Методическое пособие "Интерактивные методы и приемы на уроках крымскотатарского языка и литературы."

                     Муниципальное бюджетное учреждение

дополнительного профессионального образования

  «Информационно-методический центр»

            Интерактивные методы и приемы на

на         уроках крымскотатарского языка и литературы.

 

 

 

Симферополь

2017г.

                                                                                                                        Сборник утвержден

на Методическом совете

                                                                                                                               МБУ ДПО «ИМЦ»

                                                                                                                        пр. № 4 от 11.10.2017

 

Сборник печатается в авторской редакции.

Авторы-составители:

Эмирсалиева С.Э.                       методист МБУ ДПО «ИМЦ»

Исатова З.С.                                учитель начальных классов МБОУ

                                                     «СОШ № 42 им.Э.Шемьи-заде»

Исмаилова С.М.                          учитель крымскотатарского языка

                                                      и литературы МБОУ «СОШ № 23»

Ибраимова Э.Г.                           учитель крымскотатарского языка

                                                      и литературы МБОУ «СОШ № 42 им.

                                                      Э.Шемьи-заде»

Интерактивные методы и приёмы на уроках крымскотатарского языка и литературы (Къырымтатар тили ве эдебияты дерслеринде интерактив шекиллери ве усуллары. / - Симферополь, 2017г.-  27с.

Оглавление

Кириш.. 4

1.     Окъув ве тербие джерьянында интерактив окъутув методикасы

1.1. Интерактив окъутув методикасы.. 6

1.2. Интерактив усул насыл макъсаднен къулланыла?. 8

1.3. Группада чалышувнынъ аньаневий дерстен фаркъы. 9

2.     Окъутув-тербиелев джерьянында интерактив усулларнынъ къулланылувы

2.1. Группада чалышувгъа азырланув. 11

2.2. Интерактив усулларнынъ чешитлери. 13

3.Интерактив усулларнынъ ролю.. 16

4.Талебелернинъ фикир юрютюв фаалиетининъ инкишафында интерактив усулларыны къулланувы. 19

Хуляса. 25

Эдебият. 27

Кириш

          Земаневий мектепте окъув ве тербие процесси пек тез денъишип эп инкишаф этмекте. Бойле огге кеткен джерьянда янъы технологиялар токътамай пейда ола. «Ана тили» ве «Эдебият» фенининъ окъутув эсаслары да бойле технологиялардан марум дегиль. Бу фенлернинъ вазифелери талебелернинъ нуткъуны инкишаф эттирмектен, оларны теджребий дегерликлерге джельп этювден, бедиий сёзге меракъ ве окъувгъа авеслик тербиелевден, эстетик эм де юксек окъув медениетини шекиллендирювден ибареттир. Бу вазифелер эдебият ве ана тили дерслеринде окъув фаалиети девамында семерели усул ве услюплер, тюрлю шекиллер араштырув ёлунен эда этиле. Лякин эрбир земаневий оджа шимдики заманнынъ вазиетини, джемиетнинъ медений севиеси эр джеэттен алчакълашкъаныны, маневий дегерликлерге коре мадий дегерликлернинъ устюнлигини, эксериетинен алчакъ севиеде япылгъан ве бала психологиясына менфий тесир эткен теле – ве видео косьтерювлернинъ куньден-куньге арткъаныны эсапкъа алмакъ керектир.

           Мектеплерде ана тили ве эдебият огретювининъ бу фенлер ве урф-адетлеримиз боюнджа тедбирлер кечирювнинъ макъсады талебелерге сёз санаты вастасынен мейдангъа кетирильген бедиий дегерликлерине меракъ ашламакънен бирге, адалетли, мерхаметли, башкъаларнынъ дерт ве къайгъыларына лякъайд бакъмагъан шахсиетни  тербиелевге догърултылмалы. Оджа балаларны озьлерини ве этрафтаки адамларны динълее бильмеге, кенди ички алемини талиль этебильмеге, эдебий эсерни окъугъанда кендилерини эдебий къараманнынъ еринде коребильмеге огретмек борджлудыр. Оджанынъ итибары мусбет роль ойнамакъ керек. Талебелернинъ бильги джеэтлерини, оларнынъ фикир юрютювини сынъырламакъ ич де мумкюн дегиль. Чюнки, энъ-эвеля: «Бала алемни догърудан-догъру идрак эте ве буюклерден де акъыллыдыр. О, озюне ойле суаллер бере ки, оларнынъ джевабыны тапмакъ ичюн фельсефеджи ве языджылар йылларненбаш ёралар».

          Эр бир талебе озь ихтияджларына,къабилиетлерине, фааллигине, зекясы ве шахсий-психологик хусусиетлерине малик олгъан сербест шахсиеттир ки, онъа семерели инкишафы ичюн уйгъун шараит яратмалы.

          Дерслерде окъув-тербиевий джерьян башта бир талебенинъ окъувгъа ве янъы бильги алувгъа нисбетен авеслигини шекиллендирмек керек. Эгер бильги алув джерьяны талебе ичюн меракълы олса, инанынъыз ки, о, мектепте кечирген эр бир дакъкъанынъ къыйметини билиджек. Окъув онынъ ичюн къуванчкъа чевириледжек.            Иште, бу меселеге керекли эмиет берген оджа талебелер ичюн  даима севимли оджа оладжакъ.

      Талебелернинъ окъув эснасында къазангъан енъишлери, бильги севиелерининъ артувы оларда огренильген фенге нисбетен меракъ ашлавгъа багълыдыр. Балалар энъ-эвеля оларны меракъландыргъан шейни огренмеге тырышалар. Оларнынъ авеслиги огренильген мевзуны даа зияде бильмеге ве диггер фенлерге де меракъ пейда олмасына ярдым эте. Бу вазифелерни эда этмеге интерактив усуллар оджагъа ярдым этелер. Юкъарыда беян этильген эсапкъа аларакъ, бу ишнинъ макъсады янъы усулларнынъ(яни интерактив усул) актуаллигини, талебелерде тиль ве эдебияткъа мерагъыны арттырувда, оларнынъ нуткъуны инкишаф этювде муим бир васта олгъаныны косьтермектир.

                                                            Эмирсалиева С.Э.методист МБУ ДПО «ИМЦ»

Исатова Зарема Сеитяхъяевна

башлангъыч сыныф оджасы

МБОУ «СОШ № 42 им.Э.Шемьи-заде»

1.     Окъув ве тербие джерьянында интерактив окъутув методикасы

1.1.         Интерактив окъутув методикасы

         Окъув ве тербие джерьянына янъы технологияларны актив кирсеткен мектеплернинъ иш теджрибеси, талебелерде озюнинъ фикирини бильдирюв, суаль берюв ве дерснинъ мевзусы боюнджа къонушув буюк меракъ догъургъаныны косьтере. Оджалар дерс вакъытында, дерснинъ эр бир этапында талебелернинъ фикирлерини сорайлар ве оларны суаль бермеге итеклейлер. Талебелерни дерсте фааль иштирак этювге джельп этелер. Бу макъсаднен оджалар интерактив усулларыны кениш къулланалар. Келинъиз, шимди «интерактив окъутув методикасы» (методика интерактивного обучения) деген ибаренинъ анълатмасыны берейик.

         «interact»- инглиз тилинде бири- биринен арекетте олувны, бири биринъе тесир этювни, денъишип тургъан группаларда иштирак этип окъумакъны анълата. Интерактив методикасы аньаневийлекция, анълашув шекилинде кечирильген дерслер методикасындан баягъы фаркъ эте. Бу методиканынъ элементлерини дерске кирсетмек ичюн оджа адет олып къалгъан чокъ усулларны къайтадан бакъып чыкъмагъа меджбур ола. Бир тарафтан, окъутув процессине талебелернинъ озьара сербест къонушувыны кирсетмек къолай корюне. Амма, талебелер арасында урьмет олмаса, бири бирини дикъкъатнен динълеп, башкъасынынъ фикирини ред этмейип музакере этмеге бильмеселер, оджа да дерсте керекли киби реберлик этип оламаса, бу усул чалышмаз. Онынъ ичюн бир чокъ себеплерни козь огюне алып, интерактив уулларны къулланмагъа оджа озю огренип, талебелерни де джиддийликнен бойле иш усулларына алыштырмакъ керек. Талебелерге ишнинъ гъаеси умумий низам-тертипке эсаслангъаныны анълатсакъ, бу илериде олар арасында ачыкъ ве ишанчлы мунасебетлерге алып келе.. Бунынъ нетиджесинде талебелернинъ, эльбетте. активлиги осе.

          Окъутув методикасыны не вакъыт «интерактив» деймиз? Дерсте, окъутув вакъытында, талебелер, оджа ве ификирлерини динълемек, чыкъышларыны музакере этмек, суаль бермек,башкъаларына ярдым косьтермек киби шекиллерде кече ве къоюлгъан проблеманы чезмеге ярдым эте. Мында бир шейни анъламакъ керек, къоюлгъан проблеманынъ чезилюв ёллары, тапылгъан джеваптан да эсас олып къала. Группада талебелернинъ микъдары окъув ве тербиенинъ, къонушувнынъ нетидже ве кейфиетине тесир этмей. «Къонушув» я да группада чалышувнынъ эсас моменти шунда ки, бир проблеманы чезювде талебелер араштырувлар нетиджесинде бильги къазаналар.

         Интерактив окъутув методикасынынъ макъсадларындан бири тек информация берюв-алув дегиль де, талебелерге джевап тапувда мустакъиль иш мелекелерини ашлавдадыр.

Педагогикада окътув усулларынынъ тюрлю классификациялары   бар. Аньаневий оларакъ учь усулны къайд этмек мумкюн :   

Пассив                                                 Актив

Интерактив

          Талебелернинъ иш фааллигини инкишаф этювде оджа оларнынъ алынгъан бильгилерине ве мелекелерине эсаслана. Тешкиль этильген ишлер талебелернинъ бильгилерине ве кучьлерине коре чезиле билир.

1.2.         Интерактив усул насыл макъсаднен къулланыла?

Интерактив усулларны кенъ къуллангъан оджалар къонушув процессинде кечирильген окъутув семерели олгъаныны къайд этелер. Талебелер мунакъаша вакъытында тездже окъуйлар ве алгъан бильгилери чокъча акъылларында къала деп саялар.

        Бу бойле себеплерге коре ола (интерактив усул къуллангъанда):

- талебелер тек бильги алмайып, бир де бир суальге джевап къыдыргъан ёлларыны анълап, не ичюн бу чезювни чокъ вариантлар ичинден сайлагъанларыны ве о догъру олгъаныны анълатмагъа меджбур олалар;

- талебелер бир проблеманы чезгенде эр бир фикирни терен музакере ве талиль этелер, чюнки билелер ки, олар догъру сайгъан фикир мантыкъсыз олса, мытлакъа мунакъаша башланаджакъ;

-талебелер бир проблеманы чезгенде кенди ве достларынынъ фикир ве теджрибесинен файдалана. Бойле озьара бильги фонды, эльбетте, айры талебенинъ бильги фондындан къыйметлидир. Оджа да талебелернинъ фикирлерни, нетиджелерини динълеп, озю ичюн бир янъылыкълар ве керекли хуляса чыкъара.

        Чокъусы сыныфларда ойле алгъа расткелемиз: дерс девамында тек къабилиетли талебелер джевап берелер ве бильгилерини косьтерелер. Бильгиси осалджа олгъан, утанчакъ талебелер исе индемей отуралар. Бойле талебеде оджагъа нисбетен ишанч олса, о сыныф огюнде озюни алчатлатмакътан къоркъмайып джевап берер. Бельки оджа интерактив усулыны къулланувнынъ башлангъыч этапында айры талебелернен къонушмайып, оларны аньаневий «Сиз билесизми?» суали ерине «Сиз насыл тюшюнесинъиз?» суальге алыштырмакъ керектир. Эсас акцентни талебелернинъ озьара къонушувына бермек керек.

Талебелер озь фикирлерини сакъламайып, актив бильдирмелери ичюн оджа бойле файдалы усулларны къуллана биле:

1)    Эр вакъыт эр бир талебеге бильдирген фикири ичюн миннетдарлыкъ бильдиринъиз.

2)    Талебенинъ фикири догъру олмагъаны акъкъында айтманъыз, къалгъанлар бу фикирнен разы олгъаны акъкъында соранъыз. Эгер де бутюн сыныф музакере этильген суальни анъламагъан олса, тек о вакъыт озь фикиринъизни бильдирмек ве анълатмакъ мумкюн.

3)    Пассив талебелерни ишке джельп этмеге тырышынъыз, кимерде талебе пассив ола, лякин онынъ пек меракълы, башкъаларынкинден фаркълы фикирлери ола биле. Бойле вакъытта къалгъан талебелер музакере этильген меселеге башкъаджа бакъалар.

Демек, интерактив усулларнынъ кениш къулланувланувынынъ эсас макъсадларындан бири талебелерни дерсте фааль иштирак этювге джельп этювдир. Талебелерде озюнинъ фикирини бильдирюв, суаль берюв ве дерснинъ мевзусы боюнджа къонушув балаларнынъ мерагъыны догъура. Интерактив усуллар дерсте олгъан мунасебетни денъиштире, окъувнынъ муим нетиджелерини чыкъарувда ярдым эте. Эльбетте, интерактив усулларны къуллангъанда биз огюмизге эсас макъсадлардан бирини къоямыз: талебе олдыкъча чокъ информация къабул этип алгъан бильгилери акъылында къалсын. Араштырмалар шуны косьтерелер ки, бала

                Окъугъанда – 10 %.

                Эшиткенде –  20%

                  Корьгенде -    30%

информацияны къабул эте экен. Амма бала корьсе,окъуса, эшитсе веозю де актив чалышса 80% информация къабул этиле. Интерактив усуллар да, иште дерсте бу макъсадкъа иришмеге ярдым эте.

1.3.         Группада чалышувнынъ аньаневий дерстен фаркъы

      Интерактив усулларнен яни группаларда чалышув, аньаневий эВ ишини сорав, янъы мевзуны анълатув, пекитюв шекиллеринде кечирильген дерслерден баягъы фаркъы бар.

Биринджиден, талебелер бойле дерсте фааль иштирак этелер. Оджа озь ишини япкъан вакътында олар сусып отурмайып, вазифе узеринде чалышалар.

     Экинджиден, талебелер дерсте озь аркъадашларынен берабер къонушалар. Группа азасы оларакъ башкъаларнынъ фикирлерини ве чыкъышларыны музакере этелер. Талебелер мевзуны анъламакъ ичюн бири-бирини динълемек кереклер. Олар бири-бирине суаль берип (Не ичюн ойле тюшюнесинъ?) фикир чешитлерини нумайыш этелер. Керек олгъанда ярдым истеп башкъаларына ярдым косьтермеге огренелер.

    Учюнджиден, чокъ талебелер группаларда чалышув техникасындан файда тапалар:

1)    Къабилиетли талебелер сыныф дикъкъатыны джельп этмей озь бильгилерини косьтерелер. Кимер талебелер «оджанынъ севимли талебеси» деген лагъап къачынаракъ, эксерий алларда озь бильгилерини косьтермеге сакъыналар. Группада чалышув исе проблеманы тюбю-тамырындан чезе. Къабилиетли талебелер группада озюни оджа еринде сезе ве достлары ондан чокъ шейлерни сорап биле, о исе анълатмагъа тырышы.

Тешкерювлернинъ тасдыкълагъанына коре, башкъаларны огреткенде озюмиз огренемиз

                     Лекция                               5%

                     Окъув                                10%

                     Фильм –ТВ                        20%

                     Роллерни иджра этюв      30%

                     Группа мунакъаша           40%

                     Мешгъулиет                      50%

                    Дигерлерни окъутув           60%

2)    Балалар группаларда озьлерини сербест ис этелер. Базан чезильмеси кучь олгъан меселени къабилиетсиз сайылгъан талебе де чезе биле. Эгер бойле талебе группа онынъ фикиринен разы олгъаныны сезсе, о кендини акъыллы дуя.

3)    Утанчакъ талебе де группаларда чалышувдан озю ичюн файда эльде эте. Бойле чалышув балаларда озюне эминлик догъура. Утанчакъ талебе бутюн сыныф дегиль де, 3-4 адамлыкъ группада озюни баягъы сербест ис эте. О озюни шу группанынъ бир къысмы

4)    Группада чалышувнынъ файдасы зиядедир. Амма  оджанынъ бу ишни догъру алып барувына багълы, нетиджелери семерели олмасы ичюн беджерильген вазифелерни бакъайыкъ:

- окъув программасы оджа тарафындан тавсилятлы бакъылып чыкъа;

- мевзу сечиле ве бу мевзу бутюн материаллар козьден кечириле;

-бу мевзу боюнджа талебелернинъ фикир юрютювини рагъбетлендирген бир къач суаль азырлана;

- талебелер гркппаларнен чалышкъан вакъытта оджа сыныф арасында юрип, эр кесни козете, вазифени анълата, керек олгъанда ярдым эте, ве талебелернинъ эписи ишнен мешгъуль олгъаныны бакъа.

      Демек, группада чалышувнынъаньаневий дерстен эсас фаркъы шундаки, бойле интерактив усуллар къулланып кечирильген дерс вакъытында оджа талебени тюшюнмеге джельп эте, озь фикирлерини бильдирмеге, музакере этмеге чагъыра. Талебенинъ бойле шараитлерде къазангъан бильгилери акъылына синъе ве пекине.

2.     Окъутув-тербиелев джерьянында интерактив усулларнынъ къулланылувы.

2.1.         Группада чалышувгъа азырланув

    Интерактив усул дегенде биз дерсте талебелернинъ группаларда чалышувыны тешкиль этилюви деп анълаймыз.

   Группада чалышувгъа оджа озю де азырлана ве талебелерни де азырлай. Башта оджа дерснинъ планы устюнде тюшюне, талебелерни насыл группаларгъа боледжегини ве талебелер группада чалышувгъа азыр олгъан севиесини бельгилей. Бу вазифелерни чезген сонъ, оджа талебелер насыл бильги аладжакъларыны къарарлаштыра, бу ишни япмакъ ичюн не къадар вакъыт кереклигини тюшюне, озь ишини планлаштыра. Ишни планлаштыргъанда неге дикъкъат этмек керек?

1)Вакъыт

Мешгъулиет группада насыл япаджагъымызны бельгилеймиз. Вазифени бутюн сыныфкъа анълатып башламакъ мумкюн, сонъ группаларда чалышув ве бутюн сыныфнен нетидже чыкъарув. Демек, дерсте вакъытны бойле больмек мумкюн.

2) Ери

Группада чалышув сыныф одасыны тешкилятландырувыны талап эте, чюнки талебелер насыл ишнен мешгъуль олгъанларына бакъып, сыныфта юреджеклер, бири-бирини корьмек ве эшитмек кереклер, материал таркъатыладжакъ, оджагъа да эр бир группа янына бармагъа имкян олмакъ керек.

3)Материаллар

Группада чалышув вакъытында талебелерде чешит къулланмаларнен файдаланмагъа имкян олса, вазифемеракълыджа олур. Талебелерге къошумча къулланмалар тапып бермек имкянынен файдаланмакъ керек.

4)Язма конструкциялар

Группа иштиракчилери вазифени яхшы анъламалары ве догъру беджермелери ичюн бойле талапларгъа риает этмек керек:

- вазифени эр бир талебе ичюн анълайышлы тильде язмакъ;

- вазифе бир къач экземпляр олмакъ мумкюн;

- вазифе ачыкъ-айдын ве тавсилятлы олмакъ керек;

- бекленильген нетиджеге ёл косьтермек керек;

5)Группада чалышувны билюв

Талебелер бир шейни яхшы анъламакъ борджлулар, вазифе не къадар агъыр олса, о къадар бу иш бераберликте япылмакъ керек. Бераберликте чалышкъанда талебелер бойле вазифелерни бильмек кереклер:

- эр бир талебе аркъадашыны динълей;

- эр бир талебе группа ишинде иштирак эте;

- ярдым керек олгъанда, ярдым истемек керек;

- сенден ярдым истеселер, бу ярдымны косьтермек керек;

- эр кимсе озь ролюни (етекчи, марузаджы, протоколджы, нетидже чыкъаргъан талеб ве иляхре) япмакъ керек;

Бойлеликнен группаларда чалышувгъа джиддий азырлыкъ корюльсе, оджа талебелерни группаларгъаибольгенде оларнынъ кучьлю ве зайыф тарафларыны козьде тутса, бекленильген нетиджеге иришмек мумкюн.

2.2.         Интерактив усулларнынъ чешитлери

   Эр бир окъутув методикаларда олгъаны киби, интерактив окъутув методикасында пек чокъ усуллар къулланылмакъта: кичик группаларда ишлев, «микрофон» усулы, мий уджюми, дебатлар, «Ассоциация»чалысы, «Сенкан», «Вена» диаграммасы, «Куб» усулы.Буусуллар группаларда озьара къонушувны тешкилятландырмакъта ярдым этелер. Рус тили усулий къулланмаларда бу усуллар бойле классификация этильген:

Сходства/различия

Ранжирование

Рейтинг

Классификация

Обобщение

Верно/неверно

Правильно или требует изменений

Преимущества и недостатки

Выявление последствий

Как вы думаете?

Исследование и отчёт

Ролевая игра

Мозговой штурм

Дискуссия.

      Бундан да гъайры даа чокъ интерактив усул оладжакъ чешит вазифелер бар. Эр шей оджанынъ иджадына баглы. Бойле усулларны ана тили ве эдебият дерслеринде, тедбирлер, атта ана-бабалар ве талебелернен бераберликте кечирильген топлашувларда кенъ къулланмакъ керек. Бойле иш чешитлери талебелерни котерильген меселелерни коллективнен чалышмагъа огреете. Интерактив усуллардан бир къачыны мундериджеси ве къулланылувыны талиль этмек мумкюн.

«Мий уджумы»

  «Мий уджумы» -усулы янъы чезимлерни тапмагъа ярдым эткен фердий фикир юрютюв къабилиетлер вастасынен иджадий фикир этюв усулыдыр.

   Бу усулны бундан он йыллар эвельси Баттер,Бартон, Дастин ве Осборн ширкетинде чалышкъан Алекс Ф. Осборн рекламаны чыкъарув вакъытында ильки кере къуллангъан эди. Бу усул бир къач адаманынъ фикир юрютюв къабилиетлеринден файдаланып, белли бир проблемагъа бераберликте «уджюм этмекни» козьде тута. Сонъки вакъытта бу усул кениш сильтем алып башлады.

   «Мий уджюми» нинъ усулиети адийдир. Башта адамлар топланалар, проблеманен танышалар, сонъра олардан эр бири бу проблеманы чезюв вариантыны айты. Айтылгъан фикирлерге изаат берильмей. Эр кес озь гъаелерни сербест айтабиле. Эгер бутюн делиллер бакъылгъан сонъ проблеманынъ чезювинде 5-6 ёлу бельгиленсе, уджюм мувафакъиетли кечти, демек мумкюн.

«Мий уджуми» усулы:

1.Мешгъулеттен эвель ребер мевзуны ве иштиракчилернинъ эркяныны сечип ала.

2.Ребер группагъа «Мий уджюми»нинъ эмиетини ве ашагъыдаки къаиделерни анълата:

-макъсад-микъдары, яни гъаелерине къадар чокъ олса, о къадар яхшыдыр;

- хаялларынъызны чалыштырынъыз, эр бир фикир файдалы ола биле;

- башкъаларнынъ фикирлерини эшиттинъизми, шу ерде оларгъа къыймет кесмеге ашыкъма – эр шейнинъ озь вакъыты – сааты бар.

3.Ребер гъаеллерни язып аладжакъ кятипни тайинлей ве «уджюм»башлангъаны акъкъында сигнал бере. Иджадий фикир юрютюв вакътында ребер эр кеске айны бир дикъкъат айыра, бирев тешеббюсни бутюнлей озь къолуна алмасына ёл бермей. «Уджюм» фикирлер ве гъаелер битмегендже девам эте.

4.Бираздан сонъ иштиракчилер иджадий фикир юрютювден тенъкъидий фикир юрютювге кечелер. Гъаелер джедвелини машинкада джыйып эр бир иштиракчининъ къолуна бермек мумкюн. Бундан сонъра гъаелер группалаштырыла ве эр бирини айрыджа къыймет кесиле. Проблеманы чезмек ичюн энъ эльверишли гъае сечип алына.

5.Эгер де «Мий уджюми» нетиджесинде проблеманы чезмек ичюн бир де бир келишикли гъае тапылмаса, иштиракчилер бунынъ себеплерини береберликте къыдыралар.

«6х6х6» усулы

Бу усул ярдымынен 36 иштиракчи белли муддет девамында бир де бир меселени музакере эте ве бу муддет ичинде олдукъча чокъ иштиракчилернинъ фикирлеринен таныш ола биле.

  6 группанынъ (эр бир группа 6 шахыс) иштиракъчилери ребернинъ вазифеси оларакъ берген меселесини 6 дакъкъа ичинде музакере этелер. Бундан сонъра ребер шу 6 группанынъ иштиракчилерини денъиштирип, 6 янъы группаны мейдангъа кетире. Янъы группаларда иштиракчилер озь группаларынынъ ишлерине къыймет кеселер ве нетиджелерни музакере этелер.

  Мешгъулиетни 5,6,7 я да 8 адамдан ибарет олгъан группада кечирмек мумкюн. Группалар бир проблемни я да айны бир проблемнинъ чешит тарафларыны музакере этелер. Ребер озюни фааль алып бармакъ ве группаларны догъру пай этебильмек керек.

Мешгъулиетни насыл кечирмек керек:

1.Башта ребер 6 маса ве оларнынъ янында алтышар курьсю къоя. Масалар А, Б, В, Г, Д, Е киби арифлернен бельгиленелер. Талебелерге А1, А2, А3, А4, А5, А6, Б1, Б2…….Е6 киби ишаретлернен къайд этильген кягъытчыкълар даркъатыла. Башта талебелер озь масаларыны арифлерге коре, мешгъулиетнинъ экинджи басамагъында исе ракъамларгъа коре тапалар.

2.Ребер иштиракчилерни 6 группагъа боле – эр бир группада 6 иштиракчи.

3.Ребер мунакъаша этиледжек мевзуны бельгилей (группалар ичюн вазифелер айны бир я да айны бир мевзунынъ чешит аспектлеринен багълы олмасы да мумкюн); мунакъашагъа вакъыт (6-10 дакъкъа) айыра ве талебелерге иш нетиджелерини музакере этювде эр бириси иштирак этеджеги акъкъында бильдире.

4.Ребер группаларнынъ япкъан ишлерини козете, талебелернинъ суаллерине джевап бермеге тырыша, керек олгъан алда къошма талиматлар да бере.

5.Вакъыт биткен сонъ ребер чешит группалардан талебелерни алып, янъы группаларны мейдангъа кетире. Бундан сонъра ребер талебелерге группанынъ иш нетиджелерини анълатмалары ичюн 6-10 дакъкъа айыра.

    Земаневий дерслернинъ планлаштырувында чешит интерактив услюплеринен къулланмакъ мумкюн. Бу ишлер талебелернинъ фааллештирювинде мустакъиль фикир къабилиетини инкишаф этмесинде ярдым этип, дерслерни меракълы эте.

Интерактив усуллары тек дерслерде дегиль де, дерстен тыш, яни тедбирлерде де къулланмакъ мумкюн.

Ибраимова Эдие Гафаровна

                          къырымтатар тили ве эдедияты оджасы

МБОУ «СОШ № 44 им.Э.Шемьи-заде»

3.Интерактив усулларнынъ ролю

«Дюнья юзюнде эр адамнынъ олгъаны киби,

атта энъ медений сайылгъан халкъларнынъ

билебильмедиги пек чокъ шейлер бардыр.

Лякин озь тилини, озь тарихыны бильмеген

 халкълар артыкъ пек аз къалгъандыр.

Бекир Чобан-заде.

Менимдже бу сёзлер бугуньки кунюмизде озь актуаллигини джоймадылар. Теджрибемиз косьтере ки, ана тилинде лаф этмеген талебелернинъ сайысы пек аз, балаларымыз тасильни рус тилинде алалар, шунынъ ичюн къырымтатар тилини яхшы бильмегенлернинъ сайысы йыл-йылдан арта. Биз, оджалар, бу проблемни, агъыр олса да, чезмек керекмиз.

“Ассоциациялар” чалысы усулы талебелерни мевзу боюнджа алгъан  бильгилерни тешкермеге имкян бере.

                                   Ильхам    

Уйгъунлыкъ                                        Айненни

 Макъам                                                        Мане

Истидат                                                             Чынъ

         Раатлыкъ                                     Давуш

                                       Санат                            

 “Сенкан” усулы буюк колемли малюматтан энъ эсасыны тапып, къыскъартылгъан шекильде такъдим этмек ярдым эте. Дерснинъ нетиджесини чыкъармакъ ичюн къулланыла.

1 сыра    исим

2 сыра    сыфат

3 сыра    2 фииль я да арекетнинъ тарифи

4 сыра    ибаре, мевзугъа озь шахсий мунасебетини косьтермек

5 сыра    исимге синоним

Меселя:

Музыка

Назик ве аджайип санат

Онъы севемиз, динълеймиз, уйдурамыз

Севинъиз музыканы инсанлар.

“Куб” усулы ана тили дерслеринде “куб” усулы янъы лугъат сёзлерни огреткенде къулланмакъ мумкюн. Иш индивидуаль, я да группаларда кечириле.

1.Сёзнинъ изааты  (ВАТАН – МЕН ДОГЪГЪАН ЕРИМ.)

 2.Бу сёзнен джумле тизинъиз

МЕНИМ ВАТАНЫМ ЭНЪ ДЮЛЬБЕРДИР!)

3.Аталар сезлери, фразеологизмлер

(ВАТАН СЕВГИСИ СЕВГИЛЕРНИНЪ ЭНЪ БУЮГИДИР.)           

4. Сёз бирикмелери. ТУВГЪАН  ВАТАНЫМ, СЕВИМЛИ  ВАТАН.

5.Тамырдаш сёзлер.                                                                                

(ВАТАН,ВАТАНЫМ,ВАТАНДЫР,ВАТАНДАШ)

 6. Синонимлер, антонимлер, омонимлер.(СИНОНИМЛЕР: ЮРТ, ДИЯР,  УЛЬКЕ,

МЕМЛЕКЕТ. АНТОНИМЛЕР: ГЪУРБЕТЛИК)

  «Аквариум»усулы.Талебе 5-6 адам олып группаларгъа бирлешелер.Группалардан бири сыныфнынъ ортасында отура, вазифени ала, оны окъуп фикирлеше. Дигер талебелер музакереге киришмейлер, дикъкъатнен динълейлер ве къайдлар этелер. Вазифени беджерген сонъ, группа озь иш ерине кече, сыныф талебелери исе мунакъашанынъ кетишатыны, чыкъышта булунгъанларнынъ делиллеринден фикирлешелер. Ондан сонъ «Аквариумда» ерни дигер группа ала.

«Пресс» усулы.Бу мешгъулиет мунакъаша суалине ифадели, делилли, къыскъа шекильде, айтылгъан фикирнинъ шекиллендирювни инкишаф эте.

«Пресс» усулы дёрт этаптан ибарет:

—  Озь нокътаи назарны бильдирюв. ( «Мен беллейим…»)

—  Озь фикирни делиллерге эсасланып айтмакъ. ( «…чюнки…»)

—  Озь нокътаи назарны девам  эттирмек ичюн  мисаллер ве делиллер («…меселя…»)

Умумийлештирюв, нетиджелер. («Демек…»)

    «Карусель»усулы талебелер эки тёгерекке бет-бетке отуралар. Бир къач вакъыт ичинде,  эр бир чифт малюматнен фикирлеринен денъише; ондан сонъ тышкъы тёгерекнинъ талебелери дигер талебеге таба чекилелер. (4-юнджи схема). Бу иш рале башында да кечириле биле.(5-инджи схема)

Даа да, талебелерге, эвельден, мевзу боюнджа суаллерни азырлап тёгерек бою сорав кечирмекни теклиф этмек мумкюн.

Эр бир усул, талебелернинъ бильги алып, нуткъуны инкишаф эте, догъру фикир юрьсетмеге огрете.

Демек, интерактив окъутув усуллар талебелернинъ:

—  коммуникатив алышкъанлыкъларны шекиллендирмек;

—  мустакъиллик ве фааллигини  инкишаф этмек;

—  озь инкишафы устюнде чалышмакъ;

—  такъдимнамелер боюнджа беджерикликлерни  инкишаф этмек;

—  интерактив беджерикликлерни шекиллендирип, къаршылыкълы тесир ве къарарларны къабул этип эффектив мусааде этмек;

—  аналитик ве эксперт беджерикликлерни ве алышкъанлыкъларны шекиллендирмек  имкян берелер.

Земаневий дерслернинъ планлаштырувында чешит интерактив услюплеринен къулланмакъ мумкюн. Бу ишлер талебелернинъ фааллештирювде мустакъиль фикир къабилиетини инкишаф этмесинде ярдым этип, дерслерни меракълы эте.

     Тек яхшы ве аля нетиджелерге етмек ичюн дегиль де, озь фенимизге меракъны сакълап къалмакъ ичюн, дерслеримизде актив ве интерактив иш  шекиллерини къулланмагъа тырышмакъ керекмиз. Олар оджа тарафындан азыр бильгилерни бермек, талебелер тарафындан акъылда тутып, айтмакъ ичюн ёнетильмегенлер, огренюв процессинде мустакъиль бильги ве алышкъанлыкъларгъа ёнельгендир.

Исмаилова Селиме Маремовна

къырымтатар тили ве эдедияты оджасы

МБОУ «СОШ № 23»

4.Талебелернинъ фикир юрютюв фаалиетининъ инкишафында интерактив усулларыны къулланувы.

Земанивий мектепнинъ ёнелиши тасиль джерьяныны инсаниетликке догъурылтмакътыр. Баланынъ шахсиети тюрлю тарафтан инкишаф этювинде онынъ окъув арекетлери уйгъун олмалы. Онынъ черчивесинде бильгининъ темели, беджерюви ве алышкъанлыгъы талебелернинъ иджадий фааллигинен, пей инкишафынен, мустакъиль оларакъ меселени чезюв беджерювинен багълыдыр.

Янъы джемиетке меселени чезген, озь ёлуны сайлагъан инсанлар кереклер. Онынъ ичюн окъув джерьянынынъ меркезинде талебенинъ шахсиети ве онынъ мерагъы тура.

Оджа огюнде бильгили, мустакъиль, мувафакъиетли инсанны шекиллендирюв меселеси кенъ тура. Бу меселелер талебелернинъ иш фааллигини инкишаф этюв ёлунен чезиле. Иш фааллиги шахсиетнинъ бильги ве мелекелерини инкишаф этмеге ярдым бере. Иш фааллиги - бу тешебюслик, сабырлыкъ,  ачыкълыкъ,  алышкъанлыкъ,  иджадийлик, озюни ифаде этмеге бильмек, лидерлик, юксек бильгиликтир.

Педагогикада эсас педагогик джерьянынынъ къануны яратылгъан: талебенинъ мотивацион мейданы не къадар юксек олса, онынъ фааллиги ве мустакъиллиги о къадар юксек олур.

Яни, педагогик усулы – талебенинъ фикир этювине ёнельген. Ёлунынъ башында – оджанынъ фааллиги, сонъунда исе, нетидже оларакъ,  талебенинъ фааллигидир.

Талебелернинъ фикир этювфаалиетининъ инкишафына ёнельген бир сыра усулларыны къулланмакъ мумкюн:

-       меселени къоюв усулы;

-       тедкъикъ усулы;

-       араштырма усулы.

Бойлеликнен, араштырма усулы дерслерде меселе яратылмасы козьде тутула ве оны коллектив иле музакире этиле ве чезмек ичюн чарелер къыдырыла.

Меселя, 10 сыныфнынъ эдебият дерсинде Асан Сабри Айвазовнынъ “Аннеджигим, нердесинъ? Кель” эсеринде талебелернинъ огюнде “Шадиечикнинъ омюри денъише билир эдими?” деп къоюла.

Меселе бельгиленген. Такъымлар ичинде музакере этмеге вакъыт берем. Оларнынъ фикирлери язылгъан сонъ музакерелер кечириле ве энъ догъру сойлары сайланыла эм инша язмакъ ичюн къулланыла.

Тедкъикъ усулы : талебелер меселени чезмек ичюн озь бильгилерге эсасланып мустакъиль оларакъ арекетнинъ вастасыны тапалар.

Айны шу эсерде Шадиечикнинъ омюри не ичюн келеджексиздир меселе къоюла. Такъымлар ичинде тедкъикъатлар кечириле ве нетидже оларакъ мердивен джедвели толдурыла.

         пич бала

          бала эвинде        

                чамашырджынынъ элинде

                                        джемаат къабул этмей

                  эвсиз,къорантасыз,

                            пайнозю      

                             мезарлыкъта озюне ер тапа

Талебелер бойле нетиджеге келелер:

Шадие анасыны къыдыра ве тирилер арасында тапалмайып эбедий юкъугъа дала, бельки де, озь анасыны олюлер арасында тапар. Шадиечикнинъ омюри келеджексиз, чюнки о замандаки джемиет бойле пич бала къабул этмей эди.

Меселени къоюв усулы исе оджа талебенинъ огюнде чезмеге къыйын олгъан меселе къоя.

Нюмюне оларакъ, 7 сыныфта шахыс замирлерини огренгенде оларны келишлернен тюрлемеге вазифе берем. Бойлеликнен, оларнынъ арасында Догърултув келишинде  кимиси “манъа”, “санъа”, “онъа” деп язар, кимиси исе “магъа”,  “ сагъа”, “огъа” деп язар. Яни, замирлернинъ ялгъамаларынен багълы де меселе чыкъа.

«Учь джумле» оюны.

Мен къыскъа метинни окъуйым я да карточкаларда язылгъан шекильде даркъатам. Талебелер дикъкъатнен динълейлер ве метиннинъ мундереджесини учь джумледе айтмагъа тырышалар. Энъ къыскъа ве мундереджели джумлелер гъалебе къазаналар.

Бу усул энъ эсасларны къайд этмек, план тизмек, конспект, реферат язмакъ ичюн  инкишаф этмеге ярдым эте.

Бойле оюнларыны чокъ тюшюнип тапмакъ мумкюн: булмачалар, «Эдебий къараманнен интервью», «Адларнынъ аукционы», «Анъламны, вакъианы ве къараманны тюшюнип тап».

1. Бильгилерини актуаллештирюв къысымында шекиллернинъ ве усулларнынъ мукеммеллештирюви.

Бу дерснинъ къысымы энъ эмиетли, чюнки янъы бильгилерини алмакъ ичюн талебелернинъ джиддий азарлыгъы керек. Бу азырлыкълар ойле олмалы ки, алынгъан бильгилер янъы бильгилерине темель олмалыдыр.

“Бельгилев  джедвели”                

  Дерсте алынгъан бильгилерге бойсунып, мустакиль оларакъ дерсликте олгъан малюмат окъула ве шу арада къуршун къалеминен бойле ишарет бельгилене:

билем  +

бильмейим –

бильмеге истейим?

Базыда бойле джедвель толдурыла:

билем  +	бильмейим –	бильмеге истейим?
1 2 3	4 5 6	не ичюн?

Бойле иш бильгилерини актуаллештирюв  вакътында аналитик, мантыкъий ургъу ве нутугъынынъ инкишафына тесир эте.

2. Рефлексия къысымында ишлернинъ усулы.

Бу къысымда талебелер алынгъан бильгилерине эсасланалар. Олар огренген мундериджесини озь теджрибенен янъы бильгилерни пекителер.

Ассоциатив чалышмасы усулыны талебелер мустакъиль шекильде озь бильгилерини  ве фикирлерини ифаде этмек ичюн къулланыла.  Меселя, тиль  дерсинде сёз берем:

                  севги                   юрек                       таш юрек,

             йымшакъ юрек                                      инсаннынъ  мучеси

                                 къальп         исим, не?, предмет 

Талебелернинъ нутукъларыны  инкишаф этмек ичюн даа бойле вазифе бериле:

Исимге сыфат айтынъыз:

Алма – тёгерек, къырмызы, экши, къышлыкъ;

Антер –узун, мор тюсте, нагъышлы, енгиль, байрамлыкъ;

Отьмек – къыйметли, тазе, беяз, акъшамки, сыджакъ.

Ашыкъ Умернинъ яратыджылыгъыны огренгенде талебелерге “ашыкъ” сёзи насыл фикирлерини догъура, деп суаль бериле.

АшыкъУмер                                                           Асретлик

            Севги                                                          Ыстырап

“Юзюм салкъымы”

Бойле усул ассоциатив чалышмасында бельгилене.

1.     Меркез сёз я да ибаре къягъытнынъ ортада языла.

2.     Бельгиленген мевзунен багълы сёзнинъ я да ибаренинъ черчивесинде кене  

        сёз я да ибаре языла.

3.     Язылгъан сонъ анъламларнынъ арасында багъ тапыла.

 

“Диаграмма Вена”

Эки балабан тёгерек эсасында тизиле. Олар бири- бирисининъ устюне ойле къоюла ки, ортада умумий бошлукъ ола. Меселя, Шамиль Алядиннинъ “Чауш огълу” эсеринде “Узюльген йипнинъ багъланувы” парчасында Мустафа Чауш озь огълуны беклей, онынъ ерине исе торуны келе ве оларда узюльген багъ кене багълана.

 

Янъы джемиетке меселени чезген, озь ёлуны сайлагъан инсанлар кереклер. Онынъ ичюн окъув джерьянынынъ меркезинде талебенинъ шахсиети ве онынъ мерагъы тура.

        Оджа огюнде бильгили, мустакъиль, мувафакъиетли инсанны шекиллендирюв меселеси кенъ тура. Бу меселелер талебелернинъ иш фааллигини инкишаф этюв ёлунен чезиле. Иш фааллиги шахсиетнинъ бильги ве мелекелерини инкишаф этмеге ярдым бере. Иш фааллиги - бу тешебюслик, сабырлыкъ,  ачыкълыкъ,  алышкъанлыкъ,  иджадийлик, озюни ифаде этмеге бильмек, лидерлик, юксек бильгиликтир.

Хуляса

Земаневий усулиет къырымтатар тили ве эдебияты оджаларынынъ огюне янъы-янъы талаплар къоя. Инновацион технологияларына эсасланып ана тили ве эдебияты дерслерини ойле къурмакъ керек ки, талебелер тувгъан тильдеки сёзлерни нуткъий фаалиетининъ эр чешитине (айтув, окъув, язув) сербест къуллана бильмелери лязим.

   Интерактив окъутув технологиясы айры дерснинъ, мешгъулиетнинъ я да тедбирнинъ технологик хасиетнамеси ола биле. Интерактив режимде бир серия я да эписи дерслерни, семинар, тедбирлер кечирмек мумкюн. Интерактив усулларнен окъув-тербие джерьянында файдаланув оджада даима иджат, озь устюнде ишлевни талап эте.Оджанынъ зенааты боюнджа къабилиетли инкишаф эте. Бир де бир интерактив усулнен танышар экен, оджа бу усулнынъ педагогик имкянларыны бельгилей, талебелернинъ къабилиет ве имкянларына ве озюнинъ де индивидуаллигине келиштире.

   Интерактив усулларны дерс вакътында, бала ве ана-бабаларнен бераберликте кечирильген тедбирлерде къулланылувы талебелерни эр тарафлама тербиелемекте, бильги алувда оджагъа буюк ярдым эте. Мектеп теджрибесинде бир кере олса да, янъы усулларны къулланып, дерс кечирген оджа онынъ тесирини дуя ве бойле усуллардан файдаланмагъа арекет эте.

Земаневий усуллардан етерли дереджеде файдаланмакъ буюк ве месулиетли иштир. Шунынъ ичюн бойле системада чалышмагъа истеген, къоюлгъан макъсадына толусынен иришмек ичюн бу иш оджалардан базы къаиделер ве табиат чизгилерини эльде этмекни талап эте.

Оджа

·        Интерактив усулларнынъ семерели, тесирли педагогик васта олгъаныны бильсе

·        Окъутув джерьянында интерактив окъутув технологиясы окъуткъанны

да, окъугъанны да инкишаф этмесининъ керекли шартлардан олгъаныны анъласа,

Интерактив окъутув усулиетини огренир ве даима ишине кирсетмеге тырышыр.

   Дерснинъ меракълы олмасы ичюн къарарлаштырылгъан янъы усуллар, адий, стандарт дерслернинъ макъсат вазифелерини девам этерек, талебелерни фааль арекетке, бильгиге меракънен, мустакъиль янашувгъа, аятта озь ёлуны догъру тапувгъа, догъру къыймет кесювге, бир сёзнен, заман талапларына джевап берген инсан земаневий шахыс олып етишмесине ярдым эте.

   Бу иште ачыкълагъан бойле эмиетли, муреккеп, керекли ярдымджы васталардан бири олгъан интерактив усуллардан догъру, кереги къадар файдалана бильсек, месулиетли ишимизнинъ нетиджеси эпимизни къувандыраджакъ, талебелеримизнинъ бильги севиесини даа да артаджагъына ишанч догъура.

 

 

 

Эдебият

1.Кашлев С.С. Технология интерактивного обучения.-Мн.: Белорусский верасень, 2005.-176с.

2.Хуторский А.В. Практикум по дидактике и современным методам обучения.- СПб.: Питер, 2004.-541с.

3.Бутц М., Фальтус Р., Коэн Е. Группаларда чалышув. Сайлама макъалелер. – М.: Фонд образования для Демократии, - 1994.- 17с.

4. Акимова С.М. “Эдебият дерслерине усулий тевсиелер”- Симферополь:    Къырым девлет окъув пед.нешир, - 2005г.-76с.