Внеклассный урок "Ғажайыптар әлеміне саяхат"

Физика пәнінен «Ғажайыптар әлемі» атты ойын.

Мақсаты: оқушылардың физика пәніне деген қызығушылығын арттыру; білімдерін ортаға салып, өз ойларын еркін жеткізе білуге дағдыландыру.

Жүргізуші: Армысыздар құрметті ұстаздар мен оқушылар! Бүгінгі біздің «Ғажайыптар әлемі» атты ойынымызға қош келдіңіздер.

Ойын барысы:

Ойын 4 кезеңнен тұрады. Әр кезеңге 3 оқушыдан қатысады. Тақтадағы  шеңберлерді таңдау арқылы ұпай жинайды. Тапсырманың дұрыс жауабын тапқан ойыншы, келесі 4 кезеңге өтеді. Ойыншылардың ойын бойы жинаған ұпайлары әділқазы алқасы арқылы есептеледі.

Егер ойын барысында сіздерге төмендегідей шартты белгілер түссе:

«С» - сыйлық;

«$» - ақшалай сыйлық (екі қорапшада);

«+» - 1 әріпті ашуға болады;

«х2» - ұпай саны екі еселенеді;

«К» - көрермендер көмегін пайдалану мүмкіндігі;

«Б» - банкрот, яғни жинаған ұпайлардан айырыласыздар, ойын кезегі келесі ойыншыға өтеді.   

         Алдарыңызға І кезеңнің ойыншылары шақырылады. Енді әр ойыншы өзін таныстырып өтсе.

І кезең:

1-ші кезең тапсырмасы:

Бұл атақты итальян ғалымы телескоп туралы жүргізілген ғылыми зерттеулерді ең алғашқы болып баспасөзде жариялаған екен. Бұл кім? (Галилео Галилей).

1-кезең аяқталғаннан кейін, ойыншыларымыз марапатталады.

Ортаға ІІ кезең ойыншыларын шақырамыз.

ІІ кезең:

2-ші кезеңнің тапсырмасы:

Бұл ғалым тек атақты ағылшын  жаратылыстанушы ғана емес, сонымен бірге архитектор болған екен. Лондонда оның проектісі бойынша бірнеше ғимараттар салынған. (Роберт Гук)

ІІІ кезең:

3-ші кезең тапсырмасы:

Ядролық физикадағы бұл өлшем бірліктің оқылуы, ағылшын тілінен аударғанда «сұр» деген мағына береді. (Сәулеленудің жұтылған дозасының өлшем бірлігі)  (Грэй)

Көрермендермен ойын. Көрермендермен ойын барысында ең көп сұраққа дұрыс жауап берген оқушы сыйлыққа ие болады.

Көрермендерге қойылатын сұрақтар:

1.     I=U/R формуласы қандай заңды сипаттайды? (Ом заңы)

2.     Бір зат молекулаларының екінші бір заттың молекулаларымен араласу құбылысы (диффузия)

3.     Дененің пішіні мен көлемінің өзгеру құбылысы (деформация)

4.     Қандай да бір кедергіден шағылған және бастапқы таралған орнына қайта оралған дыбыс толқыны (жаңғырық)

5.     Амперметр тізбекке қалай жалғанады? (тізбектей)

6.     Денелердің жерге тартылу күші (ауырлық күші)

7.     Теріс зарядты бөлшек (электрон)

8.     Ауырлық күші, үйкеліс күші, салмақ, серпімділік күштері арасында қандай ұқсастық бар? (өлшем бірліктері - Ньютон)

9.     Дененің қозғалыс жылдамдығының оның массасына көбейтіндісімен анықталатын шама (импульс)

10. Физикалық шамалар скаляр және қандай болып бөлінеді? (векторлық)

11.  g=9,8 м/с² тұрақтысы қалай аталады? (еркін түсу үдеуі)

12.  Ньютонның неше заңы бар? (3)

ІV кезең: ойынның алғашқы 3 кезеңі бойынша жеңген оқушылардан тұрады.

4-ші кезең тапсырмасы:

Бұл ғалым лордтар палатасының мүшесі болған екен. Бір күні кезекті лордтар жиналысында ол «Мырзалар, терезені жауып қойыңыздар, әйтпесе маған суық тиіп қалуы мүмкін» деп, барлығын таң қалдырған болатын. Бұл оқиға қай ғалыммен болған? (Исаак Ньютон)

Соңғы суперойын шарттары:

Суперойынға 4-ші кезеңде жеңіске ие болған оқушы қатысады. Ойыншыға ойын барысында жинаған ұпайға сәйкес сыйлық беріледі. Суперойында негізгі 4 сыйлық ойнатылады. Ол 4 сыйлық тақтадағы фигуралардың артында жасырын тұрады. Егер ойыншы суперойынды ойнаса, таңдаған сыйлықты, ойында жеңсе ғана алып кете алады. Егер суперойынды ойнамаса, онда ойын барысында жинаған ұпайларына сәйкес сыйлықты алып, ойын аяқталады.

Суперойын тапсырмасы:

Атақты ғалым, жаратылыстанушы Герман Гельмгольц бұл физик ғалымды «Құдайдың сүйіктісі» («Любимчик богов») деп атаған екен. Бұл қай ғалым туралы айтылған сөздер? (Жауабы: Генрих Герц)

Бүгінгі ойынымыз осымен өз мәресіне жетті. Белсене қатысқандарыңыз үшін үлкен рахмет!