Падрыхтоўка да напісання сачынення "Мая любая Айчына"

МАТЭРЫЯЛЫ ДА ГУТАРКІ З ВУЧНЯМІ

1.     Што такое Айчына?

2.     Што такое патрыятызм?

3.     Чаму чалавек без Радзімы – гэта сірата?

4.     Чым ваша родная зямля славіцца, што вылучае яе з-паміж іншых зямель?

5.     Чаму чалавек усё жыццё імкнецца дамоў?

6.     Ці бывае шчасце на іншай зямлі і чаму?

7.     Назавіце ланцужок роднасных слоў да слова “Радзіма”.

8.     Чаму агульнапрынята словы “Айчына”, “Радзіма”, “Бацькаўшчына” пісаць з вялікай літары?

9.     Падбярыце і запішыце пятнаццаць азначэнняў да слова “Бацькаўшчына”.

10.  “Дзе нарадзіўся – там і згадзіўся”. Растлумачце, калі ласка, сутнасць выказвання.

МАЯ ЛЮБАЯ АЙЧЫНА

У кожнага чалавека ёсць Айчына…. Радзіма, Бацькаўшчына, родны край, любая старонка – так чалавек называе маці-зямлю, дзе жылі яго продкі і дзе будуць жыць нашчадкі.

Чалавек атрымлівае пры нараджэнні жыццё, бацькоў і Радзіму. Так дзіўна і, у той жа час, так проста… Але гэта ўсё, што трэба для ўсведамлення сапраўднага зямнога шчасця.

Мая Айчына – Беларусь. Няма на зямлі прыгажэйшай краіны! Яна багата сваёй гераічнай гісторыяй, непаўторнай культурай і сталымі традыцыямі, маляўнічай прыродай і непаўторнымі краявідамі. Але, бясспрэчна, галоўнае багацце нашай зямлі – шчырыя, працавітыя, добрыя людзі.

Лёс даў беларусам мірны характар, чулае сэрца, адкрытую душу, бязмерную шчодрасць і ветлівую гасціннасць. Беларусы заўсёды гатовы прыйсці на дапамогу тым, хто ў бядзе.

Беларусь – незалежная, самастойная дзяржава. На нашай роднай зямлі мір, спакой і парадак. Багатая і слаўная гісторыя каранямі ўдзячнай памяці ідзе ў сівыя стагоддзі. Ефрасіння Полацкая, Францыск Скарына, Кірыл Тураўскі, Сымон Будны, Вінцэнт Дунін-Марцінкевіч, Францішак Багушэвіч, Максім Гарэцкі, Янка Купала, Якуб Колас, Максім Багдановіч – гэта людзі, імёны якіх дайшлі да нас дзякуючы іх таленту і самаахвярнаму служэнню Айчыне. Яны змагаліся за лепшую будучыню і марылі пра тое, каб наша Радзіма займала пачэснае месца сярод іншых краін свету. Усіх іх у розны час вялі наперад ідэі патрыятызму і бескарыслівага служэння роднай зямлі.

Таму Радзіма – гэта не проста краіна, у якой мы нарадзіліся і жывём. Гэта ўсё тое, што мы любім і шануем, па чым сумуем, калі з’язджаем далёка за межы. Спытай хоць сто чалавек, што для іх Радзіма, і яны пачнуць пералічваць сваё, імкнучыся назваць што-небудзь арыгінальнае. Але, тым не менш, усе сыдуцца на адным: гэта родны дом, дзе адчувае сябе кожны надзейна і спакойна, шчасліва; гэта блізкія людзі, якія любяць і заўсёды чакаюць; гэта сцежкі маленства, на якіх яшчэ прымята трава, бо ты бег у дзяцінстве па ёй басанож.

На зямлі ёсць шмат выдатных мясцін, але дзе б ні быў кожны з нас, што б ні рабіў, душой мы застаемся дома. Як дрэва, чалавек урастае каранямі ў сваю зямлю. Тады яго ўжо не скрануць, бо, адарваны ад яе, ён навек страціць сілы і радасць жыцця.

Усе мы павінны любіць і аберагаць сваю Айчыну, бо яна ў нас адна, павінны клапаціцца пра яе, берагчы сваю спадчыну, жыць дзеля яе квітнення, служыць верай і праўдаў, пакуль б’ецца наша палымянае сэрца.

Казлоўская Соф’я, 9 “Б” клас