Тема. Н. Мусиндың “Һуңғы солоҡ” романын өйрәнеү.
(Дәрес-пресс-конференция)
Зарипова М. Ә. Ишембай
районы Көҙән урта мәктәбенең башҡорт теле һәм әҙәбиәте уҡытыусыһы.
Маҡсат. Әҫәрҙең
идея-тематик йөкмәткеһен асыҡлау; уҡыусыларҙа эскелеккә кире ҡараш тыуҙырыу,
Тыуған иленә, халҡына тоғролоҡ тәрбиәләү; уларҙың фантазияһын, телмәрен
үҫтереү.
Йыһазландырыу.
Ноғман Мусиндың портреты, яҙыусы әҫәрҙәренән күргәҙмә,
"Һәләкәтле
аҙымыңдан туҡта, әҙәм балаһы."
Ноғман Мусин
Башҡортостандың халыҡ яҙыусыһы Ноғман Мусин:
“Урмандың шауында ишетәм халҡым һүҙен, ерем зарын, илем ғәмен!”
Дәрес барышы
1. Инеш һүҙ.
Беҙ бөгөнгө дәрестә
хәҙерге башҡорт прозаһының күренекле вәкиле, беҙҙең яҡташыбыҙ, Башҡортостандың
халыҡ яҙыусыһы, беҙ яратып уҡыған бик күп повесть-романдар авторы Н. Мусиндың
"Һуңғы солоҡ" әҫәренә анализ яһарбыҙ.
Башҡорт әҙәбиәтендә
Н. Мусин прозаһы сағыулығы менән айырылып тора. Тормош көнө менән түгел, хатта
сәғәте менән үҙгәреп торғанда, заңан менән бер ҡатарҙан атлау ижад кешеһе өсөн
еңелдән түгел. Дәүер һулышына яраҡды әҙәби әҫәр ижад итеү өсөн тормоштағы
ваҡиғаларға, ундағы үҙгәрештәргә тиҙ һәм дөрөҫ баһа бирә белеү кәрәктер.
Н. Мусин үҙенең был
әҫәрендә йәмғиәтебеҙҙе борсоған проблемаларҙы асып һала, килер быуынға,
йәштәргә һабаҡ бирергә тырыша.
Ни өсөн Солоҡ:
"Туҡтағыҙ, әҙәм балалары! Ни эштәр ҡылыуығыҙға айыҡ баштан күҙ һалығыҙ.
Харап булабыҙ бит!" — тип һөрән һала. Солоҡтоң ошо һүҙҙәренең мәғәнәһен,
әҫәрҙең идея-тематик йөкмәткеһен асыу өсөн дәрескә "әҙәбиәт
белгестәрен" һәм "Ағиҙел", "Башҡортостан ҡыҙы"
журналдары, "Торатау", "Йәшлек" гәзите "журналистары"
саҡырылды. Бөгөнгө дәрес пресс-конференция формаһында үтә, дәрестә
"журналистар" һәм "әҙәбиәт белгестәре" үҙ фекерҙәре менән
уртаҡлашасаҡ. ("Журналистар" ҙа, "әҙәбиәт белгестәре" лә
— XI синыф
уҡыусылары.)
2. Төп өлөш.
"Ағиҙел"
журналы хәбәрсеһе. Яҙыусылар, ғәҙәттә, кеше, образдарын һүрәтләй. Был
әҫәрҙә Солоҡ образы иң үҙәк образ булып тора. Аяҙытау ауылында булған
хәл-ваҡиғаларға баһаны ла ул бирә. Был юҡҡа ғына түгелдер. Ни өсөн Н. Мусин
Солоҡ образын үҙәк образ итеп алған?
Әҙәбиәт
белгесе. Уйлауымса, Солоҡ символик мәғәнәгә эйә. Солоҡ образы аша
башҡорт халҡы, уның яҙмышы символлаштырыла. Башҡорт халҡының да, Солоҡтоң да
тамырҙары бик тәрәнгә киткән, улар икеһе лә күпте күргән, күпте кисергән.
"Йәшлек"
гәзите хәбәрсеһе. Н. Мусин Солоҡ ағасын һүрәтләгәндән һуң, Карамыш ҡарт
образына туҡтала. Улар араһында бәйләнеш бармы? "
Әҙәбиәт
белгесе. Эйе, Солоҡ образына Карамыш ҡарт образы ауаздаш.
Карамыш ҡарт — Солоҡтоң хужаһы. Улар икеһе лә оҙаҡ йәшәгән. Әгәр Солоҡҡа
тәбиғәттең әсе елдәренә, дауылдарына ҡаршы торорға тура килһә, Карамыш ҡартҡа
тормоштоң әсе елдәрен, һуғыш дауылдарын кисерергә тура килә. Хәҙер Карамыш
ҡартҡа 93 йәш. Солоҡто йәшен һуғып, түбәһен атып осорғас, үҙәгенә һыу үрә
башлаған инде уның. Ә Ҡарамыш ҡартты фалиж һуҡҡан. Ҡасандыр типһә тимер өҙөрҙәй
булған, донъяның әсеһен-сөсөһөн татыған, орден-миҙалдар менән баһаланған
Карамыш ҡарт мал өйөндә үлем хәлендә ята. Бер кемгә лә хәҙер кәрәге юҡ.
"Башҡортостан
ҡыҙы" журналы хәбәрсеһе. Ни өсөн Н. Мусин әбейҙәрҙең пенсия алғас та
йыйылышып әсеүҙәрен, эскән ваҡытта нимә тураһында һөйләшеүҙәрен бик тәфсилләп
һүрәтләй?
Әҙәбиәт
белгесе. Ил инәһе булырҙай әбейҙәр эске ойоштора. Телдәрендә
ниндәй генә һүҙҙәр юҡ! Йәштәргә аҡыл өйрәтеп, намаҙ уҡып, эҫеүҙән тыяһы урынға,
улар эсеп, бысранып ҡайта. "Етмешен үткәнсе бер бөртөк тә сал төшмәгән
сәсе яулығы аҫтынан ялпылдап сыҡҡан, йәмшек танауы ҡыҙарған... Оҙон ҡуныслы
калушының эсенә батҡаҡ тулған, аҡ йөндән бәйләнгән ойоғо ҡара төҫкә
ингән", — тип яҙа Н. Мусин Гөләйшә әбей тураһында.
Гөләйшә әбей ҡартын ҡарайһы урынға
араҡы һемерә. "Ҡарамыш фалиж һуғып йығылғас, иреккә сыҡты
ана. Көн дә тиерлек
иҫерек", — тип һүрәтләй уны яҙыусы. Уға ҡарты кәрәкмәй, ҡарттың аҡсаһы
ғына кәрәк, сөнки Ҡарамыш ҡарттың пенсияһы әбейенекенән 4 тапҡырға күберәк.
"Торатау"
гәзите хәбәрсеһе. Һеҙҙеңсә, Рузалиә ниндәй ҡыҙ? Н. Мусин ни өсөн уны
"ҡауырыйҙарын көйҙөргән ҡошсоҡ" менән сағыштыра? "...Аңды-тоңдо
белмәйенсә төнгө усаҡ яктыһына осоп килеп, ҡаурыйҙарын көйҙөргән ҡошсоҡ
шикелле, ниндәйҙер бушлыҡта талпына, ләкин осоп китә алмай", — тип яҙып,
Н. Мусин нимә әйтергә теләй?
Әҙәбиәт
белгесе. Рузалиә — йәш ҡыҙ. Дамир Талиповтың ниндәйерәк кеше
икәнлеге менән дә ҡыҙыҡһынмай. Ул алдана.
"Башҡортостан
ҡыҙы" журналы хәбәрсеһе. Рузалиәне ни өсөн Дамир Талипов
ҡыҙыҡһындыра?
Әҙәбиәт
белгесе. Сөнки Дамир Талипов бай, көслө, олпат кәүҙәле. Рузалиәне
"джип"та йөрөтә, концертҡа, ресторанға алып бара, офисында ҡыйбатлы
йыһаздар. "Ниндәй һиммәтле, абруйлы ир уның менән бейей", — тип уйлай
Рузалиә. Тышҡы ялтырыуыҡҡа ҡыҙып, Рузалиә үҙенең алданғанын һиҙмәй ҙә ҡала.
Ябай ауыл егете Рәсүлде кире ҡағып, үҙ бәхетенә үҙе балта саба.
"Ағиҙел"
журналы хәбәрсеһе. Автор ни өсөн Рәсүлде үлтерә?
Әҙәбиәт
белгесе. Үҙаллылыҡҡа ынтылған, эскелекте һәм башҡа күренештәрҙе
йәне һөймәгән аҡыллы был егет япа-яңғыҙ, өләсәһенең, атаһының эсеүе, һөйгәне
Рузалиәнең коммерсант менән буталыуы, тирә-яҡ тәбиғәтен төрлө
килмешәктәрҙең әләф-тәләф итеүе — барыһы ла егет йөрәгенә таш булып бәрелә.
Әммә ул бер үҙе генә пыран-заран ителгән йәмғиәтте төҙәтә алмаясаҡ: эскелекте
ул бер үҙе еңә алмай, Дамир Талиповҡа ла көсө етмәй. Рәсүл был алышта көсһөҙ.
Уҡырға ла китә алмай, сөнки аҡса юҡ.
"Йәшлек"
гәзите хәбәрсеһе. Рәсүлдең атаһы ниндәй енәйәт эшләй?
Әҙәбиәт
белгесе. Ул ғаилә ҡомартҡыһы булған Солоҡ ағасын бер яртыға
һатып ебәрә, сөнки уға баш төҙәтергә кәрәк. Баланың ғәрип тыуыуында ла ғәйебе
бар, әлбиттә. "Уның (баланың) аяҡтары тупыс, ҡулдары терһәгенән кире юҡ,
күҙ урындары бөтөнләй бөтәш ине", — тип яҙып, Н. Мусин эскелектең
һөҙөмтәһен күрһәтә.
"Торатау"
гәзите хәбәрсеһе. Яҙыусы Аяҙытау ауылын нисек һүрәтләй?
Әҙәбиәт
белгесе. Ҡасандыр гөрләп торған Аяҙытау һүнеп ҡалған төҫлө:
медпункт юҡ, магазинда араҡынан
башҡа әйбер юҡг
һигеҙ йыллыҡ мәктәп башланғысҡа тороп ҡалған, юлдар ҙа рәтләнмәй, эшләргә эш
урындары ла юҡ, ҡайһы берәүҙәр ялланып эшләргә мәжбүр, ә кемгә эш юҡ, ваҡытын
нисек үткәрергә белмәй эскелеккә һабыша ла, бер нисек тә был ғәҙәттән ҡотола алмай.
"Ағиҙел"журналы
хәбәрсеһе. Леспромхоз бөтөрөлгәс, ауыл халҡы эшһеҙ тороп ҡалған.
Эшһеҙлек, аҡсаһыҙлыҡ, эскелек хөкөм һөрә ауылда. Халыҡ яҙмышын ҡайғыртҡан бер
кеше лә юҡмы ни?
Әҙәбиәт
белгесе. Бар, ләкин бик аҙ. Солтанғужа элек уҡытыусы булып
эшләгән. Ләкин балалар һаны әҙ булыу сәбәпле, мәктәпте башланғысҡа әйләндергәндәр.
Элекке уҡытыусы хәҙер һуҡыр сысҡан аулап, тиреләрен тапшырып көн итергә
мәжбүр. Ауыл, халыҡ яҙмышы, тәбиғәт күркәмлеге тип һаман да янып йөрөгән
Солтанғужаның ошо һүҙҙәрендә бөгөнгө заманыбыҙҙы быуып алған фажиғәгә бәйле
әсенеүле уйҙар ярылып ята: "Эскелектән башы-күҙе тонған бәндәләр төкөрә
һинең сходыңа ла, Аҡташыңа ла. Улар бер яртыға ата-инәһен һатып ебәрергә
мөмкин..." Ауылдаштарын аҡылға килергә саҡырып ҡарай Солтанғужа. Тик
эскенән баштары буталған ир-ат был тәҡдимгә битараф.
"Торатау"
гәзите хәбәрсеһе. Әҫәр нисек тамамлана?
Әҙәбиәт
белгесе. Солоҡ ауа. Шул саҡ уның хужаһы Ҡарамыш ҡарт та үлә. Уға
ясин сығыу түгел, эргәһендә ултырып хушлашыусы, аяҡ-ҡулын йүнәтеп һалып, күҙен
йомдороусы ла булмай. Аҡыллы йәш егет Рәсүл үлә, Сәлиханан зәғиф бала тыуа.
"Йәшлек"
гәзите хәбәрсеһе. Авторҙы ниндәй проблемалар борсой?
Әҙәбиәт
белгесе. Авторҙы ғаилә, мөхәббәт, экология, эшһеҙлек, эскеселек,
әҙәп-әхлаҡ проблемалары борсой. Был проблемалар әле лә хәл ителмәгән.
3. Уҡытыусы
һүҙе. Эйе, "Һуңғы солоҡ" — тәрән йөкмәткеле, көнүҙәк проблемаға
арналған мауыҡтырғыс әҫәр. Яҙыусы был әҫәрендә тәбиғәт экологияһы хаҡында ғына
түгел, кеше күңеленең_экологияһы тураһында ла һүҙ алып бара.
Меңйәшәр солоҡтоң
һуңғыһы ауҙарылһа ла, йәмғиәтебеҙҙе упҡынға этәреүсе эскелек, аҙғынлыҡ,
иманһыҙлыҡ кеүек күренештәргә тиҙерәк сик ҡуйылһын, кешелек тәүбәгә килһен,
иманға ынтылһын. Шул саҡта милләт тә йәшәр, йәмғиәт тә сәләмәт булыр, ер-һыу
ҙа имен ҡалыр.
Эйе, Солоҡтоң
уйҙары, кешеләргә мөрәжәғәте тетрәндергес. (Плакатта яҙылған һүҙҙәр уҡыла,
мәғәнәһе асыҡлана.)
Эскелек таралыуҙан
күпме ғаилә ыҙа сигә, балалар яфалана. Эскелек арҡаһында күпме енәйәт ҡылына,
сөнки иҫерек кеше үҙенең ни эшләгәнен дә белмәй.
Эскелектең һәм башҡа кире күренештәрҙең
киләсәк быуынға, милләтебеҙ именлегенә хәүеф янауын аңлап, мәғариф өлкәһендә
тәрбиә проблемаларына иғтибарҙы күберәк бүлеү мөһим икәнлеге асыҡланды,
4. Эскелек тураһында
гәзит материалдарын уҡыу.
5. Р. Ғариповтың
"Был кешелек ҡайҙа бара һуң ул?" Яҡуп Ҡолмойҙоң Н. Мусинға арналған
""Мәңгелек урман" шиғырҙарын яттан уҡыу.
6. Н. Мусин
тураһындағы видеофильмдан өҙөк ҡарау.
1. Баһалау.
Өйгә эш биреү. Әҫәрҙең тел сараларына күҙәтеү үткәрергә.
Мәңгелек урман.
Н. Мусинға.
Һин урманға керһәң ҡоштар һайрай,
Гөлйемештән күҙең сағыла.
Аҡ ҡайындар серен һөйләп тынмай,
Улар ҙа бит һине һағына.
Йылдар оҙонлоғон тиңдәш итеп,
Серҙәш итеп талғын елдәрҙе,
Бөҙрә урман тәлгәштәрен һирпеп,
Көтә һымаҡ һинең килгәнде.
Ә һин унда йә рәссам һымаҡ,
Киңәйтәһең хәтер һүрәтен.
Мәшһүр йырсылай һин йырҙар йырлап,
Күңел ҡылдарыңды тибрәттең.
Икеләнмәй әйтәм йөрәк уйын:
-
Шағиры һин ҡалын урмандың.
Тик һин аңлай алаһыңдар бының
Үҙең тәпәй баҫҡан Уралдың.
Тынмай яҙған сихри китабыңда.
Тойҙоҡ утлы урман дауылын.
Йәшкелт ҡарағайҙар ҡосағында
Яфа сиккән башҡорт ауылын.
Зәңгәр күккә үрләп буйын һонған
Ҡайындарың шундай матурҙар,
Улар беҙҙең хәтирәгә һыйған,
Унда йәшәй яуҙаш батырҙар.
Урман ерҙең һутлы тамыры ул,
Китабыңдай яҡын күңелгә.
Киләсәктә лә шулай егәрле бул
Үҙең ижад иткән илеңдә.
(Я. Ҡолмой.)
Оставьте свой комментарий
Авторизуйтесь, чтобы задавать вопросы.