Из детского фольклора Села Старая Теризморга

Сире Теризморга велень идень фольклорста

Мокшень литератураса школань тонафнесаськ  мокшень устнай народнай творчествать. Сави лама кизефнемс сяда эряфкшу ломаттнень эзда мокшень фольклорть колга: бабаньконь, щаваньконь, тядяньконь. Минь  кочкаме тячиень шити аф кържа  материалда идень фольклорть коряс: легендат, ёфкст, налхксемат, дразнямат, моронят, валмуворкст.

Шабань фольклорсь кемоста сотнеф оцю ломаттнень творчестваснон мархта и арси тейнза эсь кодямонь ушетксокс. Сяс шабань фольклорсь явондови принципонь коряс, кода и марнек фольклорсь. Тяса васьфневихть и валмуворкст, и содама ёфкст, серьгядемат, налхксемат… Аньцек оцюфнень фольклорснон коряс шабатнень ёткса произведениятне морсевихть-азонкшневихть сяда нюрьхкяняста и кирьфтафста, эсост няеви идень психологиясь. «Куднянь» колендемста свадьбатне шабатнень ёткса тиендевихть куклань вельде. Шити, атямъёнгти, вармати и пиземти серьгядематне аф корхневихть, а морсевихть ламоксть тякоть азозь.

Шиня, листь! Шиня, листь!

Бабать перяканза писть!

Пиземня, пяконе!

Модась ули ляпоня,

Модась ули ляпоня,

Ласьконттяма кяпоня!

Юватькшневихть  и дразняматне:

Колька, Колька, Николай!

Саду салама сувай.

Марьда топодемс пупай,

Тоса локшеня кундай.

***

Вяре песа Мару

Бзнай, кода кару!

             ***

Ай, дигонь, дигонь, дигонёк.

Дига – сёвонень пенёк.

Улихть Сашат сёвонень,

А монь Саша - золодонь.

            ***

Ай дигонь, дигонь, дянгу.

Алгапулоц пангу.

Шичявонза – казаконза,

Синза – инженеронза.

                    ***

А, татарне, татарне,

Тинге фталга якайне.

Шары шляпац прясонза,

Кайги ружьяц лангсонза.

Стане шави келазь –

Шавсь тюжя вазне.

Стане панды даця –

Панць пине ваце.

Алашанянц кильдезе –

Сялдаз паргонц синдезе.

      ***

А, шякшата, шякшата,

Мес кувака пулоце?

Од авазе кодазе,

Салфтом вайса вадезе.

Вяри куцян – якшама,

Алу валган – лешан.

Вина стопка вешан.

Вина стопкать копадьса,

Пильгозеньге топадьса,

Кядезеньге яфодьсан,

Морозеньге морасан.

                   ***

Эй, дигонь-детька,

Кенкш фтала Петька.

Табак-сюроц кядьсонза.

Монь ашемань таргафта.

Коконь Митять таргафтозе.

Коконь Митясь-пара алясь.

Рузонь паксять шарозе,

Рузонь паксять шарозе,

Эсь ърьванцка шавозе.

           ***

Цили-били, лапама!

Тусь куяронь тапама.

Тапась, тапась- сизесь.

Мольсь Фикол, няезе,

Пиле ланга тяезе.

                 ***

Дарюне, Дарюне,

Пекоц бъта паренне,

Сельмонза орёлоннет,

Пильгонянза ёмланят,

Кода кривой олгонят.

                 ***

Нетьказ, каяк пулоцень.

А то шавса улоцень…  

Тяниень пингонь, кода и ингольдень пинкнень, иттнень налхксемасост оцю васта занцесть и занцихть лувомкатне. Тя лисенди сяс, мес шабатне сидеста налхконкшнесть и тянивок налхксекшнихть «Кяшендинякс», «Сокор пачкалгонякс», «Чакаса»(паксянь кевонь пялькскаса), а тя налхксематнень пингста фалу сашендови лувондомс:

Фкя, кафта, колма, ниле.

Мон сивонь сараз пильге.

Кафта, колма, ниле, вете.

Кинди повсь сараз прясь?

                      ***

Ай, катоня, катоня,

Лефкскадот тонь ветеня.

Ай, катоня, киска,

Нярьцень ала миска.

Кой-кона лувомкатнень эса аш видексонь лувома, аньцек аф  вельф ёню и аф шарьхкодеви валхт, конат азондовихть рифмань коряс:

Червень, бервень,

Чуха, рюха,

Бета, сота,

Ива, дуба,

Мака, крест!

Валхнень азондомста ритмань коряс иттне няфнихть кядьса эрь колендить лангс. Мекольце азомась кинь лангс прай, ся и лисись или уряйсь, или ушедысь.

Пингсь шашты инголи и ламоть эряфса пяк вишкста полафнесы, ламось юкстави. Но въдь ломанть ваймонц вихца мзярдонга аф полафцак! А тядянь валса тонатфть, тядянь валса эжтьфть мялямстот аф таргасак-нардасак. А мезе вастозонза вихца афольхть тонга, ся куватьс аф лядонды, ламос аф мяляфтови. Тяфта мялямста аф нардавихть ся аф оцю нюрямонь  моронятне, конатнень вельде тядяньке-бабаньке матнезь удома минь сазорняньконь-дуганняньконь, да и минценьге. Нюрямонь мороняснон коряс тяниень пингтьке иттнень нюряфнесаськ, тяка моронятнень  морсесаськ. Аньцек васток-васток тякокс, а васток-васток полафтозь пингть молеманц коряс.

Шабатне  инголи оцю семьяса содазь и эсь тевснонга. Катк васенда вельф стака тевс синь ашезь путне. Но вийс коре сембе лездсть оцюфненди. Ламонцненди савсь ваннемс ёмла сазорняснон-дуганняснон и, оцюфнень лангс ваномок, морсезь нюрямонь моронятнень.

                             Нюрямонь моронят

- А, катоня, катоня,

Козы тият пизоня?

- Трубать фталу,

Самоварть алу.

- Мес пяк тяфта ичкози?

- Сединязе пичеди.

Пелян пизонь яжайда,

Оржа сельме авада,

Мушка сакал атяда,

Кичкор кядь бабада,

Корож сельме шабада.

              ***

Бабать ваясь тракскяняц.

Мольсь иднязе таргазе.

Пулоняда ускозе,

Сюроняда вятезе.

-На-ка, бабай, тракскяцень.

-Дай-ка, цёрай, тракскязень.

- Мезямане инксонза?

- Лофца лангонь пееськя.

Иднязенди лофцоня,

Кисаняти клоконя.

                 ***

Баю, баю, баюшки.

Цёранязе пакшкя,

Кудре пиле вакскя,

Кафта кедень каткскя.

               ***

Шабать мархта налхксемста сави мархтонза корхнемс ляпоста, а коса и моразь:

Тёкшти, тёкшти,

Иванць касы сёксети,

Кядец саты лапаняс,

Кундай ваи пачаняс.

Пряц ни токай моркшти,

Лямнядонга коркштай.

              ***

Копша панян, кши пидян.

Пятнагоду - бух!

Колобоконя пидян! Колобоконя пидян!

                ***

А тара-ра, тара-ра!

Мес ашемайть арала?

Якань марень салама.

Оцю Гришась няемань,

Пиле ланга тяемань.

Пиленязе верыясь,

Тядянезе кяжиясь!

Сире Теризморга велень койхне - обуцятне,  азома оцю козяшикс и синь эрявихть ванфтомс сяда тов. А штоба мезське лац ванфтомс, ся эряви лацкас содамс, тонафнемс. Эряфкшу ломаттне ламоть нинге мяляфтсазь, а вов минь, оттнень седиса-мялямса тя козяшись кемокстама. Къда школаса тонафнись аф содасы эсь народонц историянц, эсь шачема ширень культурать, то аш месть корхтамс патриотическяй воспитаниять колга.

                   Материалсь кочкаф Сире Теризморга велеста.

.