Шыгармашылық тақырыбым «Оқу үрдісіндегі интербелсенді оқыту мен ойын технологиясын қолданудың тиімді жолдары»

Қазақстан Республикасы, Атырау қаласы

Каспий өңірінің қазіргі замандағы колледжі

Әлеуметтік-гуманитарлық бөлімінің

Құқықтану мамандығының 9-санатты арнаулы пән оқытушысы

Шайдоллаева Айсулу Нургабыловна

Менің шығармашылық тақырыбым «Оқу үрдісіндегі интербелсенді оқыту мен ойын технологиясын қолданудың тиімді жолдары» болып табылады.

Елбасымыз Н.Ә.Назарбаев Л.Н.Гумилев атындағы Еуразия ұлттық университетінде оқыған «Инновациялар мен оқу-білімді жетілдіру арқылы білім экономикасына» атты лекциясында былай деп айтқан еді: «Жеке тұлғаны функциональдық әзірлеу тұжырымдамасынан жеке тұлғаны дамыту тұжырымдамасына көшу жүріп жатыр. Жаңа тұжырымдама білім берудің даралық сипатын көздейді, ол әрбір нақты адамның мүмкіндіктерін және оның өзін-өзі іске асыруы мен өзін-өзі дамытуға қабілеттілігін ескеруге мүмкіндік береді». Менің субъективтік пікірім бойынша бұл ұстаным бүгінгі күннің талабына сәйкес келеді. Себебі оқытушылық қызметпен айналысқан аз ғана жұмыс уақыты ішінде әр студенттің әрқилы мүмкіндіктері мен қабілеттіліктерін байқап үлгердім. Сөзімді растау мақсатында мысал ретінде келтіретін болсам, бір студентіме сабақты слайд бойынша қорғау, екіншісіне нормативтік құқықтық актілерден ізденген, үшіншісіне тест арқылы тиянақтаған, төртіншісіне жазбаша және ауызша сауалнамалар арқылы пысықтаған, бесіншісіне логикалық жағдайлар арқылы саралаған тиімді.

Шығармашылық тақырыбымның мақсаты – «өмір бойы азық боларлықтай білім беру» емес, «өмір бойы өздігімен үйрену» және ойын арқылы білімге деген ынта-зейіндерін, қызығушылықтарын тудыру талабы болып табылады. Яғни, бұл жерде оқытушы – білімге апаратын жолды нұсқаушы, ол тек қажет кезде ғана білім алушысына жәрдемдеседі, сұрақ қояды, тапсырма береді, ақпарат ұсынады, білім алушыға оңтайлы жағдай жасайды. Сәйкесінше, білім алушы – өзінің қабілеттілігі деңгейінде ізденеді, теориялық және практикалық ресурстарды нормативтік-құқықтық актілерден, БАҚ-нан, әдебиеттерден оқу арқылы ойына тоқып, өзіне оңтайлы жағдайда ақпаратты жеткізеді. Яғни, қазіргі технологиясы дамыған қоғамда білім алушы өз ой-өрісін кеңейтіп, білім ордасында жасалып жатқан оңтайлы жағдайларды пайдаланып, өз-өзін болашақ маман ретінде бағыттайды.

Бұл шығармашылық тақырыпты алудағы критерийлер:

1.Динамикалық өзгерістер – қазіргі әлем дамуының негізгі ерекшелігі. Бұл деген сөз мынадай мағынаға саяды: қазіргі дамыған заманда ақпараттық ресурстардың үнемі өзгеріп, жаңаланып, жоспарланып отыруы.

2.Әлеуметтік ерекшеліктер: қоғамдағы тұлға рөлінің өсуі, адам қоғамының қызмет көрсету қоғамына айналуы, гендерлік саясаттың дамуы.

3.Интеллектуалдық ерекшеліктер: адам миының мүмкіншіліктерін бұрынғыдан тиімді пайдалану, «өз мүмкіншілігінді көрсете біл» идеясының кең етек алуы.

4.Білім жүйесіндегі ерекшеліктер: адам енді өндірістің элементі емес, оның басты құндылығы мен артықшылығына айналуда, ақпараттың ішінен өзіне қажеттісін таңдап, оны пайдалану, проблемаларды шешу және шешім қабылдау.

Интербелсенді оқыту мен ойын технологиясын меңгеруде білім алушылар төмендегідей құндылықтарды үйренеді:

-         Терең ойлануға;

-         Ақпаратты өздігімен түсініп, оны таразылап, оның ішінен керектісін таңдап алуға;

-         Ақпаратты жан-жақты талдауға;

-         Өздігімен жаңа түсінік пен білім құрастыруға;

-         Пікірталастарға қатысып, өз ойы мен пікірін дәлелдеуге;

-         Өз ісі мен өмірлік жағдайларына жауапкершілікпен қарауға;

-         Басқалармен тиімді қарым-қатынас құруға.

Интербелсенді оқыту мен ойын технологиясын пайдалану мынадай әрекеттер арқылы жүзеге асырылады:

·       Бірлескен жұмыстар (топтық, жұптық)

·       Жеке және бірлескен ізденіс пен зерттеу жұмыстары

·       Ситуациялық және рөлдік ойындар

·       Ақпараттың әртүрлі көздерімен жұмыс жасау (кітап, лекция, интернет, БАҚ-ры, құжаттар, сауалнамалар, мамандар арқылы)

Бұл мәселені тағы да нақтылай түсетін болсам, білім алушылар оқуды аяқтағанда мынадай құзырлықтарды меңгеруі керек:

1.Мәселелерді шешуге дайын болуы.

2.Өзіндік субъективтік пікірі мен ой-жүйесін қалыптастыра алуы.

3.Қоғам мүшелерімен еркін қарым-қатынаста бола алуы.

4.Өзін тұлға және маман ретінде сезіне алуы.