Сочинение на тему "Мастер своего дела"

                                                       Йәшәү бәхете – күңел, сафлыҡта,

                                                           Йәшәү бәхете – дуҫлыҡ, хаҡлыҡта,

                                                             Йәшәү бәхете – илең, халҡың өсөн,

                                                  Хеҙмәт аша тыуған шатлыҡта.

Һәр дәүерҙең үҙ оҫталары,  фиҙаҡәр хеҙмәт иткән, ил-көн өсөн янып йәшәгән эшһөйәр ир-егеттәре бар. Шуларҙың береһе минең олатайым.

       Уйылданов Билал Усман улы 1941 йылда  крәҫтиән ғаиләһендә Ҡыйғы районында 3-сө бала булып донъяға килә. Ул бала саҡтан уҡ эшһөйәр булып үҫә . Олатайымдың бала сағы ауыр Бөйөк Ватан һуғышы йылдарына тура килә. Уның атаһы Усман олатай Берлинға ҡәҙәр барып етеп, еңеү яулап, батырлыҡтары өсөн миҙалдар менән бүләкләнеп тыуған ауылына  ҡайта.

        Хеҙмәт юлын “Тимиряз”  исемендәге колхозында механизатор булып башлай. Ҡайҙа ғына эшләмәһен, эшен һәр саҡ намыҫлы үтәй. “За трудовое отличие” тигән  миҙал менән бүләкләнә. Ер һөрөүселәр ярышында ҡатнашып өсөнсө урынды алыуы хаҡындағы документын әле лә һаҡлай. Шулай  тик яҡшы һөҙөмтәләргә ирешә һәм 44 йыл буйына Ватанына хеҙмәт итә . 61 йәшендә “Хеҙмәт ветераны”  исеменә лайыҡ булып хаҡлы ялға сыға.

       Өләсәйем Ҡорбанова Миндинур Мөхәмәтдин ҡыҙы  менән бергә бына инде 50 йылдан ашыу иңгә иң терәшеп, ауырлыҡтарҙы  аша атлай йәшәп яталар. Хаҡлы ялға сыҡһа ла  олатайым тик тормай. Ул ағастан төрлө ауыл ерендә кәрәкле ваҡ- төйәк әйберҙәр яһай. Талдан үрелгән тауыҡ ояһы, ҡаҙ ояһы, килендәргә көйәнтә бөгә. Ултырғыстар, тырмалар, ос һәнәктәре, балта, һәнәк, көрәк һаптары һәм башҡа хужалыҡта кәрәк нәмәләрҙең барыһын да уның эш урынында табырға була. Материалдарҙы ул яҙҙан әҙерләй. Һәр әйберҙе эшләүҙә, материалын һайлауҙа үҙенең серҙәре, нескәлектәре бар. Шуға ла олатайым, оҫталыҡ серҙәрен  килгән кешеләр менән  теләп өләшә.

     Хеҙмәтенә күрә хөрмәте. Минең олатайым халыҡ оҫталары конкурсының әүҙем ҡатнашыусыһы. Зональ, муниципаль район конкурстарында яҡшы һөҙөмтәләргә ирешкәне өсөн маҡтау ҡағыҙҙары, ҡиммәтле бүләктәр менән бүләкләнә.

      “Ҡоштоң матурлығы – төҫөнә ҡарап, кешенең матурлығы  –                                эшенә ҡарап” тип юҡҡа ғына әйтмәгәндәр. Мин олатайымдың шундай эшһөйәр, кешелекле, үрнәкле булыуына ғорурланам.

Муниципаль бюджет дөйөм белем биреү учрежденияһы

Башҡортостан Республикаһы

Муниципаль район Ҡыйғы районы

Үрге Ҡыйғы лицейы

Һөнәрле булыу гәүһәрле булыуҙан мең артыҡ.

                                                  ( инша)

                                                    Эштең авторы: 10-сы а класс уҡыусыһы

                                                                           Оморҙаҡова Лилиә

                                                Етәксеһе: Башҡортостан тарихы һәм мәҙәниәте

                                                                          уҡытыусыһы Зиннәтова Гөлнара

                                                                          Зөфәр ҡыҙы

Үрге Ҡыйғы - 2015