Эссе "Ұстаз талантты болса, шәкірт талапты болады"

Эссе

Ұстаз талантты болса, шәкірт талапты болады

Осы тақырыпты алғаш оқыған кезімде, бірден 2020 жылы бітірткен оқушыларым ойыма оралды. Өйткені осы түлектеріме сіңірген еңбегім жоғары көрініс тапты. Әрине, осы 30 жылға жуық педагогикалық өтілімде алдымнан талай оқушы өтті. Олардың әрқайсысы бір бөлек әлем. Әрбірін зерттей, зерделей келе жеке кілттерін табуға тырыстым. Ең бастысы, «Адамның адамгершілігі жақсы ұстаздан болады» деген ұлы ақынымыз Абай айтқандай, олардың бойына адамгершілік қасиетін дарытуға күш салдым. Өзім де жәй мұғалім болып қалмай, заманмен бірге қадам басуға ұмтылдым, Сенека сөзімен айтсам, «үйрете жүріп үйрендім». «Өмір бойы оқу» принципін ұстанған жандардың бірімін.

Заманмен бірге аяқ басып, курстарға қатысып, дарынды тренерлердің дәрістерін тыңдау барысында әр адам бойында аналитикалық ой жүруі керек екенін ұғындым. Әсіресе менің ойымның тереңдеуіне 2011 жылы Алматы қаласында тыңдаған тренерлер Н.Ж.Бирибаеваның және Мәскеуден арнайы шақыртумен келіп, шеберлік сабағын өткізген  Н.В.Кулибинаның дәрістерінің әсері мол болды. Мен мұнда әр сөзді астарлап оқып, сол ойдан түйін түю керек екенін ұғындым, кез келген дерек, дәйекті назардан тыс қалдырмауды жете түсіне бастадым. 2014 жылы Алматы қаласында ІІ негізгі деңгей бойынша Н.К.Тайтанова тобында дәріс алған  курсым осы тұжырымдарымды санама бекітті десем болады. Мен үшін бұл курс Сократша ойлауды, сын тұрғысынан ойлауды жетілдірген курс болды. Сондықтан мен осы тренерлерімді талантты ұстаздарым дер едім.

Талаптана жүріп, мен өз шәкірттерімнің бойына ізденімпаздық, креативтік, өз ойын дәлелдей алу қасиеттерін де дарытуға күш сала бастадым.  Ол үшін Шульман іліміндегі «үш көмекші» арқылы құзырлы мұғалім болып, табысты оқыту,  М. Чиксентмихайдың «ағынымен» бірге алға жылжи отырып «өзіндік мақсат» қою,  Л.С.Выготскийдің «көпіршелер тұрғызу» теориясы арқылы оқушыларымызды қолдау  әдістерін үнемі жадымда ұстауға тырыстым.

Нәтижесінде, менің шәкіртім деп мақтанатын оқушыларды көрдім.

Бәрін тізбектемей, жоғарыда аталған өз сыныбымды айтар болсам, оқушыларымның басым көпшілігі білім, спорт, өнерге қатысты сайыстар мен олимпиадаларға қатысып, жүлдегер атанды, «Үздік сынып» номинациясын жеңіп алды. 2019-2020 жылы аудан бойынша ҰБТ көрсеткішінен 96,6 пайызбен алғашқы орынға табан тіреді.

Қазіргі таңда сыныбымдағы 26 оқушым өз таңдауларын жасап, қалаған оқу орындарына түсіп, 100 пайыз орнығып, оқуларын жалғастыруда. Мен осындай шәкірттеріммен мақтана аламын, өйткені олардың көздерінде от, жүректерінде жылулық бар!

Және бір қуантатыны – олардың ізін басып келе жатқан басқа да Абайша «ақыл, қайрат, жүректі бірдей ұстаған», жүректері жылы, ақылдары толық, қайраттары жеткілікті шәкірттер де өрбіп келеді.

                2021 жылғы 1 қыркүйекте Мемлекет басшысы Қасым-Жомарт Тоқаев «Халық бірлігі және жүйелі реформалар – ел өркендеуінің берік негізі» атты Қазақстан халқына Жолдауында атап өткендей, алдымыздағы шәкірттеріміз талапты болу үшін біз, мұғалімдер, «шәкіртінің бойына білім сіңіре алатындай нағыз ағартушы» бола алуымыз керек. Ендеше, осыған ұмтылайық!

Әлихан Гүлмира Әбдіғаниқызы

Қызылорда облысы, Шиелі ауданы,

«№152 орта мектебі» КММ

Краткое описание документа:

Осы тақырыпты алғаш оқыған кезімде, бірден 2020 жылы бітірткен оқушыларым ойыма оралды. Өйткені осы түлектеріме сіңірген еңбегім жоғары көрініс тапты. Әрине, осы 30 жылға жуық педагогикалық өтілімде алдымнан талай оқушы өтті. Олардың әрқайсысы бір бөлек әлем. Әрбірін зерттей, зерделей келе жеке кілттерін табуға тырыстым. Ең бастысы, «Адамның адамгершілігі жақсы ұстаздан болады» деген ұлы ақынымыз Абай айтқандай, олардың бойына адамгершілік қасиетін дарытуға күш салдым.