Конспект урока по мокшанскому языку "Дс,тс, дьс, тьс орфограмматнень сермадомасна" (5 класс)

Учкина Валентина Васильевна

МБОУ «Рыбкинскяй СОШ»

Ковылкинскяй районць

Темась: «Вайгяльксне и букватне»

ДС,ДЬС,ТС,ТЬС орфограмматнень сермадомасна.(1-це слайдсь)

7-це классь

Урок-исследования

Цельхне и задачатне:

1)тонафтомс ученикнень существительнайхнень и глаголхнень эса сермадомс ДС,ДЬС,ТС,ТЬС орфограмматнень.

2)тонафтомс иттнень шарьхкодемс ДС,ДЬС,ТС,ТЬС орфограмматнень мархта существительнайхнень,глаголхнень.

3)тонафтомс иттнень мушендома ДС,ДЬС,ТС,ТЬС орфограмматнень мархта валхт орфографическяй валксста.

4)касфтомс иттнень содамошиснон существительнайхнень,глаголхнень сермадомста.

5)касфтомс иттнень кельгомаснон мокшень кяльти. (2-це слайдсь)                                  

Оборудованиясь:тетрадкат,учебникт,мокшень-рузонь валкс,карточкат,компьютернай презентация.

Урокть планоц.

1.Организационнай моментсь.Азондомс урокть целензон.(1 мин.).

2.Кизефкст и заданият вайгялькснень и букватнень коряс (4 мин.).

3.Карточка мархта тевсь (3 мин.).

4.Од темать азондомац (7 мин.).

5.Кизефкст существительнайть и глаголть коряс (5мин.).

6.Кемокстамс од темать задания вельде (20 мин.).

7.Кудонь заданиять максомац (2 мин.).

8.Урокти итогонь тиемась (2 мин.).

9.Оценкань путомась (1 мин.).

Урокть молемац.

1.Организационнай моментсь,урокть целенза.(2-це слайдсь).

2.Кизефкст и заданият вайгялькснень и букватнень коряс.

-Мезе тонафневи фонетика разделса?

-Фонетика разделса тонафневихть вайгяльксне и букватне.

-Азость кайги и аф кайги согласнайхнень.

-Кайги согласнайхне-б,в,г,д,ж,з,й,л,м,н,р.

-Аф кайги согласнайхне-п,ф,к,т,ш,с,йх,лх,рх,х,ц,ч.

-Мъзяра слогста ащи СЕРМАДСА валсь?

-СЕР-МАД-СА валсь ащи 3 слогста.

-Кодама вайгялькс астама КУДСА,ВАСТСА валхнень эса ДС,ТС букватнень эземс?

-ДС,ТС букватнень эземс астама Ц вайгялькс.

3.Карточка мархта тевсь.Тиемс фонетическяй разбор РОЗЬ валти.

-РОЗЬ валсь фкя слогонь.Гласнай О вайгялькссь-фталце рядонь,кучка подъемонь,тървань,няфтеви О букваса.

Согласнай вайгяльксне:Р-калгода парнай,кайги парнай,няфтеви Р букваса.З-ляпе парнай,кайги парнай,свистящай,няфтеви З букваса.

4.Од темать азондомац.

Давайте,шабат,нинге весть лятфтасаськ тячиень теманьконь и азондсаськ мезе содаме ДС,ДЬС,ТС,ТЬС орфограмматнень колга.

Тячиень урокса минь ванцаськ ДС,ДЬС,ТС,ТЬС орфограмматнень сермадомаснон существительнайхнень и глаголхнень эса.

Панжесть 3-це слайдть,лувсаськ стихотворениять и ванцаськ ДС,ДЬС,ТС,ТЬС орфограмма мархта валхнень.

Ломатть!

Мяляфтость и содасть,

Марстонь кудоньке минь-

Модась,

Марстонь валдоньке минь-

Шись.

Кудсонк коцай васттнень матсаськ.

Шитьке валдоц,лямбоц саты,

Штоба касоль серось-

Кшись

Мезень кальдяв ульсь-юкстасаськ.

Кие лезды?

Аньцек минць.

Марстонь вийса ванфтсаськ

Эряфть

Срафтсаськ еткстонк кяжень перяфксть,

Тянь минь эздонк веши Пингсь.

                                      (Н.Циликин).

-Мезе марятама валхнень азомста ДС,ДЬС,ТС,ТЬС орфограмматнень вастс?

-Тя орфограмматнень вастс корхтамста кулеви Ц вайгялькс,а сермадомста няфтеви ДС,ДЬС,ТС,ТЬС букваса.

Тянь минь сяда тов ванцаськ заданиятнень вельде,а васенда отвечатама кизефкснень лангс.

5.Кизефкст сушествительнайть и глаголть коряс.

-Азондомс падешнень и синь кизефксснон.

-Кодама валхненди мярьгихть глаголхт?

-Азость глаголхнень аф определеннай формань суффиксснон.(-мс-,-ма-)

-Глаголонь кодама спряженият тинь содатада?(объектнай и аф объект.)

-Мезень ширде аф фкат объектнай и аф объектнай спряжениянь формаса глаголхне?

6.Кемокстамс од темать задания вельде.

-Максф существительнайхнень путость местнай,исходнай,направительно-вносительнай падежса.

Кядь,ведь,медь,седь,кедь,куд,сад,тяште.....

Кепотькст:кяДЬСа,кяДЬСта,кяДЬС. (4-це слайдсь)

-Максф глаголхнень сермадость объектнай спряженияса.

Сермадомс,тяштемс,путомс,ванфтомс,куцьфтемс,кандомс,пандомс,ан-домс,уйфтемс...

Кепотькст:сермаДСа,тяшТЬСа,пуТСа,канДСа (5-це слайдсь).

-Максф существительнайхнень сермадость именительнай падежса.

Мяштьсон,кудстонза,вастстонза,келуведьстот,ундса,шуфтсонк.(6-це слайдсь).

-Налхксема.

Чайнвордса сембе валхне ушедыхть и аделавихть А букваса.Содасть синь.(7-це слайдсь).

-Валмуворкснень,приметатнень и содама ефкснень эзда мусть ДС,ДЬС,ТС,ТЬС орфограмма мархта существительнайхнень и глаголхнень.

1.Праздникнень мяляфтсыне,да стакшинь тефнень юкснесыне.

2.Пянакудса налхки и увнай толсь-ули вишке варма.(8-це слайдсь).

-Арьсемс валрисьмот максф глаголхнень мархта.

КепоДЬСа,лоткафТСа,анДСа,морафТСа.

Кепотькс:Кеподьса пурть доскать ваксста.(9-це слайдсь).

-Етафтомс глаголхнень рузонь кяльс.

Дубордомс,езмолдомс,зойнямс,инголдамс,кяжень пандома,цингордомс.(10-це слайдсь).

7.Кудонь заданить максомац.

Ф. М. Чесноковонь «Кирьхкс Мика»произведениястонза кочкамс существительнайхть и глаголхт ДС,ДЬС,ТС,ТЬС орфограмма мархта.

8.Урокти итогонь тиемась.

9.Оценкань путомась.

Урокти самоанализонь тиемась

Тячиень теманьке ульсь ДС,ДЬС,ТС,ТЬС орфограмматнень сермадомасна.Монь койсон,тонафнихне тиендихть лама эльбятькста тяфтама орфограмма мархта валхнень эса.Сяс и эряви шарфтомс оцю мяль тянди.И мон инголен путонь цель,штоба шабатне сяда кржа тиендельхть эльбятькста,сявине тя урокть-исследованиять.

Мон арьсян,што уроконь целезе пяшкотьф.Шабатне активнайста няфтезь пряснон заданиятнень тиемста.Тейст пяк интересна,мъзярда етафнят аф стандартнай урокт.Мялезост,мъзярда урокс нолдафт налхксемань заданият.Къда улихть налхксемат и лия занимательнай материал,то лафчста тонафнихневок няфнесазь эсь пряснон сяда активнайкс.

Пара,мъзярда етафневихть тяфтама урокт,сяс мес тяфтама урокне касфтсазь иттнень кельгомаснон и интересснон мокшень кяльти.

Пингсь урокса ульсь етафтф планть коряс.Кизефкст и заданият,од темать азондомац тонафнихнень лезксснон вельде,урокть кемокстамац,нолдамок тевс заданият слайттнень вельде.

Уроконь пингть иттне тисть аф кържа задания.Отвечсесть аф аньцек кизефкснень лангс,но и активнайста работасть заданиятнень и валксть мархта.

Уроксь етась разнай методса:работаме валхнень,валрисьмотнень и ваалксть мархта.Лама ульсь практическяй тевдовок.Няфтьф соткссь и рузонь кяльть мархтовок.Тянь инкса,арьсян,тонафнихне лац шарьхкодезь од темать.

Шабатне тонафтфт эсь тевснон тиема,маштыхть кемокстама содамошиснон книгатнень,карточкатнень мархта.Урокса етафтфт кода фронтальнай,станя и индивидуальнай заданият.

Уроксь няфтезе,што иттне од темать шарьхкодезь.Уроконкса путфт тонафнихненди оценкат.

Кудонь тевсь максф поисковай (вешендеви) методонь коряс.Тя методсь сяда касфтсыне мяльснон тонафнемс уроконь темать.

Монь койсон,сяда сидеста эрявихть етафнемс тяфтама урокт.И арьсян,што уроксь пяшкотьф сембе ширде.