"Сәтті жоба аясында" (Мақала)

Сәтті жоба аясында

2015-2016, 2016-2017 оқу жылдары бүкіл облыс психологтары үшін ерекше жыл болды. Себебі,  Қызылорда облысы аумағында ҚР ДСӘДМ, ҚР БҒМ және ҚР ІІМ бірлескен бұйрығы негізінде мектептің 8-10 сынып оқушыларына және колледждің 1 курс студенттеріне «Кәмелетке толмағандар арасындағы суицидтің алдын алу» превенциясы жүргізілді. Ал осы жобаның негізінде бүгінде жұмысымыз қарқындап, облыс психологтарының деңгейлері өсіп-өркендеуде.

Облыстық оқу орталығы мамандарының ұйымдастыруымен аталған жоба негізінде қала, аудан, колледж психологтарына диагностикалық, коррекциялық, профилактикалық бағытта және денсаулық сақтау қызметкерлерімен бірлестікте көптеген семинарлар ұйымдастырылды. «Ел мен елді, халық пен халықты теңестіретін – білім» - деп Мұхтар Әуезов атамыз айтпақшы осы ұйымдастырылған түрлі семинарлар арқасында білімімізді, біліктілігімізді, кәсібилігімізді арттырып, түрлі шетел психологтарының тәжірибелерімен танысып, әдістерін жұмысымызда қолдана бастадық.

Сонымен қатар, өзге облыс психологиялық қызметінде жоқ жаңа, тың жүйемен жұмыс жасап келеміз. Яғни, Облыстық оқу орталығы мамандары жылдың басында облыстық психологиялық әдістемелік бірлестік мүшелері және қала мен аудан мектептеріне арнайы кураторлар бөлді. Кез-келген психолог жұмысындағы мәселе психологиялық әдістемелік бірлестікте талқыланып, ал әр мектеп өз кураторларынан кез-келген мәселе бойынша кеңес, хабар алуда. «Саусақ бірікпей, ине илікпейді» - деп, облыстағы 435 психолог оқу орталығы мамандары Абдрахманова Сымбат, Мақатаева Жұлдыз, Ерташова Динаның  арқасында екі жылдан бері ауызбірлікте қызмет етіп келеміз.

2016 жылы мамыр айында БҰҰ Балалар қорының өкілдері және ҚР Білім және ғылым министрлігің өкілі Қызылорда қаласы, Жалағаш ауданы мектептерінде болып облыс психологтарының жұмысына оң бағаларын беріп кетті. Сонымен қоса, шілде айында БҰҰ балалар қорының сарапшысы, Аргентина елінің өкілі келіп жоғарыда аталған жоба негізінде Облыстық оқу орталығы мамандарымен, мектеп, колледж психологтарымен кездесіп жұмысымен танысып, оң бағасын берді, Қазақстан елінде психолог қызметі осындайдеңгейде екендігіне таңданыстарын да жасырмады және облысымыздың оқушыларымен, ата-аналарымен кездесті.

Аталған жобаның негізінде  Халықаралық ЮНИСЕФ мамандарынан тәлім алып және сол кісілердің таңдауымен облысымыздан ұлттық тренерлер таңдап алынып, жоғарыда аталған жоба аясында басқа да облыс психологтарын оқытып жүрміз. Мұндай деңгейлері жоғары мамандардан тәлім алып, өзге облыс психологтарын оқыту бақыты біздің облысымызға бұйырды. Олардан алған тәліміміз біздің шынайы жетістігіміздің біріне айналды.

«Білімің болсадағы ұшан теңіз, пайдасы жоқ халқыңа қызмет етпей» деп Шал ақын айтпақшы, облысымыздың өркенді болуына үлес қосу мақсатында өткен, осы оқу жылының абыройлы жолын алдағы жылдары да лайықты жалғастыруға күш саламыз!

Сөз соңында баршаңызға шығармашылық табыс, кәсіби ізденіс және мықты денсаулық тілеймін!

№280 негізгі мектебінің психологы

Шынболат Феруза Рахымқызы

Қызылорда қаласы