Статья к 95-летию со дня рождения народного поэта Мордовии И.М.Девина

Лемтьф народнай поэтть И.М.Девинонь юбилеенцты

Тядде Илья Максимович Девинонь, МАССР-нь народнай, заслуженнай поэтть, прозаикть юбилеец - 95 кизонь шачема шистонза топодемась. Поэтть  шачема велень школаса, тя оцю юбилейть мяльса кирдезь, ётафтовсь лятфнемань ила «И.М.Девинонь панжи лайме порань уженяц» лем ала.

Илья Максимовичень поэзияц – тя седи ваксстонь корхнема инь мала и кельгови ялгацень мархта, шачема крайть, родной масторть, перьфпяльть мархта, тя – седиень панжема и ваймонь козякофнема, тя эряфть кинзон ункснемасна и пингть аськолксонзон марямасна. И.М.Девинонь валоц мзярдовок аф пандсы пилецень, сонь тундань васенце шудерькскять лаца, кона кашторфтома ловонь ацамть алга валом-валом карай эстеенза ки воляти, кели лаймотненди. Тя валоц ару кожф лаца эслек сувай ваймозт и эжттянза. Тяфта кельгови сонь поэзияц лувихненди. А кда кельгови Илья Максимовичень  творчествац лувихненди, поэтсь, кле, мзярдовок аф кулы. Сон шиса снярс, мзярс эряйхть стихонза.

Школань иттне и тонафтыхне путсть панчфт Илья Максимовичень бюстонцты, кулхцондозь литературно-музыкальнай композициять, конань пингста лятфнезь И.М.Девинонь эряфонь и творческяй кинц.

Литературно-музыкальнай композициять панжезе велень школань тонафтысь, Мордовия Республикань Заслуженнай учительсь Нина Николаевна Черновась, кона азондсь Илья Максимовичень эряфонь кинц колга.

Илья Максимович козякофтозе мокшэрзянь литературать поэзиянь и прозань книганзон мархта. Инь оцю сатфкссь тя ширеса – «Нардише» романць, кона лиссь и рузонь, и мокшень кяльса.

 Сире Теризморга велеса оцю мяль шарфневи Илья Максимовичень творчестванцты. Тя няевсь сянь эзда, кода седиень токазь лувсть иттне поэтть стихонзон,  кайгсть стихонзон лангс морот, няфтьфтольхть сценкат. Шабатне лувозь поэтть стихонзон мокшень и рузонь кяльса шачема ширеть, тядянь, авань масторть кельгоманц колга, арьсеманзон ялгань, сазоронь колга, руснень и мокшерзятне-братт, ялгаксшить колга.  Иттне лувозь эсь сёрматф стихснон.      

Кельголезень Илья Максимович мокшень кунардонь моротнень. Сире Теризморгаса пяк кельгсазь и морсесазь мокшень моротнень. Морама машты велеряенза бта кошардозь поэтть тяштемс седи ваксстонь строчкат колгаст. И морсевсь моронзон эса масторлангонь мазышись, перьфкат якай ломаттне. Поэтть землячкац Нина Васильевна Кошелева тяштсь музыка И.М.Девинонь стихонцты «Панжи лайме порась». Тячивок кайгсь морось, конань моразь иттне. Писательсь пяк кеняртькшнесь идень морамати, тяка пингть сон таколдсь мокшень козя койхнень-обуцятнень ванфтомаснон инкса.

Музыкати идень тонафтысь Шеянова З.В. мокшень кяльть колга сёрмадсь стих и ладясь музыка. Пяк пароль кулхцондомс мокшень мороть, конань моразь сонць сёрмадысь и Шестакова А.М., рузонь кялень и литературань тонафтысь. Морось ладяф поэтть лемс. Зинаида Владимировна лямбе валса корхтась мокшень кяльть колга и эняльдсь иттнень ванфтомс сонь, кода и минь земляконьке И.М.Девин.

Иттне оцю мяльса кулхцондозь 10-це классонь тонафнить Качанова Кристинать выступлениянц. Сон азондсь и няфтезень  И.М.Девинонь лемса школань уженяста поэтть рукописензон, частонзон, сёрманзон, книганзон, конань мархта сядонга малатфнесамазь авторти. 

А конашкава кеподезь ваныхнень мяльснон пеедемань и сингорямань сценкатне «Нумолов Михалунь» цикласта, конатнень налхкозь иттне! Илья Максимович ульсь тяфтама ломань, кона пяк кельгозе пеетькшнеманц, содась пяк лама мокшень рахсефти кевонзаф валсюлмот, шуткат. Тя юморть няфтезе и эсь стихонзон эса. Лама вий путсть артисттне, штоба пачфтемс налхкфть смузенц ваныхненди. Видясова С.А., школань директорть валонзон коряс, тяфтама илатне эрявихть иттненди, штоба синь содалезь эсь землякснон творчестванц педа-пес, штоба синь маряльхть гордость земляконьконь инкса, сявольхть эздонза кепотькс и касольхть эсь традициянь-коень содазь, кода и народнай поэтсь.

Улихть ломатть, конат корхнихть: кда саволь оду эрямс эряфозе, мезевок афолень полафта, тиелень станяк, кода ульсь. А Илья Девинонь мяленза лият: «Кда саволь тяфта тиемс, петелине сембе эльбятьксонень, конатнень ноляйне, сяда лама кадолень касыкс седити». Эряфти кельгомать, ломанти паронь арьсемать колга морафтольхть сиде мороняса, конатнень цёрашабатне моразь потмовиень путозь.

    Нина Николаевна Черновась азондсь сянь колга, кода И.М.Девин васенцеда ушедсь сёрмадома, кода васенцеда лиссь сонь сёрматфоц.

 Макссь эсь колганза содамс Илья Максимовичень асушиц. Аф аньцек велесь и Мордовиясь сонь содасы лемонц.

  Минь земляконьке кадсь эсь мельганза крхка и смузю наследие – питни книганзон и седиень пети моронзон. Лувить кеняртьфнесы И.М.Девинонь сёрматфоц, козякофнесы ёненц. Сонь творчествац тонафты ялгаксшинь ванфтома, фкя-фкянь кельгома, паронь арьсема. Лятфнематне поэтть колга фалу кармайхть эряма лувихнень, велеряензон седиса.

Сокорова Л.А., мокшень кялень тонафты

Краткое описание документа:

Статья на мокшанском языке

В 2017г 20 июля исполнилось бы 95 лет народному поэту Мордовии. На родине поэта, в селе Старая Теризморга, прошло мероприятие, посвящённое его юбилею, музыкально-литературная композиция "И.М.Девинонь панжи лайме порань уженяц". Вспоминали детство поэта, первые творческие шаги, каким он был человеком широкой души, который бесконечно любил свою Родину.