Өз ісін терең меңгеріп, шәкірттерінің табысымен көпшілікті қуантып жүрген ұстаздардың бірі – Шалқар қаласындағы Ә.Жангелдин атындағы орта мектептің қазақ тілі мен әдебиеті пәнінің мұғалімі Сая Төлеуова. Оның бұл қызметте жүргеніне 20 жылдан астам уақыт өткен екен. Бүгінде Саяның шәкірттері түрлі салада жұмыс жасап жатыр.
Ұстаз еңбегі бағаланып, бірнеше Алғыс хат алды. Сонымен қатар, облыстық білім департаментінің Құрмет грамоталарымен марапатталды. 2008 жылы Түркияда демалуға жолдама алды. Биыл «Үздік облыс мұғалімі» атанып, облыс әкімі Елеусін Сағындықовтың грантын иеленді.
Сая Дәулетқызы балалардың шығармашылық қабілетін дамыту бағытында мектепте үйірмелер жүргізеді. Оқушылары – аудандық, облыстық олимпиада жүлдегерлері. 2007-2008 оқу жылында шәкірті Гүлжайна Нұрманова республикалық олимпиадаға қатысып, жоғары оқу орнының грантын жеңіп алды.
Қазір ол Алматыдағы С.Демирел атындағы Қазақ-түрік университетінің үздік студенті.
Шәкірттерінің шығармашылық жұмыстары облыстық топтама жинақ кітабына енген.
Аудандық, облыстық баспасөзбен тығыз байланыста. «Ғылым» баспасы шығарған «Қазақстанның үміттері» атты жинаққа 2 оқушысының есімі енді.
Соңғы 4-5 жылдықта ҰБТ қорытындысы бойынша өзі сабақ беретін қазақ тілі мен әдебиеті пәндерінен жақсы нәтижелерге ие болды.
Сая Дәулетқызы – қайрат-жігері, күш-қуаты мол ұстаз. Ұзақ жылдардан бері әріптес ретінде байқағаным, Сая қай шаруаға болса да енжар қарамайды, еркерусіз қалдырмайды. Оның қазақ тілі кабинеті жақсы жабдықталған. Бірнеше жыл қатарынан «Жаңа технология бойынша оқушылардың өз бетімен жұмысын ұйымдастыруда білім мен дағдысын қалыптастыру» атты бағдарламамен жұмыс жасап келеді. Ол күнделікті сабақтарын жаңа технологияның әдіс-тәсілдерімен түрлендіріп өткізеді.
Сая Дәулетқызы – көп жылдардан бері әдістемелік бірлестіктің жетекшісі.
Қазақ тілінен өз тәжірибесінде пайдаланып жүрген бағдарламасын кітап етіп басып шығарды.
Ұстаз болу жүрек жылылығын, мейірім шуағын, адамгершілік ұлылығын баланың бойына дарыту дейтін болсақ, Сая Дәулетқызы – жас ұрпаққа үлгі беруден, үйретуден жалықпаған нағыз педагог.