Логотип Инфоурока

Получите 30₽ за публикацию своей разработки в библиотеке «Инфоурок»

Добавить материал

и получить бесплатное свидетельство о размещении материала на сайте infourok.ru

Инфоурок Начальные классы Другие методич. материалыРассказ собственного сочинения на родном эрзянском языке "Эряви эрямс" ("Надо жить").

Рассказ собственного сочинения на родном эрзянском языке "Эряви эрямс" ("Надо жить").

Чись алтась улеме паро. Чипаесь валскеяк уш эждясь виень апак вансто. Анна Никитична пурнась лейпряв. Тейтеренстэнь мерсь: - « Молян кандан аламошка пенгеть». Тейтерезэ сёвнозевсь: - «Авай, таго тон арсят, минь пенгевтеме кадтадызь?» Варштась аванзо сельмес ды весе чарькодсь. Аволь пенгеть сонензэ эрявсть, мелезэ ульнесь олясо байгинень пес сельведензэ авардемс. А весть уш некшнизь ды марсизь, кода сон вирьга яки ды лайши. Тейтерензэ кирьгас таго-мезе кузсь ды стакалгавтызе лексеманзо - истя жаль марявсь тензэ авазо. Ансяк теемс ульнесь а мезе. А нолдамс - сельведтне мадить стака кевекс седеезэнзэ. Кадык моли, паряк, шождалгавтсы ёжонзо. Виресь маласо. Мерить тензэ Эрямолей. Паряк, истя лемдизь эрзятне сонзэ эрямовиень максомга. Умонь шкава састь вете кудораськеть ды пурнасть те лейденть а васоло эрямотарка. Ды вант вана, кассь сядо кудос веле! Теде арсезь, совась Анна Никитична вирентень. Таго- мезе сонзэ тей ускозь уски. Сеске эзь чарькодекшне. Уш седе мейле, ламоксть яксезь те вирьганть сась прязонзо: - Ды те Филиппень сехте вечкевикс тарказоль! Тезэнь сон ёмсиль эйкакшпингева ялганзо марто, кудовгак а учовиль. Сэрьс а покшкель ды пек уш эрязасто касыль. Налксематнесэ вечкиль улемс ветицякс. Чииль кудов ды аванстэнь свал ёвтниль, зяро течи эстест сайсть яттнэде... Анна Никитична эзизе редяяк, мизолдозевсь ды сельместэнзэ лиссь сельведень байгине. Мельганзо омбоце. Авась нардынзе сынст ды макссь эстензэ вал а авардемс. Ушодовсь медьковось - кизэнь сехте мазый шкась. Зяро ды кодат улить балягатне куракштнэнь алга, весе панжовсть. Вирьсэнть кирдевсь тантей чине. Нармунтне эзть пеле – лепиить, морасть эрьва кодамо вайгельсэ. Ансяк вана кеняркст аванть седейсэ эзть сова, сонзэ икельга ютасть эрямонь неявкстнэ. ... Кустемпесэ чивалгома шкасто озадо ашти нусманя мазый од ава. Стака пулозо новольсь масторс. Сонзэ эрямосонзо весе napо, весе вити седей. Лиссь мирденень, ят кудораськенть юткс човоргадсь куроксто. Мирдезэ аноколь нармунь ловсосо каванямс, зярдояк берянь вал кургстонзо эзь марсе. Эрьва тевенть авинесь теи, мерят, налкшкесэ налкси. Сонзэ сюлмавт пулттнэнь содасызь рузонь шабра велесэяк. Истя меритькак эйстэдест- «Анкины снопы». Вейкесь берянь: мирдень кедьсэ уш зярдыя, эйкакшонзо вана арасть. Исяк мерсь тензэ шабрань бабинесь- «Анна, Талызинасо ули содыця ава. Мольть. Кевкстик, мекс эйкакшот арасть. Весементь теть ёвтасы». Валске, чинзэ лисезь, Анна тусь Талызинав. Видестэ ёвтнизе тевензэ муницясь. Сон мерсь: - «Учовить эйкашот. Иля аварде сетнеде, конатне арасть, кармат сельведень валомо чачозтнень кувалма. Трят-кастат цёра. Кепеди мастор лангсонть покш , ламо ломанень пряньсаиця война. Сайсызь цёрат ды тосто сон уш а сы». Тандадсь од авась, кармась пурнамо кудов. Орожиясь муницясь: - «Иля капша, кудов сат се шкастонть, зярдо чизэ кепети ломанень сэрьсэ ологанть сэрьс». Молемань перьть арсесь Анна: «Паряк, а весе карми истя, кода ёвтнесь муниця бабась. Чув - мерсь сонзэ потмозо. Соды сон, соды!» Ледстнезь теде, пачкодсь Анна Никитична леенть чирентень. Ней эряви печтямс тона ёнов. Авась озась леенть чирес. Лугине лангс. Прянзо путызе кумажанзо лангс. Ды теке нуваземсь. «Авай, авай!» - кавксть марязевсь тензэ сэредьксэкс содавиця вайгелесь. Пек кенярдсь Анна! Варштазь ниле ёнга ансяк, киньгак эзь нее. Ды сельведтне тусть чудеме риксэ, валтнэ сынсь кармасть певереме кургстонзо. Виресь маризе потмоёжонь раздиця авардеманть. 1943 иень якшамковонь кельме валске. Филиппнэнь топодсть 18 иеть. Сонзэ саизь войнав. Веле пес промсь весе раськесь. Филипп аванзо кутмордызе, палызе ды, самодонть алтазь, тусь чиезь нурдонть мельга. Анна Никитичнань сельмензэ пешкедсть сельведте. Сон покш вий путсь сынст а нолдамс. Филипп озась нурдос ды пек нусманясто меельцеде варштась велененть пелев, теке марясь - икелепелев сон тей а пачкоди. Войнась прядовома лангсоль. Весе учильть. Анна Никитична, пелезь, капшавтыль читнень. Филиппень кувалт сынь мирдензэ марто аштильть покш каштанчисэ. Эрзянь цёрась эзь кекшне войнасо лиятнень удалга. Покш тевень кис казизь колмо степентнень Славань колмо Орденсэ! Сась Изнямонь чиськак. Зяро кеняркс ульнесь велесэнть! Кармасть само кудов пек учовикстнэ. Анна Никитична чистэ чииль веленть пес ды сыль тосто нусманясто, прянь нолдазь. Арасель сонзэ Филиппезэ а кулозтнень, а эрицятнень ютксо. Ютыльть читне... Кемемс уш кадновсь а мезес. Весть марясы авась - кудос совиця, чарькодсь, кодамо куля тусь тензэ сёрмань кандтницясь. Сорныця кедьсэ панжизе конёвонть ды теке, кие бути пильге ланга тензэ каясь, сяворсь весе сэрьсэнзэ масторов... Вирьсэнть маряви вайгельсэ лайшема. Анна Никитичнань, теке пувтызе эсензэ вайгелесь. Прянзо кепедизе верев: чувтнэнь пачка неявсь манеесь. Сон, мерят, теке кортась авантень - «Эряви эрямс!»

Просмотрено: 0%
Просмотрено: 0%
Скачать материал
Скачать материал

Найдите материал к любому уроку, указав свой предмет (категорию), класс, учебник и тему:

5 480 115 материалов в базе

Скачать материал

Другие материалы

Вам будут интересны эти курсы:

Оставьте свой комментарий

Авторизуйтесь, чтобы задавать вопросы.

  • Скачать материал
    • 19.03.2018 255
    • DOCX 34 кбайт
    • Оцените материал:
  • Настоящий материал опубликован пользователем Темаева Анна Фёдоровна. Инфоурок является информационным посредником и предоставляет пользователям возможность размещать на сайте методические материалы. Всю ответственность за опубликованные материалы, содержащиеся в них сведения, а также за соблюдение авторских прав несут пользователи, загрузившие материал на сайт

    Если Вы считаете, что материал нарушает авторские права либо по каким-то другим причинам должен быть удален с сайта, Вы можете оставить жалобу на материал.

    Пожаловаться на материал
  • Автор материала

    Темаева Анна Фёдоровна
    Темаева Анна Фёдоровна
    • На проекте: 6 лет и 1 месяц
    • Подписчики: 0
    • Всего просмотров: 23078
    • Всего материалов: 31