Мен өзімнің 26 жылдық ғұмырымды білім беру, жас ұрпақты тәрбиелеу ісіне арнадым. Ұстаз болу менің бала кезімнен арманым еді. Мұғалім мамандығының қиыны мен жеңілі, қызығы мен қуанышы мол болған ұзақ еңбек жолындағы өмірлік ұстанымы әрқашан шығармашылық ізденісте, ой қозғалысында болу. Менің пікірімше, осындай ұстаным мұғалімде болмаса, ол жай мұғалім атын жамылып жүргендер деп айтар едім. Қазіргі уақытта қазақ тілі мен әдебиет пәні мұғалімінің жүгі ауыр. Себебі болашақ ұрпаққа мемлекеттік тілді үйрету – қазақ тілі мамандарының міндеті. Бұл міндетті жемісті орындау үшін, оқушының пәнге деген қызығушылығын артыру үшін оқытудың көптеген әдіс-тәсілдерін өз іс-тәжірибемде ұтымды пайдалана білуге тырысамын. Қазіргі уақытта елімізде әлемдік білім кеңестігіне бағыт алған жаңа білім беру жүйесі негізгі фактор болып отыр.Сондықтан дамып келе жатқан елімізде мектептердің жаңа техникалық құралдармен жабдықталуына үлкен мән беріліп отыр. Біздің мектепте бір мультимедиялық кабинет, 2 интерактивті тақта бар. Интерактивті тақта әр қазақ тілі кабинетінде болу керек деп ойлаймын, бірақ бұған әлі қалымыз жетпей отыр. Бүгінгі күнде біздің мектептерге қазіргі уақытқа сай мұғалімдер керек. Оқушылардың білім сапасын арттыруға бағытталған жұмыс түрлерін ұйымдастыра білу мұғалімнің кәсіби шеберлігіне байланысты. Педагогикалық шеберлік- ұстаздық талантпен тығыз байланысты. К.Д.Ушинский: «Педагогика теориясын қаншама жетік білгенмен, педпгогикалық әдептің қыр-сырын меңгермейінше бұған оның қолы жетпейтіндігін», -айтады. Педагогикалық шеберлік - тек қана мұғалімнің жалпы, жан-жақты және әдістемелік сауаттылығы ғана емес, ол-әр сөзді оқушыларға жеткізе білу, олардың толық қабыл алуы. Ұстаздық шеберлік, біріншіден, мұғалімнің өмірге көзқарасы, екіншіден, пәнді жетік білген, ойын толық жеткізетін және оқушылардың бойында әдеп, әдет, дағды сияқты моральдық нормаларды сіңіре білгендігі, үшіншіден, оқыту және тәрбиелеудің әдіс-тәсілдерін меңгерген, білгенін қызықты да, тартымды өткізе алатын, педагогикалық әдеп пен талантын ұштастырған адам ғана шеберлікке ие болады.
