Эссе на тему "Профессия" "Йәшәү мәғәнәһе"

                     Минең йәшәү мәғәнәм – Уҡытыусы булыу.

Йәшәү мәғәнәһе,бәхет....                                                                                        Нимә ул йәшәү мәғәнәһе,бәхете?                                                                                                                                                                                                                                                                Һәр кеше шул һорауҙың серенә төшөнөргә тырыша. Халыҡ яҙыусыһы Зәйнәб Биишеваның бик аҡыллы,мәғәнәле әйткән һүҙҙәре менән тулыһынса килешәм.

                       Йәшәү бәхете — өмөт, хеҙмәттә.
                       Йәшәү бәхете — дуҫлыҡ, хаҡлыҡта.
                       Йәшәү бәхете — илең, халҡың өсөн
                       Көрәш аша тыуған шатлыҡта.

Үҙемде бик бәхетле тип һанайым. Мине бәхетле иткэн тыуған ерем бар,ғорурланыр халҡым,әсәм һөтө менән ҡаныма һеңгән,доньяны танытҡан,белем биргәнәсәм теле бар. Ғәзиз баламды күкрәгемә ҡыҫып,һөйөп,наҙлап бәпесем,яратҡан кешемә йәнем,бәғерем тип,әсәм телендә өндәшә алыуыма бик бәхетлемен. Халҡымдың ғорурланырлыҡ тарихын,бай,моңло,балдай татлы нәфис телен бөтә кешеләргә еткерә алыуымабәхетлемен.                                                                                         Һөнәрем – Уҡытыусы!Ниндәй ябай,наҙлы,яғымлы һүҙ. Белемгә,яҡты доньяға әйҙәүсе изге йәндәр. Ауыр,яуаплы,әммә ләкин бик мауыҡтырғыс һөнәрҙе һайлағаныма үкенмәйем. Минең өсөн эшем,һөнәрем-йәшәү мәғәнәһе,бәхете. Уҡытыусы һөнәрен һайларға миңә әсәйем йүнәлеш бирҙе. Сөнки әсәйемдәр заманында- уҡытыусыларҙы алла,хоҙай урынына күргәндәр. Һәм мине лә мәрхәмәтле, мөғжизә тыуҙырыр ҙур көскә эйә булырлыҡ уҡытыусы итеп күрергә теләне.  Әсәйемдең был изге хыялы тормошҡа ашты: мин-уҡытыусы. Парта артында миңә һынап та, яратып та, ҡыҙыҡһынып та ҡараған балалар. Улар бит беҙҙең киләсәк. Ниндәй булыр ул? Уҡытыусы булғас ҡына, минең яҙмышым  илем, телем, халҡым  яҙмышы менән бер тамырға барып тоташҡанын аңланым. Үҙ көнөм өсөн генә түгел, халҡым киләсәгенә  лә яуаплы икәнмен.                  

Уҡытыусы булыу бик яуаплы эш. Көн һайын нисә күҙ һинән яңы фәһемле,мауыҡтырғыс дәрес көтә.Бөгөнгө заман шарттарында туҡтауһыҙ үҙгәрештәр һәм үҫеш кисергән көндәрҙә уҡытыусыға артта ҡалырға ярамай. Ул заман менән бергә атларға тейеш. Уҡыусыларҙың бөгөнгө көндә техника,компьютер менән ҡыҙыҡһыныуын иҫәпкә алып,уҡытыусы үҙенең эшендә балаларҙы ҡыҙыҡһындырырлыҡ эш алымдарын,яңы технологияларҙы ҡулланырға тейеш.

Ниндәй генә педагогик технологиялар юҡ бөгөн. Хәҙерге заман мәктәбе алдына ҡуйылған төп бурыстарҙың береһе – ул гармониялы үҫешкән шәхес тәрбиәләү. Мәктәпте тамамлаған һәр уҡыусы зиһенле булырға,фекер йөрөтә белергә,өҙлөкһөҙ үҙ –аллы белем алырға һәм камилыҡҡа ынтылырға тейеш. Башҡорт теле һәм әҙәбиәте уҡытыусыларына килгәндә,телебеҙгә,мәҙәниәтебеҙгә ыңғай ҡарашлы сәләмәт рухлы,үҙ халҡының патриоты булған шәхес тәрбиәләү- иң алда торған бурыстарҙың береһе. Быларҙы тормошҡа ашырыр өсөн иң тәүҙә уҡыусыларҙы ҡыҙыҡһындырырлыҡ дәрес ойоштороу кәрәк. Үҙ эшемдә бөгөнгө көндә уҡытыусылар киң ҡулланған үҫтереүсе технологиярҙың береһе- Л.В.Занков ситемаһын ҡулланам. Был технология уҡыусының шәхес булараҡ үҫеш проблемаһын үҙәккә ҡуя һәм баланың дөйөм үҫеш проблемаһын үҙәккә ҡуя һәм баланың дөйөм үҫешенә иғтибар бирә. Л.В.Занковтың уҫтереүсе уҡытыу системаһы уҡыусыларҙың эҙләнеү,тикшеренеү эшмәкәрлектәрен үҫтереүгә ҡоролған.Дөйөм үҫеш системаһының берҙәм булыуын тәьмин итеүсе биш принцип бар.

1.Теоретик белем әйҙәүсе ролен үтәй.

2.Уҡытыу юғары ауырлыҡта алып барыла.

3.Материалды етеҙ темптар менән өйрәнеү.

4.Бөтә уҡыусыларҙы төрлө яҡлап үҫтереү өҫтөндә системалы эш алып барыу.

5.Уҡыусының уҡыу процесын аңлауы.

Һәр дәресем ҡыҙыҡлы, фәһемле булһын өсөн төрлө эш алымдарын һәм методтарын ҡулланам. Дәрестең темаһын туранан-тура иғлан итмәйем,ә ниндәйҙер эш төрө тәҡдим итеп үҙҙәренә асыҡлау өсөн юнәлеш күрһәтәм. Дәрес барышында һәр уҡыусыға үҙ фекерен иптәштәренә еткереу өсөн мөмкинлек бирәм. Дәрес һайын балалар менән  халҡымдың бай тарихы,рухи хазинаһы, арҙаҡлы шәхестәре менән танышабыҙ. Уҡыусыларҙы тикшеренеү,эҙләнеү эшмәкәрлегенә өйрәтеү маҡсаты менән

1.дәрестең төрлө этаптарында проблемалы һорауҙар,ситуациялар тыуҙырам.

2.семинар,практик-лаборатор эштәр үткәрәм

3.тезистар төҙөү һәләтлеген үҫтерәм

4.һүҙлектәр менән эш төрҙәрен тәҡдим итеп,тел ғилеме өлкәһендә эшләүсе ғалимдар менән таныштырам.

      Бөйөк Уҡытыусы исеменә лайыҡ булыр өсөн куп эшләргә,эҙләнергә,уҡыусыларға ҡыҙыҡлы,фәһемле булырҙай эш алымдарын ҡулланырға,алдынғы уҡытыусылар тәжрибәһе менән танышырға,яңы технологияларҙы үҙләштерергә кәрәк.

                  Яҙмышыбыҙ – тел яҙмышы,

                  Беләм уның хаҡында

                  Әгәр телем йәшәй икән,

                   Йәшәйәсәк халҡым да, - ти бит И.Кинйәбулатов.

 Киләсәктә минең башҡарған эштәрем әсә теле үҫешенә ҙур өлөш индерер,ә уҡыусыларым ата-бабаларҙың гөрөф-ғәҙәтенә,мәҙәниәтенә ,тыуған төйәгебеҙҙең тарихына битараф булмаған юғары мәҙәниәтле быуын булып үҫерҙәр тип ышанам. Мин белем биргән балалар тормошта үҙ урындарын табып,оло шәхес булып үҫһәләр- минең өсөн шул бәхет,ҡыуаныс.

  Милләтебеҙҙең,телебеҙҙең яҙмышы беҙҙең ҡулда!