- 09.04.2014
- 6016
- 8
МБОУ «Дубенка велень средней общеобразовательной школа»
ЧОКШНЕ
Сон вечксь, сонзэяк вечксть
Ютавтызе: тиринь келень ды литературань
тонавтыцясь Косолапова В.П.
Чокшнесь ушодови С. Есенинэнь стихотворениясонть «Чуро вирне. Паксянь васолкст».
Морави моро «Вальмам велькссэ ковось»
Тонавтниця: Есенин… Кие а содасы те лементь? Молить иетне, полавтовить ломантне, лиякстоми эрямось, но эрьва шкань ловныцясь вастови Есенинэнь Поэзиянзо марто ды пингензэ прядовомс нолдасы сонзэ эсь седейс. Ламоксть снартнесть чарькодемс те а ёвтавиця вечкеманть тувталонзо. Шкась невтизе: кода ине поэт, Есенин маштсь эсь стихтнень вельде пек домкасто совамо ломанень ойменть потс, козонь кодаяк лиякс а совават. Седеймарямо, певтеме вечкема весементень, мезе ули масторонть лангсо, - те Есенинэнь Поэзиянть зэмезэ, юрозо.
Ловнови стих «А якамс якстердиця курова»
Тонавтниця: Сергей Александровичень эйкакшпингезэ ютась Константинова (тесэ чачсь) ды Спас – Клепики (тесэ прядсь школа) велетнесэ. Кемгавксово иесэ сась эрямо Московов. Тиринь велесь, сонзэ ломантне, малавикстнэ зярдояк эзть тукшно мельстэнзэ. Те неяви весе .
Есенин пек ероковсто невти ломанень ежомарямотнень. Сонзэ стихтнесэ сельмс каятыть кецямонь гайтть, седеень ризнэмат, майсемат – мелявтомат, нусманя арсемат. Те весемесь виевкстэ токи седей, сыргозти ловныцянть оймензэ! А стяко ламо стихензэ теевсть морокс.
Моравии морось «Килейбулынесь лопанзо певерди»
Тонавтниця: Алкуксонь поэзиясь лиси ойместэ апак учо, теке пандо алдо лисьмапрянь ведесь. Лиси – ды талакавты седейть, теди ловныцятнень паро тевс, дивавты эсь мазычисэ.
Истямо Сергей Александровичень творчествазояк. Содыль ли кияк 1914 иень тундостонть, зярдо сон, Рязань енксонь церынесь – самай се поэтэсь, кона велявтсынзе рузонь классической поэзиянь ушоткстнэнь, туи реализмань, народностень кияванть, поладсы А.С. Пушкинэнь славанзо.
Тонавтниця: Кортнить, эрьва ломаненть ули эсензэ тундозо, сон свал кирди эйсэнзэ эсь лецтнемасо, прок лембе кизэнь весь кивчкаиця менель тештнень. Сергей Есенинэнь туртов истямокс ульнесь 1915 иень тундось.
- Сестэ, - лецтни поэтэсь эсь биографиянзо, - лиссь «Радуница» книгам. Зярыя стихть кучинь Петербургонь журналтнэс, ды ответэнь апак получа, сыргинь тов монсь.
Сыргась ярмактомо, мартонзо сюпавчись ульнесь вейке – стихень тетрадесь. Поездэнь вальматнень пачк тензэ неявсь Россиясь: сэрей менель, келей паксятды вирть, модаскукорьгадозь кудот. Косо – бути васоло аволясь пулосонзо варма мельга сокань ускиця берякшке лишмине…
Тонавтниця: Петербургсо поэтэсь вастови Александр Блоконь марто. Тона кунсолось стихензэ. Нама, сетнень, конат сермадозь еще эйкакш порасто ды совасть васенце книгасонзо.
Александр Блок некшнесь эрьва кодат поэт: покшткак, сермадомо ансяк ушодыцяткак. Сонзэ стака ульнесь дивавтомс. Сергей Есенин ялатеке дивавтызе. Блок мейле сондензэ сёрмады: стихензэ ванькст, гайтевть, весе сынь – седейстэ.
Ловнови стих «Сияждыця телень яннэ»
Тонавтниця: Вечкемадо зяро стихть казсь тенек инее поэтэсь Сергей Есенин. Вере пазось макссь тензэ стихень складямонь покш ёрокчи, штобу сон мораволь Вечкемадонть, Тейтерь – аватнеде. Сергей Есенин пек вечкелизе сазоронзо, весе эрямонзо перть тенст лездась.
Ловнови стих «Шура сазоронтень»
Поэтэсь седейшкава вечксь аванзо.
Ловнови стих «Серма аванень».
Тонавтниця: Кить жо ульнесть лия тейтерь – аватне, кинь уцяскаст сюлмавсть поэтэнть уцясканзо марто? Теде ёвтневи ансяк поэтэнть ледстнематнесэ.
Кодгеменце иетнень прядовомсто печатазельть С.Есенинэнь серманзо, конань кучизе М.П.Бальзамованень. мезе жо сонзэ сюлмась те тейтеренть марто?
Тонавтниця: Константиновасо Мария Бальзамовань марто Есенин ульнесь ансяк зяро – бути чить, мейле тейтересь тусь важодеме Рязанщинань велесэ тонавтыцякс. «Те тейтересь – седеймарямонь ды чевте обуцянь коряс, озномань мельтнеде башка, теке тургеневской Лиза», - пачтясь поэтэсь эсь оянстэнь Панфиловнень 1912 иень августсто.
Московсто Сергей кучни сонензэ сермат, ансяк Мария а капши отвечама. Кавто иень ютазь сермань кучнемась прядовсь. Ванна сермасто саевксэсь, кона сермадозель 1913 иень декабрянь 10 – це иестэ:
«Маня! Минек ютксо весе икелень отношениятнень стувтозь, мон пшкадян тонеть кода ломанентень6отвечат – арась монень? Икелень святой вечкеманть мельсэ кирдезь, мон энялдан, иля чатьмоне. Бути тон вечкат уш лиянь, мон а карман тонеть мешамо. Мон жо уцяскаван Тонь кис».
Тонавтниця: 1914 иестэ Московсо эрямсто Сергей Есенинэнь никскармась улеме Анна Изряднова. Эрясть урьвакстомаст апак сермадсто ды апак венча. Анна важодсь корректорокс «Товарищество И.Д.Сытина» типографиясонть, косо содавиксэкс стихень складицянть марто. Зярдо анна чачтась цера, Сергей ульнесь мелявтыця тетякс. «Зярдо мон велявтынь кудов, весемесь парсте урядазель: киякстнэ шлязь, пецькатне уштозь, рамазелть ламбамо прякинеть, учось. Эйкакшонть лангс ваномсто кортась: «Ванна монгак тетя». Куроксто тонадсь эйкакшонтень, кармась вечкемензэ, нурсесь, морась тензэ морот. Нурсемстэ моньгак кармавтсь морамо»…
Тонавтниця: Колмо ковонь ютазь Есенин сыргась уцяскань вешнеме Питерэв. Велявтсь овсе лия ломань, куш икеле ладсо ульнесь вечкицякс, мелень явицякс. Тукшнось ды велявтнесь…
Тонавтниця: 1917 иестэ жо васенцеде урьвакстсь закононь коряс – Зинаида Рейхень лангс. Поэттэнть Зинаидань ледстнематненьванстызе Есенинэнь сазорозо. Куломадо икеле Сергей сакшнось Аннанень простямо. Сон марясь куломанть малавгадоманзо ды энялдсь ванстомс церанзо.
Зинаида Рейхень ды Сергей Есенинэнь ульнесть кавто эйкакшост – цера ды тейтерь. Сон пек вечкелинзе нинзэ ды эйкакштнэнь. Поэтэнть жо ульнесть певтеме ялганзо, кинень сон эрявсь иредьстэкс ды кинь мартояк аладицякс. Эдь Есенинэнь лемензэ марто ледстневить сынст лемтнеяк. Минек туртов сон – ине поэт, Зинаидань туртов жо, паряк, ульнесь берянь мирдекс. 1921 иень октябрянь 5 – це чистэ Орёл ошонь народной судось сынст явинзе.
Есенин пек мелявтсь тень кувалма. Рейх жо венчась Мейерхольднэнь.
Тонавтниця: Омбоце нинть Айседора Дункан марто теевсь содавиксэкс 1921 иень сексня. Айседоранень эсь вечкеманть Есенин невтсь пек а вечкетьстэ: лиясто, марявсь, вечксы певтеме, ломань пингстэ овсе эзизе кадно ськамонзо. Зярдо жо кадновильть кавонест,позорясь эйсэнзэ а мазый валсо, лиясто мик вачкодилизе. Те шкастонть Айседора ульнесь пек цидярдыцякс ды седеймарицякс, эрьва кодамо ладсо снартнесь сонзэ оймавтомс.
Айседора Дункан пек содавиксэль.сондензэ сермадозь ламо ледстнемат, конат а молить вейке – омбоце ёнов.
Тонавтниця: Мель явовты Айседорадо Н.Толстаянь – Крандиевскаянь ледстнемась: «Лиясто марявсь – пек содавикс те авась, мезде сон сизекшнесь, паряк, арси Россиядонть, революциядонть, Есениндэ кода катонь кандыця иредьстиця симемапельденть, кода эрямонь мирсэнть меельце ярсамопелентень толонь кондямо таньшкавтомадонть?
Дунканнэнь ульнесть 45 иеть. Лангс ваномс авась эште пек сельмс каявицяль, ялатеке редявсь уш есениннэнь меельце вечкемась».
Айседора эзь кеме поэтэнтень, вешнесь, зярдо орголесь эйстэнзэ, севнось ды мик порксась весементь, мезесь понгонесь кедензэ малас. Дункан панжинзе Есениннэнь Европанть ды Американть, сон жо арсесь ансяк Россиядо. 1923 иень августонь 3 – це чистэ Есенин велявтсь Московов. Айседора тукшнось гастролев Кисловодскоев, поэтэсь жо кундась стихень складямо.
Тонавтниця: Сонензэ лездыцякс ды оякс теевсь Галя Бениславская, од, раужо кувака черьбуло марто, сельмечирькензэ раужот, сельмензэ валдо – пижеть. Галя лездась поэтэнтень стихень нолдамонь, ярмактнень марто сюлмавозь тевтнесэ. Сон пек вечкелизе поэтэнть ды стихензэ, ды куш Есенин уш налкстакшнось Дункадо, арсесь явомадо, Бениславкаянь эзь вечке. «Вечкевикс Галя! Тынь монень малавикст кода оя, ансяк мон овсе а вечктядызь, кода аванть С.Есенин». те сермадовксонть мартоконевнесь ванстови литературной музеень архивсэ.
Тонавтниця: Московсо Ваганьковской калмазырьсэ Есенинэнь калмонзо маласо Галина Бениславскаянь сельмс а прыця калмозо. Авась маштызе прянзо поэтэнть калмонзо лангсо, эдь эрямось сонзэ туртов емавтызе смустензэ…
Галина лездась Есениннэнь явомс Аседорань марто. Ялтав, косо ульнесь Айседора, сась телеграмма: «Сермат, телеграммат Есениннэнь илядо кучне. Сон Монь марто, ды Тыненк зярдояк а велявты. Галина Бениславская». Мик тешкстазель, буто Есенин соды, мезе сермадозь телеграммасонть.
Тонавтниця: Московов велявтомадо мейле Айседора ламо важодсь: анокстась эсензэ кавто спектаклят, ды школасо эйкакштнэнь тонатомантень. Есениндэ косояк эзь ледстневе. Сонзэ куломадо Дункан кармась содамо Парижсэ улемстэ. Эзть юта кавто иетькак, сонськак чавовсь.
Омбо масторсто велявтомадо мейле, С. Есенин теевсь содавиксэкс актрисанть Августа Миклашевскаянь марто. Сексесь ансяк ушодовсь. «Мон карман Тынк туртов стихень складямо», - весть мерсь поэтэсь. Кие эзизе ловно «Любовь хулигана» пусмостонть стихтнень?!
Миклашевская ды Дункан мик весть вастневсть актрисанть Лиза Александровань кудосо. Айседора сакшнось Августа лангс варштамо.
Тонавтниця: - Весе Европась соды, што Есенин ульнесь монень мирдекс ды оякс – васенцеде моразевсь вечкемадо – тыненк, арась, те монень! Тосо ули берянь стихотворения: «Ты такая же простая, как все»…Те тыненк!» - истят валтнэ кадовсть Августа Миклашевскаянь превс. Тевастовомадонть жо сон сермады пейдезь, эдь Айседора, Августань валонзо коряс, пек мельстуиця авадь валдонзо а кода покордавомс.
Августа пек парсте чарькодсь Сергеень. «Мон неинь, кода сонензэ стака, берянь, ськамонзоль. Чарькодинь, чуман монгак, ламо сонзэ вечкицятнеяк. Кияк эйстэнек сонензэ алкукс эзь лезда. Сон снартнесь малавгадомс миненек. Ансяк мартонзо стакаль, ды минь тукшнынек ве енов, каднынек ськамонзо».
Тонавтниця: Больницяс мадемадо икеле, поэтэсь совсесь Миклашевскаянень ды энялдсь совсемадо.
Августа вестькак эзь сакшно, арасель мелезэ тосто вастомс Есенинэнь колмоце нинть Софья Толстаянь.
Софья Толстаянь марто Есенин теевсь содавиксэкс 1925 иень мартсто, июньстэ жо саизе мелензэ урьвакстомс инее писателенть пек превей, ламонь содыця нуцьканзо лангс.
Толстая марто сынь урьвакстсть 1925 иень сентябрянь 18 – це чистэ. Софья теевсь тензэ алкуксонь лездыцякс, оякс, меельце веякемакс.
Од эрямось жо эзь лисе, сезевсь кажовсто. Вечкемань морось кадовсь апак мора…
Поэтэнть марто рядцек ульнесть ламо тейтерь – ават, сынст эйстэ эрьвась вечксь эсензэ ладсо, сонгак вечксь сынст.
Сергей Есенин эсь стихтнесэ кемекстызе, што мастор лангсо ули вечкема.
Тонавтниця: Есенинэнь поэзиянзо содасызь ламо масторсо ды вечксызь миллионт. Моронзо морыть сцена лангсояк, праздник чинь келей столь экшсэяк. Сон лездась аволь вейке ломаннень сехте стака шкасто, сестэ, зярдо эрявсь вал.
Сонзэ стихтнесэ сонсон, те валось, ульнесь. Эйстэнзэ мольсь а евтавикс, а чарькодевикс вий,конась талакавтсь, таймаскавтсь, кепедсь, токшесь витьстэ седейс, кандсь тозонь нусманя, сэпей рискс ды теке марто вечкема, кемема, вельмема – валдо.
Тонавтниця: Ютыть кемень, комсь, ведьгемень, сядо, сядодо ламо иеть, стувтовить (паряк) сеть шкатне, зярдо сонзэ стихтнень ловномаст кис пансесть университетстэ, пекстнесть тюрьмас, нардавить ломо «покш» фамилият, конат лездасть тенень. Ансяк кадови, пингеде пингес карми максомо валдонзо – поэзиянзо ды а мадии, зярс эрить минек народтнэ, вейке тештесь, конань лемезэ, истямо лембе ды истямо нурькине – Сергей Есенин.
Морави Моро «А янксян, а тердян, а авардян»
Ловнови стих «Сексень экшесэнть истямо паро».
Рабочие листы
к вашим урокам
Скачать
Чокшнесь ушодови С. Есенинэнь стихотворениясонть «Чуро вирне. Паксянь васолкст». Морави моро «Вальмам велькссэ ковось» Тонавтниця: Есенин… Кие а содасы те лементь? Молить иетне, полавтовить ломантне, лиякстоми эрямось, но эрьва шкань ловныцясь вастови Есенинэнь Поэзиянзо марто ды пингензэ прядовомс нолдасы сонзэ эсь седейс. Ламоксть снартнесть чарькодемс те а ёвтавиця вечкеманть тувталонзо. Шкась невтизе: кода ине поэт, Есенин маштсь эсь стихтнень вельде пек домкасто совамо ломанень ойменть потс, козонь кодаяк лиякс а совават. Седеймарямо, певтеме вечкема весементень, мезе ули масторонть лангсо, - те Есенинэнь Поэзиянть зэмезэ, юрозо. Ловнови стих «А якамс якстердиця курова» Тонавтниця: Сергей Александровичень эйкакшпингезэ ютась Константинова (тесэ чачсь) ды Спас – Клепики (тесэ прядсь школа) велетнесэ. Кемгавксово иесэ сась эрямо Московов. Тиринь велесь, сонзэ ломантне, малавикстнэ зярдояк эзть тукшно мельстэнзэ. Те неяви весе
6 662 973 материала в базе
Настоящий материал опубликован пользователем Косолапова Вера Павловна. Инфоурок является информационным посредником и предоставляет пользователям возможность размещать на сайте методические материалы. Всю ответственность за опубликованные материалы, содержащиеся в них сведения, а также за соблюдение авторских прав несут пользователи, загрузившие материал на сайт
Если Вы считаете, что материал нарушает авторские права либо по каким-то другим причинам должен быть удален с сайта, Вы можете оставить жалобу на материал.
Удалить материал
Ваша скидка на курсы
40%
Курс профессиональной переподготовки
500/1000 ч.
Курс повышения квалификации
72/180 ч.
Курс профессиональной переподготовки
300/600 ч.
Курс профессиональной переподготовки
300/600 ч.
Мини-курс
4 ч.
Мини-курс
10 ч.
Мини-курс
3 ч.
Оставьте свой комментарий
Авторизуйтесь, чтобы задавать вопросы.