План конспект урока по крымскотатарскому языку за 8 класс на тему "Сойдаш азалы джумлелер."

Дерснинъ мевзусы: Сойдаш азалы джумлелер.

Дерснинъ макъсады:

1) Талебелерге сойдаш азалы джумлелерни анълатмакъ;

2) Талебелернинъ сёз байлыгъыны, нутукъ инкишафыны артырмакъ.

Дерснинъ донатувы: джедвеллер, дерсликлер, карточкалар, схемалар.

Дерснинъ кетишаты:

I.Тешкелий къысым:

Оджа: Селям алейкум балалар! Сизлерни корьгенимден пек мемнуним!

Талебелер: Алейкум селям,бизде сизни корьгенимизден пек мемнунмиз.

Оджа: Ким бугунь невбетчи?

Талебелер: Керим.

Оджа: Керим,бугунь дерсте ким ёкъ?

Талебелер: Бугун дерсте Хаиров Рамазан ёкъ.

Оджа: Сагъ ол отур. Дерске азырланынъыз. Бугуньки саныны дефтерлеринъизге язынъыз.

II. Эв вазифесини сорав:

III. Янъы мевзуны анълатув: бугуньки дерсимизнинъ мевзусы «Сойдаш азалы джумлелер»

1. Джумледе бир сой синтактик вазифени беджерип кельген ве бир сой суальге джевап берип кельген джумленинъ бир сой азаларына сойдаш азалар дерлер. Джумленинъ сойдаш азалары арасында тизмели багъ мунасебети олса да, лякин джумленинъ башкъа азаларына олар табилеме багъ вастасыне бирикип келирлер. Меселя: О, сабадан берли одаларны, ашханени джыйштырмакъта. Юкъарыда берильген мисальден корюне ки, сойдаш азалар бири – бирине бойсунмаслар да, лякин эписи хаберге бойсунып келирлер.

Сойдаш азалар бир сой сёз чешитине менсюп олур ве озьара багълайыджысыз ве багълайыджылар вастасынен багъланырлар.

1. Къошма багълайыджылар: ве, эм, -нен, иле, (ве манасында) де. Меселя: Машина энишке енгиль ве тез кете. Асан кете эм тюшюне.

2. Айырыджы багълайыджылар: я да, я …, я да, де … де, ёкъса, кя…, кя, яхут. Меселя: Эдем козьлерини де юма, де ача. Онынъ къалтырагъан ве эеджанлы сеси кя болюне, кя юкселе.

3. Къаршылыкъ багълайыджылар: амма,лякин, факъат. Меселя: Рустем яваштан одагъа кирди, амма сонъ бирден токъталды.

4. Тенъештирме багълайыджылар: исе. Меселя: Къышта сувукъ, язда исе сыджакъ ель эсип тура.

5. Инкяр багълайыджылар: не …, не (де). Меселя: Не комюр оджакъ идаресинде, не де комбината бу талапны эда эталмадылар.

2) Талебелер келинъиз бу къаиде устюнден лугъат ишини язайыкъ.

Багълайыджы – союз

Тизме багълайыджы – сложный союз

Багъ вастасы – средство связи

Къошма багълайыджы – соединительный союз

Айырыджы багълайыджы – разделительный союз

Къаршылыкъ багълайыджы – противопоставительный союз

Тенъештирме багълайыджы – сравнительный союз

Инкяр багълайыджы – отрицательный союз

Умумийлештириджи сёз – обобщающее слово.

3) Балалар келинъиз 250-нджи ишни беджерейик.

Эгер тойда Ашыр устанынъ чалгъы такъымы – Аппаз уста, Меджит уста, Мимиш уста олсалар, мен чалгъыджылар янында саатлернен турам. Кимерде Ашыр устагъа тым-тымны сымарлайлар. Бу музыканы яраткъан адам – Ашыр устанынъ озю, яни «Тым-тым»нынъ муэллифи, бу улу кеманеджи. Бизим композиторларымыз, музыкашынасларымыз, чалгъыджыларымыз бу хусуста акъсыз оларакъ сусып кельдилер. Не себептен… белли дегиль.

ДЖУМЛЕНИНЪ СОЙДАШ АЗАЛАРЫ

Араба тегиз ёлдан тез ве енгиль кете эди.

Джумленинъ сойдаш азалары:

1. Бир сой суальге джевап берелер.

2. Бир сой джумле азасы олып келелер.

3. Бир джумле азасына бойсунып келелер ве оны изалайлар.

4. Интонация я да тизме багълайыджыларнен бирикип келирлер.

4) Келинъиз энди «Умумийлештириджи сёзлернен кельген сойдаш азалы джумлелер»нен таныш олайыкъ.

Умумийлештириджи сёзлер сойдаш азаларнынъ манасыны айдынлаштырыр ве сайып косьтерир.

1. Эгер умумийлештириджи сёз сойдаш азаларындан эвель кельсе, умумийлештириджи сёзден сонъ эки нокъта къоюлыр. Меселя: Бу джанаварнынъ зеэри нефесинден этрафта эр шей сараргъан: инсанларнынъ юзьлери айванларнынъ терилери, чёллер, дагълар, атта кок де сары киби корюне эди.

2. Эгер умумийлештириджи сёз сойдаш азаларындан сонъ кельсе, умумийлештириджи сёзден эвель тире( - ) къоюлыр. Меселя: Сынаяткъан агъачларнынъ давушлары, къуршун давушлары, яралыларнынъ инълеви – эписи бир ерге къошулды.

УМУМИЙЛЕШТИРИДЖИ СЁЗЛЕР

Умумийлештириджи сёзнинъ ери

Мисаллер

Токътав ишаретлери

Джумленинъ сойдаш азалары огюнде

Азбарда чешит чечеклер осе эди: падие, акъшам сефа, къаранфиль, фесильген, къадифе чечек, гуль.

Сойдаш азалардан сонъ

Талебелер, оджалар, анна-бабалар – эписи мектеп азбарына топлаштылар.

-

Сойдаш азалар огюнде ве олардпн сонъ

Азбарда оськен чечеклер: пападие, къаранфиль, акъшам сефа – эписи ачкъанлар.

-

Иза: Умумийлештириджи сёзлер джумленинъ сойдаш азаларынен берабер бир сой вазифени беджерелер ве бир сой суальге джевап берип келелер.

IV. Пекитюв.

1. Бугунь дерсте насыл мевзуны кечтик?

2. Дерсте насыл суаллерни бакъып чыкътыкъ?

3. Сойдаш азалар озьара насыл багъланалар?

V. Эв вазифесини берув: Кунделиклеринъизни ачып эв вазифесини язынъыз. 252-нджи иш.