Компьютердің бала ағзасына тигізетін зияны

Компьютердің бала ағзасына тигізетін зияны

Солтүстік Қазақстан облысы

Петропавл қаласы

№ 26«Мектеп - балабақша»ҚММ

Абдрахманова Жанар Байкеновна

Педагог-психолог

Компьютердің өмірімізге, кеңінен енгені соншалықты, адамдар тіпті онсыз өмір сүре алмайтын дәрежеге жетті. Компьютерде мәтін теру, әр түрлі есептер шығару, көлемді мәліметтер сақтаумен қатар, қажетті құрылғылармен және соларға сәйкес бағдарламамен жабдықталған компьютер негізінде шағын кинотеатр жасап алуға болады. Десекте  компьютердің адам ағзасына тигізетін  зиянын ескере бермейміз. Әсіресе өсіп келе жатқан  балаларымызды тыныштандыру үшін ұялы телефонды беріп қою немесе жас сәбилер  мазамызды алмасын деп телеарнаны қосып беріп, қалаған мультикті  көрсін деушілер қатары күн санап өсіп келеді.

Жалпы бүгінгі күні теледидар мен компьютер, ұялы телефон балалардың айырылмас серігіне айналды. Балалар ойыншықпен емес, компьютердің алдында отырып,  кино, мультиктер көріп, ондағы құбыжық кейіпкерлерін  жатқа білетін болды. Атыс-шабысты, қатыгездік пен  жат қылықтарды көрген бала сабақты да естен шығарады. Жарты күн интернетте отырған бала жатарда ұялы телефонды жастанып жатып, түннің бір мезгіліне дейін құрдастарымен хабар алмасады. Осының бәрі баланың психикасын бұзып, көзінің көру қабілетін нашарлатады. Шамадан тыс компьютер алдында отыру баланың техникаға тәуелді етеді.

Компьютерде көп отыратын балаларды бақылаған кезде жасөспірімдердің даму деңгейінің төмендейтіні, сөздік-қисындық ойлауының нашарлайтыны, назар аудару қабілеті мен сараптамалық қабілетінің әлсірейтіні белгілі болған. Көптеген балалар естіген нәрсесін үлкен қиындықпен түсінеді. Ондай балалар жаңа ғана айтқан нәрсені есінен тез шығарып, тіпті сөйлем құрауға қиналады, шығарма да жаза алмайды.

Жұмыс  істеп тұрған  компьютер өз айналасында толқын  ұзындығы 1,5 м болатын  электромагниттік  өріс құрайды.Сол өріс аясына түскен адам зиянды ультракүлгін сәуле әсеріне ұшырайды.

Дәрігерлер мен психологтардың ұзақ уақыт жасаған зерттеулерімен оның қорытындысы компьютермен ұзақ уақыт жұмыс жасау, компьютерлік ойындарды мөлшерден тыс ұзақ уақыт ойнаудың балаларға төмендегідей зияны бар екендігін дәлелдеді. 

Тапжылмай ұзақ уақыт компьютердің алдында отыру, алдымен баланың ой-өрісінің дамуын шектейді. Екіншіден, оның мінез-құлқының өзгеруіне, логикалық ойлау қабілетінің бірте-бірте төмендеуіне әкеліп соғады. Сонымен қатар баланың, ақыл-ойының дамуын тежейді. Компьютердің алдында үзіліссіз жұмыс істеу баланың қан қысымын көтереді, және миопия, (көз жанарының алыстан немесе жақыннан көру қабілетінің төмендеуі) құлақтың есту қабілетін төмендетеді.Әрі баланың ұйқысы бұзылып, асқа тәбеті болмайды. Ал ұйқысы қанбаған баланың зейіні төмендейтіні баршаға  аян. Сонымен қатар омыртқаға көп күш түсетіндіктен сколиоз (омыртқа буынының қисаюы) омыртқа ауруына шалдығуы мүмкін, бұған қоса электрленген сәулелер саусақ ұштарына әсер етіп, қолдың буындарына зақым келтіреді. Сондай-ақ балалар жиі қолданатын құлаққаптың (наушники) да зияны өте көп. Ол құлақ тамырларының жүйке талшықтарын тітіркендіріп, әлсіретеді.

Жалпы ғаламтордың зиянынан сақтандыру үшін, кез келген ата-ана баласына оны пайдаланудың шарттарын түсіндіруге міндетті. Ұзақ уақыт компьютер алдында отырудың адам ағзасына тигізетін зиянын  жан-жақты айтып отырса артық болмас еді.