Оҕо суруйааччыта,поэт Константин Ильич Сосин айымнньыларынан уус-уран композиция «Саҥа үйэ Манчаарыта» .(туруорда Елена Васильевна Чичахова) олунньу ый,2015 сыл.
Аахтылар: 1.Дайбанныров Александр Петрович
2.Григорьев Дмитрий Павлович
3.Назаров Александр Иванович
4.Васильев Николай Петрович
Литература,Улуу Кыайыы 70,Мэҥэ-Хаҥалас улууһа төрүттэммитэ 85,Манчаары 210 сылларынан «Ким да умнуллубат,туох да умнуллубат!»,диэн девизтээх I Тыыллыма нэһилиэгин 59-с Культура уонна спорт эстафетатын театрализованнай кэнсиэригэр аа5ан-дипломант(01.03.15с.Өлөчөйгө бөһ.Мэҥэ – Хаҥалас ).
Презентацияны оҥордо- Борисова Вилюяна Васильевна.(ааҕар кэмнэригэр слайд задникка көстө турар,сахалыы музыка доҕуһуола иһиллэр).
1.Алгыс:(Александр Петрович)Дьылҕам тыыннаах айыыта-
Оҕолорум-хоһооннорум!
Эдэр сааһым умсулҕанын
Өрүү илдьэ сылдьаҕыт.
2.(Александр Иванович) Көнө сүрэх көҕүс түспэт
Күнэ тахсан,көнньүөрэн,
Саппахтаах да санаалары
Саһыарбакка этэбит.
3. (Дмитрий Павлович) Көҥүл өрүү өргөйбөтүн,
Күөмчүлэнэн ыларын,
Көрө-билэ сылдьаммыт,
Кэскил кэҥиэ,-дэһэбит.
4.(Николай Петрович) Төлкөлөөх маҥан түөрэхпит
Тэхтиргэ тэптэрбэтин!
Туску буоллуҥ! Хоһооннорум,
Олох үөһэр олоруҥ!
2. Урааҥхай саха:(А.П.) Атааннаах айан аартыктаах,
Хабырыйсыылаах халыан айаннаах,
Кээрэнэн иһэр кэскиллээх,
Самна турар саргылаах
Урааҥхай саха эбит.
(Д.П.) Түһүмэх- түһүмэх кэмнэргэ
Түмүллэн,түрдэстэн кэлэр,
“Тиис-тиискэ,муос-муоска,(А.П.,Н.П.)
Туйах-туйахха!”-дэсиһэр (А.И.)
Тумус туттар дьонноох эбит.
(Н.П.) Быыһал-абырал буолуох баҕалаах,
Былаҕайга былдьатар дьылҕалаах,
Ардахтаах суолу атаҕынан арыйар,
Тордохтоох суолу тобугунан тобулар
Тойуксут уолаттардаах эбит.
(А.И) Симэлийэн иһэн сириэдийэн кэлэр,
Умулла-умулла көрдүгүннээн тахсар
Өй күлүмэх күүһүн түмүнээри,
Мөккүөр бөҕөтүн мөҕүрүтээри,
Санаа,сорук оҥостор эбит.
(Н.П.)Аҕыс айыы ууһуттан айдарыылаах
Аан дайдыттан арахсыбат аналлаах,
Күөмчүлэммит көҥүлүн туруулаһар
Көлүөнэ-сүһүөх ыччатын туруорар
Өспөт тыыннаах омук эбит!
(А.П.)Атааннаах айан аартыктаах,
Хабырыйсыылаах халыан айаннаах,
Кээрэнэн иһэр кэскиллээх,
Самна турар саргылаах
Урааҥхай саха эбит. (1999с.)
3. Тыа дьонугар (Н.П.)А5ам дьоммут алгыһынан
Алаһа дьиэ арчылатан,
Айыыларга үҥэн – сүктэн
Сарсыҥҥыны саныаҕыҥ!
(А.И.) Сайын аайы ходуһаҕа
Кулуһун уота умайдын!
Сүрэҕи,куту уоскута
Түптэ буруота тунуйдун!
(Н.П.) Ынах ииттэн,сылгы тутан
Үрүҥ аһынан үссэнэн,
Үүнэр ыччаты туруоран
Үксүү,элбии туруоҕуҥ!
(А.П.) Алаас ыырдаах киһиэхэ
Урааҥхай дэтэр анала
Саха омуга уутуйан
Үөскүүр сирэ – иыа сирэ.
(Д.П.) Бүгүҥҥү күн үөрүүтүнэн,
Бүтэн биэрбэт түбүгүнэн,
Тыа ыала,тыа сахата
Дьоһуннук олоруоҕуҥ!
(Н.П.) Аҕам дьоммут алгыһынан
Алаһа дьиэ арчылатан,
Айыыларга үҥэн-сүктэн
Сарсыҥҥыны саныаҕыҥ!
4. Өрөгөй үөрүүтүн билэбит :(Д.П.)
Батталлаах былааһын самнарсан
Саҥалыы олоҕу тутуспут,
Артыалтан колхозка,совхозка
Охсуулаах үлэҕэ туруммут
Манчаары сиэттэрэ – Мэҥэлэр,
Өрөгөй үөрүүтүн билэбит.(бары)
(А.П.) Геройбут Сүөдэрдии хорсуннук
Өһүөннээх өстөөҕү самнарбыт,
Күн сирин эйэлээх олоҕун
Көмүскүүр аналын толорбут.
Манчаары сиэттэрэ- Мэҥэлэр,
Өрөгөй үөрүүтүн билэбит.(бары)
(А.И.) Уус тылга уһуллан улааппыт
Ураты чаҕылхай талааннаах
Аар – саарга аатырбыт ырыаһыт,
Артыыс да,хоһоонньут ыччаттаах
Манчаары сиэттэрэ- Мэҥэлэр,
Өрөгөй үөрүүтүн билэбит. (бары )
5. Саҥа үйэ Манчаарыта
(Н.П.) Кырдал үөһэ кылбаҥнатан
Кылыйбахтаан кыыралдьытар,
Күөн көрсөн аат ааттатар
Кыайыы көтөллөөх бөҕөспүт
Баар ыччаппыт ньургуна-
Саҥа үйэ Манчаарыта!
(А.П.) Орто дойдубут отуорун
Огдолуппат олоҥхолоох,
Доллоһуйа устар үөстүү
Тобуллаҕас тойуктардаах
Баар ыччаппыт ньургуна-
Саҥа үйэ Манчаарыта!
(Д.П.) Үллэр өрүс түгэҕинэн
Тимир тиһилик турбаны
Соһо тардан таһаарсыһар
Күлүмэх күүстээх боотурбут
Баар ыччаппыт ньургуна-
Саҥа үйэ Манчаарыта!
(А.И.) Үрдүк үөрэх үктэллэрин
Үргүлдьү ааһар өйдөммүт,
Кэскилбитин туруулаһар
Кэтэһэ саныыр эрэлбит
Баар ыччаппыт ньургуна-
Саҥа үйэ Манчаарыта!
(А.П.) Күөмчүлэнэр көҥүлбүтүн
Күөтэһиилээх мөккүөрдэргэ
Көмүскэһэр аналламмыт
Саха киһитин саарына
Баар ыччаппыт ньургуна-
Саҥа үйэ Манчаарыта!
Оставьте свой комментарий
Авторизуйтесь, чтобы задавать вопросы.