Карвинг элементтерін пайдалана отырып жемістен дайындалған салатты безендіру

Өндірістік оқу бойынша сабақ жоспары.

Сабақтың тақырыбы :   « Карвинг элементтерін пайдалана отырып жемістен дайындалған  салатты безендіру».

Сабақтың мақсаты:

а) Білімділік: Теория  сабағында алған білімдеріңді пысықтап жетілдіру. Оқушыларды жемістерден салаттарды  дайындауға және оларды безендіруге   үйрету.

ә) Дамытушылық: Жеке тапсырмаларды орындау барысында технологиялық ретін, талаптарын орындауға үйрету. Оқушының шығармашылығын дамыту, іскерліктерін шындап дамыту.

б) Тәрбиелік: Жаңашылдыққа, әдемілікке, дастарқан әзірлеуге, ұқыптылыққа, тазалыққа жауапкершілікпен қарауға, эстетикалық талғамға баулу, жеке басының әдебін сақтауға, топпен ынтымақтаса бірігіп жұмыс жасауға, өз бетінше еңбектенуге, танымдық қабілеттерін қалыптастыруға тәрбиелеу.

Сабақтың өтетін орны: Аспаздық зертханасы

Сабақтың әдісі: Түсіндірмелі, сарамандық.

Сабақтың түрі: Аралас, әңгіме.

Пәнаралық байланыс: Еңбекті қорғау, тауартану, жабдықтау, калькуляция

Қолданылатын әдебиеттер: Интернет- ресурстары, «Еңбекті қорғау», «Кәсіп орнынын жабдықтары», «Аспазшы» Б.Бисембаев

Көрнекілік құралдар: Нұсқау картасы, суреттер, слайдтар.

Құрал жабдықтар: ыдыс- аяқтар, маркіленген пышақтар,  тоназытқыш, маркіленген тақтайша.

Шикізат: Технологиялық-нұсқау картасы бойынша.

Сабақтың барысы:

І. Ұйымдастыру кезеңі: 5 минут

1. Оқушыларды тізім бойынша тексеру.

2. Оқушылардың техника қауіпсіздік талаптарына сәйкес киінулеріне назар аудару.

3. Техника қауіпсіздік жөнінде нұсқаулар беру.

ІІ. Кіріспе нұсқау: 40-45 минут

1.Сабақтың тақырыбы мен мақсатын хабарлау.

2. Өткен тақырыпты қайталау.

Сұрақ:

1.     Бутербродтың түрлері нешеге бөлінеді?

2.     Жай бутербродтың жасалу технологиясы қандай?

3.     Бутербродтың түрлерінің бір-бірінен айырмашылығы барма?

4.     Бутерброд дайындау кезінде қандай құрал-жабдықтар  қолданады?

5.     Бутерброд қандай тағам түріне жатады?

Жаңа тақырыптың мазмұны (қысқаша конспект)

1.      «Жемістен дайындалған салат»  дайындау технологиясы.

2.     Технологиялық нұсқау картасы.

3.     Сапасына қойылатын талаптар.

-         Бүгін біздің сабағымыздың тақырыбы « Карвинг элементтерін пайдалана отырып жемістен дайындалған  салатты безендіру».

«Карвинг» дегеніміз –бұл көкөністер мен жемістерден кесінді жасау өнері. Тарих мәліметіне жүгіне отырып,  көкөністерден кесінді жасау алғашқы рет бұдан 800 жыл бұрын Тайланд және Қытай елдерінде пайда болған. Жергілікті аспазшылар патшаларды қабылдауға әдеміленген ас мәзірлерін дайындауға, жігер-күштерін салып, сондай бір шабытпен әзірлеген.

 Шеберлер бізге таныс тамыр-түйнектерді, соның ішінде –сәбізді, тұрыпты, шалқанды әдемілеуге бағындыра білген. Сонымен қатар, басқа көкөністермен бірге, яғни бұрыш, қызанақ, қарбыз  және асқабақтар мерекелік үстелден ең басты орын алған. Табиғаттың өзінің берген сыйлары сиқырлы күйде экзотикалық құстарға, тоты құс пен павлинге немесе әдеміленген раушан, түймедақ гүлдеріне айналған.

     Соңғы кезде көкөніс, жеміс-жидектерден сәнді кесінді жасау Азия елдерінің жоғарғы мәдени деңгейіне жетті. Көкөністерді шеберлі кесінді жасау мейрамханаларда, сонымен қатар отбасы мейрамдар салтына кірді. Адамның денсаулығына пайдалы көкөністерден мультфильм батырларын, әр түрлі пішінділерді кескіндеу арқылы балалардың тәбетін ашатын күнделікті дастархандарды мерекелік дастарханға айналдыруға болады.

   Карвинг жасау үшін арнайы құралдар және пышақтар пайдаланады. Арнайы құралдар болмағандықтан бүгін біз қарапайым пышақпен кесінді жасауға үйренеміз.

  Бұл салат мерекелік дастарғанға қоюға немесе далаға серуендеуге шыққанда өте орынды болады. Себебі ол сыбағалы болып жасалады, әр адамға бір гүлден.  Кішкентай өткір пышақтын көмегімен алмадан гүл жасау сіздіңде қолыңыздан келеді. Алманы лимонмен өңдеу кезінде, алма өте ұзақ сақталады. Ол қарайып кетпейді. Йогурпен араластырылған салат тоназытқыштың ішінде 3 сағатқа дейін,  ал араластырылмаған салат 6-8 сағатқа дейін сақталады. Салатты дайындауға 10 минут уақыт кетеді.

Технологиялық-нұсқау картасы  № 1

Тақырып: Жемістен дайындалған салат.

Эскиз.	Азық-түліктің атауы
	Алма – 3 дана Алмұрт-1 дана Банан -1 дана Апельсин -2/3 Киви -0,5 дана Йогурт – 150 г Лимон -1
	Жұмысты орындау барысы
	1. Жемістерді жуады. Алманы алып жоғарғы төбесін кесіп алады. 2. Жіңішке пышақпен  2-3 см тереңдікте дөңгелентіп кеседі. 3. Дәндерін пышақпен ойып алады. 4. Алманың қабырғасының қалындығын бірдей етіп, шай қасықпен жұмсақ жерін түбіне дейін қырып алады. Ішіне жеміс салаты сиятындай етіп қырып тазалайды. Алманың айналасын лимон шырынымен өңдеп, азықты орайтын жұқа пленкамен орайды. 5.Салат  дайындау: алмұрт пен бананды қабықтарынан тазартады, апельсиннің жұмсақ жерін алады.  Барлығын ұсақ кубик түрінде турайды. 6.  Салатқа йогурт құйып, апельсин шырынын қосады. 7.Гүл жасау: алманың жоғарғы төбесін алып гүл жасайды.Ол үшін өткір кішкентай, тайский немесе орақша пышақты қолданады. Желектің ортасын 45º бұрыш жасап, 2 жапырақша кесекті жасайды. Осылайша 6-7 желек алу үшін кесіктер дайындайды. 8. Гүлдің басын лимон шырынымен өңдейді. 9. Жұмсағын қырып алған алмалардың ішіне дайындалған салатты салады. 10. Қабығынан тазартылған кивиді тілімшелеп турайды да дайын салаттын үстін безендіреді. 11. Дайын гүлді ағаш таяқшалар көмегімен  алмадан дайындалған ыдысқа бекітеді.

ІІІ.Оқушылардың өз бетімен жұмысы: 240 минут.

1.     Нұсқау карталарын топтарға таратып беру.

2.     Топ басшылары азық-түліктерді қабылдайды.

3.     Оқушылар ыдыстырды, аспаптарды, жабдықтарды және жұмыс орындарын дайындайды.

4.     Топ оқушылары өндірістік шеберінің берген нұсқау карталарын өз бетімен толтырып есептейді және толтырып жұмыстанады.

Ағымды нұсқау:

1-ші айналым: Оқушылардын жұмыс орнын дұрыс ұйымдастыруын, техникалық қауіпсіздігін сақтауын қадағалау.

2-ші айналым: Оқушылардын құрал-саймандарының түгелдігін, жұмыс үрдісінің дұрыстығын қадағалау. Әр оқушыға ерекше көңіл аудару.

3-ші айналым: Оқушылардың қатесі болса түзетіп, жекелей нұсқау беріп көрсету. Әр оқушыға ерекше көңіл аудару.

4-ші айналым: Жіберілген қателіктерді топтың көмегімен табу, оны түзеу. Әр оқушыларға ерекше көніл аудару.

ІV.Қорытынды нұсқау: 10 минут

1.     Оқушылардың жаттығу жұмысына сараптау жүргізу арқылы сабақ мақсатының орындалуын хабарлау.

2.     Жіберілген қателіктерді айтып, болдырмау жолдарын түсіндіру.

3.     Жаттығу жұмыстарындағы жақсы орындаған оқушылардың жетістіктерін айтып, бағалау. Оқушылардың біліміне, белсенділігіне, орындаған жұмысының қиындығы мен сапасына қарай және қойылған сұрақтарға жауап беруіне қарай тиісті баға қою.

4.     Жұмыс орнын тазалау.

5.     Үйге тапсырма беру: « Көктем салаты» тақырыбына дайындалып келу .

Өндірістік оқу шебері:                               Б.Т.Латиева