Сценарий внеклассного мероприятия посвященного празднику "Къурбан байрам"

Къурбан байрамына багъышлангъан тедбир

Алып барыджы:

-Селям алейкум, сайгъыллы мусафирлер, ана-бабалар, балалар. Мектебимизге хош кельдинъиз! Дерслерден гъайры мектебимизде чешит тюрлю тербиевий тедбирлер де кечириле. Бу тедбирлернинъ эсас макъсады балаларда ана тилимизге, Ватанымызгъа, байрам ве урф-адетлеримизге севги дуйгъусыны ашламакътыр.

Бизим миллетимизнинъ тербие адетлери, эдеп тербиеси ислям динине эсаслана.

Бугунь биз диний байрамлардан бири олгъан,Къурбан байрамына багъышлангъан тедбирге топландыкъ.

Талебелер:

Къурбан байрам

Хош кельдинъ,Къурбан байрам,

Мубарек Къурбан байрам,

Къуванамыз биз санъа

Мусульманмыз иншалла!

Къурбан къойлар чалынсынъ,

Бол софралар къурулсын,

Эйилик ниет этип,

Дуа-сена окъулсын!

Къол котерип ялварам,

-Ярдым эт бизге, Аллам,

Юреклер бираз оссин,

Гам-къасевет эксильсин.

Бинъ бир адлы бир Алла,

Бинъ бирбелядан сакъла,

Бахт-сеадет къысмет эт

Кунь корьсин бизим миллет.

Хош кельдинъ Къурбан байрам,

Мубарек, Къурбан байрам,

Къуванамыз биз санъа,

Мусульманмыз иншалла!

Алып барыджы:

-Мусульманлар эр бир шейни «Бисмилля» сёзюнен башлай. Бисмилля чекмек «Бисмилляхиррахманиррахим» демектир. Бу «Рахман ве Рахим олгъан Аллахнынъ адынен башлайым» демектир.

Талебелер

Бисмилля

1.    Аллахтыр ильк сёзюмиз,

Иман толу озюмиз.

Ишлер Аллах адынен

Башлар, битер дадынен.

1.    Уянгъанда эр саба

Аман дерим «Бисмилля»

Бир шей ашап ичкенде

Унутмам бир кез бире.

1.    Ёнелирим Раббиме

Кувет келир къальбиме.

Аллахнен аз—чокъ олур,

Кучьлюклер эп ёкъ олур.

1.    Гъалебенен эль-эльге

Берир чеккен бисмилля.

Тюшюрмем ич тилимден

Аллах тутар элимден.

Алып барыджы:

- Белли олгъаны киби, Къурбан байрамы мераметлик, бири-бирине гонъюльдешлик, урьмет байрамы, фукъарелерге, оксюз балаларгъа, янъгъыз къартларгъа ярдым этюв байрамыдыр.

Къурбан байрамы халкъ арасында айтылгъан риваетлерге коре адам джаныны къуртаргъан кунь сайыла. Ибраим ве Исмаил пейгъамберлер акъкъында риваетни халкъымыз бойле икяе эте:

Талебелер:

1.    Ибраим пейгъамбернинъ баласы ёкъ экен. О, гедже-куньдюз дуа этип, Аллахтан бала истей ве эгер де огълу олса, оны Аллахкъа къурбан этмеге сёз бере. Чокъ вакъыт кечмеден онынъ къарысы огълан бала тапа, адыны Исмаил къоялар. Бала осе, лякин Ибраим пейгъамбер огълуны къурбан этмеге ашыкъмай. Геджелернинъ биринде тюшюнде о бойле сёз эшите: «Эй, Ибраим, сен огълунъны манъа ададынъ». Ибраим пейгъамбер исе: «Мен адагъымны унутмадым, амма бала пек яш, о даа ана сютюнен яшай. Разы олсанъ, бала бир яшына кельген сонъ адагъымны берейим,»- дей.

1.    Исмаил бир яшына кирген геджеси Ибраим пейгъамбер адагъыны бермесини талап эткен кене шу сесни эшите.Саба Ибраим пейгъамбер къарысына баланы ювундыртып, башыны ве пармакъларыны къыналамакъны авале эте. Ибраим де янъы урбаларыны кие, кескин пычакъ ала ве огълунен Арафат дагъына чыкъа. Дуа этип, пычакънен огълунынъ богъазыны кеседжек ола, амма не къадар тырышса да, кесип оламай. Чаресизлигинден пычакъны янында олгъан бир ташкъа ура. Таш экиге болюне. Шу дакъкъасы ташнынъ янында бир къой пейда ола.

1.    Ибраим пейгъамбер кене де шу сесни эшите: «Сен меним севимли къулумсынъ. Озь адагъынъны эда эттинъ, онынъ ичюн огълунъны къурбан этме. Бу къой меним санъа эткен бахшышымдыр. Огълунъны ерине бу къойны ал да, къурбан чал.» Ибраим пейгъамбер севине-севине ойле де япа. Этини исе факъыр-фукъарелерге бере. Онынъ ичюн мусульманлар эр йыл байрам кунюнде Арафат дагъына барып, къурбан чалалар. Узакъ ерден барып оламагъанлар исе яшагъан ерлеринде, эвлеринде къурбан чалалар ве байрам япалар.

Алып барыджы:

- Арафат дагъына бармакъ, яни Хаджгъа бармакъ – бу ислям динининъ шартларындан биридир.

Талебелер:

Ислямнынъ шартлары

1.    Ислямнынъ беш шарты бар,

Бильмек биле сеадет,

Буларгъа ким уярса

Онъа ачылыр дженнет.

1.    Шартлардан биринджиси

Келиме-и Шеадет

Бир ве буюк Аллахтан

Башкъа Танъры ёкъ эльбет

Онынъ сонъ пейгъамбери

Шаны юдже Мухаммед.

1.    Экинджи шарт намаздыр

О, не гузель ибадет

Куньде ярым саатке

Сыгъар беш вакъыт невбет.

1.    Учюнджи шарт Рамазан

Оразанъадыр ниет

Куньдюз ашап ичмеден

Севинчнен кечер муддет.

1.    Дёртюнджи шарт зекяттыр,

Аллах беген исе сервет

Топламыны къыркъкъа боль,

Бирини эдие эт…

1.    Бир кере Хаджгъа бармакъ

Олур исе къысмет

Бешинджи шарт Ислямнынъ

Кябесини зиярет.

Алып барыджы:

- Хадж – мусульманларнынъ эр сене Меккеде олгъан халкъара олгъан топлашувыдыр. Хадж дюньянынъ бутюн мусульманларыны ыркъына, миллетине, тенининъ тюсюне бакъмадан бир ерде Меккеде топлай.

Бу бирлик, мусавийлик ве къардашлыкъны пеките. Байрамларымызны къайд этейик, урф-адетлеримизни кутейик, тилимизни къорчалайыкъ, унутмайыкъ. Эпинъизге «Къурбан байрамы» хайырлы олсун.

Тебриклев ичюн сёз ана-бабалар комитетининъ азаларына бериле.