Мен, Шаги Анар Ақмола облысы, Бурабай ауданы, Атамекен ауылының орта мектебінде тарих-география пәнінің мұғалімімін. Осы мектепте 2007 жылдан бастап істеймін. «Мұғалім маған бәрінен де қымбат,
өйткені, ол – мектептің жүрегі» - деп ұлы ағартушы Ы.Алтынсарин айтқандай , ұстаз – әрбір адам өміріндегі ең маңызды тұлға. «Адамның адамшылығы ең алдымен жақсы ұстаздан!», жас жеткіншектерді білім нәрімен сусындата отырып, жеке тұлға ретінде тәрбиелеуде мұғалімнің еңбегі зор екендігі сөзсіз. Ұлттың болашағы ұрпағында болса, ұрпақтың тәрбиесі – ұстаз қолында.
Ұрпақ тәрбиесі дегеніміз келешек қоғам мұрагерлерін тәрбиелеу. Тәуелсіз мемлекетіміздің басты құндылығы – білімді адам. Тек жақсы, білімді мұғалімнің арқасында ғана әрбір оқушы жоғарыдан көрініп, білім ала алады. Ұрпақ тәрбиелеу ісінде ұлағатты ұстаздық жолында қызмет етіп келе жатқан мұғалімдердің ата-анадан кейінгі атқарар рөлі ерекше. Мұғалім балаларға білім беріп қана қоймай, өмірге дұрыс жолдама беріп, бағыт-бағдар көрсетеді.
Мұғалім болу үшін – талап болу керек. Қай адамның балалармен жұмыс істеуге қабілеті бар – сол адам ғана мұғалім деген атаққа ие бола алады. «Лашын құсқа ауа қадірлі, жүйрік атқа дала қадірлі, ата – анаға бала қадірлі» дегендей болашақ ұрпақты тәрбиелеу мұғалімдер қауымынан терең білім мен үлкен шеберлікті талап етеді. Мұғалім еңбегі адамзат қызметінің өте маңызды да күрделі түрі екені даусыз, ол жүрек жылуы мен күш-жігерді, тіпті уақытпен санаспай еңбек етуді қажет етеді. Күнделікті қызметінде жас ұрпақ бойына сапалы білім, саналы тәрбие сіңіріп, рухани байлықты, ұлттық құндылықтарды көздің қарашығындай сақтауға, адамгершілік қасиеттерді бойларына сіңіруге бар күш-жігерін жұмсайды. Ең алдымен ұстаз өзінің ісімен, өзінің сөзімен тәуелсіз еліміздің болашағын ойлайтын, Отанның беріктігін қорғайтын білімді ұрпақ тәрбиелейді.
Ұстаздың осыншама қадір-қасиет, құрметке бөленуі өзін қоршаған орта мен әрбір шәкіртіне асқан сезімталдықпен, жауапкершілікпен қарым-қатынас жасауында. Өйткені оның қарапайым да сыпайы киім киісі, мәдениетті сөзі, әдепті жүріс-тұрысы, жинақы іс-әрекеті, білімі шәкіртке де, ата-анаға да, жұртшылыққа да өнеге. Ұлы ағылшын ағартушысы Уильям Уорд:
Жай мұғалім хабарлайды,
Жақсы мұғалім түсіндіреді,
Керемет мұғалім көрсетеді,
Ұлы мұғалім шабыттандырады,- дейді. Білім беру жүйесі мамандардан кәсіби икемділік пен ұтқырлықты, сан қырлы шығармашылық қызмет пен өзін-өзі басқару, өзін-өзі ұйымдастыру жағдайындағы біліктілікті қажет етеді. Өйткені қазіргі жас буын – еліміздің келер күнгі келбеті. Бұл жөнінде Елбасымыз Нұрсұлтан Әбішұлы Назарбаев: «Ғасырлар мақсаты – саяси-экономикалық және рухани дағдарыстарды жеңіп шыға алатын, ізгіленген ХХІ ғасырды құрушы іскер, өмірге икемделген, жан-жақты жеке тұлғаны тәрбиелеп қалыптастыру»,- деген тұжырым жасады.