Мевзу: Энвер Селямет. «Алтын балта акъкъында масал»

Мевзу: Энвер Селямет. «Алтын балта акъкъында масал»

Макъсат: масал къараманынынъ образы эсасында талебелерде низам, эмексеверлик,  джумертлик, намуслыкъ  киби чизгилерни тербиелемек; ана тилимизге севги ашламакъ; окув къабилиетини пекитмек.

                                            Дерс  кетишаты.

I.Оджа  озь кириш сёзюнде талебелернинъ дикъкъатыны шаирнинъ омюр ёлуна, онынъ иджадына джельп эте.

-Энвер Селяметнинъ яраткъан шиирлерини онынъ озь иджрасында эшиткен адам первасыз къалмаз, чюнки онынъ кескин ве джошкъун сеси аятта адалет ве догърулыкъ, мераметлик ве виджанлылыкъ кучани исбат эте.

-Акъикъий инсан насыл олмалы?

-Темиз гонъюлли, виджданлы, эмексевер,низамлы. Ашагъан отьмегини элял эмекнен тапмалы.

Шаир Энвер Селяметнинъ яраткъан фукъаре койлюнинъ образы эр бир окъуйыджынынъ бу рухта тербиелеп, яхшыны ямандан, догърулыкъны айнеджиликтен фаркъ этмеге огрете.

II.Шаирнинъ аятындан базы бир малюматларнен танышув (дерсликтеки малюматлар).

Макъалени окъугъан сонъ, лугъатта берильген сёзлернен таныштырмакъ.

III. «Алтын балта акъкъында масал»ны талебелер окъуйлар. (Яхшы окъугъан балаларны  оджа бу дерске огюнден азырлай).

1. Лугъат иши.Янъы сёзлерн дерсте огренмели.Сонъра исе суаллер ве вазифелер устюнде иш алып бармалы.

2.Суаллер:

-«Алтын балта акъкъында масал»ны ким язды?

-Масал не акъкъында?

-Бир бичаре ёлджу насыл муджизеге расткеле?

-Бу озеннинъ тыйнагъында ким яшай экен? Сув анасы къартттан не сорай?

-Акъикъатны бильмек ичюн сув анасы койлю къартны насыл сынай?

-Акъ къальпли къарт алтын балтаны не ичюн алмады?

-Койлю догъру яптымы?

-Дигер койлю не япты? Сув анасынынъ сынавындан кечтими?

-Не  ичюн сув анасы экинджи койлюни джезалады?

IV.Тахтада ве дефтерлерде эки койлюнинъ бири-биринден фаркъ этиджи чизгилери боюнджа джедвель тизиле.

Биринджи койлю	Экинджи койлю
Факъыр; Бичаре ёлджу; Акъ къальпли; Намусына садыкъ; Эмеги элял; Джумерт.	Пахыл; Айнеджи; Косе сакъал; «Ала бота»; Азыргъа дуваджы; «Атны корьсе акъсагъан,сувны корьсе сувсагъан»; Ачкозь.

V.Нутукъ инкшафы. Оджа  «намусына садыкъ», «элял емегимни», «тиз чёкелеп» ибарелерининъ манасыны анълата.

Балалар оларны метинде тапып, джумлелер тизелер ве шу ибарелерни насыл алларда къулланыладжагъыны билелер.

VI.Дерс нетиджелерини екюнлемек.

-Бугун дерсте насыл эсернен таныш олдыкъ?

- Насыл къараманны бегендиниз? Не ичюн?

-Акъикъий инсан насыл олмакъ керек?

VII.Эвге вазифе.Масалны ифадели окъумакъ. Бегенген парчаны эзберлемек.