Статья по воспитательной работе"Тәрбие-отбасы бастауы"

Отбасы-тәрбие бастауы

Жастардың іс-әрекетін қоршаған ортадағы қарым-қатынасын, өмірге, дінге көзқарасын, дүние-танымын, мінез-құлқын дұрыс қалыптастыру тәрбиесіне байланысты.

Армандап жүріп егемендік алған жас қоғамның іргесін нығайту үшін, бүгінгі жастарға үлгі боларлықтай өнегелі тәрбие беруіміз қажет.

Оқушыны өркениетті өмірге талпындыруға ата-баба дәстүрін жаңа өмірге жалғастыруға, кіндік қаны тамған туған жерін, асқақтаған көк байрақты Отанын сүюге, ата-анаға, үлкендерге кішіпейілдікті бойына сіңіруге және салауатты өмір сүруге жан-жақты жұмылдыру керек.

Ұрпақ-еліміздің, ұлтымыздың болашағы. Ұрпақ тәрбиесі әр елді алаңдатса керек. Өйткені, ертеңін ойламаған мемлекет қашан да орны толмас өкініштерге душар болады. Ұлы данышпан даналарымыз «Ел боламын десен, бесігіңді түзе»- деп өнегелі өсиетті текке айтпаса керек. Баланың алтын ұя-мектептен алған тәлім-тәрбиесі мен ата-анасының өнегесі ұлт келешегінде зор маңызға ие.

«Тәрбиесіз берілген білім-адамзаттың қас жауы»,-деп ұлы философ Әл-Фараби айтқандай, ел келешегі ұрпақ тәрбиесімен тығыз байланысты. Ал ол ұстаз тағылымынан бастау алады.

Жас ұрпақты өмірге дайындауға жаңа сапалық белгілер қалыптасып, дербестікті дамыту, кәсіптік бағдар, білім алу және өздігінен білім алу сияқты мәселелерге ерекше маңыз беріле бастады. Мектептің, отбасының және жұртшылықтың тәрбиелік қызметінің біртұтастығы мектептің мақсатты түрде жүргізген жүйелі жұмыстарының нәтижесі. Ал бұл нәтиже қазіргі заманғы білім беру мекемесіне қойылатын басты талаптардың бірі.

Жас жеткеншектерді тәрбиелеу ісінде мектеп пен отбасы арасындағы байланысқа үнемі көңіл бөлінуі тиіс.

Отбасының аса маңызды әлеуметтік қызметтері- азамат тәрбиелеу, патриоттығын қалыптастыру, болашақ отбасы иесін кемелдендіру және мемлекет заңдарын мойындап, құқықтарын сауатты пайдалана білетін қоғам мүшесін жетілдіру.

Отбасындағы тәлім-тәрбиенің мақсаты-баланың жасын, жеке ерекшелігін, психикалық жағдайларын ескере отырып, жарасымды жетілген, ұрпақты тәрбиелеу. Ата-ана мектептің серігі. Олармен мектеп тығыз байланысқанда ғана оқу-тәрбие жұмысы оң нәтиже берері сөзсіз.

Ата-ана күнделікті өмір тіршілігінде еңбегі, адамдық бейнелері, жақсы мінез-құлқы, дұрыс қатынасы арқылы балаға үлгі.

«Балапан ұяда не көрсе, ұшқанда соны іледі», «Әкеден ақыл, анадан мейір» алады. Отбасында «Әке-асқар тау, ана-бауырындағы бұлақ, бала-жағасындағы құрақ» болып есептеледі.

«Баланы жастан» деген халық даналығы текке айтылмаса керек. Ендеше, баланы дұрыс тәрбиелеу өз қолымызда.

                                                                                 Л.Р.Абишева

                                                            Новопокровка орта мектебінің мұғалімі.