Татар теленнән "Фигыль" темасына тест

“Фигыль” темасы буенча тест

1 нче вариант

1)Менә көз җитте. 2)Укулар башланды.

3)Ефәк шарфлы апа безнең мәктәптә рус теле укыта. 4)Аны бик яраталар.

5)Аның ире очучы икән. 6)Менә хәзер ул ут эчендә фа­шистларны кырып йөри. 7)Ә Анна Сергеевна гомердә күз алдына китермәгән татар авылында балалар укыта. 8)Аңа бик еш хатлар килә. 9)Андый көннәрдә ул бик шат күре­нә. 10)Ә кайчакта уйчанланып китә. 11)Кич, эштән бушаган арада, улы белән урамда йөри, чишмә буйларына төшә.

12)Әллә күршедә генә торганга, әллә улы минем сеңлем белән дуслашканга, Анна Сергеевна мине дә яратты. 13)Мәк­тәптә очраганда, ул минем белән сөйләшергә тырыша. 14)Мин тартынам, рәтләп русча да белмим бит. 15)Җитмәсә тагын тотлыгам.

16)Беркөнне ул мәктәптән минем белән бергә кайтты, юл­да кызык нәрсәләр турында сөйләде. 17)Мин шуны аңладым: әгәр тырышсам, мин тотлыгуымны бетерә алам икән.  (Г.Бакиров)

В1 – В4 нче биремнәргә җавапны сүзләр белән языгыз.

В1.  12-15 нче җөмләләрдә кулланылган инфинитивны  язып алыгыз.

В2. 16 нчы  җөмләдә кулланылган фигыльләрнең төркемчәсен языгыз.

В3. 1-2 нче җөмләләрдәге фигыльләр кайсы заманда кулланылган? Шуны языгыз.

В4.  6-9 нчы җөмләләрдән сыйфат фигыльне язып алыгыз.

В5 – В9 нчы биремнәргә җавапны цифрлар белән языгыз.

В5. Билгеле үткән заман кулланылган җөмләләрне табып, номерларын арта бару тәртибендә языгыз.

В6. 15-17 нче җөмләләрнең кайсында беренче зат берлек санда, хәзерге заманда килгән хикәя фигыль бар? Шул җөмләнең номерын яз.

В7. 11-14 нче җөмләләрдән юклык формасындагы фигыльне тап. Шул фигыль кулланылган җөмләнең номерын яз.

В8. Шарт фигыль кулланылган җөмләнең номерын яз.

В9. Ярдәмче фигыль кулланылган җөмләнең номерын яз.