Сочинение «Мостай Кәрим – безнең өйнең яме, безнең Башкортостанның яме»

       Безнең Башкортстан – гүзәл республика. Бай ул, матур ул, Башкортстан җире! Күпме талантлар, күпме акыл ияләре, язучылар, гайрәтле җир хуҗалары көч һәм дан алган шул Башкортстан туфрагыннан. Халкыбызның милли горурлыгы булган Салават Юлаев, Мәҗит Гафури, Зәки Вәлиди, Баязит Бикбай, Рәми Гарипов, Назар Нәҗми, Зәйнәп Биишева, Мостай Кәрим кебек якташларыбыз белән хаклы рәвештә горурланабыз. Башкортстанның халык шагыйре Мостай Кәримнең дә бөтен тормышы, иҗаты шул изге,бәрәкәтле җир белән бәйле.

       Мостай Кәрим – республикабызда гына түгел, төрле җирләрдә,төрле халыкларда да олы абруй, зур ихтирам яулаган халык шагыйре. Әдипнең иҗаты озын һәм җимешле булган. Ул төрле жанрларда эшләгән: шигырьләр, пьесалар, хикәяләр язган. Язучы бик күп илләрдә булган, билдәле кешеләр белән очрашкан. Кайда гына булмасын һәр җирдә Башкортстанны данлаган. Аны белмәгән кеше бик сирәктер. М.Кәримнең әсәрләре ачык йөзле, олыларга да, кечеләргә дә ихтирамлы булырга, туган телне яратырга өйрәтә.

      Шундый бөек шәхесләребезнең иҗатлары белән кызыксынып, өйләребездә аларның китапларын укып, әти-әниләребез өйрәткәнне тыңлап үссәк, зур уңышларга ирешербез дип уйлыйм. Кичләрен без гаилә белән М.Кәримнең әсәрләрен бергәләп укыйбыз. Ул –онытылмас шәхес! Аның әсәрләре берничә дистә телгә тәрҗемә ителгән.

     Данлыклы кешеләре булганда, Башкортстаныбызның яме һәм киләчәге югалмас. Мостай Кәрим безнең арада булмаса да аның китаплары, әсәрләре һәм даны калды. Аның исеме мәңге безнең күңелләрдә яшәр!