"Латын әліпбиіне көшу – қазақ тілінің жаңа белесі".

Латын әліпбиіне көшу – қазақ тілінің жаңа белесі.

«Тіл – адамның адамдық белгісінің зоры, жұмсайтын қаруының бірі. ... Біздің заманымыз – жазу заманы, жазу мен сөйлесу ауызбен сөйлесуден артық дәрежеге жеткен заман».

                            А.Байтұрсынұлы

Еліміздің латын әліпбиіне көшуге деген бетбұрысы – қазақ тілінің жаңғырып, жандануы десек қателеспейміз. Әліпбиіміздің жаңаруы – ұлтымыздың, әдебиетіміз бен мәдениетіміздің жаңғыруы.

Қазақ тілі – түркі тілдерінің қыпшақ тобына жатады. Қазақ жазуы, қазақ тілінің әліпбиі бірнеше рет өзгеріске ұшырап, тарихи кезеңдерді басынан өткізді. Сол уақытта қолданылған әліпбилерді кезең – кезеңімен атап көрсетсек: 1929 жылға дейін Қазақстанда араб жазуы қолданылса, 1929-1940 жылдар аралығында латын графикасына негізделген әліпби, 1940 жылдан бастап бүгінгі күнге дейін, кирилл графикасына негізделген әліпбиді қолданып келді. Қазақ тілі осындай кезеңдерден өтіп, араға ғасырға жуық уақыт салып, жазба тілімізді латын қаріпіне көшіру туралы мәселе көтерді. Бұл еліміз үшін, ұлтымыз үшін көңілге қуаныш ұялатады.   Бұлай дейтін себебім, қазақ тілін латын қаріпіне көшірудің бірден бір мақсаты  – орыс графикасымен тілімізге енген, ұлттық тілімізге тән емес бөгде дыбыстардан арылу. Соның нәтижесінде, әліпбидегі басы артық таңбаларға қатысты емле, ережелер қысқарып, тіліміздің  тазалығы сақталады. Латын әліпбиіне көшу – тіліміздің халықаралық дәрежеге шығуына жол ашады.  Сонымен қоса, тарихымыз, әдебиетіміз  бәрі әлемге ортақ,  латын әліпбиінде жарық көреді. Бұл дегеніміз – түбі бір, тарихы ортақ  түркі халықтарымен байланысымыз нығая түседі.

Жаңа ғасырдағы ғылым мен техниканың, жаңа технологиялардың тілі – латын әліпбиі десек, ғылым мен техника қарыштап дамып жатқан кезеңде,  латын қаріпіне ауысу, заманауи технологияларға қолжетімділікті арттырады. Ақпараттық технологиялар заманында компьютер тілі – латын тілі екенін ескерсек, қазақ тілінің компьютерлік технологиялар арқылы халықаралық ақпарат кеңістігіне енуіне  жол  ашылады. Латын әліпбиіне көшу тек әліпбиімізді ауыстыру ғана емес, сонымен қатар заман ағымынан қалыспай, дамыған елдермен иық тірестіре алатындай дәрежеге жетіп, ұлтты жаңғырту. Жазба тілімізді латын қаріпіне көшірсек, еліміздің одан әрі дамуына ықпалын тигізіп, қазақ тілін басқа ұлт өкілдерінің меңгеруіне септігін тигізеді.

 «Ұлттың сақталуына да, жоғалуына да себеп болатын нәрсенің ең қуаттысы – тілі» - деп ұлт ұстазы, тіл жанашыры ғалым Ахмет Байтұрсынұлының айтып кеткен сөзіне сүйенсек, тілі сақталған ұлт, ешқашан өшпейді.  Қаймағы бұзылмаған қазақ тілімізді дамытып, бүкіл әлемге таныту үшін латын әліпбиіне ауысу, ұлт мүддесі үшін жасалған маңызды қадамдардың бірі.  Әлемдік әліпбиге, латын қаріпіне көшу  сан ғасырдан аманат болып жеткен ана тіліміздің дәрежесін жоғарлатары сөзсіз.