Методическая разработка внеклассного мероприятия для 1-2 классов

“Көҙҙә ҡунаҡта”  кластан тыш  дәрестең конспекты

(1-2 кластар  өсөн)

Маҡсат:уҡыусыларҙың  телмәрен үҫтереү,   тәбиғәттәге  матурлыҡты  күрә  белергә, иғтибарлы булырға, хеҙмәткә  бөйрәтеү.

Класс  бүлмәһе  көҙгө  япраҡтар  менән биҙәлгән. Уҡыусыларҙың  Көҙ  темаһына  төшөргән  һүрәттәренән  күргәҙмә ойошторола, хеҙмәт дәрестәрендә башҡарған   ҡул эштәре ҡуйыла.

Уҡытыусы: Хөрмәтле ата-әсәләр, уҡыусылар, ҡунаҡтар!  Беҙ бөгөн   йылдың гүзәл миҙгеле- байлыҡ, муллыҡ килтереүсе  көҙ  байрамын билдәләргә  йыйылдыҡ. Беҙҙең уҡыусыларыбыҙ  көҙ  тураһында  шиғырҙар  ятланылар, йырҙар  өйрәнделәр. Хәҙер  һүҙҙе  уларға бирәйек.

“Яратам мин илемде”  йыры  

Әсәй менән гөл  ултырттыҡ,

Гөлдәр  хуш еҫ тарата.

Уңғаным, тип,  үҫкәнем, тип,

Әсәй мине ярата.

Ҡушымта:  Гөлдәр хуш еҫ  тарата,

                                       Әсәй мине ярата.

Һәр көн һайын  һыуҙар һибәм,

Яратам мин гөлөмдө.

Гөлдәр  кеүек  илем матур,

Яратам мин илемде.

Ҡушымта: Яратам мин гөлөмдө,

                                      Яратам  мин илемде.

Айгиз:  Көҙ килгән, көҙ килгән,

Көҙ быйыл бик тиҙ килгән.

Ҡайындар,тирәктәр, талдар

Һарынан күлдәк  кейгән.

Көҙ  килгән, тиҙ килгән,

Тиҙ килгәнен  кем белгән?

Көҙ бит  һорап та  тормаған

Баҡсаға барып кергән.

Дания: Килдек  күмәкләп  көҙгө урманға.

Япраҡта  нурҙар уйнап  торғанда.

Япраҡтарҙың бар  алы, һарыһы,

 Бурҙат  ҡыҙылы-  матур  барыһы.                                                                                                                 

Әлфиә: Тирә-яғыбыҙ сағыу төҫ бары,

Гүйә был  урман әкиәт  һарайы.

Япраҡтар йыйҙыҡ, алын, һарыһын,

Бурҙат  ҡыҙылын- алдыҡ барыһын.

Румиә: Ҡайтҡанда  ҡыштың  ыжғыр  бураны,

Хәтерләрбеҙ  беҙ  көҙгө  урманды.

Артем: Ҡыҙғылт- һары  япраҡтарын

Ергә ҡоя  аҡ саған.

Ҡаҙҙың ҡыҙыл  тәпәйенә

Улар бигерәк  оҡшаған.

Илнур:  Эй, ҡарағыҙсы, яуа  япраҡтар,

Күмелә  юлдар,  таҡыр  һуҡмаҡтар.

Ҡойҙо ҡайындар һап-һары алтын.

Осто муйылдан  ҡып-ҡыҙыл   ялҡын.

Айгизә: Ҡала ағастар япраҡһыҙ ғына.

Тулап  баҡсала тик ел һыҙғыра.

Төҫ  күркен  шулай һалырмы баҡса,

Бойоғоп   ҡына  ҡалырмы  баҡса?

Руслан:  Ямғыр  яуһа,  тирәгем  ямғыр  менән һөйләшә.

Иркә елдәр  иҫкәндә  елдәр менән серләшә.

Хәҙер инде, көҙ еткәс, тәңкәләрен  ҡойҙо ул,

Өй артында  һап- һары

Келәм  йәйеп ҡуйҙы  ул.

Юлиә:  Яҡындағы  сауҡалыҡта үҫә йәп-йәш  бер миләш.

Башҡа  емеш кибеп  бөттө.

Ул ғына   тәлгәш-тәлгәш.

Һыуыҡ көндәр  килеп  етһә,

Миләшкәй  өшөр инде.

 Йәмле , йылы  йәй көндәре  иҫенә  төшөр инде.

Әлиә: Көҙ етте инде, ҡоштар  китерҙәр,

           Йылы  яҡтарға  сәләм  илтерҙәр.

           Сыйырсыҡ түгә  хушлашыу   моңон

           Алыҫ- алыҫҡа  юл алмаҫ  борон.

Айнур: Ҡанатын ҡағып  һаман  талпына:

-Китәм мин тиҙҙән, тигәндәй була.

Бойоҡма  ҡошсоҡ ҡайтырһың  яҙға

Үҙем  яһаған  яңы ояға.

“Ҡарт  сыйырсыҡ” йыры.

Айгизә:  Моңһоуланды урмандар, һарғайҙы  ҡырҙар  өҫтө.

Йылға- күлдәр  топ- тоноҡ.

Көҙ килде бит, көҙ  килде.

Элиза:  Ашлыҡ  тейәп  ылауҙар  ниндәй  тиҙ, етеҙ  елде.

Ил байлығы  мул булыр.

Көҙ килде бит, көҙ килде.

Шул саҡ класс бүлмәһенә    Көҙһылыу   килеп инә.

-Һаумыһығыҙ,   балалар!  Мине   ҙурлап  һөйләгән   шиғырҙарығыҙҙы, дәртле   йырҙарығыҙҙы  ишетеп  ҡалдым да  үҙем  һеҙҙең   байрамға  килеп еттем.  Буш   килмәнем  мин   һеҙгә,  бына  үҙемдең  күстәнәстәремде  лә  килтерҙем.

-Ә хәҙер  мин  һеҙҙең менән   уйнап та  алайым.  Мин  һеҙгә  йомаҡтар  әйтәм,   һеҙ  яуабын  әйтегеҙ.

Жюри  һайлау. Командаларға  бүленеү.                                                                                                         Япраҡтар   командаһы. 

Девиз:  Османыҡ  бит  бына   йыраҡҡа,

                                                           Түшәлдек  бит  тыуған  тупраҡҡа.

Икмәк  командаһы.  Девиз:  Икмәк   һәр кемгә  кәрәк,

                                                            Икмәк   һәр көн  дә кәрәк!

 Йомаҡтар   ҡойошоу:

Ҡыҙыл  ҡыҙым ер эсендә,

Йәшел  сәсе  ер өҫтөндә (кишер).

-Үҙе шарҙай,  эсе ҡандай, тәме балдай (ҡарбуз)

- Ер  аҫтында  ерән ат, уның  тиреһе  ете  ҡат.

  Һуйырһың, тунарһың,  тунағанда   иларһың (һуған).

-Үҙе  йомро, ай түгел,  төҫө   һары- май  түгел,

Ҡойроғо  бар- сысҡан  түгел (Шалҡан).

-Бер  бөртөк  ер аҫтына  күмелде,

Көҙ етеүгә  балалары  күренде(картуф)

-Ҡат-ҡат  тунлы, ҡарыш  буйлы(кәбеҫтә)

- Бик  зирәктәр икәнһегеҙ! Афарин , балалар!  Көҙ көндәре атай- әсәйҙәрегеҙгә уңыш  йыйыуҙа ярҙам итәһегеҙҙер, бит! Хәҙер  инде, әйҙәгеҙ, үҙегеҙҙең  етеҙлегегеҙҙе лә,  тырышлығығыҙҙы ла   күрһәтегеҙ  әле.

Ярыштар: Уңыш  йыйыу.

                       Серле тоҡсай

                       Мозаика   төҙөү

                       Йәшелсә   һүрәтен эшләү

                       Еҫенән таны.

Көҙһылыу:- Һеҙҙең  менән  ваҡыттың  үткәнен  дә  һиҙмәгәнмен. Мине  башҡа  балалар  ҙа  көтәлер бит. Тағы  ла  бараһы  ерҙәрем  күп әле.  Һау  булығыҙ,  балалар. Иҫән- һау  йәшәгеҙ. Тырышып уҡығыҙ!

Балалар:  Һау бул, Көҙ  апай,

                      Юлдарың   уң  булһын!

Йомғаҡлау.

Бүләкләү.

Ҡулланылған әҙәбиәт:  башҡорт шағирҙәренең шиғырҙары

Краткое описание документа:

Конспект урока по внеклассной работе может быть использован как на уроках по литературному чтению, так и на уроках по окружающему миру. Использованы стихи башкирских поэтов об осени, в этих стихах очень красиво описываются природные изменения осенью. Этот урок можно проводить как и классный час. Вторую часть урока можно провести как КВН между командами