымсыз жұмыс істеген жұмысшылар, ауыл адамдары тойлайды. Бұл мейрамды біздің аяулы да даңқты әйелдеріміз - өздерінің әкелерін, ерлерін, ұлдарын және сүйіктілерін көзінен жасы сорғалай жүріп төзімділікпен күткен, олардың орнын жоқтатпаған аналар мен жұбайлар, қалыңдықтар мен қыздар тойлайды. Бұл мейрамды өздерінің әкелері мен ағалары қанын төгіп, жанын қиып бақытты өмірін қамтамасыз еткен Ұлы жеңістің құрдастары тойлайды. Ұлы Жеңіс күні елі мен жері үшін жанын пида еткен, туған-туысқандарына, жақын-жарандарына, туған жеріне, ауылына оралмай қалған қаһарман ерлерді бүкіл елі болып еске түсіреді. 
Бұл мейрамды бұрынғы кеңес одағына кірген 15 одақтас республика халқымен бірге, кеңес халқы неміс басқыншыларынан азат еткен Еуропа елдерінің Варшава мен Прага, Будапешт пен Бухарестің, София мен Белградтың, Париж бен Венаның, жер шарының басқа да көптеген қалаларының тұрғындары тойлайды. 

Неменеңе жетістің бала батыр, 
Қариялар азайып бара жатыр 
Бірі мініп келместің кемесіне, 
Бірі күтіп, әнеки, жағада тұр, - деп тебіренген Мұқағали мұңында жұмырбасты пенде үшін теңдессіз құндылық ұрпақаралық қимастық, сыйластық сезімдері мөлдіреп тұр. 

Мың жылда бір-ақ көрінетін кометалардай сыры да, сезімі де терең, тұңғиық дана тұлғаларымыз фәни өмірден баз кешіп, бақилық болып жатыр. Әйтсе де, Баубек пен Бауыржан батырлығы, Әлия мен Мәншүк ерлігі, Қаныш пен Әлкей білімі, Мұхтар мен Ғабит, Ғабидендердің үні, Дінмұхаммедтің парасаты – бүгінгі ұрпаққа өнеге... 

Жітіқара қаласы «№9 орта мектеп» КММ-нің тарих пәнінің мұғалімі Малайдарова Гульзат Нұрболатқызы