Добавить материал и получить бесплатное свидетельство о публикации в СМИ
Эл. №ФС77-60625 от 20.01.2015
Инфоурок / Русский язык и литература / Другие методич. материалы / Исследовательская работа "Лудорвай гуртын улисьёс - удмурт писательёслэн произведениосысьтызы геройёс"

Исследовательская работа "Лудорвай гуртын улисьёс - удмурт писательёслэн произведениосысьтызы геройёс"


До 7 декабря продлён приём заявок на
Международный конкурс "Мириады открытий"
(конкурс сразу по 24 предметам за один оргвзнос)

  • Русский язык и литература

Поделитесь материалом с коллегами:

Удмурт Элькунысь дышетонъя но наукая министерство

Вылӥ ӧнерлыко тодон-валан сётонъя федерал кун бюджето дышетон ужъюрт

«Удмурт кун университет»

Тодослыко ужъёсъя

«Наукае нырысетӥ вамышъёсы»

нимо кылтодонъя, литературатодосъя, калык кылосъя но шаертодонъя

элькун ӵошатскон








Тодослыко уж

«Лудорвай гуртын улӥсьёс -

удмурт писательёслэн произведениосысьтызы геройёс»



Дышетскись: Миролюбова Анна Сергеевна, Завьял ёросысь «Совето Союзысь Герой А.М. Лушников нимо Лудорвай шоръёзо огъядышетсконъя школаысь» 10-тӥ классын дышетскись

Кивалтӥсез: Мерзлякова

Надежда Николаевна, удмурт кылъя но литературая вылӥ категориен

дышетӥсь


Ижкар 2015

Пуштросэз

стр


Азькыл…………………………………………………………………………..3

1 люкет. Т.Архиповлэн, А. Мироновлэн «Межаос гырисько»

очеркысьтызы Лудорвай гуртын улӥсьёслэн нимъёссы…………………......5

2 люкет. Н. Кондратьевлэн «Лудорвай» очеркысьтыз колхозникъёслэн образъёссы…………………………………………………………………… 10

3 люкет. Эскеронлэн материалэз но методикаез……………………… 17

4 люкет. Исследованилы йылпумъянъёс но выводъёс………………….. 18

Уже кутэм литература…………………………………………………….. 20

Приложение……………………………………………………………………21

















Азькыл

Лудорвай гуртлэсь историзэ эскерыку, Лудорвай ужен тунсыкъяськыку, милям киямы шедизы кык ми понна туж дуноесь книгаос: Т. Архиповлэн но А. Мироновлэн «Межаёс гырисько» (Ижкар,1931), Н. Кондратьевлэн «Лудорвай» (Ижевск,1961) очеркъёссы.

Та пичиесь произведениос огшоры гурт калык сярысь, соослэн сюлмаськонъёссы, куректонзы но шумпотонзы сярысь. Ма ватонэз, асьсэлэн тыршеменызы, сюлмо ужаменызы соос лэсьтӥзы, «гожтӥзы» Лудорвай гуртлэсь историзэ, нимъёссэс, асьсэос но сое тодытэк, пыраклы кельтӥзы асьмелэн визьёсамы. Асьмеос, туала улӥсьёс, тодамы возьыны кулэ гуртмылэсь историзэ, солэсь калыксэ. Вордскем шаерез яратон кутске ас гурттэ, ас гурт калыктэ гажан но валан бордысен.

Соин ик ас азямы валтӥсь ужпум (цель) пуктӥмы: эскероно, кыӵе муген Лудорвай гуртын улӥсьёслэн нимъёссы но образъёссы пыризы удмурт писательёслэн произведениосазы.

Валтӥсь ужпумез быдэстон понна, ми быдэстоно луим та ужпумъёсты (задачаосты):

  1. Произведениосты лыдӟыса, геройёсын тодматскыса, тыршоно шедьтыны соослэсь нимтулъёссэс, малы ке шуоно, тросэзлэн кушем яке воршуд нимъёссы гинэ сётэмын.

  2. Пересьёслэсь юалляськоно та геройёсты тодэмзы сярысь.

  3. Геройёслэсь туспуктэмъёссэс шедьтыса, бичано лудорвайёс-колхозникъёс сярысь материал (туспуктэмъёс, тодэ ваёнъёс, цитатаос)

Эскерон ужмылэн объектэз луэ Лудорвай гурт но солэн улӥсьёсыз.

Исследованилэн предметэз: ма но кызьы гожто авторъёс лудорвайёс сярысь. Вылӥ произведениос вылэ пыкиськыса, школаысь шаертодонъя музеямы архивной материалъёсты эскерыса но соосын тодматскыса, ми ужмес тазьы радъям:

1 люкетын эскерим Т. Архиповлэн, А. Мироновлэн «Межаос гырисько» очеркысьтызы Лудорвай гуртын улӥсьёсты, книгаысь соослэн нимъёсынызы цитатаосты уже кутыса. Таяз люкетын бадӟымгес саклык висъям нимъёсты эскеронлы, малы ке шуоно писательёс нырысь ик суреданы тыршизы огъя колхозлэсь образзэ, лудорвайёслэсь кушем (воршуд) нимъёссэс уже кутыса.

2 люкетын возьматӥмы Н. Кондратьевлэн «Лудорвай» очеркысьтыз колхозникъёслэсь образъёссэс, озьы ик куд-ог геройёс сярысь люкам на ватсаса материал, ӵыжы-выжыоссылэсь но пересьёслэсь юалляськыса.

Куд-ог геройёслэсь туспуктэмъёссэс шедьтыса, висъям нимысьтыз приложение.

Исследованилэн кулэлыкез: быдэстэм ужез кутыны луэ удмурт литературая, шаертодонъя, история урокъёсын, классной часъёсын. Озьы ик музеын нимысьтыз стенд яке альбом кылдытэмын луыны быгатэ.










1 люкет. Т.Архиповлэн, А. Мироновлэн «Межаос гырисько» очеркысьтызы Лудорвай гуртын улӥсьёслэн нимъёссы

Тодмо критик Ф. К. Ермаков гожтэ, удмурт литератураын очерк умой-умой пушйыны кутскиз кызетӥ аръёслэн пумазы, сельхозартельёс кылдытыны кутскемен классовой нюръяськон пуромем бере. Со дыре ваньмыз сямен ик удмурт писательёс коллективизация сярысь гожъязы но удмурт гуртын ортчись событиосты очеркъёсазы возьматӥзы. Умоесь очеркъёссэс А. Миронов но Т. Архипов «Межаёс гырисько» сборникен поттӥзы 1931 арын. [2,16].

«Писатель луэме понна нырысь ик йыбырттӥсько газетлы. Со дышетӥз улон шоры мургес учкыны, солэсь вирсэрзэ ӟечгес валаны, кылэз узырмытыны. Газетэ печатлам очеркъёс, веросъёс вылын ӝужазы бадӟымесь произведениосы. Газет монэ адями кариз, дышетӥз улон шоры паськыт синмын учкыны, вань быгатэмме но кужымме сётыса ужаны», - гожтӥз тодэ ваёнъёсаз калык писатель Трофим Архипович Архипов.[1,145]

Очерклэн кулэлыкез соку туж шӧдскымон вал, малы ке шуоно, гуртын ортчись коллективизациез возьматон понна, кулэ луизы зэмос улонысь ортчись событиос но геройёс. Та пичи жанрлэн со вакытэ тырмымтэосыз но шекъёсыз трос вал ке но, тросэзлы писательёслы очерк бордын ужамзы луиз бадӟымесь но яркытэсь произведениос кылдытонэ паськыт сюрес.

Валамон, малы «Межаос гырисько» луиз очеркъёсын бичет.

Удмурт гуртын классовой нюръяськонлэн ӟырдыт тылӝу пӧлаз пыдлогес пырыны тыршыса, А. С. Мироновен чош Т. Архипов кӧня ке дыр ӵоже улэ Ижевск дорысь Лудорвайын. Та гуртэз малы быръемзы валамон. Татын 1928 арын «кулак ньӧръёс шулазы», узыръёс куанеръёсты жугизы – сӧсыръязы, вуж сямъёссэс выльысь улӟытыны, кенешез копак ас киязы кутыны турттӥзы. Та учыр быдэс страналы тодмо луиз. Соя партилэн ЦК – ез кутӥз нимысьтыз постановление. Архипов но Миронов Лудорвае очерк гожтыны лыктэм муртъёс гинэ ӧй вал. Соос калыклы валэктӥзы колхоз ужпумъя партилэсь политиказэ, нимаз – нимаз примеръёс вылын шараязы огъя хозяйство кылдытыны, артелен ужаны кулакъёслэсь малы пумит луэмзэс, середнякъёсты кулаке поттонлэсь малы умойтэм луэмзэ но кулэзэ. Авторъёс палэнэ уг кельто православной религиез но язычествоысь кылем вуж сямъёсты, социальной висёнъёсты, гожтэт тодымтэез быдтон понна нюръяськонэз.

«Колхозэ трактор вуиз. Солэн гуретэмез быдэс гуртэз сэзъялтӥз кадь. Руль сьӧрын пуке егит тракторист Скобелев Ефим. Чипыез но, курегез но шуэм сямен, вань калык потӥз солэсь нырысетӥ борозда лёгемзэ учкыны. Паймон но, шумпотон но огазе сураськиз. Табере выль сюреслэн ӟеч улонэ нуэмезлы оскисьтэмез ӧз ик кыльы ни кадь.

Паськыт удысэн гырыса кошке трактор. Сое учкыса сылӥсь воргоронъёс, одӥгез но мукетыз, отын ик верало:

- Ойдо меӵак гинэ кошкы ни, Ефим! Гыр мынэсьтымзэ но!

Ефим гыриз, кизиз. Солэн киосыз, проворесь ке но, лумбыт руль бордын возьыса, жиль-жиль жадё. Ӝытазе бусыысь акшанэн бертыкуз, пыдессинъёсыз ик либрак луыло. Моторлэн гуретэм куараез кӧлыны выдэмез бере но солэн пель сьӧраз кема кылӥське на. Ӵукна нош ик выльмыса султэ, толло жадемез быремын – егит тракторист машинаез доры дыртэ ини.

- Ничего, Ефим Александрович, - пульпумаз вешалля Сари Педор, - ваньмыз умой луыса кошке кадь ай. Асьмелэсь та нырысетӥ сюресъёсмес уз вунэтэ, берло но ӟечен вералозы.

Председательлэн сыӵе кылъёсыз егит пилэсь мылкыдзэ уката бурдъяло. Солэн машина куараез быдэс бусыез шулдыртэ. Валъёс пельёссэс пуньяса кылзо сое, возьматыса сямен гырдалтыло.

Тракторлэн гуретэмез выль улонлэн вормон кырӟанэз луиз. Солэн кужымез дауръёс ӵоже кыжмем, ожмем межаосты кесяз, музъем понна керетонъёсты быдтӥз, межа вылын, кенер дорын ваче мыжык вуылонъёсты гыриз. Чебересь удъёс ӝужазы дэмен огкылысь гырем-кизем музъем вылын. Азьлане ӝутскон удъёс вал соос.»[2,50-51]

«Игоня пересь синъёсызлы ӧз оскы, му дуре пыдесъяськиз но гырем мулэсь мурдалаз эскерыны кутскиз. Собере киыныз котыр маялляз но султӥз, горд тушсэ маялтыса вераны кутскиз:

- Плуглэн гырем бервылыз но умой, нош талэн эшшо но ӟечгес. Учкали! Пыдэссэ но таба кадь ик ӵошкыт басьтэ. Дурыз тани пуртэн шорыса басьтэмын ук».[2,7]

«Косарев Петыр дорысь, трактор сьӧраз усы басьтӥз но, нош ик зол жуэтыса Мульы Пашкалэн капка азьтӥз бусые потыса кошкиз. Калык табере Позим урамтӥ мында гинэ уг туб, тракторъёслэн азязы но беразы но сьӧд-сьӧд калык. Азяз пиналъёс горд флаген тубо, бер палаз – нылкышноос но пересьёс.»

«Тини Сари Степан туж уно аръёс ӵоже Дрей Петыр сямен ик ужаз. Туннэ нош со колхоз бусыын. Отын со герыен но, плуген но уг гыры. Маин бен? Тракторен! Тини со трактор вылэ пуксьыса, ана пумысь пуме берыкъяськыку гинэ ӝутъяса, эскерыса ветлэ.»

«Иж карысь лыктыса пырыку ик кузь выль корка адӟиське. Тае корка но шуыны уг луы, лабаслы но уггес тупа: укноен, туж ӵем укноен. Укноосыз пичиесь - пичиесь, Сьӧд Ульянлэн коркаезлэн укноосыз сярысь но пичиесьгес.»

«Та Ӵужъем кенаклэн куӵо скалэз али ик аслыз ачиз му вылысь коттыр утчаны потэм ини. Со нырзэ музэ карыса, Мульы Пашкалэн но Ӟичы Ондыръянлэн капка азьтӥз скотной двор пала вамыштэ. Скотной дворлэн ӧсэз усьтэмын. Куӵо скал сое адӟиз. Йырзэ мычиз но, каллен куараен бурсйыны кутскиз. Куӵо скаллэн но колхозысь скалъёслэн кадь ик улэм потэ. Соослэн улэмзылы со вожъяське кадь.

«Межаос гырисько» очеркъёсын бичет ми понна туж дуно шедьтос, малы ке шуоно табере шонерак вераны луэ: 1930 арын Лудорвай гуртын «Горд Лудорвай» колхозлэсь кылдэмзэ возьматыку, писательёс шонерак возьматӥзы гуртоосмылэсь нимтулъёссэс но колхоз шоры учонзэс;

Со сяна, писательёс узырмыто очеркъёссэс характеръёсты, образъёсты, учыръёсты, произведенилэсь люкетъёссэ ваче пумит пуктон амалэн-антитезаен. Шуом, «конгыро геры» но трактор плуг, выль но югыт Лыдӟон корка но сьӧд мунчо, каргаськись Еремей кышно но егит, улонэз яратӥсь трактористка но мукет.

Озьыен, писательёс ас азязы пуктэм ужпумзэс быдэстӥзы. Партия чурытэсь куронъёс пуктӥз соос азе: калыклы возьматоно но валэктоно вал коллективной улонлэсь пайдазэ, шулдырзэ, чеберзэ, азинскемзэ.

Нош ми вуылӥм кадь асьме гуртамы 84 ар талэсь азьло, али кадь ик улэпен адӟимы гуртоосмес:

Скобелев Ефим Александрович

Сари Педор - Косарев Федор Иванович

Мульы Пашка – Сергеев Павел

Кырыж Кими – Горлов Тимофей

Чурай Анна – Егорова Анна

Ӵужъем кенак – Косарева Анастасия

Ӟичы Ондыръян – Вершинин Андриан

Кузь Пашка – Сергеев Николай

Пор Гирыш – Иванов Григорий

Сьӧд Ульян – Маратканов Ульян

Дрей Петыр – Романов Пётр

Сари Степан – Косарев Степан

Игоня пересь - Мемятов Игнатий






2 люкет. Н. Кондратьевлэн «Лудорвай» очеркысьтыз

колхозникъёслэн образъёссы

«Межаос гырисько» очеркъёсын бичет быдэсак Лудорвайын коллективизацилэн ортчемезлы сӥземын ке, Н.Кондратьев 1960-тӥ арын татчы вуиз гуртмылэсь выль туссэ адӟон понна. Ветлэмезлэн емышез - «Лудорвай» нимо очерк. Книгалэн пуштросэз аспӧртэмлыко луэ: валтӥсь геройёсыз – огшоры колхозникъёс, кудъёсыз асьсэ уженызы, тыршеменызы ӝутыны быгатӥзы Лудорвайлэсь данзэ. Шумпотымон соиз но: милям гуртоосмы книгалэн геройёсыз луизы. Куд-огъёсыныз милемлы шуд усиз пумиськыны, юалляськыны ужамзы-улэмзы сярысь. Мукетъёсыз сярысь ма но со тодӥм матысь ӵыжы-выжыоссылэсь.

Андрианов Николай Андрианович вордскиз 1928-тӥ арын Можга районын. 1951-тӥ аре быдтӥз Аграрной школаез. Лудорвайын ужаз бригадир луыса. Кивалтӥз сортоучастокен. Кузпалыныз будэтӥзы ньыль нылпи. Ваньзы соос басьтӥзы вылӥ образование, дано адямиос луизы.

«Ӵапак таӵе лек дыръязы соос доры пырыны кемдизы комплексной бригадалэн кивалтӥсез Николай Андрианович Андрианов но зоотехник Анна Семёновна Первякова.

Кутскизы ук соос борды! «Пудо сиён сётон понна уд сюлмаськиське, - шуо дояркаос. - Ӟег уд висъяны кулэ на. Вералэ правлениын: трос йӧл кулэ ке, милесьтым куронмес но мед быдэстозы». Бригадирзы ӝог гинэ пурӟись адями ӧвӧл. Ӵашетэмзэс кылзӥз но лякытэн гинэ валэктӥз: «Правление косытэк ӟег удэз мон огнам висъяны уг быгатӥськы. Туннэ тани Вуколудын открытой партийной собрание луоз. Отын вераськом ни ӟег уд висъян сярысь но, концентратъёс ваён сярысь но». Интыяз вераны шедьтэм кыл висись муртлы тупам эмъюм кадь ик. Бригадирлэн но кылъёсыз ӵап интыяз тупазы. Нылкышноос солы пумит номыр вераны ӧз шедьтэ ни, йӧл ведраоссэс кутыса, соку гинэ бусыысь вуэм скалъёссы доры потӥзы, нош бригадирен зоотехник партийной собрание дыртӥзы».[5,59] «Кузь улон сюресэз ортчиз ни Косарев Фёдор Иванович. Пичи дырысен сое Сари Педор шуо. – Вал, вал, котькыӵе дыръёс вал…Царской армиын но кыстаськи, Октябрь революция нуналъёсты но адӟи…Кулакъёс но тӥни зӥбыны выризы милемды. Колхоз но кылдытӥм. Кужым но мылкыд бадӟым вал, номыр но куасылтыны ӧз вормы. Тани али но улэп. Ортчем сюрес вылаз таӵе суредъёс но вылӥллям. Котькинэн мед вераськоз, соосты со одно ик тодытэ. Секыт йӧтӥз царской армиын служить карон. Казахстанысь Сергиопольын конвойной командаын дыръяз Педорез одӥг уе политической заключённойёсты возьманы косӥзы. Сылэ, мыд-мыдлань ветлэ. Витёнтэм шорысь адӟе: одӥгез пегӟыны шӧтаз. «Стой!»- кеськиз солдат но затвореныз шальт-шальт кариз. Пегӟись мурт валаз, дугдӥз но выдӥз. Арня ортчыса, со пегӟись муртэ но Педорез судэ вуттӥзы. «Малы тон сое од ыбы? Ыбысалыд ке, тыныд азвесь медаль сётысалзы ук?» - Косаревлэсь юа судья. «Мыным медаль кулэ ӧвӧл. Адями улэп кылиз, соиз дуно»,- кышкатэк вераз удмурт солдат. Чиновникъёс лек вожпотонэн учкизы со шоры. Нош та уж пумысен сое кызьы ке номыр ик ӧз каре. – Кин тодэ, со адями оло али ке но вань на,- шуэ Фёдор Иванович.- Нош ыбысал ке, асьме кадь адями юнме бырысал. Адями жаль. Отын пукисьёс асьмелэн улонмы понна ик сюрем адямиос вал ук. Октябрь революция кутскыку, Косарев Казаньын служить каре вал. – Одӥг нуналэ тазьы ,- шуэ со ,- городын мар ке аляк луыны кутскиз. Спирт возён склад доры трос рабочийёс люкаськизы но складэз тӥяны кутскизы, ӵапак со складъёсты возьманын Косарев но сылэ вылэм. Солдатъёс калыкез склад дорысь улляны кутскизы. – Али ик кошке татысь! Складъёсты тӥяны ум сётэ, ӧд ке кошке, ыбылом!- кесясько соос. Солдатъёс бере солдатъёс ини. Номырзэ уг валало на. Косэмын бере, возьмано. Ӵапак соку, калык пӧлысь потыса, соос доры сурон дӥсен адями вуиз. – Кушты пыӵалдэ, революция кутскиз,- шуиз со туж лякыт куараен.-Пыӵалэныд мертад на ке, рабочийёс астэ но луло уз кельтэ. Пеймыт гуртын ке но будэмын, Косарев Фёдор та югдурез ог йӧндыриз. Сурон дӥсен рабочийлэн кылъёсыз солэн сюлэмаз пыдло пыризы. Солдатъёс рабочийёсын огкылысь луизы. Со дырысен кема ортчиз ни. Фёдор Ивановичлэн син шораз выльмиз гуртын улон. «Горд Лудорвай» колхоз арысь аре юнмаз, будӥз. Та выльдӥськонлэн, ӝутсконлэн ӝог кошкись ӧраз ик мынӥз Фёдор Иванович но. Ӟырдыт ужан дыръёсы со ӧз но жадьылы кадь. – Выльдӥськон сюрес вылын мынам кужыме будыса кошке,- данъяськылӥз со.- Весь тазьы ик уло кожасько вал. Табере, адӟиськоды, пересьми. Ма бен карод… Мон шумпотыса учкисько асьмелэн колхозмы шоры. Милям мерттэм писпумы буй-буй пушйиз, таза емышъёссэ сётэ.»[5,51-55]

«Вордскемын атаймы 1887-тӥ арын. Ми – вань ӵыжы-выжыосыз- солы озьы вазиськылӥм. Туж гажаськом вал лякыт сямыз но трос тодэмез понна. Ас вакытаз со туж грамотной вал. Царской армиын полковой священник гожтэтлы дышетэм. Гурт калык но гажалляз. Али тани нимзэ вунэто ини»,- тодаз вае пиез Косарев Владимир Фёдорович.

Сергеев Архип Васильевич вордскиз 1940-тӥ арын Лудорвай гуртын. 1957-1960-тӥ аръёсы «Правда» колхозын ужаз разнорабочий луыса. 1960-тӥ арын «Правда» совхоз луиз. Соку ини Архипез учётчике пукто. Учётчикын ужаз 1967-тӥ арозь. Колхозын ужакуз, куинь пол сётылӥзы коньдон премия (5,10,15 манет). Соку та уксёлэн дуныз туж бадӟым вал. «Книгаын мон сярысь гожтэмын шуыса кылэме вань, но лыдӟеме ӧвӧл. Писателен пумиськемме уг ни тодиськы. Со вакытэ вань гурт калык ужа вал колхозын. Городэ кошкисез ӧй вал. Пинал калык - нылъёс но пиос-ужаськом вал туж мыло-кыдо. Азьлань улонлы оскон вал соку. Учётчикын ужай бере, эскерисько вал йӧлэз, кунянъёслэсь но парсьпиослэсь привес сётэмзэс. Ужакум, заочно дышетски сельхозинститутын. 1967-тӥ арын сортоиспытательной участокын агроном луыса ужай. Нош 1975-тӥ арын участокез пытсазы. Пенсие потытозям ужаны ветлӥ ини Ижевске», - тодаз вае Архип Васильевич.

«Соослэсь (дояркаослэсь) вераськемзэс чал-чал кариськыса кылзэ учётчик Архип. Интыяз пукыса кылиз Архип гинэ. Берен со бумагаосыз борды кутскиз. Ӵуказе нош ик огез толэзь быре ини. Кин кӧня йӧл кыскиз- ваньзэ йылпумъяса дасяно но ӵукна азелы борддоре ляконо.

Кытысь ке Архип нимез кылӥськод ке, син азе соку ик мольк пуксе кыче ке маскара пересь мурт. Тон шоры со шаян синъёсыныз серем пыр учке но маке гор-гор серекъя кадь. Нош таиз Архип сыӵе ӧвӧл. Сыӵе луиз ке луоз ог ньыльдон ар ортчыса гинэ. Солэн ангес йылаз али гинэ пигон потыны кутске. Кылем арын со средней школаез быдтӥз. Фермае нырысьсэ ужаны лыктэмез бере, востэмзэ шӧдыса, мӧйыосызгес дояркаос соин исаськыса-серекъяськыса вераськылӥзы. Архип соос пумитэ номыр вераны ӧз шедьтылы но кепырась синъёсыныз ӵыж-горд луыса учкылӥз. Чупырес пияш-Архип! Ужаны быгатэмзэ шӧдыса, колхозлэн правлениез солы пудо сиёнэз но, фермалэсь вань продукцизэ но лыдъянэз оскиз. Ваньмон дыръёсаз пияш сэрыт учебникъёсыз борды пуксе». [5,59-60]

Сидорова Мария Ивановна вордскиз 1938-тӥ арын. «Правда» колхозын ужаз дас ньыль аресысен пенсие потытозяз скал кыскись луыса. Ужын басьтэм вормонъёсыз пусъемын Москваысь ВДНХ – ысь грамотаен. Мария Ивановна трос йӧл кыскемез понна озьы ик пусъемын Элькун грамотаосын. Солэн скалъёсыз самой йӧлоесь но чылкытэсь вал. Вань ужез быдэсъязы киын. Озьы ке но, егит кышномуртлэн кужмыз тырмылӥз на бадзым общественной уж нуыны: со вал партилэн членэз, пӧртэм конференциослэн но собраниослэн ужазы пыриськылӥз.

Анай-атайтэк вазь кыльыса, огназ будэтӥз Виктор но Володя вынъёссэ. Огназ пыд йылаз султытӥз Андрей пизэ. Озьы ке но, вань шуг-секытъёсты вормиз. Быгатӥз йыг-йыг корка ӝутыны». ( А.С.Куликова кенэзлэн верамез)

Кема но секыт висемез бере, Мария Ивановна улонысь кошкиз 1998 арын.

«Улмо кадь ӵыжыт бамо егит ныл Сидорова Маша азбар сьӧры потаса учкылэ, ӝегатскон сое уката но вӧсь каре, лэся. Фермаын сяна но ужез трос солэн. Сое комсомольской организациын витё, со ик райсоветлэн депутатэз но. Алигес со егит коммунистка луиз. Ӝытъёсы дышетске». [5,61]

Скобелев Ефим Александрович – Лудорвайысь нырысетӥез тракторист.

«Колхозэ трактор вуиз. Солэн гуретэмез быдэс гуртэз сэзъялтӥз кадь. Руль сьӧрын пуке егит тракторист Скобелев Ефим. Чипыез но, курегез но шуэм сямен, вань калык потӥз солэсь нырысетӥ борозда лёгемзэ учкыны. Паймон но, шумпотон но огазе сураськиз. Табере выль сюреслэн ӟеч улонэ нуэмезлы оскисьтэмез ӧз ик кыльы ни кадь.

Паськыт удысэн гырыса кошке трактор. Сое учкыса сылӥсь воргоронъёс, одӥгез но мукетыз, отын ик верало:

-Ойдо меӵак гинэ кошкы ни, Ефим! Гыр мынэсьтымзэ но!

Ефим гыриз, кизиз. Солэн киосыз, проворесь ке но, лумбыт руль бордын возьыса, жиль-жиль жадё. Ӝытазе бусыысь акшанэн бертыкуз, пыдессинъёсыз ик либырак луыло. Моторлэн гуретэм куараез кӧлыны выдэмез бере но солэн пель сьӧраз кема кылӥське на. Ӵукна нош ик выльмыса султэ, толло жадемез быремын-егит тракторист машинаез доры дыртэ ни».[5,51]

«…Калык оло сайкаса но ӧз вуы на, нош Ефим Александрович Скобелев ӵукна ик тракторез доры ваське ни. Тулыс ӧжыт шунтыны кутске ке, сюлмыз уг чида ни солэн.

Руль борды пуксьыса, рабочий Ефим Скобелев нуоз тракторзэ паськытэсь лудъёстӥ. Удалтэм ю-нянь будэтыса, ас государствозэ уката узыр, кужмо кароз со.

Мотор огсыр гуретыку, мӧйы трактористлы тодаз лыктоз егит дыръяз нырысьсэ трактор вылэ пуксемез, Иж МТС-ын ужамез, ӟеч тыршемез понна правительстволэсь Ленин орден басьтэмез…»[5,72] Кинъёс бен соос - «Лудорвай» очерклэн геройёсыз? Очерклэн гинэ ӧвӧл, быдэс гуртлэн, колхозлэн. Соослэсь нимъёссэс пусъем потэ:

- Косарев Фёдор Иванович (Сари Педор) - «Горд Лудорвай» колхозэз кылдытӥсьёс пӧлысь одӥгез;

-Скобелев Ефим Александрович - нырысетӥез тракторист;

-Сергеев Архип Васильевич - фермаысь учётчик;

-Андрианов Николай Андрианович - бригадир;

-Сидорова Мария Ивановна - скал кыскись;

-Волкова Мария Сергеевна - скал кыскись;

-Горлова Мария Андреевна - кунян сюдись;

-Горбунов Анатолий Михайлович - бригадир.

Книгалэн пумыз туж яркыт но малпаськытӥсь.

«Мотор огсыр гуретыку, мӧйы трактористлы тодаз лыктоз егит дыръяз

нырысьсэ трактор вылэ пуксемез, Иж МТС-ын кема ужамез, ӟеч тыршемез понна Правительстволэсь Ленин орден басьтэмез, нырысетӥ председательзылэн Фёдор Иванович Косаревлэн верам кылъёсыз: «Асьмелэсь та нырысетӥ сюресъёсмес уз вунэтэ, берло но ӟечен вералозы».[5,72]

«Лудорвай» очеркез лыдӟыса, син азе яркыт пуксё милям гуртоосмылэн образъёссы, колхозын тыршыса ужамзы, шулдыр но чебер вуоно аръёслы оскемзы. Автор быгатыса возьматэ котькуд героезлэсь яркыт но аспӧртэмлыко луэмзэ: Косарев Федор Иванович – улонэз адӟем, котьмае валась, тодӥсь мурт, гуртоос сое гажало, данъясько соин; Скобелев Ефим Александрович – Лудорайысь нырысетӥез тракторист, аслаз тыршеменыз, кужмо луэменыз дано луэ; Андрианов Николай Андриянович – егит ӧнерчи, визьмо, кылзӥськись, ужан радлыкез валась мурт, колхозникъёс сое гажало нод-нод луэмез понна; Сидорова Мария Ивановна – егит скал кыскись, колхозын ужась нылкышнолэн огъясь образэз, вань сюлэмзэ сётыса, ассэ жалятэк тыршись кышномурт, общественной ужен вырыны вуттӥсь егит коммунистка. Сергеев Архип Васильевич – фермаысь учетчик – со вакытэ колхоз егитъёсты возьматӥсь образ: чупрес, ужзэ яратӥсь, азьланезлы оскись.

Ваньзэсты та геройёсты огазея шудбуро азьланезлы, вордскем шаерзылы пайда сётыса ужанлы, колхозлэн пушъемезлы оскон.





































3 люкет. Исследованилэн материалэз но методикаез.

Эскерон ужмес ми ортчытӥм одӥг ар куспын.

Нырысь ик ми шедьтӥм но лыдӟим Н. Кондратевлэсь «Лудорвай» очерксэ. Нош Удмурт кун университетысь басьтӥм А. Мироновлэсь но Т. Архиповлэсь «Межаёс гырисько» бичетсэс.

Книгаосын тодматскыса, висъям геройёслэсь нимтулъёссэс, куд-огезлэсь ӵыжы-выжыоссэс шедьтӥм, соослэсь юалляським геройёсмы сярысь, курим туспуктэмъёссэс, приложение бичан понна.
























4 люкет. Исследованилы йылпумъянъёс но выводъёс.

Эскерон ужмес йылпумъяса, ми тодӥмы:

1. Лудорвай гуртын улӥсьёслэн нимтулъёссы но образъёссы книгаосы пыризы нырысь ик коллективизаци ортчемен валче, Лудорвай уж ортчем бере, калыклы возьматоно вал колхоз ужлэсь пайдазэ. Ваньзэ тае ми тодӥмы, А.Мироновлэсь но Т.Архиповлэсь «Межаёс гырисько» но Н.Кондратьевлэсь «Лудорвай» очеркъёсын бичетъёссэс лыдӟыса. Та книгаос гожтэмын писательёслэн огдыр ӵоже гуртамы улэмзы но адямиосын пумиськылэмзы бере.

Нырысетӥез бичет быдэсак сӥземын колхоз улонлэсь умой палъёссэ но вормонъёссэ возьматонлы.

Кыкетӥез книга кык люкетлэсь пӧрмемын. Одӥгез люкетэз возьматэ 1928-тӥ арын Лудорвайын пуромем классовой нюръяськонэз - «Лудорвай ужез». Мукетыз люкетэз возьматэ 1960-тӥ арын Лудорвай гуртысь «Правда» колхозлэн азинлыко ужамзэ но ужасьёссэ.

  1. Произведениосты лыдӟыса, геройёсын тодматскыса, шедьтӥм кушем нимъёссылы нимтулъёссэс.

  2. Пересьёслэсь, ӵыжы-выжыоссылэсь юалляським та геройёсты тодэмзы сярысь.

4. Куд-ог геройёслэсь туспуктэмъёссэс шедьтыса, висъям нимысьтыз приложение.

Эскерон ужмес йылпумъяса, ми таӵе малпанэ вуим-Лудорвай гуртын улӥсьёс, уката ик егитъёс, туж ӧжыт тодо ас гуртсылэсь историзэ, данэ потэм адямиоссэ.

Нош ми туннэ сётыны быгатӥськом таӵе дэмланъёс:

-гуртмылэн историезъя эскерон ужъёс луыны кулэ арлы быдэ;

-школаысь шаертодонъя музеямы лэсьтоно гуртамы ортчем коллективизацилы сӥзем стенд но альбом, нимысьтыз экскурсия;

-удмурт литературая но шаертодонъя, история урокъёсы пыртоно гуртамы со вакытэ ортчем событиослы сӥзем темаос;

-«Межаос гырисько» но «Лудорвай» книгаосъя ортчытоно литературной лыдӟонъёс, та бичетъёсы пырем геройёсты но соослэсь ӵыжы-выжыоссэс ӧтьыса;

























Уже кутэм литература

1. Арекеева С. Т., Пантелеева В. Г., Фёдорова Л, П., Шкляев А. Г. Удмурт литература: 10-11 классъёслы учебник.- Ижевск: Удмуртия, 2008,с.145

2. Архипов Т. А., Миронов А. А. Межаёс гырисько. Ижкар: Удкнига, 1931,с.1-102

3. Вопросы истории Удмуртии.- Ижевск 1974,с.

4. Выль дунне. Удмурт верос: Антология / Азькылэз А. Ермолаевлэн.- Ижевск: Удкнига, 1931,с.6-7

5. Кондратьев Н. И. Лудорвай.- Ижевск: Удмуртской книжной издательство, 1961,с.30-72

6. Шкляев А. Г. Удмурт литература: 8-ти класслы учебник – хрестоматия.- Ижевск : Удмуртия, 1973,с.272




















Приложение

hello_html_m206e7be1.jpg


Скобелев Ефим Александрович

(туспуктэмез школа музейысь)







hello_html_2ed528a.jpg

Скобелев Ефим Александровичлэн тракторез

(туспуктэмез школа музейысь)




hello_html_m672ddd98.jpg

Андрианов Николай Андрианович

(туспуктэмез ас архивысьтыз)




hello_html_5e0ff8fb.jpg

Сергеев Архип Васильевич

(туспуктэмез ас архивысьтыз)



hello_html_1e437192.jpg

Сидорова Мария Ивановна (шорысез)

(туспуктэмез ас архивысьтыз)















































































26



57 вебинаров для учителей на разные темы
ПЕРЕЙТИ к бесплатному просмотру
(заказ свидетельства о просмотре - только до 11 декабря)

Автор
Дата добавления 04.01.2016
Раздел Русский язык и литература
Подраздел Другие методич. материалы
Просмотров89
Номер материала ДВ-305665
Получить свидетельство о публикации

Включите уведомления прямо сейчас и мы сразу сообщим Вам о важных новостях. Не волнуйтесь, мы будем отправлять только самое главное.
Специальное предложение
Вверх