Мен, Канатбекова Гульнур Алтынбековна 2004 жылы Қарағанды Мемлекеттік Университетінің география мамандығын бітірдім. Алғашқы еңбек жолымды 2004 жылы Балқаш қаласындағы осы ЖББ №8 орта мектебінде география пәнінің мұғалімі болып қызмет жасап келемін. Еңбек өтілім 11 жыл. ІІ санатты.
Ізденіс тақырыбым: «Қазіргі заман білім беру парадигмасының тиімді әдістерін қолдана отырып, оқушылардың шығармашылығын және білім сапасын арттыру»
Іс-әрекетім: «География сабақтарында жаңа ақпараттық технологияларды сабақта кеңінен қолдану арқылы жан-жақты дамыған жоғары интеллектуалды , функционалдық сауаттылығы жоғары, құзырлы тұлға қалыптастыруға жағдай жасау».ХХ ғасырдың басында Жүсіпбек Аймауытов «Сабақ беру бұл үйреншікті жай ғана шеберлік емес, ол – жаңадан жаңаны табатын өнер»,- деген екен. Сол кісінің айтқанындай «жаңадан жаңаны» тауып жатпасам да, өзіме таныс жаңа технологияларды сабақтарыма кіріктіре отырып, жас буынға саналы тәрбие мен сапалы білім беру ісіне бар ынтамды салып келе жатырмын. Оның дәлелі ретінде соңғы үш жылдағы өткізген ашық сабақтарымды алға тартар едім. Атап айтсам 8В сыныбында «Сарыарқа», 7А сыныбында «Аустралияның жер бедері және пайдалы қазбалары, климаты және ішкі сулары» атты қалалық семинар сабақтарым өз дәрежесінде өтті. Соңғы екі жыл көлемінде өткізген пән бойынша сыныптан тыс мектепішілік «Балқашым-мыс шаһарым» және «Білгірлер» сайысы өз дәрежесінде өтті. Қазіргі уақытта әр бір мұғалімнің жұмысы ғаламтормен байланысты десем артық айтқан болмас. Сондықтан мен өзімнің жұмыстарымен басқа ұстаздармен тіжрибе алмасу мақсатында өз материалдарымды сайт беттеріне жарияладым.
Оқушылар пәндік олимпиадаға үнемі қатыстырылып отырылады. Атап айтсам: 2014-2015 оқу жылында қалалық пәндік олимпиададан Қуанышова Інкар ІІІ орын, Болатбек Ернұр ІІІ орынға ие болды.
Оқушыларды шығармашылық жұмысқа, ғылыми жұмыстарға бағыттауда да айтарлықтай жұмыстар жүргізіліп келеді.Республикалық ғылыми- тәжірибелік конференцияға 9А сынып оқушысы Қуанышова Інкар «Ұлт тұғыры-Ұлытау»тақырыбында мақала жазып, алғыс хатпен марапатталып, республикалық жинаққа енді.
Мұғалім шығармашылығының кәсіби іс – әрекетіне деген қажеттіліктің туындауына ықпал ететін мына шарттарды атап айтқан жөн.
– қайшылықтарды жеңе білу.
– өзінің жеке тұлғалық кәсіби қасиеттерін танып білу.
– іс-әрекеттің біріккен түрін қолдана білу. Оқыту процесінің өзекті мәселелері шеңберіндегі шығармашылық сипаттағы таңдалған тақырыптар әр мұғалімнің көздеген мақсатына қол жеткізу үшін тиімді ізденіс жұмыстарын ұтымды ұйымдастырып жүргізе білуге мол мүмкіндік туғызады. Мұғалімнің беделі өсіп, білім сапасы жақсарады. Елдің, жердің қамын ойлар жас буын тәрбиеленеді. Олардың білімге, ғылымға деген құлшынысы артады.Сөз сонында айтарым, « Шәкіртсіз ұстаз –тұл»,- демекші алдағы уақытта жас ұрпаққа сапалы білім, саналы тәрбие беруде өз үлесімді қоса бермекпін.
