Краезе!
Кельгома Руссь и Мордвась!
Пачкодеть тячити тон ёфксонь лаца.
С.Есенин.
Мокшэрзянь народсь Шинь стяма ширдень Европань ломаньтналса -
инь кунардоннетнень эзда фкясь, сонь историяц тушенды кафта тежятть кизода
ичкози. Мокшэрзятнень юрсна пяк кърхтат , синь етасть историческяй оцю ки ,
лама мезе няйсть , лама мезе кирдсть. Кодама аньцек тефт ашельхть мосторлангса,
мъзяра давол лийсь-етась , а синь ванфтозь эсь шамаликснон , кяльснон ,
пуроптсть козя материальнай и духовнай культура.Тя козяшись изь юма, сон касы –
вихонзай тянивок.Ульсть маласост кунардонь лия пляматка ( мерятне, муроматне ,
буртасне , мещерань ломаттне ), конатненди изь ванфтов прясна , аф сембонди ни
содафт лемсновок.Валом-валом пингонь шуварсь тавадозень пильгокиснонга.
Мокшетне ашесть сола- юма лия пляматнень еткса, ванфтозь пряснон . Тя
кемокснесы синь эрьгавшиснон, кеме юрснон.
Российскяй Федерацияса лама народта , аф фкат синь
лувкссна.Сяда ведьгемоньшка род-пляма лувондови марстонь государствасонк. Но
стама ломаньтналда , конат етнесазь миллионть , сембоц вете. Нят - русне ,
татархне, чувашне, башкирхне и мордвась , мокшетне и эрзятне. Сяс эльбятькшнихть
сят, кит лувондсазь мокшэрзянь народть «емла» , «кържа» народкс.
Эрь ломанть улихть раднянза , мала ломаненза. Улихть раднясна
нароттненьге.Лемдьсаськ тянь этническяй , историческяй
малаксшикс.Мокшэрзятненди сембода малат финно- угорскяй нароттне .А сяда
келиста варжакстозь минь сувсетяма уральскяй народонь семьяти . Кялень ширде
тя оцю кярьмазсь явондови финнонь , угрань и самодийскяй тарадга- пяльксова.
Коста молихть угро- финскяй нароттнень марстонь юрсна , коста
тусть васенце ункскятне? Тяфтама вастокс лувондови Волгать и Уралть етксна ,
синь перьфкаст масторхне. Тяста ни тусть келемома марстонь шуфтть тарадонза.
Ломаньтналсь кассь , етнесь эряма од васту , шинь мадома ширеса пачкодсь мянь
Балтийскяй моряти и Дунай ляйти.Пяк кунардонь пингть финно-угрань пляматнень
масторсна келемкшнесь ниле тежяньда лама вайгяльбе – Сибирень Енисей ляйста
сявомок Скандинавияти молемс.
Мордвась лиякс мяляфтсы эсь историянц. Сонь фольклорсонза
улихть мотифт мокшэрзятнень Московскяй Русти эсь воля сувамаснон колга.Тя ,
кепотьксонди, няеви «Шякшатань панттнень пряса» мороста. Сон серматфоль 19
векста Нижегородскяй Эрзятнень валста.
«Шякшатань панттнень пряса» мороса азондови мордовскяй народть
историческяй шкайкинц колга. Тяса корхтави, кода мокшэрзятне сувайхть
Московскяй государствав, сувайхть эсь воля.Этническяй сознаниясь тяса аф ладяй
народть историческяй опытонц мархта.Мордвать и Русть соткссон няфнесыне лия
тюсса , тиендьсыне синь сяда маланнекс , фкя- фкянь шарьхкодикс.Героическяй
эпость юрса мирть тиемац , тя мороса мирть тиемац сотф Рузонь государствав
сувамать мархта.
Мекпяле нинге весть китькстасаськ , мордвати национальнай
мялькс, идеякс , лядондоза марс пуромомань мяльежесь, фкя народть потмоса
ладязь-шарьхкодезь эрямась.
Мордовскяй
народть социально- политическяй историясонза оцю васта занци Рузонь
государствав суваманьконь колга кизефкссь.Рузонь летописнень эса 1382 кизоня
Мещерась азондови ни московскяй князень модакс . Сяс сяда лама кизефкста вов
мезть перьфке: мъзярда сувасть башка ванозь мокшень и эрзянь модатне и мъзярда
тя ульсь . Минь арьсемасонк , Рузонь государствав мордвать сувамац ульсь кафта
пяк стака тевда меле. Историясонк ня кафта стака пинкне- монголо-татархнень
1237-1242 кизонь врьгятнемасна и 1395 кизоня масторганк Тамерланонь ётамац.
Оставьте свой комментарий
Авторизуйтесь, чтобы задавать вопросы.