Мин, Ситдикова Рәйсә Сәлимйән ҡыҙы, 1974 йылдың 24 мартында Башҡортостандың Архангель районының Абҙан ауылында тыуып үҫкәнмен.
1980-1991-се йылдарҙа тырышып - тырышып Абҙан урта мәктәбендә "4" һәм "5" билдәләренә генә уҡып, төплө белем алдым. Үҙемдең тыуған яғымдағы халҡыма, уҡытыусыларыма ғашиҡ булып, уҡытыусы һөнәрен һайланым. Башҡорт дәүләт университетын ситтән тороп уҡып 2002 йылда тамамланым.Бәләбәй ҡалаһының 1-се һанлы урта мәктәбендә инде 21 йыл эшләп йөрөйөм. Әлеге көндә өс балаға әсәймен. Уларҙы мин сикһеҙ яратам, һәр атҡан таң менән һәр береһенә , таҙалыҡ, һаулыҡ теләп көнөмдө башлайым.
Уҡытыусы һөнәрен яратып башҡарам, һәр уҡыусыма ышаныслы ҡараш менән ҡарайым. Коллективымдағы уҡытыусыларымдан тормош ауырлыҡтарын еңеп сығырға өйрәнәм.
Уҡытыусымын! Һөйөнөп эшкә барам.
Байрам кеүек миңә һәр көнөм!
Балалар һәм мәктәп - бар байлығым,
Үҙем тапҡан бәхет бөртөгөм.
Уҡытыусымын! Сәскә орлоҡтарым
Аҡыл емешенә әйләнгән.
Сөнки илем, халҡым киләсәге
Минең хеҙмәтемә бәйләнгән.