Эссе на тему "Современный учитель"

Қазіргі заманның мұғалімі

Қазіргі заманға сай мұғалім оқушыға тек білім ғана бермей, оның ең жақын досы, олардың көмекшісі, кеңесшісі бола білуі керек. Сонымен қатар, тек дайын ақпарат бермей, ол ақпаратты іздеу, табу, орынды қолдана білуге бағдар беру. Оқушыға бағыт-бағдар беру үшін ұстазға үнемі ізденісте болу керек. Ал үнемі ізденісте болу қасиеті тек жас маманға ғана тән емес, тәжірибиелі ұстазға да қатысты болуы керек. Өйткені бүгінгі таңда білім саласында болып жатқан өзгерістерге қарамастан, ескі қағидаларын ұстанып, жылдар бойы жинаған білім қорын жеткілікті санап, бүгінгі күнге дейін жеткен жетістіктерін қанағат тұтып, болып жатқан жаңа өзгерістерге сенімсіздік танытып, білім саласында енгізіліп жатқан жаңалықтарды немқұрайлы қабылдап жатқан тәжірибиелі ұстаздар да жоқ емес. Егер 21 ғасырда мұғалім өзінің қажеттілігін сезінгісі келсе 10 жылдық немесе 20 жылдық тәжірибиесіне қарамастан өзінің білім саласындағы жеке көз қарасын, ұстанымын өзгертуден қорықпауы керек. 21 ғасыр ұстазы өзгеруден қорықпайтын, жаңаны қабылдап, іске асыратын тұлға екені сөзсіз.

Ия, мұғалімнің жұмысы қиын дейді, мектепте қуаныш та, реніш те болады, тексеретін дәптерлер, күнделіктер, бірақ осының бәрі алдыңда күлімдеп тұрған оқушыңды көргенде ұмытылып қалатын сәттер. Біз, қазіргі кезде мектеп қабырғасында жүрген ұстаздар білім саласында болып жатқан өзгерістерді көріп, жасалып жатқан жаңалықтар мен мүмкіндіктерді пайдаланып отырғанымыз қуантарлық жағдай. Жаңартылған білім беру бағдарламасының аясында біздің мүмкіндігіміз артуда. Осындай мүмкіндіктермен қатар ұстаздардың жауапкершілігі де артуда. Жаңартылған білім беру бағдарламасы негізінде оқушы пән бойынша белгілі бір тақырып аясында ақпарат қана алмай,ақпаратты өмірмен байланыстырып, болашақта пайдасына асыра алатындай етіп үйретуіміз керек. Мұғалім оқушылар үшін тек пән бойынша білім беретін адам ғана емес, сондай-ақ олардың сабақтарын қызықты, тиімді ұйымдастыра алатын, оларға үлгі болатын ерекше тұлға болуы керек. Оқушылардың талабын қанағаттандыру үшін қазіргі заманның мұғалімі жаңашыл, икемді, өзгерісті тез қабылдай алатын, жан-жақты, жаңа педагогикалық инновациялық технологияларды меңгерген болуы керек.

Қорыта айтқанда қазіргі заман мұғалімі жаңа бағдарламаның мәнін түсініп, баланың функционалдық сауаттылығын қалыптастыруда тынбай жұмыс жасауы тиіс. Оқушылардың бойына 21 ғасырда өмірдің барлық салаларында табысты болу үшін, қажетті дағдыларды дарыту үшін, мұғалімдер тынымсыз еңбектену керек. Қазіргі заман талабына сай, жаңартылған оқу бағдарламасы аясында тек өз пәнін, өз мамандығын шексіз сүйетін білімді мұғалімдер ғана жұмыс істей алады. Үнді халқының тарихи тұлғасы Махатма Гандидің «Егер сен болашақтағы өзгерісті көргің келсе, сол өзгерісті уақытында жаса» деген ілімін негізге ала отырып, әріптестерімді оқушы бойындағы қабілетті бірге жетілдіруге, оқушыларды болашаққа бірге жетелеуге, жаңа бастама аясында бірге жақсы істер жасауға шақырғым келеді.