- 24.01.2015
- 1038
- 0
Темась: «Литературнай гостинай «Лемоц эряй и кармай эряма народоньконь ваймоса». Г.Я. Меркушкинонь пьесац «Народть лемста»
Цельхне:
1) келептемс тонафнихнень содамошиснон Григорий Яковлевич Меркушкинонь эряфонц колга;
2) кемокстамс выразительнай лувомань и корхтама маштомань навыкснон;
3) Григорий Яковлевич Меркушкинонь творчестванц вельде касфтомс и кемокстамс тонафнихнень кельгомаснон мокшэрзянь литературати.
Оборудованиясь: мультимедийнай проектор, компьютер, книгань выставка, портрет.
Источникне: http://finugor.ru; http://kk.docdat.com; http://verhissy.ru; Е.И. Чернов «Драматурги Мордовии»; «Мокшень правда» газетатне, «Мокша» журналхне.
Урокть молемац.
I Организационнай пялькссь.
1. Тонафтыть валоц. (1 слайдсь)
Тячи уроконьконь лемдсаськ содаф мокшень ученайти, педагогти, драматургти Григорий Яковлевич Меркушкинонди.
(2 слайдсь) «Г.Я. Меркушкинонь колга лятфнембяльсь кизоста кизос аф олай. Сонь лемоц серматф республикать историяс. Ученаень, педагогонь, государственнай деятелень коенза – обуцянза – эрек лихтибря, конанди фалу сашендома, штоба ванфтомс пря цебярь тевонди», - ня валхнень азозень филологическяй наукань кандидатсь, профессорсь Г.И. Горбунов. И тяфта арьсихть сембе. Ученайть лемоц содаф аф аньцек Мордовияса, но и марнек Россияса.
II Работась урокть теманц коряс.
1. Заочнай экскурсия «Г.Я. Меркушкинонь шачема велесонза».
Пензенскяй духовнай консисториянь Инсарскяй уездонь Од Иссапря велень церькавонь метрическяй книгаса тяштьф, што сире стильть коряс, 1917 кизонь 11 ноябрьста, а одть коряс, 23 – це ноябрьста, Яковонь и сонь рьванц Мариянь шачсь церац Григорий.
Штоба сяда лац содамс писательть, сонь творчестванц, марса етатама ся васттнень эзга, коса шачсь тя ломанць.
Шачема веленязе (видеоролик)
Исса веленяй, шачема масторняй!
Панжат, венемат тон кувалмоняс.
Од ульцят строявсть, кеподсть мазы кутт,
Пяшкодсть вайгяльда, мазы морода.
Эряк, веленяй, фалу мазомкшнек
И минь мяленьконь, фалу кенярьфнек
Кенярьфнемасть минь цебярь тевняса,
Цебярь ломаньца, цебярь мяльняса.
Тяса шачендсть–кассть содаф мокшалят
Касфтозь, мазоптозь мокшень крайняньконь,
Мокшень крайняньконь, шачема ширеньконь.
Ю.Артамонова
2. « Исса велесь» стихотворениять морафтомац.
Исса
велесь, од велесь
Панда алняса, панда алнясa
Ляйть трваняса.
Велеть откстомсть ульцянза
Келемсть сенем ляйнза,
Мазы панга налкс
Кеподсть кудонза.
Исса велеса минь эрятама
Шобдавань зарять
Мархта стятама.
Велеть мазыхть стиренза
Да удалафт церанза,
Цефксонь вайгяльса
кайгихть моросна.
Шачема веленяй,
касома масторняй
Штоба тейть фалу
Тердель седизе. З.Ломачкина
3. Азондомась Г.Я. Меркушкинонь колга. (заданиянь максомась)
(3 слайдсь) Тонафтысь: Г.Я. Меркушкин. Азондомок тя лемть, арьсетяма, мезе карматама азондома сонь эряфонц колга? И катк тячиень васедеманьконь мельгя сон арай киндивок сяда мала, сяда содавикс, а кивок панчсы эстейнза аф содаф драматургть.
(4 слайдсь) Тонафнись: Григорий Яковлевич Меркушкин емластакиге лядсь аляфтома – тядяфтома. Аньцек топодсь ёмла Гришаняти вейхкса ковнят, кода тифть эзда кулось тядяц, Мавра Трифоновна. Тейнза ульсь аньцек комсь киза. Арьсекшнесь ли тя мокшавась сянь колга, што шачфтомок омбоце иднянц аф няйсы сонь васенце аськолксканцка. Улема, прязонзовок ашесть сашенда ня мяльхне. Шабатнень ашезь када юмама. И, кода корхнихть, масторсь ляпе вайме ломаньца кирди. И мувсь тяфтама мокшава, конац аннезе Гринькать тядянь лофцта. Тя авать лемоцоль Надежда Петровна Кижаева. Ётни кафта кизот и зиянць тага синь кудботмозост. Кулось аляц, Яков Семенович. Тейнза ульсь 27 киза. Шабатне илядсть уроскакс. Оцю брадонцты, Иванонди, эста топодсь аньцек вете. (5 слайдсь) Синь ашезень када юмама аляснон сазороц Мария Семеновна Кирдянкинась. Сон стяфтозень синь пильголанкс.
Аф ваномок сянь лангс, што тейнза савсь ётамс лама сталма пачк, сон сяськозень синь. А лездыкс тейнза сяськомс сталмотнень ульсть школань учительхне. Васендакиге Анна Игнатьевна Хомутовась. Пади, сяс и Григорий Яковлевич кочказе учителень профессиять.
Аделазе Исса велень колма классонь начальнай школать, сяльде сявозь тонафнема Инсар ошу.
(6 слайдсь) Кемготува кизоса Григорий Яковлевич педагогическяй институтонь студент. Нинге тонафнембачк сон покодсь вейхксоце номер школаса историянь учителькс.
- Сон ашель кода аф няемс, - кода – бди азозе студент ялгац С.Н. Назаров. – Мъзярда сувсесь экзаменонь максома, нъльне преподавательхне кулхцонкшнезь келептень куркт. А улендсь и стане, мъзярда стакаль шарьхкодемс, кие экзаменца кизефнись, а кие отвечайсь. Аделамок институтть комсь кизоса, Григорий Яковлевич прважафоль покодема Темниковскяй педагогическяй училищав. (7 слайдсь)
Тонафтысь: Курокста сонь сявозь служама армияв. Служась Дальняй Востокса. Но армияса улемстонзонга сон ашезе кадонда тонафнеманц. Тянь колга азонды сермасонза. Барабаш ошста кучсесь седиваксстонь сермат Мордовияв, сяда сидеста Темниковав, коса учсь эсонза кельгома стирец Шура Чиндяева. Ванфтовсь Григорий Яковлевичень тяфтама аньцек фкя сермац:
«Барабаш, 1939 кизонь маень 16-це шись, Дальняй Восток.
Нюрьхкяняста эсь колган. Эрян лац, работан, лама луван, сёрмадан. Мзярда ули ёткозе якан библиотекав. Касфнесайне эсь содамошинень. Вдь мон одан, оцю мялезе содамс сяда лама. Лувондса Дарвинонь, тонафнеса математикать, историять. Анокласа эсь прязень институтса работамати. Минь оттама, сяс эряви эрь шиня работамс культураньконь и содамошиньконь касфтомаса.»
Армияста Григорий Яковлевич мърдась 1939 кизоть песта, эстокиге путфоль директоркс Рыбкинань средняй школав. Войнась сотозе тевонь тиемста: аноклазь школать од кизоти.
(8 слайдсь) Григорий Меркушкин васенце шитненькиге тусь фронту. Ульсь и тюрсь Ленинградскяй и Калининскяй фронттнень эса. Васенда ульсь ротань, а сяльде батальононь командиркс, полконь штабонь оцюнякс, дивизиянь оперативнай отделонь вятикс. Кода ба стака теенза афоль уле, сон вестевок ашезе юксне эсь шачема крайнц, рьванц Александра Кузьминичнань, конанди кучсесь седи ваксстонь лямбе сермат фронтста.
(9 слайдсь) «Монь эряфозень инкса тят пичеде. Монь эряфозти пелькс аш, кода корхнихть, отькорть эзда пуляське пели, сонь аф сявсы штыксь…
Сидеста арьсян колгат. Войнась минь явфтомазь. Аф виде. Сай и минь ульцязонк праздниксь. А войнась аделави. Эста мон мърдан тейть, и минь ульхтяма инь павазу ломанькс».
Григорий Яковлевич воявась фашисттнень каршес 1944 кизоть самс. Сяськомань шити ляткшнесь ровна вейхкса кофт, а сонь госпитальста нолдазь омбоце группань инвалидкс…
(10 слайдсь) Тонафнись: Рьвац, Александра Кузьминична, тянь колга лятфнесь:
- Ардонь инксонза Ивановав, сувань госпитали, муйне, а сон лофтана –лофтана, мярьгонь, якамшкацка аш. Да и коста улемс, кда кафцьке пильгонза ранендафтольхть. Няемань, кенярдсь шабанякс, ёрдась пря кргазон. А мон аварьгодонь, сяшкава ужялькс арась. Мон аварьдян, а сон басяй эсон: тят аварде, кле, прязень маряса лац… А мезень ни лац, кда колмоксть ранендафоль: васенда мяштец – Ленинградть ала стане, эста цють изезь калма, спасиба ялганцты, ся ладязе пиленц верса валф мяштезонза и аерфтазень шири калмайхнень, кле, сон шиса, куроконе санбату!.. Эрь, и виде, врачне вельмофтезь, прважазь Казани. Тоса керозь тевлав пакшенц, пчкафтозь кода эряви, макссть отпусконя куду. Эрясь-ащесь аф ламос Рыбкинаса, вийня кочксесь,- меки фронту ильхтине, сяка частти, бльшай, командирть мархта фкя-фкянди сермат кучсесть. Кобиридзе Ермолай Георгиевич фамилияцоль командирть, меколи Советскяй Союзонь Геройкс арась. Ся Кобиридзесь и пачфтезе Казани Григорий Яковлевичень, кле, стане и стане, фронту меки ётамбачк сувак Москуву, получак тоса орденцень. Ленинградть ала бойхнень инкса сон, бльшай, казьфоль Якстерь Знамянь орденца, сонць Михаил Иванович Калинин максозе ордентьке… Омбоцеда ранендафоль пряти, ся ранац аф пяк оцюволь, сельмоширьхконц вельхксса кедсь пакарти молемс ваткафоль, тозк медсамбатса и пчкафтозь. А вов колмоцесь – пильгонза тапафтольхть, ся рананзон мархта и повондсь Ивановав, то-та, нильгемонь нилеце кизоня… Ардонь Ивановав аф варжамонза, а штоба сявомс сонь тоста и ускомс Саранскяи, сяда маланяв шачема-касома вастозонза. Саранскяйса эста ламоль военнай госпитальда, а сон пчксесь – косоль эстонь пединститутсь, тяниень университетть ташта зданияц, - сявок тифоль госпиталенди. Пяле кизошка ащесь тоса, а мон монць эрянь и работань Рыбкинаса. Ушеса сёксель ни, афоли как раз сентябрель, ся пингова и лиссь Григорий Яковлевич госпитальста. Сась Рыбкинав, щафоль пялес военнайкс. «А мес, мярьгонь, погонфтома?» - сон эста майороль. – «Нолдамазь прокс, тяни мон гражданскяй ломанян», - отвечась.
(11 слайдсь) -Гопитальста лисемдонза меле Рыбкинаста туме курок, сонь зепсонза ульсь ни работама назначения. Кочкамазь ки лангс – монь да васенце иденьконь и ускомазь Саранскяи. Тяса сон и ушедсь работама директоркс научно- исследовательскяй институтса. Куватьс эряме ломань ширеса. Эста Саранскяйса ашесть стройсе эряма кутт- мольсь война. Кой- коста изгорткшнень: «А, конашкава пароль Рыбкинаса кудоньке. Ряцок Мокшесь, кизонда архт хоть лугав, хоть вири,- марнек перьфпяльсь сянгяря. Местема саме тяза?» А мирдезе лоткафтомань:
(12 слайдсь) «Ожу,ожу, мон нинге изень аердов военнай военнай дисциплинать эзда, коза кучсамазь – тоса и эряви работамс». Стакаль сембе ширде, но Григорий Яковлевич работась оцю мяльса, ашезе сотце аф вень удоманц, аф шинь ваймаманц. Мокшэрзянь народть историянц тонафнеманцты прафтозь прафтсь…»
(13 слайдсь) Тонафнись: Григорий Яковлевич марса Владислав цёранц мархта угадясь Москуву. Москувонь циркса мольсь представления. Клоуттне рахсефтезь ваныхнень. Рахасть сембе фкакс, кода шабатне, станя и оцюфневок. Ваныхнень ёткса ульсь и Григорий Яковлевич Меркушкинга. Москуса улемстонза сон фалу якась театрав или цирку, тяфта ульсь тянинге. Представлениясь пяк тусь Григорий Яковлевичень мяльс, и вдруг, тейнза арам, маряй пяк содаф вайгяль. Да тяфта рахась аньцек сон, дивизиянь командирсь. Григорий Яковлевич кулхцондсь: «Вага тя да, да сон шавовсь, тя виде и мон содаса, тейне азозь тя аф цебярь кулять войнада меле». Цёрац Владислав ванць алянц лангс и коданга ашезе шарьхкоде мезе лиссь мархтонза. Сон таколдозь кизефтезе:
- Аляй, мезе лиссь, аф седице сярятькстсь?
- Аф, церай, ашезь сярятькста.
И тага марясь рахама.
- Ермолай, - сетьмоста азозе Григорий Яковлевич, - Ермолай шиса!
- Стясь, и мезе ули вийц пешкодсь: « Ермолай!»
А ся пингть лия ширде Григорий Яковлевиченди мольсь шаржу пря уряднай аля, Советскяй Союзонь Геройсь и ювадсь:
- Гриша, тон косат?
Минутада меле синь ащесть цирконь аренать кучкаса фкя-фкянь ктмордазь. Тяфта васьфнесть аньцек фронтовикне. «Шиса, шиса»,- тошкась Григорий Яковлевич командиронц пилес. Залсь кашт ашезь моле. Артисттне и ваныхне ванцть фронтовой ялгатнень лангс. Синь воявасть марса, но войнань толу кисна тапарявсть, и лиссь тяфта, што эрсь синь эздост получась куля шавовомаснон колга. Веньберьф фронтовикне корхнесть «Моску» гостиницаса. Шобдава Ермолай Георгиевиченди эрявсь тумс меки. Фронтовикне макссть фкя-фкянди вал, што обязательна васедихть. И 1968 кизонь август ковста синь васедсть Саранскяйса. Синь лятфнезь стака бойхнень Ленинградть араламста, шавф ялгаснон. Григорий Яковлевич лувондсь пьесастонза пакшт, а Ермолай Георгиевич пингонь-пингонь весяласта юватькшнесь:
-Да тя жа Гуськов, тонь ялгаце.
- А тя сержантсь, кона эсь ронгонц мархта аралазе од лейтенантть, аньцек лемонц юкстайне кода.
- Григорий, а тя вдь мон.Аф, тя аф виде, мон тяфта ашень юваде. Ювадень, кода аш, орудиянь залпнень мархта тейне ашезь шарьхкодев. Азк, кода тейть сембось тяшкава мяляфтовсь? И сонць отвечсесь, путомок седиенц лангс кяденц: «Тяфтама няят – марнек эряфозт иляды».
-Григорий, а Тумовсь тя вдь тонць.
Тя ульсь фронтовикнень мекольце васедемасна.
(14-16 слайттне) Тонафтысь: Тюремать Григорий Яковлевич поладозе тяса, мирнай фронтса, и тага аф рядовойкс, а командиркс. Ульсь научно-исследовательскяй институтонь директоркс, аралась наукань кандидатонь диссертация, покодсь МАССР-нь просвещениянь министркс, Мордовскяй обкомонь секретарькс, Мордовскяй госуниверситетонь ректоркс. А нинге ульсь республикаса драматургиянь жанрань ушедыкс. Григорий Яковлевич сермадсь кемоньда лама пьеса. Нят «Толонь кит», «Шинь стяма», «Эряфонь киге», «Поэтть тяштец» и ламоц лият. (книгань выставкать ваномац)
(17 слайдсь) «Сяськома» альманахса 1955-це кизонь 15-це номерсонза печатлафоль: «Г. Меркушкин, Народть лемста, Ниле актса драма». Тяда меле курокста Саранскяйнь ульцятнень эзга эвондасть афишат – «Народть лемста» драмась путфоль театраньконь сценаса. Илья Максимович Девин – мокшень писательсь тянь кувалма пинге ётазь лятфнесь: «Кда кизефтелемазь тяни, мезень квалма азондови тя драмаса (и аф аньцек тяса, а сембе драманзон эса), - мон отвечалень: сонцень Меркушкинонь, сонь брадонзон-сазоронзон, алянзон-тядянзон, шабранзон-раднянзон квалма, марнек народоньконь эряфонц ащефонц квалма».
4. Афишать мархта содафтомась.
Къда видеста морафтомс афишать, арьсезевомс лангсонза, эста лац шарьхкодьсак, мес авторсь тяфта няфтезень налхкихнень. А аф лиякс. Ванцаськ, кие налхки «Народть лемста» пьесать эса.
Выводсь: афишать эса максфт налхкихне, конатнень ули эряфонь опытсна, аф няфтевихть кизосна, сяс мес пьесать эса максф пингсь 1930 сявомок мянь 1952 кизоть молемс.
5. Прологть налхкомац. (19 слайдсь)
Драмаса азондови, конашкава поафневи мокшень велеть эряфоц. Пьесась ушеды прологста. Тя эпизодсь – сценась сувафтсамазь и тиендьсамазь свидетелькс главнай действияда инголе ётаф событиятненди, ся пингти, мъзярда велеса юрнась классовай вии тюремась.
- Кулхцонтама прологста пакшкя и отвечатама тяфтама кизефкс лангс: мезе содаде геройхнень колга?
Кизефксне «налхкихненди»:
- Мезе маряде, мъзярда налхкость рольхнень?
- Кодама персонажень качестват удалась няфтемс тейнть?
- Тяни эряфсонк васьфневихть тяфтама ломать, кода Сергеев тонафтысь?
- Мялезонт ли тусь налхкомась ваныхнень инголе?
6. Отвечамась кизефкснень лангс?
- Мезе содаде геройхнень колга?
- Кодама собятия колга нинге азондови пьесать эса?
7. Тонафтыть валоц.
- Г.Я. Меркушкинонь лемоц эряй и, мон арьсян, кармай эряма народоньконь ваймоса (20-23 слайттне). Историческяй наукань кандитатсь Ю. Сальников сермады, што Григорий Яковлевичень эряфонц лангс ванозь эряви тонафнемс. Аф кунара МГУ панчф именной аудитория, кона лемтьф солаф драматургти. (видеоть ваномац Интернетста)
III Урокть итогоц.
1. Урокть итогонза.
- Тяни ванцаськ, кода, тинь тиесть заданиятнень, конатнень макссинь урокть ушетксста. Проверясть. (24 слайдсь)
2. Куду заданиясь: морафтомс Антоновонь «Фкя семьяса» произведениять; кочкамс эсь эряфонь шуфтснон.
3. Оценкань путомась.
МБОУ «Дракинская средняя общеобразовательная школа»
(ШМО учителей русского, родного языков и литературы)
Провела: учитель родного языка
и литературы Зюзина Г.П.
Рабочие листы
к вашим урокам
Скачать
Урок мордовской литературы в 10 классе.
Темась: «Литературнай гостинай «Лемоц эряй и кармай эряма народоньконь ваймоса». Г.Я. Меркушкинонь пьесац «Народть лемста»
Цельхне:
1) келептемс тонафнихнень содамошиснон Григорий Яковлевич Меркушкинонь эряфонц колга;
2) кемокстамс выразительнай лувомань и корхтама маштомань навыкснон;
3) Григорий Яковлевич Меркушкинонь творчестванц вельде касфтомс и кемокстамс тонафнихнень кельгомаснон мокшэрзянь литературати.
Оборудованиясь: мультимедийнай проектор, компьютер, книгань выставка, портрет.
Источникне:http://finugor.ru; http://kk.docdat.com; http://verhissy.ru; Е.И. Чернов «Драматурги Мордовии»; «Мокшень правда» газетатне, «Мокша» журналхне.
6 665 159 материалов в базе
Настоящий материал опубликован пользователем Зюзина Галина Павловна. Инфоурок является информационным посредником и предоставляет пользователям возможность размещать на сайте методические материалы. Всю ответственность за опубликованные материалы, содержащиеся в них сведения, а также за соблюдение авторских прав несут пользователи, загрузившие материал на сайт
Если Вы считаете, что материал нарушает авторские права либо по каким-то другим причинам должен быть удален с сайта, Вы можете оставить жалобу на материал.
Удалить материал
Ваша скидка на курсы
40%
Курс профессиональной переподготовки
300/600 ч.
Курс профессиональной переподготовки
300/600 ч.
Курс профессиональной переподготовки
600 ч.
Оставьте свой комментарий
Авторизуйтесь, чтобы задавать вопросы.