На тему "Құстарға үйшік жасаймыз"

Ұйымдастырылған оқу іс-әрекетінің технологиялық картасы.

Бекітемін: __________

Күні:

Тобы: Еркемай

Білім беру саласы: Таным

Бөлімі: Құрастыру

Тақырыбы: «Құстарға үйшік жасаймыз» (қағаздан құрастыру)

Мақсаты: заттарды қағаз материалдарынан құрастыруға үйрету; құстар туралы түсінік пен олардың адамға деген пайдасы туралы ойларын жетілдіру; құстарға қамқор болуға тәрбиелеу; іскерліктерін дамыту.

Қажетті құрал-жабдықтар: текшелер жиынтығы: ені мен ұзындығы бірдей кірпіш, үй жануарлары, ойыншық мысық, құстарға ұя, «Жыл құстары» өлеңі.

Билингвалды компонент: құс-птица, үйшік-домик, табиғат-природа.

Іс-әрекет кезеңдері	Тәрбиешінің іс-әрекеті	Балалардың іс-әрекеті
Мотивациялық-қозғаушылық	Суретпен жұмыс Тақтаға күз мезгіліне байланысты суретті іліп, сұрақтар қояды: -Қазір қандай жыл мезгілі? -Күздің қандай белгілерін білесіңдер? -Қандай жыл құстарын білесіңдер?   Балалардың жауаптарын тыңдап, толықтырады: -Жыл құстары жылы жаққа ұшып кетеді, көктемде қайта ұшып келеді де, өзінің сайраған дауыстарымен адамдарды қуантады. Сергіту сәті «Құстар сияқты ұшайық» жаттығуы Тәрбиеші балалармен бірге құстардың ұшып жүрген сәттерін еліктеу арқылы жасап жүреді. Тәрбиеші ойыншық мысықты алып көрсетіп, оның құстарды аңдып жүргенін айтады.Балаларды құстарға ұя жасап, көмектесуге шақырады.	Суретті тамашалайды. Сұрақтарға жауап береді. Тәрбиешінің түсіндірмесін тыңдайды. Ұшып жүрген құстардың қимылын келтіреді. Құстарды мысықтан құтқару үшін оларға ұя жасап беруге келіседі.
Ұйымдастыру-іздестіру	Үлгі суретпен жұмыс Тақтаға ұяның үлгілерін іліп, көрсетеді.Сұрақтар қояды: -Мынау не? -Ұя не үшін керек? Балалардың жауаптарын тыңдап, толықтырады: -Құстардың ұясы болу керек, ұя оларға үй, пана болады.Құстар тұмсықтарымен неше түрлі сым, талдың шыбықтарын алып кетіп, ағаш бұтақтарының арасына қойып, ұя құрастырады.Ал ұялары жылы, мықты болу үшін олар жіптер мен мақтаны тауып, тесіктерді бітейді.Біз ұяны қағаздан құрастыруды үйренеміз.  Жұмысқа керек заттармен таныстырады. «Қағаз қандай» дидактикалық жаттығуы Балалардан қағаздың қандай қасиеті бар екенін сұрайды, жауаптарын толықтырады: -Қағаз жыртылады, уқаланады, бүктеледі, суланады, жанады, ұмаждалады. Саусақтар серуені -балалардың алдарында ұяның макеті тұрады; -қағаздан ұзын,қысқа етіп, жыртып алады да желім жағып, дайын макеттің үстінен (шетіне шықпай) жапсырады. Астауға құстарға арнап жем салып қоюды тапсырады.	Ұяның үлгілерін тамашалап, сұрақтарға жауап береді. Тәрбиешінің түсіндірмесін тыңдайды. Қағаздың қандай қасиеттері бар екенін айтады. Орындарына отырады, тәрбиешімен бірге ұя жасауға кіріседі. Астауға жем салады.
Рефлексивті-түзетушілік	Сұрақтар қойып, тақырыпты қорытады: -Құстарға не жасап бердік? -Ұяны неден жасадық? -Астауға не саламыз? Тәрбиеші үнтаспаны қосып, дала құстарының дауыстарын тыңдатады. Балаларды мадақтап, ұйымдастырылған оқу іс-әрекетін аяқтайды.	Сұрақтарға жауап беріп, құстардың дауыстарын тыңдайды.

Күтілетін нәтиже:

Нені білу керек	құстар туралы түсінік пен олардың адамға пайдасы туралы.
Нені игереді	біріктіру және қалпына келтіру, қағазды жыртып, жапсыру іскерліктерін.
Нені біледі	құстарға қамқор болуды.