Сочинение на тему "Пою мою республику"

МӘЛӘҮЕЗ  РАЙОНЫНЫҢ  МУНИЦИПАЛЬ  РАЙОН ХАКИМИӘТЕНЕҢ МӘҒАРИФ  БҮЛЕГЕ

3-СӨ ГИМНАЗИЯ МУНИЦИПАЛЬ ДӨЙӨМ БЕЛЕМ БИРЕҮ БЮДЖЕТ УЧРЕЖДЕНИЕҺЫ

Башҡортостан республикаһы

көнөнә арналған

иншалар  бәйгеһенә

Башҡортостан – тыуған ерем,

Һиндә тыуҙым, һиндә үҫәмен.

Һинән яҡын, һинән гүзәлерәк

Юҡтыр бер ил – шуны беләмен.

  Башҡарҙы: Мәләүез ҡалаһы 

 3-сө гимназияның

5-се класс уҡыусыһы

Вәлиәхмәтова Мәҙинә

                                                       Етәксеһе: Башҡортостан Республикаһы

Мәләүез районының 3-сө гимназия

муниципаль дөйөм белем биреү бюджет

учреждениеһының башҡорт теле һәм әҙәбиәте

уҡытыусыһы Морозова Фаягөл Кәфил ҡыҙы

2022 йыл

... Ҡояш көлә, көҙгө ҡояш көлә! Уның ғәзиз һары нурҙары тыуған ҡаламды тәмле йоҡонан уятты. Урам йәнләнде. Ололар эшкә, бала-саға уҡырға ашыға. Һәр кемдең үҙ хәстәре... Эй, халыҡ! Бер минутҡа ғына туҡтап, көҙгө тәбиғәткә һоҡланайыҡ эле! Матур бит тыуған яҡтар! Ысынлап та,  ниндәй мөғжизәле төбәктә йәшәйбеҙ беҙ! Юҡҡамы ни Башҡортостанды йыш ҡына  икенсе Швецария менән тиңләмәйҙәр. Ошондай сихри гүзәллек батшалыҡ иткән илдә тыуып үҫеүемә һоҡланам һәм ғорурланам мин!

Башҡортостан – тыуған ерем,

Һиндә тыуҙым, һиндә үҫәмен.

Һинән яҡын, һинән гүзәлерәк

Юҡтыр бер ил – шуны беләмен.

54 районы, 21 ҡалаһы булған тыуған Башҡортостаным 1990 йылдың 11 октябрендә  үҙаллы республика булып китә. Ул йылға-күлдәргә, урман-ҡырҙарға, бейек тауҙарға бай тәбиғәте, рух байлығы  менән тирә-яҡта дан тота. Ошо матурлыҡты маҡтап күпме әҫәрҙәр, шиғырҙар яҙылған, йырҙар йырланған!

    Һәр кемгә лә үҙ тыуған яғы йөрәгенә яҡын һәм ҡәҙерле. Ҡайҙа ғына булһаң да, ниндәй генә матур ерҙәрҙе күрһәң дә  үҙ тыуған ерең ҡәҙерлерәк тә, гүзәлерәк тә шул.

 Ошондай ерҙә тыуыуыма һәм йәшәүемә бик шатмын. Мин башҡорт  ҡыҙы! Башҡорт булыуым менән ғорурланам! Ҙур теләк һәм ҡыҙыҡһыныу менән туған телемде, халҡымдың тарихын өйрәнәм! Ғаиләлә рәхәтләнеп башҡортса һөйләшәбеҙ! Мәктәптә туған тел дәрестәренә шатланып йөрөйөм. Башҡорт телендә уҙған төрлө бәйгеләрҙә ихлас ҡатнашам.

   Мөмкинселек булған һайын беҙ, ҡустым Морат менән, әсәйемдең тыуған яғы Ейәнсураға барырға тырышабыҙ. Ул –  Башҡортостаныбыҙҙың иң көньяҡ районы. Йәй көндәре өләсәйем һәм ҡартайым менән еләк, муйыл, шифалы үләндәр йыябыҙ. Оло Эйек йылғаһында һыу инәбеҙ, ҡояшта ҡыҙынабыҙ. Ә  ҡыш булһа , саңғы-санала. конькиҙа шыуабыҙ. Иҫәнғолда яңыраҡ асылған «Дуҫлыҡ»  паркына йөрөргә яратабыҙ. Балалар өсөн төҙөлгән ҡаласыҡта уйнауы рәхәт, бәләкәй һеңлем Мәликәгә айырыуса  шунда уйнау оҡшай. Футбол, баскетбол майҙансығында балалар күп була.

    Ошо уҡ паркта райондан сыҡҡан 6 Советтар Союзы геройына арналған  Дан аллеяһы асылды.  Ҡәйүм Әхмәтшин, Ҡотләхмәт Хәйбуллин, Иван Корнеев, Николай Бедренко, Алексей Рутчин, Григорий Филатов тигән ағайҙар Бөйөк Ватан һуғышында батырлыҡ күрһәткән, тыуған илен һаҡлап уҙҙәрен ҡорбан иткән. “Беҙҙең киләсәгебеҙ тыныс, матур булһын өсөн көрәшкән геройҙарҙы оноторға ярамай. Илдә һәр вакыт улар яулаған тыныслыҡ булһын ине!» -ти өләсәйем.

     Эйе, илдә тыныслыҡ булһа, Башкортостаныбыҙ ҙа артабан үҫер, сәскә атыр. Беҙгә, балаларға, республиканы артабан өйрәнеп,  Шүлгәнташ мәмерйәһе, Ирәмәл тауы, Ғәҙелша шарлауығы , Яҡтыкүл  кеүек башка  мөғжизәле ерҙәрен күрергә яҙһын ине!

Республикам, йондоҙ булып балҡы hин,
Күҡрәп йәшә, гүзәл илебеҙ.
Тыуған ерҙә hүнмәҫ усағыбыҙ,
Туған телдә тынмаҫ йырыбыҙ.