Добавить материал и получить бесплатное свидетельство о публикации в СМИ
Эл. №ФС77-60625 от 20.01.2015
Инфоурок / ИЗО, МХК / Конспекты / Внеклассное мероприятие "Тугэнитки нимэгнэдек"

Внеклассное мероприятие "Тугэнитки нимэгнэдек"

  • ИЗО, МХК

Поделитесь материалом с коллегами:

КВН «Тугэнитки нимэгнэдьэк»

(внеклассное мероприятие)


Чолбодукова Аянесса Александровна,

учитель МКОУ «Березовская НСОШ им В.А.Роббека»


Нинун: ҥунмир бинивэн, ноҥан томалбан илкэмэн одядатан, аявдатан бодучин; харивутан эмҥэлтэникэн, балдача төрэми хинэмэлтэдэтэн дяпкачин; мулгуми унубган уюлдукэни, төрэн нулуман хамалканду, мандучинду, дёкутич дялнюнми гургэвчинду хупкучин.

Гургэ дёданални: Гөмкэрэл, эвинду кимапча гяки гиратлал хинютти конвертал. Гяки мулрукалкан карточкал. Иманра бэикэлкэн онича. Дёнтуралкан открыткал. Дьөр корзинкал, 12 иманракакар. Эвэды икэ огални.

Эвин ҥэнунни.

I. Оргмомент. Дорова куҥал! Эвэды икэ, алман, хэдьэ тэгэли дорнаникан, иртэндули хавдатан гяки фестивалил эгден бэлрин. Эрэк амаргаг анҥанилду эвэды икэ хо хояч исни. Тек, эвэдыч икэри икэмҥэлти хоял, бу эстраднай икэмҥэн Дмитрий Лебедев эвэдыч икэривэн хокан эркэникэн долчиваттап. Мун Республикалавун хаври куҥал ансамблитан бис: Хэку Мома улусан Сасыр билэклэн, Маранга Томпо улуслан Тополинайла, Мэрлэнкэ Кобяйи улуслан Себян-Кюель билэклэн, Аянесса Эвено-Бытантай улуслан, т.х. Ноҥартан эвэды икэлбу алманикан, икэникэн, көплэчим хэюкникэн, хэдьэв хэдьэникэн, эвэн ҥунмирэн титэрэптук бинивэн, тэгэлгэмэн гяки бугалдули хөллөтникэн ичукэттэ, укчэндэ.

Ламутскай дёнтуралдун огам дукритан П.Старков, Е. Бокова, А. Степанов, эрэк икэлбу эвэн хурэлни, бэилни титэрэптук алманикан икэвэттэ. Тарак икэл огалдутан көплэтникэн хэдьэвэттэ.

(Икэ оган исни)

Иманаддан нёбаҥакан,

Иманаддан нэсэҥэкэн.

Төр ойлан ням бидэн

Элбэддэн хэҥкэҥэкэн.

Мукдэкэндел авулкасал,

Хякитандял майталкасал,

Кунтэкэл, урэкчэл

Мунрукас очамдасал. (П.Ламутский)


II. Тугэни дюгулин КВН. Хэбдеку тиндэвур "Осикат" нян "Хонҥачан" гэрбэ дьөр командаду дэлкэбдип. Тугэни дюгулин ирэк команда хоя гөмкэрбу, ҥэнукэрбу, икэлбу харивутан итчип.

Бу хо аич ҥунмир томалбан, эдьэкбэн харап. Тарак дюгулин дёнгалда.


Нонап мулрука. "Тугэни илкэлни".

Ирэк команда аич хан?

Нянин хялтаду осикаталканнямула один.

Хялтаду хякита хурэлни хамудир нямалдин.

Ньөлтэн эрэли мэрэти хякапалкан бисэкэн хялтаду.

Ирангадук ханин хэссэки ҥэндэкэн этэн хялтар.


Гя мулрука. "Ҥэнукэрбу тамкачин".

Командал мэр доливур ҥэнукэрбу тамкатта.


а) "Осикат" команда ҥэнукэрни:

1. Нёбати авулкан мукдэкэр илатта. (Иманралкан мукдэнэк).

2. Умкагачаккан этикэчэкэр ханимадда гөҥнэр. (Тугэрэп хярму хярагган)

3. Иманрали хэрэлэн оран куняддан. (Карандаш)

4. Мэн ач таҥуна орарби көсчидды бисни. (Осикаталкан бөгандя)

5. Ач удла удьармав эвэнкиҥэнчэ. (Окат)

6. эсни гулун бис, нямулукаттан. (Ньөлтэн)


б) "Хонҥачан". команда ҥэнукэрни:

1. Нёбати биникэн эсни мунрукан бис, дэгридэ-дэбиникэн эти дэги бис. (Иманра)

2. Эникэн ичур анусадды бисни. (Эдэн)

3. Мэендули орар боргачал, тарав ок чакчип гөҥнэчэл. (Осикат)

4. Ноҥман хоч аяваникан-тит, дэпки көетҥэ туркучэпти. (Нөлтэн)

5. Ядук-та эҥэе як бисни? (Хиги)

6. Ядук-та эҥи як? (Мө)


Или мулрука. Капитанал есчимэчэкэтэн.

Нэсэвунду иманракакар гирапчарни дэсчир. Капитанал гирапча иманракакарбу амалтач ганикан, иманракакарду ирэк номер дукуттиван мэтудин. Хупкучимҥэ таралбу номердитэн итникэн, улгимирбу таҥдин:

Ирэк дэги тугэниду умталбуваттан, чипирчарни хевэттэ?

Анҥанила дьөрэкэн як тэтий гайоттан?

Ирэк дэги мэрэҥтэлкэн?

Ирэк дэги дили хэссэки хуклэвэттэн?

Ями нёбати накан - нёбати?

Ирэк дэги нючидыч иманра гэрбэлкэн?


Дыги мулрука. "Открыткалбу чакли, гөмкэрбу таҥни". (Насакапча открыткалбу чакриди, кубэтчур өмэтту дукапча мулрукаван таҥанмай.)

Намас иманрала удь аич хаввоттан.

Иманра өйдэн иҥэньси, дон нямси.


Тунҥи мулрука. "Ясали нимдутникэн онянмай".

Эвиддилдук дьөр куҥал есчимэчиннэтэн. Ноҥартан оничав аймакан хякаҥчиникан көеттидюр, як оняттиван унуридюр, ясалур нимдэнидюр, эникэн көер тарав оняннатан. Ҥи хо аич оняча этэннэн.


Нюҥи мулрука. "Иманракакар"

5 минуталкан эвэч эвин. Командалду корзиналбу бөнмэй. Гирапча иманракакар төрли нэсуҥчир. Таралбу чакникан, эвиддил мэн корзиналавур өмэн метрадук нодуннатан. Ирэк команда корзиналан хоя иманракакар, тарал этчир.


Нади мулрука. "Дёнтуру мудакли" (икэ оган исни).

Хупкучимҥэ: Тос-тос мостали

Куҥал: Тобаҥакан хэдели!

Хупкучимҥэ:Иҥэньси иманрав

Куҥал: Хякитала хорун…


Хупкучимҥэ: Иҥэньси хоч инивэттэн,

Куҥал: Имандав тикукэвэттэн;…


Хупкучимҥэ: Тугэни илран,

Куҥал: Иманра хорун…


Дьапки мулрука. Есчимэчин "Ҥи хинмач иманракакам гирдин". (Командалдук дьөр куҥа есчимэчиннэтэн.)


Уйи мулрука. Есчимэчин. Василий Спиридонович Баргачан «Тугэни» дёнтурбан мандуникан аймакан авдатникан таҥанмай (өмэтэл куҥа).


Тугэни эмрэн,

Иманра хөррэн.

Төрлэ бэкэтлэн

Эрро, нёбалран!


Би бугу дасун

Хо нодач хулрач –

Тэмбутич, нямсич

Гилтаня уҥуч.


Эйду хуклэснэ

Хякитал, хятал.

Тивунь бидилрэ

Нэлкэрлэ истала.


III. Муданни. Комадалбу эскэн.



Төрэм унувкачин:

Нинун – цель, нэсэвун – стол, нэсуҥчир – разбросаны, мулрука – задание, мулгун – мысли, көплэчин – танец, оган – мелодия, тамкатта – отгадывают, авдатникан - внимательно.



Автор
Дата добавления 25.12.2015
Раздел ИЗО, МХК
Подраздел Конспекты
Просмотров91
Номер материала ДВ-284805
Получить свидетельство о публикации
Похожие материалы

Включите уведомления прямо сейчас и мы сразу сообщим Вам о важных новостях. Не волнуйтесь, мы будем отправлять только самое главное.
Специальное предложение
Вверх