Экологическая игра "Парма да ми"

Старцева Э.А.

МОУ «СОШ» с. Большелуг

«Вöр-ва да ми» ворсöм. 4 класс. 03.03.2016

Видза оланныд, дона  велöдчысьяс. Видза оланныд, гырысь йöз.

Ме рад, мый ті талун локтінныд ме дорö гöсьти. Вайö öтвылысь нюмдыштам öта- мöдлы да заводитам гажа ворсöм.  И медводз  тöдмасям  «Вöрсакöд». (Видзöдам мультфильм «Вöрса»).

-И сідз, челядь, кыдз ті чайтанныд, мыйлы сиöма миян талунъя ворсöмыс? (Вöр-валы. Вöр-ва видзöмлы).

-Да, стöч сідз. Талунъя ворсöмыс миян шусьö «Вöр-ва да ми».

-А думыштлыны кö тема боксянь, кажитчис-ö тіянлы мультфильмыс. И эз кö, то мыйöн эз кажитчы? Сёрнитышьтам.

-Да, мырöн шыбласьöмыс миянöс дзугыльмöдіс. Öд тулысын ставыс ловзьö. И весиг косьмöм мыр бöр кöсйö пöрны мича пуö,  либö жö мöд ногöн вöрлы вайны пöльза. А кутшöм пöльза вермас вайны мыр?

-Зэръясысь сійö эжсялас, да сэтчö овмöдчасны быдпöлöс гагъясыс. А тайö лоö чöскыд вöлöгаöн звер-пöткалы.

-Кыдз ми тöдам, мыр серти ми вермам тöдмавны весиг пулысь арлыдсö. Коді кöсйö висьтыштны, кыдзи?

-Пулöн кытшъяс отсöгöн.

-Стöч сідз. И весиг кытшъяссö бура видзöдлöм бöрын ми вермам тöдчöдны, кутшöм вöлöма тöлыс.

-А ми тіянкöд тожö тайö вермам вöчны, и таын миянлы отсаласны кытшъяс.

1. Тіян мог: сетны командалы ним, медым сійö лöсяліс  талунъя темалы, а сэсся кытш отсöгöн, коді лоö аслыссяма рамаöн тіян фотолы, вöчны стоп-кадр, а ме тіянöс снимайта.

-И сідз, ми дасьöсь петкöдлыны асьнымöс?

2. Быд зэрöм бöрын мырлы пыр лöсьыдджык лоö, а ми тіянкöд кыдзи вермам сылы отсавны?

-Кöдзны мыр гöгöр турун да быдмöгъяс.

-Правильнö! Сідзкö, ворсöмыс миян шусьö «Вöрса чöсмасянторъяс».

Вöрса чöсмасянторъяс (сетны ворсан чачö)

Быд  кывйö дзебсьöма  вöрса быдмöг.

Ворсöны быд командаысь öтиöн. Быд паралы сетсьö кыв. Кывсö артмöдöма  сöмын согласнöй шыпасъясысь, гласнöйсö чышкöма.

Мог: тöдмавны, кутшöм кыв дзебöма.

Кодар ворсысьыс öдйöджык тöдмалас, сетö шы (ворсыштö чачаöн)

Пример вылö: Оз- З

Лежнöг- ЛЖНГ

Чöд-ЧД

Пув-ПВ

Льöм-ЛЬМ

Чöдлач-ЧДЛЧ

Ыжман-ЖМН

Намыр-НМР

Öмидз-МДЗ

Пелысь-ПЛСЬ

Сэтöр-СТР

Мырпом-МРПМ

Турипув-ТРПВ             

-Молодечьяс. Со и пуыд ловзьыны мöдіс. Сідзкö, ставыс миян сайын.

-А ловзьöм пу дорад звер-пöткаыд матыстчыны кутіс. Налы нимкодь, и миянлы нимкодь. Сідзкö, бара на ворсыштам.

3. Звер-лэбач-пöтка (Висьтав мöд нимöн)

Ворсöм: Быд командаысь артмöдöм паралы нуöдысь висьталö кутшöмкö звер-пöткалысь ним.

Мог: ворсысь кö дась петкöдлыны ёртъяслы сійöс, сетö чачаöн шы да висьталö-петкöдлö, но сöмын  мöд нимöн.

Лоö кö кутшöмкö подсказка, балл сетсьö мöд командалы. Котрыр кö оз тöдмав, балл сетсьö бара жö  мöд командалы. Сэсся ворсысьяс вежсьöны.

Йöра Ябыр Тури Ош Кöин Кöч Руч Тар Сьöла Джыдж Ур Катша Жонь

-Молодечьяс. Мудзыштім неуна, лысьöмъяснымöс колö веськöдыштны. А сэтшöма со  зэрöма, мый гöгöр ва гöпъяс лоöмаöсь. Медым вотчыштны, тайö нюрсö ковмас миянлы кыдзкö вуджны. Сідзкö,  вайö нопъясямöй да мöдöдчам туйö.

4. Тіян мог: нопъясьны, гöнитлыны öтарö- мöдарö да нопсö сетны ётныдлы. И сідз, заводитам. Код командаыс тэрыбджык? (Физминутка)

5. Молодечьяс. Зэв тай тэрыбöсь вöлöмныд. Öні сэсся вотчыштам. Тіян мöг: тöдмавны, мый жö ми вотам. Быд командалöн аслас вöтöс. Мича пуксялам места вылö, ме тіянлысь синъяснытö тупка, а ті кималасöн тöдмаланныд, кутшöм шыпас тіянлы веськаліс, ёртъясныдкöд сёрнитыштанныд. Налöн кутшöм шыпас, сы серти сэсся и тöдмаланныд. Кывсö колö лöсьöдны лыддьöм вылö, шуйгасянь веськыдвылö.

Дасьöсь, сідзкö, мöвпалöй-корсьысьöй.

Подсказка:

Корйыс посни, кокыс вöсни,

Куйлö тусь, оз сувт.

Гöрдöдас да асьсö вöзйö

Шома …турипув.

Быдмö вöрын, нюраинын,

Зіля вотчан-он мун тыртöг.

Гортдад лэччиг, дозъяд чинö.

Вотöсыслöн нимыс … мырпом.

6. Санитарнöй машиналöн сирена.

Мый нö тайö? Да тайö жö вöрыд пикö вошöма! Лöп-ёгнас, коньöрöс,  тыртöмаöсь!

Со тіян водзын лöптöн тырöм ведраяс.

Тіян мог: торйöдны став лöп-ёгсö, медым утилизируйтны. Кодар командаыс лоас тэрыбджык.

Кывъяс: стеклö, кучик, кöрт, пластмасс, батарейка, фольга,

резина, банка, дöра, вурун, чугун, кабала.

Ті, дерт, молодечьяс. Сэ и и вöр-ваыд кутіс нюмъявны. Кывзыштöй öти велöдöм,  да и мукöдыслы висьталöй.

Памятка.

Ті  нёльöд класса велöдчысьяс. Кампет кышныд, кодöс ті талун шыбитанныд  муö, сісьмас сöмын сэк, кор кутанныд велöдчыны сизимöд классын, сідзкö,  3-4 во мысти. Кöрт банка заводитас сімны, кор ті помаланныд  Ыджыдвидзса шöр школа да мунанныд карö водзö велöдчыны, сідзкö, 10-11 во мысти. Кор ті  дзикöдз нин пöрысьманныд, лоанныд старикъясöн да старукаясöн, му пиын сісьмас тіянöн  шыбитöм полиэтилен пакет, сідзкö, 60-100 во мысти. Тіянöн жулльöм стеклö торъяс да шыбитöм бутыльяс муын куйласны 600 во гöгöр. А жвачка некор оз сісьмы.

Помнитöй та йылысь да висьталöй налы, кодъяс та йылысь некор на эз  кывлыны!

-Но, мый, со и шонді петіс, тіянöн нимкодясьö, мый сэтшöм ті тэрыбöсь, зільöсь да тöлкаöсь. Босьтöй шонді дзирдсö, а тані сійö кык рöма, да öшöдöй шонділы. Кольквиж рöм висьталö, мый тіянлы талун ставыс кажитчис, тіянлы вöлі  лöсьыд да шоныд, а лöз рöм- мый кöнкö вöлі гöгöрвотöм да сюрис мудзöм.

-Челядьлы аттьö уджысь, гырысьяслы видзöдöмысь. Быд бурсö ставныдлы. Челядьлы  уджалöмысь неыджыд козин.

Аттьö. Аддзысьлытöдз.