Презентация на тему "Багшанарай уг залгамжалал"

Шойдокова Бальжина,

Буряад Уласай үндэһэтэнэй лицей-интернадай 4-дэхи ангиин һурагша, хүтэлбэрилэгшэ-Лубсанова Цыбигма Владимировна

Багшанарай уг залгамжалал

Эхэ гээшэ наран мэтэ,

Багша гээшэ бурхан мэтэ.

Эхын энхэрэл дундаршагүй,

Багшын һургаал дууһашагүй.

 Багша… Энэ үгэ хадаа хүн бүхэнэй хуби заяанда тон дүтэ үгэ. Багшын лэ ашаар эрдэмтэй, hургаалтай болонобди, хүмүүжэнэбди.

Багшын ажал буянтай, хүндэтэй, харюусалгатай, эхин ангиин багшанарай үүргэ тон ехэ.                Заха холын Захааминай Ёнгорбой нютагта минии төөбии- Марина Раднаева түрэһэн юм.

                        33 жэлдэ хүдэлжэ, багашуулые табадахи класс хүрэтэр хүтэлһэн юм.  Тэдэ үхибүүд  соонь элдэб мэргэжэлтэд олон даа.  Тэдэнэрэйнгээ һайн хүдэлжэ ябахада, “минии үхибүүд” гэжэ омогорхожо ябадаг. Хүдэлжэ ябахын хажуугаар элдэб конкурс-мүрысөөнүүдтэ хабаададаг, Дангинашье, Хатаншье, Эрхим багшашье болоһон, бүлөөрөө хабаадажа, “Гран-при” абаһаншье.   

            һургуулидаа фольклорно группа бии болгожо, ударидажа ябаһан байна. Буряад зонойнгоо заншалта хубсаһа оёдог, урданай дуунуудые аха захатанһаа бэшэжэ абадаг, һонирходог юм.  Өөрөөшье урданай дуунуудые дуулажа, мүрысөөнүүдтэ хабаададаг.    

            Энхэргэн эжы найман үхибүүдтээ эрдэм ном олгожо, ажабайдалай үргэн харгыда гарганхай. Угаа залгуулха 22 аша зээнэрынь өөдөө боложол ябанад. Аймагайнгаа “Эхын алдар”гэһэн хүндэлэлэй номдо 2014  ондо оруулагдаһан юм.

            Дүй дүршэл ехэтэй багша хадаа олон шагналнуудта хүртэнхэй: “Жэлэй эрхим багша”-1995 ондо,  “Жэлэй гэр бүлэ”-1994 ондо болоһон. 1988 ондо “РСФСР”-эй арадай гэгээрэлэй отличник гэһэн нэрэ зэргэдэ хүртөө.

            Сэсэн ухаатай, сэбэр шарайтай, наһанайнгаа амаралтада гарабашье, эдэбхи эрмэлзэл ехэтэй зандаа.

            Багшын ажалай эхи табиһан,1-дэхи үеын багша, хайрата эжынгээ наһан соогоо хэһэн ажалынь үргэржэлүүлхэ, үргэдхэхэ, баяжуулха үхибүүдынь, аша зээнэрынь олон даа. 

            Ехэ бэринь, Баярма Владимировна, биологи, химиин  багша. 2006 ондо Буряад Уласай Засаг түрын хүндэлэлэй тэмдэгтэ хүртөө, 2009 ондо багшанарай эрхим түлөөлэгшэдэй тоодо ороо. 2010 ондо багшанарай мүрысөөндэ хабаадажа, Орос Уласай хүндэтэ хүдэлмэрилэгшэ гэжэ нэрэ  зэргэтэй болоо юм.

            Соёлма Владимировна басаганиинь эхин һургуулиин багшаар ажалаа үргэлжэлүүлһээр. Соёлма Владимировна 2008 ондо багшанарай мүрысөөндэ хабаадажа, “Учитель-новатор” гэһэн номинацида хүртөө. Арадай хуралай, эрдэм ухаанай яаманай хүндэлэлэй тэмдэгүүдтэй.

            Чингис Сергеевич хүрьгэниинь тамирай багшаар хүдэлнэ, һурагшадынь мүрысөөнүүдтэ эрхимээр хабаадалсадаг. Чингис ажалайнгаа хажуугаар һур харбалгын мүрысөөнүүдтэ ябалсажа, түрүү һууринуудые эзэлдэг, 2019 ондо Ёрдын нааданда Абарга илагша боложо ерээ. Энэ жэл Уласай найр нааданда баһал илагша боложо тодороо.

Чингис хүбүүниинь 1996 онһоо 2014 он болотор түрэл һургуулидаа һур харбалгын, теннисэй һоригшоор, гар урлалай багшаар хүдэлөө һэн. Дарима бэринь 2008 онһоо хүүгэдэй сэсэрлигтэ хүмүүжүүлэгшээр хүдэлнэ.

Намсалма- эхин ангиин, географиин,
 буряад хэлэнэй багша  . 2008 ондо “Творческие успехи” гэһэн номинацида багшанарай мүрысөөндэ гараһан бэлэй.

Цыбигма - буряад хэлэ болон уран зохёолой багша. 2007 ондо анха түрүүшынхиеэ багшанарай мүрысөөндэ хабаадажа, “Традиции  и новаторство в образовании” гэһэн номинацида гараа.  2017 оной “Эрхим багша” болоо, “Серебрянный морин хуур” гэжэ уласхоорондын мүрысөөндэ хабаадажа, лауреат болоһон юм.

Эрдэм һургуулида гар бүмбэгын һорилго хэгшэ.  Наташа бэринь- англи хэлэнэй багша,  һургуулиин захиралай орлогшо.

Одхон Саян хүбүүниинь 2 жэл соо гар бүмбэгэ нааданай тренерээр хүдэлөөдшье үзөө, мүнөө түмэршэ дархан

3-дахи үеын уг залгамжалха 1-дэхи аша хүбүүн Эрдэни багшанарай һургуули дүүргээд, “Океан”, “Артек” лагерьнуудта вожата. Мүнөө дээрээ байһан 22 аша зээнэр соогоо үшөө багшын мэргэжэл шэлэхэ зон олдохол бэзэ гэжэ найданаб.

Дээрэ хэлэгдэһэн багшанарай ажалай дүн согсолоо һаа, хамтадаа 209 жэл болоно.

            Яажа төөбиимни-Марина Дымбрыловна, багшанарай ажалай эхи татагша бүхы юумэндэ хабаадажа үрдинэ гээшэб гэжэ гайхахаш. Энэньшье гайхалгүй. Юундэб гэхэдэ, төөбиимни бэлиг шадабаринь дундаршагүй. Энэмнай ёһотойл Гуа сэсэн хатан гээшэ. Угайнгаа заншалнуудые наринаар сахиһаар, гал гуламтадаа зон нүхэдөө урижа хүндэлһөөр, үшөөл урагшаа дабшаһаар. Үшөө үндэр дабаануудые дабажа, жэлэй дүрбэн сагта жэгдэ хүнгэн гэшхэлжэ, элдин һайхан дэлхэйдэ энэл зандаа сэсэглэжэ, маанадайнгаа хоорондо одон мэтэ яларжа, үшөөл олон жэлнүүдтэ үреэлэй һайханиие үреэжэ, нютагаа суурхуулжа, бэе тамиртнай хатуужажа, үнэр баян, золтой, жаргалтай һуугыт даа гэжэ үреэнэбди. Талаан бэлигтэй, ажалша бэрхэ багшын хэшээлнууд мартагдашагуйл…

Багшынгаа ехэхэн оролдолгые

Багашуул хэзээдэш hажаадаг,

Нангин үйлэ хэрэгыень

Нааршаажал хододоо дууряадаг.