Маңғыстау облысы Мұнайлы ауданы
№6 орта мектебінің
қазақ тілі мен әдебиеті пәні мұғалімі
Отарбаева Қарлыға Дуйсеновна
Менің
педагогикалық ұстанымым
«Еліміздің
ертеңі – бүгінгі жас ұрпақтың қолында, ал, жас ұрпақтың тағдыры – ұстаздардың
қолында.»
Елбасы Н.Назарбаев.
ХХІ ғасырдың ғажайып жетістіктерін игеру- білімді, іскер, жас ұрпақтың
еншісінде болса, жас ұрпақтың интеллектуалдық қабілетін дамыту, тума талантының
көзін ашу, саналы , парасатты, білімді азамат етіп шығару- ұстаздардың міндеті.
Сол ауыр міндетті жүктеп жүрген ұстаздың бірі болғаныма мақтанамын.
Мақтанатыным: осы мамандығым арқылы өзімнің қоғамға қажет екенімді сезінемін.
Ақырын жүріп анық бас,
Еңбегің кетпес далаға.
Ұстаздық еткен жалықпас,
Үйретуден балаға, - деп Абай атамыз айтқандай, ұстаз – ұлы тұлға.
Ұстаз болу, оқушыларыма жақсы тәрбие беру, менің бала
кезімнен арманым еді. Мен жай ғана ұстаз емеспін, қазақ тілі
мен әдебиеті пәнінің мұғалімімін. Оқушыларыма сөйлеу мәдениетін, сөз әдебін үйретемін.
Ұлттық тәрбиенің де негізі тілден басталады. Тіліміздің бүгінгі
мен ертеңін сөз еткенде, үміт артатынымыз- келешек ұрпақ, қазіргі кезде
біз тәлім-тәрбие беріп отырған оқушылар. Кез келген ұстаздың білім мен
тәрбие беру үдерісінде алдына қойған өмірлік ұстанымы болады. Менің ұстанымым- іздену,
табу,нәтижеге жету. Ал, ұстаз үшін нәтижеге жету- шәкіртінің білімді болуы
ғана емес, білімді өздігінен алуы және алған білімін қажетіне қолдануы.
Нәтижеге жеткен соң,болдым деп тоқтап қалмай, әрі қарай қайтадан ізденуі тиіс.
Қытай халқының ұлы ұстазы, философы, саяси ойшылы Конфуций – «Адамдар
үшін адал қызмет ете алдым ба? Мінез - құлқым жұртқа жайлы ма? Достарыммен
қарым-қатынаста адалмын ба? Маған үйреткенді қайталап айтып, өнеге алып отырмын
ба?» деп мен өзімнен күніге үш рет сұраймын - деген екен. Мен де өзіме
«оқушының пәнге деген қызығушылығын арттыра алдым ба? Оқушымен қарым-қатынас
мәдениетін қалыптастыра алдым ба? Бала бойындағы бұғып жатқан тылсым талантты
таба алдым ба?» деген сұрақты күн сайын қоямын. Өйткені, оқушының болашағына
бағдар беретін-ұстаз.
Жеке тұлғаны қалыптастыру, болашақтың
білімді, саналы азаматын тәрбиелеу мақсатында «
Сабақта жаңа технологияларды пайдалану арқылы оқушыларды шығармашылыққа баулу» тақырыбы
бойынша жұмыс жасап жүрмін. Әрбір оқушының шығармашылық қабілетін қайрап,
тереңдете түсуде мектепте жиі өткізілетін ақын-жазушылармен кездесу, поэзия кештері,
Абай, Махамбет, Мағжан оқулары т.б оқушылардың ізденісіне жол ашады.
Оқушының ізденісі жеміссіз болмақ емес. Мұғалім жұмысты дұрыс ұйымдастырған
жағдайда оқушы шыңдалып, белгілі бір жетістіктерге жетері сөзсіз. Аудандық, облыстық,
республикалық олимпиадаларда орын алып жүрген шәкірттерім: Елмағамбетоав Гүлзада, Нұхы Жамбыл соның дәлелі. Шәкіртсіз
ұстаз - ағашсыз орманмен тең. Орман ағаштарымен көрікті болса, ұстаз
шәкірттерімен көрікті. Мен шәкірттерімді әрдайым мақтанышпен айтып жүремін.
Әрбір ұстаздың мақтан етер шәкірті болса, онда еңбегі зая кетпегені деп
білемін. Мен өз мамандығымды, шәкірттерімді жақсы көремін, сыйлаймын,
құрметтеймін.
Ойымды мына өлең жолдарымен қорытқым келеді:
Озып келмес тұлпарың да бапталмай,
Үйреткенің санасына сақталмай.
Дайындадым, шаршамадым, жыл бойы,
Еңбегім еш қалған емес ақталмай.
Шәкірттерім біліммен шарықтады,
Талпыныс пен ізденістен жалықпады.
Олимпиада, сайыста, фестивальда
Жүлделі орын алып қалықтады.
Ойлаған мақсаттар мен арманыма
Қуанамын қол жеткізе алғаныма.
Көргенде жеңістерін шәкірттердің
Мақтанамын мен ұстаз болғаныма.
Ұстаздық- ұлы есім ғой, қашан дағы,
Ұстаздың орнын ешкім баса алмайды.
Алты алаш жиналғанда төрді ұсынған
Ұстаздан озып ешкім аса алмайды.
Оставьте свой комментарий
Авторизуйтесь, чтобы задавать вопросы.