«Существительноела мягIна ва лишанти».

       Дарсла мурад:  существительноеличила мурхьси багьуди бедни; декIар-декIарти кьяйдурти дузахънила шайчирти бурсидешуни дебадирути жура-журала бяркъла хIянчурби дурадеркIни; мез давлачердирути, мягIничердирути, саркъахъути мезла гIягIниахъала гьандикахъни, мухIлила ва белкIла гъай гьаладяхI ардукни.

      Дурх1нас бяркъ бедлугнила мурадуни:  дарган мезла лук1нила кьяйдуртачи  буч1антала пикри бях1чиаъни; илдала дарган мезличи диги мурхьдирни.   

      Чебаъла гIягIниахъала: таблицаби, карточкаби, галгубала, арцантала ва ц. суратуни, ИКТ.

       ЦархIилти предметуначил бархбас: Дагъиста литература, урус мез.

                  Нешла мез хIедалуси адам

                  КIарала пяхIбиубси галгагъуна сай.

Дарсла башри

1.     Класс дарсличи хIядурбарни.

                 Слайд 1.         Салам,никIа дучIанти,

                                  Салам,ахIерти дурхIни,

                                  Шалатили адулхъаб

                                  ХIушаб гьар дусла бурхIни!

(дурхIни кабиахъили, дарс даимбарес)

   Учитель: ИшбархIи нушала дарган мезла дарс саби. Ну дебалали разилира, хIушаб дарс кабихьес имкан бикниличи. Рирхес дигулра , хIушала гIямрулизиб ил багалабирниличи.

     Слайд 2.  ХIердизирая, дурхIни, иш суратличи.  Иш нушала ВатIанна сурат саби.

  – Сегъуна дубуртар саби нушала ВатIан?

  – ХIердизирая шараличи. Се бурес дируда иличила?

Учитель: Касили саркъибти рангани, художникли ВатIайчи сунела диги нушази ишкьяйда иргъахъули сай. Поэтли биалли сунела уркIила х1ялани дугьбала кумекличил иргъахъу.

   ЛехIдизирая, се викIулил ХIябиб ГIябдуллаев сунела «Дагъистан» бикIуси назмулизив.

Дагъистан

ТIабигIятли хIед гибси,

Тамашала жагадеш,

ХIела ахъ дубуртала

Кабизла исбагьидеш.

Дигасра суратдарес,

АхIедаиб устадеш-

ХIелайчи мешути ранг

ХIейубра нуни даргес…

Дагъистан, дила ВатIан,

ХIу сабри бахъ ахIерси,

ХIела гьава саб нуни

Мурталра гьигьбируси.

Слайд 3.

АхIерси ВатIан –

ахъти дубурти –

биштIаси шара –

умуси гьава –

Учитель: дугьбала цалабикуназир декIардарибти дугьбас антонимти делк1еная.

ДурхIни: ах1ерси – г1язизси, ахъти – г1яшти, бишт1аси – халаси, умуси – нясси.

Слайд 4.

Февральла гъану шура.

Классла хIянчи.

Дугьбала диктант.

Учитель: ХIердарая суратуни, сегъуна-биалра лишан гьар секIа гьанбушили, дугьбала цалабикуни лукIехIе.

 Масала: Се саби нушани чебиуси? Ил сегъуна саби?

ДурхIни: Муриси хъяр, жагаси cурат, халаси мах, берцIибси кьурч, разиси дурхIя.

 Учитель: Ишди дугьбас синонимти делкIеная.

   Муриси – тIягIямла, гIяхIси

   Жагаси – къугъаси

   Халаси – зурбаси

   БерцIибси – сабаибси, бикьурси

   Разиси – шадси.

Слайд  5

Учитель: Дурх1ни, гьандикахъая гьари се сарил омонимти, синонимти, антонимти.

Омонимти или бикIар тIамралашал цагъунти, амма мягIналашал дек1арти дугьбас.

Синонимти или бикIар тIамралашал декIарти, мягIналашал цаличил ца мешути дугьбас.

Антонимти или бикIар мягIналашал цаличи ца къаршити дугьбас.

Слайдуни 6-9

Учитель: ХIердизирая  гIергъити суратуначи ва антонимти дурая.

( Багьлали – къалабали, халаси – биштIаси, бягIуси – чIяртIа, ахъси – гIяшси.)

Слайдуни 10 -13

Учитель: Гьанна биалли чумал девла кумекличил синонимти дурая.

( Кахси – урухиэси, декIси – зугьаси, къугъаси – жагаси, нясси – жяргаси).

Слайдуни 14 - 16

Учитель: ХIердизирая, дурх1ни, ишди суратуначи ва омонимти дурая.

(Школализи башес – бетIу башес, устала кьякь – анкIила кьякь, диъ усули сай – ряхIятли усули сай).

Слайдуни 17 -18

Физминутуни

Учитель: Айзирая, дурх1ни. ХIязла тяхIярли дугьбазир антонимти дургехIе.

                     За-ки-дях1 тяп къур-гъи-ван

                      Гум-ла -чир ахъ-ди-ре-х1е

                            Ахъ! Ахъ! Ахъ!

                     Ар-цан-та дук-лу-ми-ван

                    Някъ-би-ра гьак1-ди-ре-х1е!

                      Гьак1!  Гьак1!  Гьак1! 

(Бурусила мягIна хIясибли учительличил барх дурхIнира вяшбикIар)

Учитель: Гьари бурая, дурхIни, гумлачир нушани се барира?

Дурх1я: Гумлачир нуша ахъдиубра ва гIяшдиубра.

Учитель: Нушани гьандушибти дугьби сели детарули? Сегъунти дугьби сари илди?

Дурх1я: Цаличи ца къаршити дугьби сари, х1ебиалли илди антонимти сари.

Учитель: ДаимбирехIе нушала дарс.

2.    Сагаси дарс кабихьни

Слайд 19.

Учитель: Гьанна хIердизирая, дурхIни, “ХIябцIанну гехIра попугай» бикIуси мультфильмлизибадси бутIаличи ва пикридухъеная, селичила гъайдикIехIел нуша ишбархIила дарсличир…   

- Се саби хъусбик1уси?

- Ч1ич1ала…

-Пикри бяхIчиаая, дурхIни, гIергъити дугьбачи. Чили  ва  се бурес вирару илди дугьбачила? (ДурхIяла жаваб).

СекIал чебиахъуси гъайла бутIалис се бикIусирил чили вирару бурес?

Учитель: ДурхIни, хIушала пикри хIясибли, селичила гъайдикIехIе  нуша ишбархIила дарсличир?

(ДурхIнани чула пикри буру)

- Бархьли саби,  д арсла тема  «Существительноела мягIна ва лишанти» саби.

Слайд 20.

Дарсла тема:  Существительноела мягIна ва лишанти.

Дарсла мурад:  существительноеличила мурхьси багьуди бедни; декIар-декIарти кьяйдурти дузахънила шайчирти бурсидешуни дебадирути жура-журала бяркъла хIянчурби дурадеркIни; мез давлачердирути, мягIничердирути, саркъахъути мезла гIягIниахъала гьандикахъни, мухIлила ва белкIла гъай гьаладяхI ардукни.

Учитель:  Чили вирару бурес, се бикIусирил секIал иргъахъуси гъайла бутIалис?

ДурхIя: СекIал чебиахъуси гъайла бутIалис существительное или бикIар.

  – ГьанбиркахъехIе, се сабил  существительное.

(ДурхIнала жаваб)

Слайд 21.

Учитель:  Гьари бурая лебтанилра саркъахъили, существительноели  секIал  чебиахъу или. Сегъунти суалтас жаваб луга илини?

Слайд 22.

Учитель: Существительноеби хIябал жинсличи дуртIути сари:

Мурул жинс – учитель, узи, дудеш;

Хьунул жинс – рузи, неш, хьунул;

Урга жинс – галга, ваца, мирхъи.

Учитель: Гьанна, нуни дурисра существительноеби, хIушани хIябал кьукьяличи дутIая.

 ( Тухтур, хала дудеш, рурси, гажин, начи, ралликьяна, хIеркI, узикьар, букIун, Рашидат).

Учитель: Гьанна пикридарая ца-ца предложение  ишди дугIла мицIирагличила, чинар илди хIердирарал, се бирули дирарал чузиб аргъесли.             

Масала:

ГIямултар хIунтIена гурда вацIализиб хIербирар.

Тахьси гIяра кахси бецIлизибад урухкIар.

Азгъин синка бусули яни кадиркур.

ХIиллакар бецIли букIунас халаси зарал биру.              

Слайд  Аудирование.

Слайд Учитель: ЛехIдизирая текстличи ва суалтас жавабти дурая. КIунтIрала мерла урдатурти прилагательноеби кадатирая. Кумекла дугьби гили лер текстла удир.

   Дила … - … ! Ну гIяхIил хIерирулра.  Дила лерилра гIягIнити лер. Леб … ванаси, дила бишт1аси …, … . Ну хIушачи карцIлира, хаслира барх1ехъла  замана.

…  кам-камси .  … изахъули сари, … кабиркули саби.

    Кумекла дугьби: хъали, неш - дудеш, хъали, арадешра,  кьяшмира,  кухни, къуйрукъра.

    (ДелчIахъес дурхIнази суалти ва илдас  жавабти дурахъес).

Слайд   Чебиуливан, существительноела кумекличил нушани секIултала умачила бурес дирулра. 

Учитель: Мез саркъахъути гIягIниахъала сари буралаби ва багьираби. Багьирабазиб секIа сегъуна-биалра лишан гьанбуршу ва адам пикриулхъахъу,  илала пикрила, гIякьлула хIялумцIу.

 Масала: Халаси канила бегI, бухъяна къянкъла бегI. (ХясасупI. Хяса супIдируси машина)

Учитель: ДурхIни, хIушанира дирутира багьираби дучес.

ü БусягIят нуша чинар сарра? (Школализир)

ü Ил сегъуна саби? Илаб дурхIна се биру?

ü  БелкIеная сегъуна сабил нушала школаличила багьира.

Халаси, шаласи, дурхIна багьуди кайсуси мер. (Школа)

Учитель: Дила някълабси се саби? (Телефон)

Адамлис ил селис хIяжатси? Ил сегъуна саби? ЛукIехIе ца гьатIи багьира.

Саби биштIаси-биаллира, адамла халаси мурад бируси. (Телефон)

Учитель:  ХIера илкьяйда хIушани дируда пикридирес багьираби ва зилан дурхIни пикрибухъахъес дурхьес «Лачин» журналлизи.

  Слайд   ГIямрула сегъуна-биалра анцIбукьличила къантIли, чебетаахъили буруси насихIятлис бурала бикIар. Халкьла мухIлила пагьмула имцIали пайдалабируси жура саби ил. Буралаби дузахъуси адамла гъайличи лехIирхъес тIягIямли бирар.

Учитель: ДелчIеная буралаби. Севан иргъулра хIушани илди? ГIяхIдизурти буралаби черделкIеная ва существительноела уди тугъаили чедаахъая.

Ø ГIяхIси  жуз  белчIни-гIякьлучевси  гьалмагъличил  гьуниваънигъуна  саби.

Ø ГIямру  муритира сари  кьутIкьутира сари.

Ø Жанничиб  гIязизси ва ах1ерси селра  лебси  ахIен.

Дарс кагахъни.

Кьиматуни кадатни.

Хъули хIянчи

Х1янчи 269 бяхI 123 ( существительноеби черделкIес)

 Существительноеличила баянти тикрардарая.

      Айзирая, дурхIни!

Багьудлумала хIурхъи

Ахъаба тякхIедухъи,

ГIилмула мурхьси лутIи

КъяйцIбараба черхIелкIи!

Ишичибли  дарс  таманбиуб.  ХIушаб  бархIи  гIяхIбираб!