ПОКШЧИ "«СВАЛ ГАЙГЕЗЭ ЭРЗЯНЬ КЕЛЕСЬ»

«СВАЛ ГАЙГЕЗЭ ЭРЗЯНЬ КЕЛЕСЬ»

1 -це ветицясь: Шумбратадо, вечкевикс ялгат! Течи минь тешкстатано Эрзянь келень чи.

2 -це ветицясь: Мекс течи, чадыковонь 16 – це чистэ?

1 -це ветицясь: Те чистэнть чачсь ине эрзянь учёноесь Анатолий Павлович Рябов. Те ломаненть а онкставишка путовксозо минек тиринь эрзянь келенть вельмевтемантень, кастомантень, сюпалгавтомантень.

2 -це ветицясь: Ёвтатано те Покшчинть кувалма седейшкавань поздоровт ды  тердтяно улеме азоркс тиринь келентень алтазь вастовомасонть.

1 -це ветицясь: А келесь –

                        Минек эрзянь келесь!

              Морак морот ды сермадт стихть.

              Сон ней гайги масторонть келес

                       Эйсэнек пек васов вети.

·        Лисить ушодомань классонь тонавтницятне

1. Тарасова Люба

Мон чачинь масторсо,

Косо мазыйть виртне,
Косо сюпав паксят,
Косо валдот читне.
Косо эрить эрзят,
Кортыть эрзянь кельсэ,
Важодить ды оймсить,
Тонавтнить ве мельсэ.

2. Русяев Илья

Эрзянь кель, тон – валскень зоря,
Норовжорчонь гайть.
Тон певтеме мазый моро,
Валскень росань байть.

3. Митина Ангелина

Тон бойкасто чуди лейне,
Тундонь валдо сад.
Кизэнь коське шкасто пельнекс
Монень эряват.

 4. Ионова Настя

Эйстэть кортан седейшкава,
Тонеть свал кецян.
Эрзянь кель, валдо киява
Мартот мон туян.

 5. Митина Ангелина

Эрзянь келесь сех вечкевикс,
Сехте мазый ды питней.
Тон содак эсь тиринь келеть
Ды сонензэ путт седей.

6. Пиянзина Мария

Сон тонавты тонь эрямо,
Тонавтнеме ды морамо.
Сон тонеть прок тиринь ава,
Касты эйсэть седейшкава.

7. Сошникова Яна

Мон пек вечкса эрзянь келем,   

Эрзянь тейтерне монь лемем

А вечкан мон истят ломанть,

Конат стувтнить эсест келест.

·        МОРО «Кенярксов эйкакшчи»

-  морыть ушодомань классонь тонавтницятне

8. Палагин Владислав

Зярос гайги эрзянь валось -                      

Семс монгак эрян,                                   

Ялгатненень - шабратненень          

«Шумбрачи» мерян.

9. Алякина Алёна

Чачи келем кулындеряй,

 Мерть, монгак кулан.

 Сонстемензэ мон а эрян:

 Мезекс маштован?...

10. Назаров Артём

Эрзянь келесь сех вечкевикс,     

Сехте мазый ды питней.

Тон содак эсь тиринь келеть

Ды сонензэ путт седей.

11. Борсуков Артём

Ков аволинь туе –

Седеезэнь путса

Тиринь келем, эрзянь келем

Зярдояк а стувтса!

12. Инчина Катя

Сон тонавты тонь эрямо,

Тонавтнеме ды морамо,

Сон тонеть, прок тиринь ава,

Касты эйсэть седейшкава.

13. Сырман Ада

Эрзянь масторсо ней эрян.

Весеменень смелстэ мерян -

Чевте, мазый эрзянь келесь,

Кортамс эйсэнзэ – монь мелесь.

14. Винтайкин Саша

Эряк сюпавсто, монь эрзянь келем,   

Виев ульть, превей ломанть кастак!

Тон монь седейсэ эрят, вечкевикс,

Иля ёма масторлангсто зярдояк!

1-це ветицясь:Айдо, ялгат, паро ялгат,
Пурнавтано вейс,
Эрзянь моро моратанок
Верьга вайгельсэ !

·        МОРО: «Селяка» -  морыть ушодомань классонь тонавтницятне

·        МОРО: «Пельне» -  морыть ушодомань классонь тонавтницятне

·        Валморо «Тиринь ёнксом, Отяжбуе!» -  ловны Инчина Света, 2- це классо тонавтниця.

1.Тиринь ёнксом, Отяжбуе!

Иеде иес каст!

Кемема вандынь читненень

Эрицят туртов макст!

2.Тиринь ёнксом, Отяжбуе!

Сюпавчисэ васькат!

Кудот одкстомить, строявить.

Сырне валыть паксят.

3.Тиринь ёнксом, Отяжбуе!

Кеман, истят арасть!

Культурань центра, церькова

Тонь куншкакурос стясть.

4.Тиринь ёнксом, Отяжбуе!

Коданя лемдямс тонь?

Мордовиянтень – тейтерне,

Россиянь нуцька тон!

5.Тиринь ёнксом, Отяжбуе!

Мельспаросот аштян.

Козонь аволинь пачкоде –

Тонеть мон велявтан!

·        МОРО: «Косо, косо, да Утяша»

    - морыть 2-це классонь тонавтницятне

·        5-це класс «Пеедькшнемат»

·        МОРО: «Адя, Олён, базаров»

    - морыть 5- це ды ушодомань  классонь цёрынетне

·        Валморо – ловныть 7- це классонь тонавтницятне

Эрить масторсонок ламо раськеть.

Эрить ладсо, аздыть нужачи.

Ламо кельсэ минек модась гайги,

Эрьвась эйстэст – цецянь мазычи.

Сехте питней монень эрзянь келесь,

Сон пек мазый, сюпав ды келей.

Кортамс эйсэнзэ монь ули мелем,

Сон прок валдо теште, чудилей.

Чуди сон потмовам, канды кеняркс

Седеентень, ойментень. Маряви

Сон монень ламбамо, тантей медекс,

Конань танстезэяк а ёвтави.

Эрзянь кель! Тон прок валдо толбандя

Монь чопода эрямонть валдомтат.

Кеман мон,седейсэм тон а мадят,

Карми свал паломо лембе толот.

Эрзянь кель, тонь ине оймень виенть

Авань моротнестэ саинь мон.

Седе гайтев эзинь марсе лия

Ды а содан седе чевте, ён.

Эрзянь кель, мон кенярдан тонь кисэ.

Ламо масторт содыть тондеть ней.

Эрзянь кель, тон – мазый цецянь кизэ.

Эрзянь кель, тон – Равов прыця лей.

1-це ветицясь: Эйкакшт, а ней лездадо ёвтамс тень «Эрзянь ковгерьксэнть».

Эрзятне превейть ульнесть.
Сынь эстест ковгерькс арсесть.
Ацы моданть АЦАМГОВ,
Пек якшамо ЯКШАМГОВ,
Канды давол ДАВОЛГОВ.

Эряк, эрзя, седе тов.
Телесь юты, тундось сы,
Пертьпельксэсь мазылгады.

Вельть эйзюров ЭЙЗЮРГОВ,
Чадыведев ЧАДЫКОВ,
Цеця потсо ПАНЖИКОВ.

Эряк, эрзя, седе тов. 
Тундось юты, кизэсь сы, 

Псить ды манейть сон канды.

Кенярдовты АШТЕМГОВ,
Медте кавани МЕДЬГОВ,

Умарть кази УМАРЬГОВ.

Эряк, эрзя, седе тов.
Кизэсь юты, сексесь сы,
Пертьпельксэсь тюжалгады.

Анокставты ТАШТАМГОВ,
Ожо лопав ОЖОКОВ,
Сравты сундерькст СУНДЕРЬГОВ.
Эряк, эрзя, седе тов.

2-це ветицясь:  Кевкстемат 1-це классо тонавтницятненень.

Содынк ракшанть сонзэ тешксэнзэ коряс.

·        Покш идем ракша, тюжа тюссо, медь вечки. Те - …. .

·        Мазый вирень ракша, покш пуло, пек ёжов. Те - … .

·        Вишкине идем ракша, сёрмав, весемеде пелиця, кувака пиле. Те - ….

·        Кежей вирень ракша, сёрмав тюссо, пшти пей. Те - … .

·        Те вишкине вирень ракша, шубазо пупиця. Те - … .

·        МОРО: «Сюк, Ковава»

    - морыть ушодомань классонь колмо  тейтерькат

• 8-це класс. Налксема «Ошонь цёрыне»
  
  
• МОРО: «Кизэнь пиземе»

    - моры Валя Емельянова

·        9-це класс. Налксема «Телевизор»

1-це ветицясь:

Мейсэ, мейсэ минек краенть
Парочизэ?
Мейсэ, мейсэ минек ёнксонть
Мазычизэ? 
Минек краенть парочизэ 
Паксятнесэ. 
Минек ёнксонть мазычизэ 
Ломантнесэ.
         

Содынк, киде моли кортамось?

1. Сон сёрмадызе эрзянь пакшатнень туртов васенце букваренть (1884- це иестэ). Чачсь Уфимской губерниянь Калейкина велесэ. Сон ульнесь эрзянь раськестэ васенце тонавтницякс Казанень инородческой семинариясо, конань прядомадо мейле кадокшнызь тоско важодеме тонавтыцякс.

                       (Юртов А.Ф.) 

2. Те ломаненть искусствань чарькодицятне совавтызь модамасторонь вете весемеде содавикс ды ёроков ломантнень юткс. Сон эсь произведениянзо, кедьтеевксэнзэ кармась сёрмадстомо эсь раськень лемсэ.

                                  (С.Д. Нефёдов (Эрьзя))

      3. Цярмун велесь сравтовсь а покш лейненть кувалт. Те веленть марто  кеместэ сюлмавозь те покш ломаненть эрямозо. Сон тонавтнесь Казанень инородческой семинариясонть, зярыя иеть важодсь тесэ тонавтыцякс. Сёрмадсь ды нолдась зярыя тонавтнема книгат, научной роботат, ламо мель явсь раскень шкинемань пурнамонтень, велетнева пурнась мазый оршамопельть, снимсинзе, анокстась альбом ды кучокшнынзе выставкав.

                        (М.Е.Евсевьев)

      4. Мокша леенть велькссэ - сэнь менелесь,

         Уить пельтне кие соды ков.

         Вана Кочелаева покш велесь,

         Вана кудось, козонь чачсь…..(Сычков)

    5. 25 000 ламоксть морась те ломанесь сцена лангсо. Сонзэ лисеманть свал вастсь виев цяпамосо. Морамстонзо кунсолыцятне каштмольсть, мерят, эрьвась арсесь эсь арсеманзо ды стувтылизе морыцянть. Морась и эрзянь, и рузонь морот, арият. Эсест велесэ нейгак ледстнить, кода вайгелень вийсэнзэ, васоло аштезь, мадстнекшнесь суликавтомо лампань тол.

                    (И.М.Яушев)

   6. Минек масторсо лемезэ теевсь ёвксонь лемекс. Сонзэ морамодо мейле пельсстувтовозь моротнеяк одов теевильть мельстуицякс. Вейкеяк лия морыця сеть шкатнестэ эзь пелькставо мартонзо – истя покшоль сонензэ ломантнень вечкемаст.

                             (Л.Русланова)

  7. Лиянь ёнов а молиця , килангов шождасто кепедевиця те авась ютась зняро  эрзянь велеть, морсесь зняро школасо, клубсо, маряви,  а содыцянзояк арасельть. Весемеде покш бажамозо ульнесь- морамс эсензэ ладсевть моротнень ды каземс тень вельде ломантненень мельспаро.

                (С.М.Люлякина)

      8. Те ломанесь эйкакшпингестэ саезь  пек вечксь кунсоломо ёвкст, эрзянь морот, кезэрень шкадо ёвтнематнень. Сёрмадсь поэма, конань эйсэ весе вийсэ гайгезевсь эрзянь келесь, конань мазычизэ пиземечирькень тюссо цитни эрьва валсто. Те произведениянть кис сонзэ чумондызь ды пекстызь тюрьмас. Аштесь тосо 20 иеть.

(Я.Я.Кулдуркаев. «Эрьмезь» поэманть авторозо)

·         Налксема «Ялаксонь ваныця» -  10-це класс

·        МОРО: «Моро тиринь веледе»

    - моры покш классонь тонавтницянь хор

1-це ветицясь: Тиринь келесь – сехте покш сюпавчи, конанть алтызе тенек кезэрень раськесь. Зярс эри келесь, карми эрямо и народось. Ванстодо тиринь келенк!»

2-це ветицясь: Ков илядо пачкодть пингень перть, ванстынк седейсэнк тиринь масторонтень вечкеманть. Сон лезды тенк весе стакачитнестэ, максы валдо сехте чопода читнестэ, совавты ойментень кемема…

1-це ветицясь: Эйкакшт ды ялгат, вана пачкодсь пес минек вастомась, кона алтазель ЭРЗЯНЬ КЕЛЕНТЕНЬ. Весенень арсетяно шумбрачи, уцяска ды валдо кемемат вандынь чинтень. Вастомазонок !